Esambishelo ka laande koonga l’etombelo w’amɛna
Mingu shato la ntondo ka Losanganya la distrikɛ ntatɛ, tshumanelo tshɛ diayokahɛ anto wa l’ɛtshi kawɔ ka nkɛtɛ wɛnya nsaki akatshi wa leeta dia vɔ ndja oya lo losanganya lɔsɔ. Ɔsɔ mbele oyango w’esambishelo ka laande k’ɔnɔnyi ɔnɛ. Anto efula wetawɔ akatshi aso wa leeta ndo waya lo losanganya mambiyamaka efula dia mboka asawo w’oma l’Afundelo washama, woho wokongɛmi adepartɛma w’anto wakayakimɔ la lolango dimɛna, waonga w’amɛna ndo kaamɛ kele l’atei aso. (Osam. 110:3; 133:1; Is. 65:13, 14) Aha laasɔ ato, onde esambishelo kaso ka laande mongaka nto l’etombelo w’amɛna kaanga l’ahole wanda wanɛ wɛnya nsaki nkɛndɔ y’etale dia tɔtɔ lo losanganya?
L’ɔkɔngɔ wa Losanganya la distrikɛ l’ɔnɔnyi wa 2011, Bɛtɛlɛ kɛmɔtshi k’Ɛmɛnyi wa Jehowa akalongola mukanda wakafunde womoto ɔmɔtshi lakatane dikatshi dia leeta lo lokuke lande. Nde akayashɛka etena tshɛ kakayaka Ɛmɛnyi wa Jehowa lakande dia ndjoosambisha. Nde akafunde ate: “Laki la luudu la dimɛna efula, omi l’oshika, ndo lakafɔnyaka nte laki la ɛngɔ tshɛ kakakokaka mbishami ɔngɛnɔngɛnɔ. Lonyangu ko dimi komonga l’ɔngɛnɔngɛnɔ akɔ, ndo lɔsɛnɔ lami komonga l’oyango w’oshika. Diakɔ diakamɔshi yɛdikɔ ya munda lɔkɛndɔ la kilɔmɛtrɛ 320 dia toyela ekongelo ka Losanganya la distrikɛ ka Lushi la samalo.” Nde akangɛnangɛna losanganya lɔsɔ woho w’anyanya ndo akatelefɔnɛ omende dia nde ayolala lekɔ l’oyango wa nde ndjela ndo ekongelo ka Lushi la lomingu. Nde mbutaka ate: “Lakayele asawo tshɛ dimɛna, lakasawola l’Ɛmɛnyi wa Jehowa efula, ndo lakakombolaka diaha losanganya lakɔ nshila.” L’ɔkɔngɔ wa nde nkalola la ngelo, womoto ɔsɔ akatotatɛka mbeka Bible l’Ɛmɛnyi wa Jehowa ndo l’ɔkɔngɔ wa ngɔndɔ nyɛi tsho, nde akakome opandjudi wahatabatizama. Nde mbutaka ate: “Lekɔ l’ɔngɛnɔngɛnɔ heyama lo woho wakamatane dikatshi dia leeta sɔ lo lokuke lami, nɛ dia lɔsɛnɔ lami laya l’oyango w’oshika kakianɛ.”
Anto efula wayolongola akatshi wa leeta wayoya lo losanganya lɔsɔ. Ɔnkɔnɛ, katonge l’ohetoheto dia nkaha akatshi wa leeta asɔ. Ndo nto, katotshɔke l’akatshi tshɛ wa leeta wayotshikala lo dihole diayosalema losanganya l’oyango wa tosambisha lo tshakitudi.
[Kiombo ya lo lɛkɛ 5]
Woho wa mbisha anto akatshi wa leeta
Dia nkindjakindja ɛtshi kaso ka nkɛtɛ dimɛna, sho pombaka ntɛkɛta lo tshena pe. Ɛnyɛlɔ, sho kokaka mbutɛ onto ɔnɛ: “Akemwe! Tekɔ lo ndjakahɛ anto tshɛ wa l’etshi kaso ka nkɛtɛ akatshi wa leeta dia vɔ ndjɔtɔ laso lo Losanganya la distrikɛ. Dikatshi diayɛ diɔ nɛ. Wɛ ayotana akambo efula lɔkɔ.” Sho pombaka monga l’ɔngɛnɔngɛnɔ etena katatakahe akatshi wa leeta. Etena kayotokahaka akatshi wa leeta asɔ lo wikɛndɛ, sho pombaka nto nkaha ndo periodikɛ naka kokaka.