Onde sho mbishaka ɛnyɛlɔ lo mbɔsa asekaso ambetawudi la nɛmɔ?

‘Lo dikambo dia ngandji k’onto l’ɔnango, nyonge la lolango l’efula lam’asanyu. Lo kɛnɛ kendana la mbɔsana la nɛmɔ, nyosha ɛnyɛlɔ.’—ROMO 12:10.

1, 2. a) Dako diakɔna diakasha Paulo lo mukanda wakandafundɛ ase Rɔma? b) Ambola akɔna wayangaso nsɛdingola?

LO MUKANDA wakandafundɛ ase Rɔma, Paulo akake epole ɔsɛkɛ l’ohomba wa sho Akristo mbokana ngandji l’atei w’etshumanelo. Nde akatohola diaha sho monga la ngandji ka ‘dungi pende.’ Nde akatɛkɛta nto dia ‘ngandji k’onto l’ɔnango’ ndo akate dia Akristo pombaka mɛnyana woho wa ngandji ka ngasɔ la ‘lolango l’efula.’—Romo 12:9, 10a.

² Lo mɛtɛ, onto lele la ngandji k’onto l’ɔnango hakomɛ tsho lo monga la wangasanu otsha le anto akina, koko nde pombaka kiɛnya oma l’etsha. Ngasɔ mbediɔ, nɛ dia ndoko onto layeya dia sho mbokanaka ngandji naka hatokiɛnyisha lo yoho mɔtshi. Diakɔ diele, Paulo akakotsha dako diayela nɛ ɔnɛ: ‘Lo kɛnɛ kendana la mbɔsana la nɛmɔ, nyosha ɛnyɛlɔ.’ (Romo 12:10b) Mbɔsa anto akina la nɛmɔ kɛdikɛdi na? Lande na kahombaso mbisha ɛnyɛlɔ lo mbɔsa asekaso ambetawudi la nɛmɔ? Ngande wakokaso nsala dikambo sɔ?

Otshikitanu wele lam’asa dilɛmiɛlɔ la nɛmɔ

3. Kitshimudi yakɔna yele la tshɛkɛta “nɛmɔ” lo Hɛbɛru la Grɛkɛ?

³ Tshɛkɛta ya lo Hɛbɛru yakadimɔma ɔnɛ “nɛmɔ” l’Ɔtɛtɛla kokaka kadimwama nto tshɛkɛta lo tshɛkɛta ɔnɛ “wotsho.” Onto lɔsama la nɛmɔ mbɔsamaka la wotsho kana oko onto l’ohomba efula. Tshɛkɛta yakɔ yâmɛ ya lo Hɛbɛru kadimɔmaka mbala efula nto l’Afundelo ɔnɛ “lutumbu.” Ndo nto, lotombo lɔsɔ mɛnyaka nɛmɔ di’efula diashawɔ onto lɔsawɔ la kɛnɛmɔ. (Etat. 45:13) Tshɛkɛta ya lo Grɛkɛ yokadimɔmi ɔnɛ “nɛmɔ” lo Bible mbelaka kanyi ya mbɔsa di’onto ɔmɔtshi ekɔ ohomba efula, la wotsho w’efula ndo l’oshinga wolo. (Luka 14:10) Eelo, anto wɔsaso la nɛmɔ wekɔ anto wɔsaso la wotsho w’efula.

4, 5. Diɔtɔnganelo diakɔna diele lam’asa mbɔsa anto akina la nɛmɔ la mbalɛmiya? Lembetshiya.

⁴ Mbɔsa anto akina la nɛmɔ kɛdikɛdi na? Dui sɔ nembetshiyaka mbâlɛmiya. Lo mɛtɛ, Bible kambaka mbala efula la tɔtɛkɛta “nɛmɔ” la “dilɛmiɛlɔ” nɛ dia tɔ fɔnaka. Nɛmɔ ekɔ ɔkɛnɛmwɛlɔ wa dilɛmiɛlɔ. L’ɛtɛkɛta ekina, dilɛmiɛlɔ mendanaka ntondotondo la woho wɔsaso anangɛso l’akadiyɛso, etena kele nɛmɔ mendanaka la woho wâsalɛso akambo.

⁵ Ngande wakoka Okristo mɛnya dia nde mbɔsaka asekande ambetawudi la nɛmɔ di’efula naka nde hâlɛmiya l’otema ɔtɔi? (3 Joa. 9, 10) Oko watofukaka osongo ndo ntshikala edja naka edio awɔ mpikama wolo lo nkɛtɛ ya dimɛna, mbele nɛmɔ kokaka monga dia shikaa ndo ntshikala edja naka diɔ mpikama wolo lo dilɛmiɛlɔ di’oma k’ɛse otema. Lam’ele nɛmɔ dia lâdiko di’ɛlɔmɔ hadioye oma lo dilɛmiɛlɔ dia mɛtɛ, diɔ diayoshishɔ l’edjedja ka wonya. Ɔnkɔnɛ, kema dui dia diambo dia Paulo ndaka Akristo wa la Rɔma dia vɔ ‘mbokana ngandji ka mɛtɛ’ la ntondo ka nde ndjalɔmba dia vɔ mbɔsana la nɛmɔ.—Romo 12:9; adia 1 Petero 1:22.

Tɔlɛmiya wanɛ wakatongama ‘l’efanelo ka Nzambi’

6, 7. Lande na kahombaso nɛmiya anto akina?

⁶ Lam’ele nɛmiya anto akina l’otema ɔtɔi nɔmbaka ntondotondo dia sho mbaɔsa la nɛmɔ, hatohombe mbohɛ pondjo ɛkɔkɔ wa l’Afundelo watotshutshuya dia sho nɛmiya anangɛso l’akadiyɛso tshɛ. Ɔnkɔnɛ, nyɛsɔ tɔsɛdingole ɛkɔkɔ ehende l’atei w’ɛkɔkɔ ɛsɔ.

⁷ Otshikitanyi la ditongami dikina diele la nkɛtɛ, paka anto ato mbakatongama ‘l’efanelo ka Nzambi.’ (Jak. 3:9) Ɔnkɔnɛ, tekɔ la waonga waki Nzambi wele oko ngandji, lomba ndo losembwe. Tolembete nto woshasha okina wakatosha Otungi aso. Omembi w’esambo akate ate: “[Jehowa] Khum’esu li, . . . lutumbu laye lambumbela ladiku di’ulungu! . . . We akûtungi [onto] lasuki la mbedima la [Nzambi], akûlimbe lufule la lutumbu ndu la [“nɛmɔ,” K.J.].” (Osam. 8:1, 4, 5; 104:1)a Nzambi akalɛngɛ anto lo tshɛ kawɔ la yema ya kɛnɛmɔ, lotombo ndo nɛmɔ. Ɔnkɔnɛ, etena kɔsaso anto akina la nɛmɔ, sho mɛnyaka dia Jehowa mbele Kiɔkɔ ya nɛmɔ diele l’anto. Naka tekɔ l’ɛkɔkɔ wa shikaa wa nɛmiya anto lo tshɛ kawɔ, shi kete sho pombaka ndeka nɛmiya asekaso ambetawudi?—Joa. 3:16; Ngal. 6:10.

Tekɔ ase nkumbo ɔtɔi

8, 9. Ɔkɔkɔ akɔna walɛmiyaso asekaso ambetawudi wakatɛkɛta Paulo?

⁸ Paulo akate ɔkɔkɔ okina wahombaso nɛmiyana lam’asaso. Yema la ntondo ka nde mbisha dako dialɔmba dia sho mbɔsa anto akina la nɛmɔ, nde akate ate: ‘Lo dikambo dia ngandji k’onto l’ɔnango, nyonge la lolango l’efula lam’asanyu.’ Tshɛkɛta ya lo Grɛkɛ yokadimɔmi ɔnɛ “lolango l’efula” nembetshiyaka dimama dia wolo diakakatanya ase nkumbo wokana ngandji ndo wasukanɛ lam’asawɔ. Ɔnkɔnɛ, lo nkamba la tshɛkɛta shɔ, Paulo akɛnyaka dia diɔtɔnganelo diahomba monga lam’asa ase etshumanelo pombaka monga wolo oko nɛ diatongaka lam’asa ase nkumbo. (Romo 12:5) Lâdiko dia lâsɔ, tohɔ dia Paulo akafundɛ Akristo w’akitami ɛtɛkɛta ɛsɔ wanɛ wele vɔ tshɛ wakôtama oko ana wa yanyi oma le Jehowa Shɛwɔ. Ɔnkɔnɛ, vɔ waki ase nkumbo ɔtɔi waki la diɔtɔnganelo dia ma ma. Omalɔkɔ, Akristo w’akitami wa lo nshi ya Paulo waki l’ɔkɔkɔ w’oshika wa nɛmiyana lam’asawɔ. Ngasɔ mbediɔ ndo le Akristo w’akitami wa nshi nyɛ.

⁹ Kayotota dikambo di’Akristo akina wele l’olui wa “ekoko ekina”? (Joa. 10:16) Kânga mbahatawaote Nzambi oko ana wa yanyi, vɔ kokaka mbɔsana oko onto l’ɔnango nɛ dia vɔ wekɔ lo nkenga nkumbo k’Akristo ka l’andja w’otondo kele kâmɛ. (1 Pet. 2:17; 5:9) Ɔnkɔnɛ, naka Akristo wakenga olui w’ɛkɔkɔ ekina nshihodia lande na kelanɛwɔ ɔnɛ onto l’ɔnango, kete vɔ lawɔ wayonga l’ɔkɔkɔ w’oshika wa nɛmiya asekawɔ ambetawudi.—Adia 1 Petero 3:8.

Lande na kele ekɔ ohomba sho mbɔsana la nɛmɔ?

10, 11. Lande na kele ekɔ ohomba dia sho nɛmiya anto akina ndo mbaɔsa la nɛmɔ?

¹⁰ Lande na kele ekɔ ohomba sho nɛmiyana ndo mbɔsana la nɛmɔ? Nɛ dia, lo mbɔsa anangɛso l’akadiyɛso la nɛmɔ, sho mbishaka lonya di’etshumanelo nkɛndakɛnda dimɛna ndo di’anto tshɛ wa lɔkɔ monga kâmɛ.

¹¹ Lo mɛtɛ, sho mbeyaka dia monga la diɔtɔnganelo dia ma ma la Jehowa ndo nkondja osukɔ wa nyuma kande mbatokimanyiya sho Akristo wa mɛtɛ dia monga la wolo. (Osam. 36:7; Joa. 14:26) Ndo nto, etena kɛnya asekaso ambetawudi dia vɔ tɔngɛnangɛnaka, sho keketshamaka. (Tuk. 25:11) Sho mongaka l’ɔngɛnɔngɛnɔ etena katotɛ anto ɛtɛkɛta wa lowando kana katosalɛwɔ akambo amɔtshi wɛnya dia vɔ tɔlɛmiyaka. Dikambo sɔ tokeketshaka dia sho ntetemala nkɛndakɛnda l’ɔngɛnɔngɛnɔ ndo l’eshikikelo lo mboka k’otsha lo lɔsɛnɔ. Aha la tâmu, wɛ amboyaokaka ngasɔ lo lɔsɛnɔ layɛ.

12. Ngande wakoka onto tshɛ la l’atei aso nkimanyiya dia wangasanu ndo ngandji monga l’atei w’etshumanelo?

¹² Lam’ele Jehowa mbeyaka dia sho tshɛ mbotɔka la nsaki ka nɛmiyama, lo tshimbo y’Ɔtɛkɛta ande nde tokeketshaka dia sho ‘nomɔlomɔ dia nɛmiyana.’ (Romo 12:10; adia Mateu 7:12.) Akristo tshɛ wakitanyiya dako diahashile nɛmɔ sɔ kimanyiyaka dia wangasanu ndo ngandji monga lo nkumbo kaso k’Akristo k’onto l’ɔnango. Omalɔkɔ, ayonga dui dia lomba dia sho mbɔsa etena ka ndjambola ɔnɛ: ‘Naa mbala k’ekomelo kakamakomɛ ntɛkɛta ndo salɛ ɔnangɛmi kana kadiyɛmi kɛmɔtshi ka l’etshumanelo akambo la dilɛmiɛlɔ?’—Romo 13:8.

Ɔkɛndɛ w’onto tshɛ

13. a) Waa na wahomba mbisha ɛnyɛlɔ lo mbɔsana la nɛmɔ? b) Kakɔna kɛnya ɛtɛkɛta waki Paulo wele lo Romo 1:7?

¹³ Waa na wahomba mbisha ɛnyɛlɔ lo mbɔsana la nɛmɔ? Lo mukanda wakandafundɛ ase Hɛbɛru, Paulo akate dia dikumanyi di’Akristo wekɔ ‘wanɛ watɔlɔmbɔla.’ (Heb. 13:17) Lo mɛtɛ, dikumanyi tɔlɔmbɔlaka l’akambo efula. Koko, oko wewɔ alami w’ɛkɔkɔ, vɔ pombaka mbisha ɛnyɛlɔ lo nɛmiya asekawɔ ambetawudi, mbidja ndo dikumanyi dia wanyawɔ. Ɛnyɛlɔ, etena katshumana dikumanyi dia nsɛdingola ehomba wa lo nyuma w’etshumanelo, vɔ nɛmiyanaka lo mpokɛ lotui la yambalo tshɛ etena katɛkɛta wanyawɔ dikumanyi. Ndo nto, vɔ nɛmiyanaka lo mbidjaka yimba lo kɛnɛ kata dikumanyi di’asekawɔ etena kɔsawɔ yɛdikɔ mɔtshi. (Etsha 15:6-15) Koko, sho pombaka mbohɔka dia mukanda wakafundɛ Paulo ase Rɔma komendanaka tsho la dikumanyi, koko ndo l’anto akina tshɛ waki l’etshumanelo. (Romo 1:7) Ɔnkɔnɛ, dako dia mbisha ɛnyɛlɔ lo mbɔsana la nɛmɔ mendanaka la so sho tshɛ ɛlɔ kɛnɛ.

14. a) Sha ɛnyɛlɔ kɛnya otshikitanu wele lam’asa mbɔsa anto akina la nɛmɔ la mbisha ɛnyɛlɔ lo mbɔsa anto akina la nɛmɔ. b) Dimbola diakɔna diakokaso ndjaoka?

¹⁴ Tolembete nto dikambo dikina diele lo dako diakasha Paulo. Nde akakeketsha anyande ambetawudi wa la Rɔma diaha vɔ mbɔsana tsho la nɛmɔ, koko dia vɔ mbisha ɛnyɛlɔ lo kɛnɛ kendana la mbɔsana la nɛmɔ. Otshikitanu akɔna wele lam’asa akambo asɔ ahende? Tɔshi ɛnyɛlɔ kɛnɛ: Onde ombetsha ayokeketsha ambeki weya mbadia dia vɔ mbeka woho wa mbadia? Ndoko, nɛ dia vɔ wamboshilaka mbeya mbadia. Koko, ombetsha ayokombola dia mbakimanyiya woho wa vɔ ndeka mbeya mbadia. Woho akɔ wâmɛ mbele, mbokana ngandji lam’asaso totshutshuyaka dia sho mbɔsana la nɛmɔ nɛ dia ngandji mbele djembetelo yokeyamaka Akristo wa mɛtɛ. (Joa. 13:35) Koko, oko wahomba ambeki weya mbadia nsala la wolo dia ndowanya akoka awɔ wa mbeya mbadia dimɛna mbakokaso ndo sho lawɔ nsala la wolo dia mbisha ɛnyɛlɔ lo kɛnɛ kendana la mbɔsana la nɛmɔ. (1 Tes. 4:9, 10) Ɔsɔ ekɔ ɔkɛndɛ wa ɔmɔmɔ la l’atei aso. Sho kokaka ndjambola ɔnɛ: ‘Onde dimi mbishaka ɛnyɛlɔ lo mbɔsa ase etshumanelo akina la nɛmɔ?’

Tɔshi ‘akanga w’okitshakitsha’ la nɛmɔ

15, 16. a) Etena kɔsaso anto akina la nɛmɔ, anto akɔna wahatahombe minya yimba, ndo lande na? b) Kakɔna kakoka mɛnya dia sho nɛmiyaka anangɛso l’akadiyɛso tshɛ oma k’ɛse otema?

¹⁵ Etena kɔsaso anto akina la nɛmɔ, anto akɔna wa l’atei w’etshumanelo wahatahombe minya yimba? Ɔtɛkɛta waki Nzambi mbutaka ɔnɛ: “One latukaka usi wula ketshi, atosondjaka [Jehowa] diango, ndi ako layûfuta uku ololo wakandatshi.” (Tuk. 19:17) Ngande wakoka tɔndɔ diele lo divɛsa sɔ monga la shɛngiya le so etena kasalaso la wolo dia mbisha ɛnyɛlɔ lo mbɔsana la nɛmɔ?

¹⁶ Ondo wɛ mbetawɔka dia ase olimu efula salaka la wolo dia mbɔsa ewandji awɔ la nɛmɔ, koko mbeyaka monga ko ase olimu asɔ hawɔlɛmiya kanga yema anto wɔsawɔ dia wekɔ l’ɛse kawɔ. Koko, Jehowa hasale akambo ngasɔ. Nde mbutaka ate: “Wane watonemiaka, mbayumolemia.” (1 Sam. 2:30; Osam. 113:5-7) Jehowa nɛmiyaka anto tshɛ wôkambɛ ndo wɔlɛmiya. Nde hohɛ ‘akanga w’okitshakitsha.’ (Adia Isaya 57:15; 2 Ek. 16:9) Lo mɛtɛ, sho kombolaka mbokoya Jehowa. Ɔnkɔnɛ, naka sho nangaka mbeya polo lo yɛdikɔ yalɛmiyaso anto akina, kete ayonga dimɛna sho ndjambola ɔnɛ: ‘Ngande wɔsami anto wele bu la dihole dia lâdiko kana wele bu l’ɛkɛndɛ l’atei w’etshumanelo?’ (Joa. 13:14, 15) Okadimwelo wayotosha lo dimbola sɔ ayɛnya polo lo yɛdikɔ yakɔna yalɛmiyaso anto akina oma k’ɛse otema.—Adia Filipi 2:3, 4.

Sho mɛnyaka woho wɔsaso anto la nɛmɔ lo nkamba la wenya aso

17. Naa yoho yoleki woke yakokaso mbisha ɛnyɛlɔ lo mbɔsa anto akina la nɛmɔ, ndo lande na kahombaso nsala dikambo sɔ?

¹⁷ Naa yoho yoleki dimɛna yakokaso mbisha ɛnyɛlɔ lo mbɔsa ase etshumanelo tshɛ la nɛmɔ? Ele lo nkamba la wenya aso dikambo di’anto akina. Lande na kediɔ ngasɔ? Nɛ dia oko weso Akristo, tekɔ l’akambo efula wa nsala lo lɔsɛnɔ ndo sho pombaka mbɔsa wenya efula dia nsala awui wele la so l’etshumanelo. Diakɔ diahatakɛnya la wenya aso. Mbokɛmaka hwe dia hatohombe nɔmba anangɛso l’akadiyɛso dia vɔ nkamba la wenya awɔ lo yoho yamboleka lo dikambo diaso. Woho akɔ wâmɛ mbele, sho ngɛnangɛnaka efula etena kashihodia anto akina wa l’etshumanelo dia hawohombe todjangɛ dia sho nkamba la wenya aso efula lo wahɔ awɔ etena kewɔ l’ohomba aso.

18. Oko wadiɛnya osato wa lo lɛkɛ 18, ngande wakokaso mɛnya dia sho mbetawɔka nkamba la wenya aso lo wahɔ w’asekaso ambetawudi?

¹⁸ Koko, sho mbeyaka nto (djekoleko wanɛ wakamba oko alami l’etshumanelo) dia woho wetawɔso dia memadia elimu aso l’oyango wa nkamba la wenya aso ɛmɔtshi lo wahɔ w’asekaso ambetawudi mɛnyaka dia sho mbalɛmiyaka. Lo woho akɔna? Nɛ dia lo memadia elimu aso dia nkamba la wenya aso ɛmɔtshi lo wahɔ w’anangɛso l’akadiyɛso, ekɔ oko tekɔ lo mbatɛ ɔnɛ: ‘Nyekɔ la nɛmɔ di’efula lo washo ami. Diakɔ diamomolanga mbetsha wenya ami ɛmɔtshi kâmɛ la nyu lo dihole dia dimi ntetemala nsala kɛnɛ kakamasalaki.’ (Mako 6:30-34) Lo yoho yotshikitanyi, naka tekɔ lo mengenga dia memadia elimu aso l’oyango wa nkamba la wenya aso ɛmɔtshi lo wahɔ w’ɔnangɛso kana kadiyɛso kɛmɔtshi, kete sho mbeyaka ndjôkonya dia nde mbɔsa oko nde bu la nɛmɔ efula lo washo aso. Lo mɛtɛ, ekɔ tena dimɔtshi diahatakoke memadia kɛnɛ kasalaso. Koko, woho wemadiaso elimu aso l’oyango wa nkamba la wenya aso dia wahɔ w’anto akina mɛnyaka akambo efula lo kɛnɛ kendana la woke woke wa dilɛmiɛlɔ diele la so otsha le anangɛso l’akadiyɛso.—1 Kor. 10:24.

Toyashikikɛ dia mbishaka ɛnyɛlɔ

19. Lâdiko dia nkamba la wenya aso dia wahɔ w’anto akina, naa toho tokina takokaso mɛnya asekaso ambetawudi dia sho mbaɔsaka la nɛmɔ?

¹⁹ Ekɔ toho tokina t’ohomba takokaso mɛnya dia sho mbɔsaka asekaso ambetawudi la nɛmɔ. Ɛnyɛlɔ, etena kakambaso la wenya aso dia wahɔ awɔ, sho pombaka mbahokamɛka. Lo dikambo sɔ nto, Jehowa toshaka ɛnyɛlɔ. Omembi w’esambo Davidi akate ate: “Ashu wa [Jehowa] weko le antu w’ololo, la atui andi weko hwe lu alelu awo.” (Osam. 34:15) Sho salaka la wolo dia mbokoya Jehowa lo mendaka ndo lo mpokamɛka anangɛso l’akadiyɛso la yambalo tshɛ, djekoleko wanɛ wayanga ekimanyielo oma le so. Lo nsala ngasɔ, sho mɛnyaka dia sho mbaɔsaka la nɛmɔ.

20. Waohwelo akɔna wendana la mbɔsaka anto akina la nɛmɔ wahombaso mbohɔka?

²⁰ Oko wambotodisɛdingola, sho kombolaka mbohɔka lande na kahombaso mbɔsaka asekaso ambetawudi la nɛmɔ. Ndo nto, sho nyangaka waaso wa sho mbisha ɛnyɛlɔ lo mbisha anto tshɛ nɛmɔ, mbidja ndo akanga w’okitshakitsha. Lo nsala akambo asɔ, tayokeketsha dimama dia ngandji ndo kâmɛ k’onto l’ɔnango l’atei w’etshumanelo. Omalɔkɔ, nyɛsɔ totetemale mbisha ɛnyɛlɔ lo mbɔsa anto akina la nɛmɔ lo dihole dia mbaɔsaka la nɛmɔ dia lâdiko di’ɛlɔmɔ. Onde wɛ amboyashikikɛ dia nsala dikambo sɔ?

[Nɔtɛ ka l’ɛse ka dikatshi]

Onde wɛ mbohɔka?

• Diɔtɔnganelo diakɔna diele lam’asa nɛmɔ la dilɛmiɛlɔ?

• Ɛkɔkɔ akɔna watotshutshuya dia mbɔsa asekaso ambetawudi la nɛmɔ?

• Lande na kele ekɔ ohomba sho mbɔsanaka la nɛmɔ?

• Lo toho takɔna takokaso mɛnya dia sho mbɔsaka asekaso ambetawudi la nɛmɔ?

[Osato wa lo lɛkɛ 18]

Ngande wakokaso mɛnya dia sho mbɔsaka asekaso ambetawudi la nɛmɔ?