Tokimanyiya akɛnda dia vɔ mbeya okongamelo wa Jehowa

ANA kombolaka mbeka. Ohokanyiya ambola wakakoke ana waki ase Isariyɛlɛ mumbola l’otsho wa difɛstɔ di’Elekanelo dia ntondo diakawasale. Vɔ wakakoke mumbola ɔnɛ: ‘Lande na kahomba ɔn’ɔkɔkɔ mvɔ?’ ‘Lande na kakita papa dikila l’eshingito wa lokuke?’ ‘Otsha lende atatatshu?’ Kɛnɛ kɛnya dia Jehowa akangɛnangɛnaka ambola wa ngasɔ mɛnamaka oma lo kɛnɛ kakandadjangɛ ambutshi w’apami w’ase Isariyɛlɛ. Jehowa akawatɛ lo dikambo dia difɛstɔ di’Elekanelo diakawahombe ndjosala lo nshi y’otsha la ntondo ɔnɛ: “Lam’ayunyumbula an’anyu vati: Okoko wana watunyutshaka etshelu kene? Ku nyu mbakaluya diui nyati: Ulambu w’elekanelu ka [Jehowa], lakalekana mvudu y’asi Isariyele lu Edjibitu one. Lam’akandadiaki asi Edjibitu, ndi akashimbela khumbu yasu.” (Etum. 12:24-27) L’ɔkɔngɔ diko, Jehowa akohola ambutshi w’ase Isariyɛlɛ dia vɔ kadimolaka ambola w’anawɔ wendana la ‘ɛlɛmbɛ la dombwelo’ diakandawadjangɛ.—Euh. 6:20-25.

Mbokɛmaka hwe dia Jehowa akakombolaka di’ana nkondja ekadimwelo wa ambola awɔ wendana la ɔtɛmwɛlɔ wa mɛtɛ nɛ dia ekadimwelo ɛsɔ wayowakimanyiya dia vɔ mboka Jehowa ngandji oko wende Nzambi ndo Oshimbedi awɔ. Ɛlɔ kɛnɛ, Jehowa kombolɛka akɛnda woho akɔ wâmɛ. Yoho mɔtshi yakoka ambutshi nkimanyiya anawɔ dia vɔ mboka Nzambi ndo ekambi ande ngandji k’oma k’ɛse otema ele lo mbakimanyiya dia vɔ mbeya okongamelo wa Jehowa ndo nshihodia woho wakokawɔ nkondja wahɔ oma lo kɛnɛ katosalɛ okongamelo. Ɔnkɔnɛ, nyɛsɔ tende toho tɔmɔtshi takokaso nkimanyiya akɛnda dia vɔ ndeka mbeka awui wendana la okongamelo wa Jehowa.

Etshumanelo kanyu

Akɛnda wekɔ l’ohomba wa mbeya woho wakɛndakɛnda etshumanelo kɔtɔ ase nkumbo kawɔ. Dia nkotsha dikambo sɔ, oko wenyu ambutshi nyotshɔke l’ananyu otsha lo nsanganya tshɛ y’Akristo. Naka nyu nsala ngasɔ, kete nyayokoya ɛnyɛlɔ kakasha Jehowa ase Isariyɛlɛ etena kakandawatɛ ɔnɛ: “Kanyusanganya antu, apami, amantu, ana wa tshitshe, . . . dia vo mbuka la mbeka lama mbuka [Jehowa, Nzambi k]anyu, woma, la dia nama ololo dia ntsha aui tshe w’elembe ene. Ku an’awo wahatalimbitela, wayuka ndu wayeka lama mbuka [Jehowa, Nzambi k]anyu, woma.”—Euh. 31:12, 13, sho mbɛnganyisha alɛta ango.

Oma ko totshitshɛ tawɔ, ana kokaka ntatɛ mbeka akambo wele lo Ɔtɛkɛta waki Jehowa. Ɔpɔstɔlɔ Paulo akate lo dikambo dia Timɔtɛ ate: “Umaka dikenda, we akeyi afundelu w’ekila.” (2 Tim. 3:15) Lo nsanganya ya lo Mbalasa ya Diolelo, oyadi kânga akɛnda kokaka ntatɛ nshihodia wetshelo washama ndo mbeya memba esambo wa Diolelo dimɛna. Lɛkɔ, vɔ mbekaka dia nkamba ndo nɛmiya Bible kâmɛ l’ekanda walembetshiya Bible. Lâdiko dia lâsɔ, naka vɔ ntshɔ lo nsanganya yaso, kete wayɛna dia ambeki wa mɛtɛ wa Kristo mbokanaka ngandji k’oshika kele djembetelo yeyamawɔ oma le anto akina. Yeso akate ate: “Olembe w’uyuyu mbamumunyusha, dia nyu mbukana ngandji. Nyukani ngandji uku akamanyuki ngandji. Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joa. 13:34, 35) Ngandji ka la wangasanu ndo wɔladi wa mɛtɛ wɛnama lo Mbalasa ka Diolelo ayɔngɛnyangɛnya ana ndo ayowakimanyiya dia vɔ mbɔtɔka lo nsanganya y’Akristo mbala la mbala lɔsɛnɔ lawɔ l’otondo.

Naka ambutshi monga la mbekelo ka komaka lo Mbalasa ka Diolelo la ntondo ka wonya ndo tshikalaka yema l’ɔkɔngɔ wa nsanganya, kete anawɔ wayokondja waaso wa monga l’angɛnyi. Lo dihole dia nyu ntshika di’ananyu mbekesanɛ paka l’ana akina wele la wɔ lɔlɔnga ɔtɔi, shi nyu kokaka mbaeyanya l’anangɛso ndo l’akadiyɛso wele l’ɛnɔnyi wotshikitanyi? Naka vɔ mbeya esombe, kete ananyu wayoshola diewo di’efula ndo lomba lele l’anto asɔ. Oko waki Zɛkariya ka lo nshi y’edjedja laki ‘ombetsha wakokaka Nzambi ka mɛtɛ wɔma’ la shɛngiya ya dimɛna le ɔlɔngɔlɔngɔ Uziya nkumekanga ka Juda, mbele ndo ɛlɔ kɛnɛ wanɛ wambokambɛ Jehowa la kɔlamelo l’edja k’ɛnɔnyi efula mongaka la shɛngiya ya dimɛna le akɛnda. (2 Ek. 26:1, 4, 5) Etena kenyu lo Mbalasa ka Diolelo, nyu kokaka nto nembetshiya ananyu woho wakambawɔ la lɔkɔtɔ la ekanda, dibaya dia waewoyelo ndo akambo akina.

Okongamelo wa l’andja w’otondo

Ana wekɔ l’ohomba wa nshihodia dia etshumanelo kanyu kekɔ lo mbadiema l’atei wa tshumanelo ndekana 100 000 diakenga okongamelo aso wa l’andja w’otondo. Nyâlembetshiya akambo wendana la okongamelo, woho wakɛndakɛndawɔ ndo woho wakoka ana nsukɛ elimu wakambema lɔkɔ. Nyowaɛnya lande na katonyokongɛka l’asolo walomɔlomɔ nsanganya y’etshimbedi, ya distrikɛ ndo wembwelo w’omendji w’otshimbedi.—Enda kiombo yele l’ɔtɛ a dui ɔnɛ: “Akambo wa nsɛdingola lo Ɔtɛmwɛlɔ wa lo nkumbo,” yele lo lɛkɛ 28.

Naka nyambokondja diaaso, nyele emendji w’etshimbedi, waa misiɔnɛrɛ, ase nkumbo ka Bɛtɛlɛ ndo ekambi wa lo tena tshɛ lakanyu dia nyu ndjosanga la wɔ lonya lo lokenga. Tanyɔfɔnyake dia vɔ kema la etena ka nsawola l’akɛnda. Ekambi wa lo tena tshɛ ɛsɔ salaka la wolo dia mbokoya Yeso lakalongolaka ana w’akɛnda nshi tshɛ ndo lakasawolaka la wɔ. (Mako 10:13-16) Naka ananyu pokamɛka woho wakɔndɔla ekambi waki Jehowa ɛsɔ akambo wakahomana la wɔ ndo mɛna ɔngɛnɔngɛnɔ wele la wɔ l’olimu w’ekila, kete vɔ lawɔ kokaka ndjadjɛ oyango wa nkamba olimu wa lo tena tshɛ.

Kakɔna nto kakokanyu nsala oko nkumbo dia nkimanyiya ananyu dia vɔ mbeya okongamelo wa Jehowa? Awui amɔtshi wakokanyu nsala vɔanɛ: Nyoyadje oyango wa sɛdingolaka dibuku Les Témoins de Jéhovah : Prédicateurs du Royaume de Dieu. Nyoke epole ɔsɛkɛ l’ohetoheto, okitshakitsha ndo kɔlamelo yakɛnɛmɔla ekambi waki Jehowa ɛsɔ. Nyowaɛnya woho wakamba Jehowa la wɔ dia lokumu l’ɔlɔlɔ sambishama lo nkɛtɛ k’otondo. Nyokambe la waa bandɛ vidɛo ndo DVD mɔtshi yakatondja okongamelo waki Jehowa dia nyu mɛnya ananyu wetshelo w’ohomba wakokawɔ nkondja l’akambo wakete lo nshi y’edjedja la wa nshi nyɛ. Naka nyekɔ l’akoka, nyembole Bɛtɛlɛ ka lo wodja anyu kana ya lo wedja ekina. Wembwelo ɔsɔ ayokimanyiya ananyu dia vɔ mbeya woho wakɛndakɛnda etenyi ka la nkɛtɛ k’okongamelo waki Jehowa l’ɛlɔmbwɛlɔ k’ɔhɔmbɔ wa kɔlamelo dia nɔngɔsɔla ndo mbisha mbo ya ndɛ ya lo nyuma ndo nɔmbɔla anangɛso l’akadiyɛso wa l’andja w’otondo oko wakadiasalemaka lo ntambe ka ntondo T.D.—Mat. 24:45-47; Etsha 15:22-31.

Nyɔtɔnganyiya wetshelo la ɛnɔnyi wele la ɔna l’ɔna

Etena ketshanyu ananyu, nyohɔke woho waketshaka Yeso apɔstɔlɔ ande. Lo diaaso dimɔtshi, nde akawatɛ ate: “Dimi la akambu akina efula wa nyutela, keli nyu hanyeyi mbalungula kakiane.” (Joa. 16:12) Yeso kɔpɔpaka ambeki ande akambo wamboleka efula wakiwɔ kokoka nshihodia. Koko, nde akatawaetshaka akambo wa mɛtɛ w’ohomba wakawakoke nshihodia dimɛna yema yema. Woho akɔ wâmɛ mbele, tanyɔpɔpake ananyu akambo wamboleka. Lo mbaetsha akambo wendana la okongamelo wa Jehowa mbala la mbala ndo lo yɛdikɔ yakoka nyayolomialomia nsaki yawɔ ndo vɔ wayɔngɛnangɛnaka mbeka akambo wendana l’etshumanelo k’Akristo. Oko watatshikitana ehomba w’ananyu, nyu kokaka mbaohola ndo mpamia kɛnɛ kambowoshilaka mbeka.

Etshumanelo k’Akristo kekɔ kiɔkɔ y’ekeketshelo ka lo nyuma ndo akɛnda wayasha l’ohetoheto tshɛ dia nkamba elimu wa lɔkɔ nɔngɔswamaka dimɛna dia nshika ekolo la ntondo ka tɔsɛngiya ta l’andja waki Satana. (Romo 12:2) Tekɔ l’eshikikelo dia nyayɔngɛnangɛna efula dia nkimanyiya ananyu dia vɔ mbeya okongamelo wa Jehowa. Tambokombola dia vɔ mamema okongamelo wa Jehowa ndo Nzambi kakambɛso la kɔlamelo tshɛ diɛsɛ oma l’ɛtshɔkɔ ande.

[Kiombo/Osato wa lo lɛkɛ 28]

Akambo wa nsɛdingola lo Ɔtɛmwɛlɔ wa lo nkumbo

Ɔnɛ ekɔ akambo amɔtshi wendana la okongamelo wakokanyu nkamba la wɔ lo Ɔtɛmwɛlɔ wa lo nkumbo wa la dikɔlɔ:

▪ Nyovusole ɔkɔndɔ w’etshumanelo kanyu. Etena kakɔna ndo ngande wakatatatɛ? Mbalasa ya Diolelo yakɔna yakɔtɔ etshumanelo kanyu? Lo kɛnɛ kendana l’ɔkɛtshanyelo wa ngasɔ, shi nyu kokaka mbelɛ onto ɔmɔtshi laya edja l’etshumanelo kanyu dia nde ndjokadimola ambola wayaoka ananyu?

▪ Nyolembetshiya oyango wele la nsanganya ya l’etshumanelo tshɛ ndo nsanganya ya weke ndo woho wakoka ana nkondja wahɔ oma lɔkɔ.

▪ Nyɔsɛdingole oyango wele la kalasa yotshikitanyi yalɔngɔsɔla okongamelo waki Jehowa. Nyote akambo wakete wɛnya etombelo w’amɛna wakonge oma l’olimu wakakambe ambeki wakɔtɔ lo kalasa yakɔ.

▪ Nyokimanyiya akɛnda dia vɔ mɛna ohomba wa sambishaka lokumu l’ɔlɔlɔ ngɔndɔ tshɛ. Nyowaɛnya woho wakokawɔ mbisha lonya lo alapɔlɔ wa l’andja w’otondo watondjama lo dibuku Annuaire des Témoins de Jéhovah.

▪ Nyɔsɛdingole toho totshikitanyi t’olimu wa lo tena tshɛ takoka akɛnda wa l’okongamelo waki Jehowa nkamba. Tshapita 10 ya dibuku Tamboyakongɛ dia sala lolango la Jehowa ekɔ l’awui wakoka nyokimanyiya lo dikambo sɔ.

▪ Nyokimanyiya akɛnda dia vɔ nshihodia woho wasalema akambo amɔtshi l’etshumanelo. Nyâlembetshiya lande na kahawahombe monga la yimba ya dipanda l’okongamelo wa Jehowa kânga l’akambo wa totshitshɛ. Nyowaɛnya woho wakokawɔ mbisha lonya di’ase etshumanelo ndjela ɛlɔmbwɛlɔ ka dikumanyi dimɛna.

[Osato]

Ananyu wayokondja wahɔ naka vɔ mbɔtɔ lɔngɛnyi l’ekambi wa Nzambi wambokamba edja

[Esato wa lo lɛkɛ 26]

Oko wakidiɔ l’Isariyɛlɛ w’edjedja, ɛlɔ kɛnɛ ambutshi salaka la wolo dia mbisha anawɔ ekadimwelo w’eshika etena kawaokawɔ ambola wendana l’okongamelo wa Jehowa