Leeta la mbala ɔtɔi

1. Etena kakɔna kayotatɛ okahanyelo w’akatshi wa leeta l’oya lo losanganya la rɛjɔ?

¹ Tɔshi dia wɛ ekɔ lo nɔngɔsɔlɛ ase nkumbo ndo angɛnyi ayɛ dambo dia laande diakɔlɔmba dia nkamba olimu ndo nshisha falanga efula, ondo wɛ ayowaelɛ la waasaso tshɛ dia vɔ ndjɔlɛ. Woho akɔ waamɛ mbele, elimu efula wekɔ lo salema dia nɔngɔsɔla dambo dia lo nyuma diayosalema lo losanganya la rɛjɔ layaye. Mingu shato la ntondo ka losanganya laso rɛjɔ ntatɛ, tayonga la diɛsɛ dia laande dia mbelɛ anto akina oya lo losanganya lakɔ. Kakɔna kayotokimanyiya dia nkahanya akatshi wa leeta la waasaso tshɛ?

2. Kakɔna kayototshutshuya dia ndjasha tshɛ lo tshɛ l’okahanyelo ɔsɔ?

² Tayotshutshuyama dia ndjasha tshɛ l’okahanyelo ɔsɔ naka sho nkana yimba la lowando tshɛ lo wahɔ wakondjaso oma lo dambo dia lo nyuma diatosalɛ Jehowa lo nsanganya yaso ya weke. (Is. 65:13, 14) Tatohɛke nto dia okahanyelo w’akatshi wasalema ɔnɔnyi tshɛ mongaka l’etombelo w’amɛna. (Enda kiombo yele l’ɔtɛ a dui ɔnɛ: “Okahanyelo w’akatshi wa leeta mongaka l’etombelo w’amɛna.”) Anto amɔtshi wayotelɛ wayoya dia ndjɔtɔ lo losanganya la rɛjɔ kaamɛ la so, koko akina hawotoya. Oyadi lofulo lakɔna l’anto layoya lo losanganya lɔsɔ, welo wa l’otema ɔtɔi wayotodja lo nshi y’okahanyelo w’akatshi wayotombola Jehowa ndo wayɛnya lokaho lande.—Osam. 145:3, 7; Ɛny. 22:17.

3. Ngande wayokahanyema akatshi wa leeta?

³ Elui wa dikumanyi tshɛ pombaka nshikikɛ woho wakoka ase etshumanelo nkahanya akatshi wa leeta l’ahole tshɛ, mbidja ndo anto wahawatotana lawakawɔ kana woho wa mbakahanya lo esambishelo ka lo sɛkɛ l’ɛtshi kawɔ ka nkɛtɛ. Etena kakahanyaso akatshi wa leeta lo wikɛndɛ, sho kokaka nkaha ndo periodikɛ naka kokaka. L’ɔkɔngɔ wa sho nshidiya okahanyelo w’akatshi wa leeta, tayonga l’ɔngɛnɔngɛnɔ dia mbeya ɔnɛ takasha lonya l’osalosalo tshɛ l’olimu akɔ ndo takelɛ anto efula oya lo dambo dia lo nyuma diakatosalɛ Jehowa.

Okahanyelo w’akatshi wa leeta mongaka l’etombelo w’amɛna

L’ɔkɔngɔ w’ɛnɔnyi efula kadiyɛso kɛmɔtshi kakayashaka lo kapanyɛ k’okahanyelo w’akatshi wa leeta, akayoyambolaka dia kana welo tshɛ wakandadje wakɔtɔ l’ashi. Nde akayambolaka ɔnɛ: ‘Onde mɛtɛ anto wayetawɔ dia ndja ndo ndjɔtɔ laso lo losanganya la rɛjɔ lɔnɛ?’ La pindju ka Lushi la samalo la losanganya la rɛjɔ, nde akɛnyi ɔlɔngɔlɔngɔ ɔmɔtshi lakawelɛka Sikh mbidjasɛ nsuke la nde, oma laasɔ nde akɔshi yɛdikɔ ya ndjaeyanya le nde. Akɛnamaka dia ɔlɔngɔlɔngɔ ɔsɔ akaye lo losanganya nɛ dia nde akalongola dikatshi dimɔtshi dia leeta. Nde akonge la wambola efula waki kadiyɛso l’akoka wa mbokadimola. Nde akate woho wakandandola ekongelo ka losanganya ndo akambiyama oma lo ɛnamelo ndo lɔkɛwɔ laki l’anto akina waki lo losanganya. L’ekomelo ka lushi lakɔ laamɛ, kadiyɛso akayotatɛ nsawola la atshukanyi amɔtshi wakadjasɛ nsuke la nde. Vɔ lawɔ nto wakalongola dikatshi dia leeta ndo wakaye lo losanganya lo bisi. Atshukanyi asɔ wakangɛnangɛna losanganya lɔsɔ ndo wakɔshi yɛdikɔ ya nyomoya Lushi la lomingu. Kadiyɛso akayɛnaka ohomba waya lo ndjasha lo okahanyelo w’akatshi wa leeta wendana la nsanganya yaso ya weke ya l’ɔnɔnyi.
Lo losanganya la rɛjɔ l’etshi, atshukanyi amɔtshi wakakambaka olimu w’ombatshi mboka wa tshanda mbala la mbala, wakayaeyanya le wadi l’omi amɔtshi waya esombe. Atshukanyi w’esombe asɔ wakawatɛ dia ɔnɛ mbele mbala kawɔ ka ntondo ka vɔ ndja lo losanganya. Atshukanyi w’ambatshi mboka wakawambola ɔnɛ: “Onto akɔna akanyelɛ lo losanganya lɔnɛ?” Vɔ wakaakadimola vate: “Etena kakatakalola lushi lɔmɔtshi la ngelo, takatane dikatshi dia leeta l’ɛse ka lokuke la so la luudu.” Vɔ wakadia dikatshi dia leeta ndo wakalodia adrɛsɛ waki l’edia ka dikatshi. Anto akina waki lo losanganya wakale kaamɛ la atshukanyi asɔ yangɔ ya ndɛ ya la midi. Vɔ wakangɛnangɛna ekongelo ka losanganya k’otondo ndo wakɔshi yɛdikɔ ya nyomoya lushi layela. Oma laasɔ, wakɔshi yɛdikɔ ya ntshɔ towaenda ndo tolomialomia nsaki kawɔ.