Ambutshi, nyokimanyiya ananyu dia nanga Jehowa

1-2. Lembetshiya woho wakoka atɔndɔ wa lo Bible monga ohomba efula le so etena katshikitana awui aso.

LO LUSHI lawɔ la diwala, pami la wadɛnde l’olangala pokamɛka la yambalo tshɛ sawo dia diwala diohikami lo Bible diashama dikambo diawɔ. Atɔndɔ wasɛdingɔma lo sawo sɔ keema eyoyo le wɔ. Koko ntatɛ oma lo lushi lɔsɔ, awui asɔ wamboleka monga ohomba le wɔ. Lande na? Nɛ dia vɔ wayokamba lawɔ oko atshukanyi.

² Woho akɔ waamɛ mbediɔ etena kakoma atshukanyi w’Akristo ambutshi. L’edja k’ɛnɔnyi efula, mbeyaka monga ko vɔ wambokaka asawo efula wendana la wodielo w’ana. Koko kakianɛ atɔndɔ asɔ wamboleka monga ohomba le wɔ. Vɔ waya l’ɔnawɔ hita lahombawɔ mbodia. Ande ɔkɛndɛ wa woke! Lo mɛtɛ, etena katshikitana akambo lo lɔsɛnɔ laso, atɔndɔ amɔtshi wa lo Bible ndjolekaka monga ohomba le so. Ɔsɔ ekɔ ɔkɔkɔ ɔmɔtshi wɛnya lande na kele atɛmɔdi wa Jehowa mbadiaka Afundelo woho wakalɔmbamaka nkumi ya dikanga ya l’Isariyɛlɛ dia nsala ndo dia nkana yimba lawɔ lo “nshi tshɛ” ya lɔsɛnɔ lawɔ.​—Eoh. 17:19.

3. Kakɔna kayotɔsɛdingola lo sawo nɛ?

³ Ambutshi, nyu nyekɔ la waɛsɛ efula lo woho wenyu Akristo, ɛnyɛlɔ dia mbetsha ananyu awui wendana la Jehowa. Koko nyu nangaka nsala akambo efula, aha mbaetshaka tsho awui wendana la Nzambi. Nyu nangaka nkimanyiya ananyu dia vɔ mbolanga efula. Kakɔna kakokanyu nsala dia monɛ ngandji ka Jehowa le ananyu? Lo sawo nɛ, tayɔsɛdingola atɔndɔ anɛi wa lo Bible wakoka nyokimanyiya oko wenyu ambutshi. (2 Tim. 3:16) Tayɛna nto wahɔ wakakondja ambutshi amɔtshi w’Akristo lo nkamba l’alako wa lo Bible.

ATƆNDƆ ANƐI WAKOKA NKIMANYIYA AMBUTSHI

4. Naa tɔndɔ diakoka nkimanyiya ambutshi dia monɛ ngandji ka Jehowa l’etema w’anawɔ? (Jakɔba 1:5)

⁴ Tɔndɔ dia 1: Nyoyange ɛlɔmbwɛlɔ ka Jehowa. Nyɔlɔmbɛ Jehowa dia nyosha lomba lenyu l’ohomba dia nkimanyiya ananyu dia vɔ mbooka ngandji. (Adia Jakɔba 1:5.) Nde mbele Onto loleki nsungana dia mbisha alako. Ekɔ ɛkɔkɔ efula wɛnya lande na kele dui sɔ diekɔ ngasɔ. Tɔsɛdingole ɛkɔkɔ ehende. Ntondotondo, Jehowa mbele la diewo dioleki tshɛ diendana la monga ombutshi. (Os. 36:9) Ndo ɔkɔkɔ wa hende, alako wa lomba watoshande mongaka nshi tshɛ la wahɔ le so.​—Isa. 48:17.

5. a) Kakɔna katondja okongamelo wa Jehowa dia nkimanyiya ambutshi? b) Oko wɛnyamidiɔ lo vidɛo, wetshelo akɔna wamboyokondja oma lo woho wakodia ɔnangɛso la kadiyɛsɔ Amorim anawɔ?

⁵ Lo tshimbo y’Ɔtɛkɛta ande ndo y’okongamelo ande, Jehowa toshaka mbo ya ndɛ ya lo nyuma efula yohikami lo Bible yakoka nyokimanyiya dia mbodia ananyu dia nanga Jehowa. (Mat. 24:45) Ɛnyɛlɔ, nyu koka ntana alako w’eshika l’ɔnɔngɔ w’asawo wele l’ɔtɛ a dui ɔnɛ: “Ekimanyielo le nkumbo,” wakatondjamaka l’edja k’ɛnɔnyi efula lo Emɔ! ndo kakianɛ waya lo sitɛ kaso k’Ɛtɛrnɛtɛ. Ndo nto, tovidɛo efula tatondjama lo jw.org tekɔ l’ɛkɔnya wakoka nkimanyiya ambutshi dia nkamba l’alako wa Jehowa etena kodiawɔ anawɔ.b​—Tok. 2:4-6.

6. Ngande wakayaoke ombutshi ɔmɔtshi wa pami lo dikambo di’ɛlɔmbwɛlɔ kakandakondja nde la wadɛnde oma l’okongamelo wa Jehowa?

⁶ Ambutshi efula wekɔ la lowando l’ekimanyielo kakawasha Jehowa lo tshimbo y’okongamelo ande. Ombutshi wa pami ɔmɔtshi welɛwɔ Joe mbutaka ate: “Mbodia ana asato l’akambo wa mɛtɛ bu yana ya dikambo. Dimi la wadɛmi nɔmbaka Jehowa mbala tshɛ dia tokimanyiya. Ndo mbala efula takokaka dia sawo kana vidɛo mɔtshi yakaye paka l’etena kahombama dia tokimanyiya l’etena kakiso l’okakatanu ɔmɔtshi. Nyanga ɛlɔmbwɛlɔ ka Jehowa ekɔ yoho yaso ya lɔsɛnɔ.” Joe nde la wadɛnde wakɛnyi di’asawo ndo tovidɛo tɔsɔ kimanyiyaka anawɔ dia ndjasukanya la Jehowa.

7. Lande na kele ekɔ ohomba di’ambutshi salaka la wolo dia mbisha anawɔ ɛnyɛlɔ ka dimɛna? (Rɔmɔ 2:21)

⁷ Tɔndɔ dia 2: Nyetsha oma l’ɛnyɛlɔ. Ana mendaka ambutshi awɔ la yambalo tshɛ ndo mbala efula vɔ mbokoyaka kɛnɛ kɛnawɔ le wɔ. Lo mɛtɛ, ndooko ombutshi wele kokele. (Rɔmɔ 3:23) Kaanga mbediɔ ngasɔ, vɔ salaka la wolo awɔ tshɛ dia mbisha anawɔ ɛnyɛlɔ. (Adia Rɔmɔ 2:21.) Lo ntɛkɛta dikambo di’ana, ombutshi wa pami ɔmɔtshi akate ate: “Vɔ wekɔ oko nanda yakotola oseka ɛngɔ tshɛ.” Nde kotshaka ate: “Vɔ wayototɛ etena kayowɛna dia ɛnyɛlɔ kaso hɔtɔnɛ la kɛnɛ kawaetshaso.” Ɔnkɔnɛ naka sho nangaka di’anaso mboka Jehowa ngandji, kete ngandji kawokaso pombaka monga wolo ndo mɛnama l’etsha aso.

8-9. Wetshelo akɔna wamboyokondja oma lo kɛnɛ kakate Andrew nde la Emma?

⁸ Ekɔ toho efula takoka ambutshi mbetsha anawɔ dia nanga Jehowa. Tende kɛnɛ kakate ɔnangɛso ɔmɔtshi laya l’ɛnɔnyi 17 lelɛwɔ Andrew. Nde mbutaka ate: “Ambutshi ami wakatɛtɛka nshi tshɛ l’ohomba wa dɔmbɛlɔ. L’otsho tshɛ, papa akalɔmbaka kaamɛ lami kaanga naka dimi lakashidi nɔmba. Ambutshi ami wakamboholaka tena tshɛ ɔnɛ: ‘Wɛ kokaka sawolaka la Jehowa mbala efula yalangayɛ.’ Woho wakawatɛtɛka l’ohomba wa dɔmbɛlɔ akonge la shɛngiya y’efula le mi ndo kakianɛ dimi ndjaokaka dimɛna etena kalɔmbami Jehowa ndo dimi mbɔsaka oko Papa ka ngandji.” Ambutshi le, tanyɔnyɔlake pondjo shɛngiya yakoka monga la ngandji kokanyu Jehowa le ananyu.

⁹ Tɔsɛdingole nto ɛnyɛlɔ kaki Emma. Etena kakakalɛ papa kande nkumbo kawɔ, nde akatshike mama kande l’abasa w’efula. Emma mbutaka ate: “Mbala efula mama akadiɛnɛka l’ekakatanu wendana l’ekondjelo, koko tena tshɛ nde akasawolaka laso lo woho wayakiyanya ndo wakotshɛ Jehowa ekambi ande ehomba awɔ. Lakɛnyi oma lo yoho yande ya lɔsɛnɔ dia nde aketawɔka mɛtɛ dui sɔ. Mama akasalaka kɛnɛ kakandasambishaka.” Wetshelo akɔna wakondjaso? Ambutshi koka mbetsha oma l’ɛnyɛlɔ kawɔ kaanga etena kewɔ l’ekakatanu.​—Ngal. 6:9.

10. Naa waaso waki l’ase Isariyɛlɛ efula dia nsawola l’anawɔ? (Eohwelo k’Ɛlɛmbɛ 6:6, 7)

¹⁰ Tɔndɔ dia 3: Nyosawolake l’ananyu mbala la mbala. Jehowa akadjangɛ ase Isariyɛlɛ w’edjedja dia mbetshaka anawɔ akambo wendana la nde mbala la mbala. (Adia Eohwelo k’Ɛlɛmbɛ 6:6, 7.) Ambutshi asɔ waki la waaso efula dia nsawola l’anawɔ ndo monɛ ngandji ka Jehowa l’etema w’anawɔ. Ɛnyɛlɔ, ɔlɔngɔlɔngɔ w’ose Isariyɛlɛ akakokaka mbetsha wenya efula dia nkimanyiya papa kande dia monɛ diononɛ kana dia mina. Kadiyɛnde akakokaka mbetsha wenya efula lo lushi dia nkimanyiya nyango dia ntɛla, dia nsala ahɔndɔ kana dia nsala elimu ekina wa la ngelo. Etena kakakambaka ambutshi l’ana kaamɛ, vɔ wakakokaka nsawola akambo efula w’ohomba. Ɛnyɛlɔ, vɔ wakakokaka nkɛtshanya woho wele Jehowa ɔlɔlɔ ndo nsɛdingola woho wakandakimanyiyaka nkumbo kawɔ.

11. Naa diaaso diele l’ambutshi w’Akristo dia nsawola l’anawɔ?

¹¹ Ɛlɔ kɛnɛ awui wambotshikitana. Lo wedja efula, ambutshi l’ana hawoyokoka mbetsha wenya kaamɛ l’edja ka lushi. Ambutshi mbeyaka monga lo olimu ndo ana mbeyaka monga la kalasa. Etombelo wele la dui sɔ ele, ambutshi pombaka nyanga waaso wakokawɔ nsawola l’anawɔ. (Ɛf. 5:15, 16; Flpɛ. 1:10) Ɔtɛmwɛlɔ wa nkumbo mbishaka diaaso dia ngasɔ. Ɔnangɛso ɔmɔtshi l’ɔlɔngɔlɔngɔ lelɛwɔ Alexander mbutaka ate: “Papa kami ndjakongɛka tena tshɛ dikambo di’ɔtɛmwɛlɔ wa lo nkumbo ndo nde hetawɔ ndooko ɛngɔ toshimba dia sho monga kaamɛ l’etena kɛsɔ. L’ɔkɔngɔ wa wekelo, sho sawolaka yema.”

12. Kakɔna kahomba owandji wa nkumbo mbohɔka etena kasalawɔ ɔtɛmwɛlɔ wa nkumbo?

¹² Naka wɛ ekɔ owandji wa nkumbo, akokayɛ nsala di’ɔtɛmwɛlɔ wa nkumbo monga etena k’ɔngɛnɔngɛnɔ le ananyu? Shi nyu koka mbeka kaamɛ l’ananyu dibuku diaso di’oyoyo dia dimɛna efula diele l’ɔtɛ a dui ɔnɛ Ngɛnangɛnaka la lɔsɛnɔ pondjo pondjo! Wekelo ɔsɔ mbishaka diaaso dia dimɛna dia nyu monga l’asawo w’amɛna. Naka wɛ nangaka di’anayɛ kodihwɛ otema lo kotɛ tokanyi ndo awui waakiyanya, kete tokambake l’etena kakalamema dikambo di’ɔtɛmwɛlɔ wa lo nkumbo kɛsɔ dia mbaɔnyɔla kana mbangola. Ndo nsala la wolo diaha momala naka anayɛ wambota dui dimɔtshi diahɔtɔnɛ l’atɔndɔ wa l’Afundelo. Lo dihole dia nsala ngasɔ, onga la lowando l’ɔtɛ wambowonga la losembwe lo mbita tokanyi tawɔ ndo keketshakawɔ dia mbitaka awui hwe hwe. Wɛ koka ndeka nkimanyiya anayɛ dimɛna paka naka wɛ mbeyaka woho wayaokawɔ mɛtɛ.

13. Naa waaso akina wele l’ambutshi dia nkimanyiya anawɔ dia ndjasukanya la Jehowa?

¹³ Ambutshi le, nyoyangake waaso lo lushi dia nkimanyiya ananyu dia ndjasukanya la Jehowa. Tanyokongake paka etena ka wekelo wa Bible ko nyu ndjowaetsha awui wendana la Nzambi kaso ka ngandji. Tende kɛnɛ kakate ombutshi wa womoto welɛwɔ Lisa, nde mbutaka ate: “Takakimanyiya anaso dia vɔ mbeya diɔtɔnganelo diele lam’asa Jehowa l’etongelo. Ɛnyɛlɔ, etena kakasalaka mfɔ kaso dui dimɔtshi diakɔdiaka ana, takawatɛka ɔnɛ dui nɛ mɛnyaka dia Jehowa ekɔ Nzambi k’ɔngɛnɔngɛnɔ, nde akasale dia sho mongaka l’ɔngɛnɔngɛnɔ lo lɔsɛnɔ ndo salaka shɛkɛsɛkɛ.”

14. Lande na kele ekɔ ohomba di’ambutshi nkimanyiya anawɔ dia nsɔna angɛnyi awɔ la lomba tshɛ? (Tokedi 13:20)

¹⁴ Tɔndɔ dia 4: Nyokimanyiya ananyu dia nsɔna angɛnyi w’amɛna. Ɔtɛkɛta wa Nzambi mɛnyaka hwe di’angɛnyi aso wekɔ la shɛngiya le so ya dimɛna kana ya kɔlɔ. (Adia Tokedi 13:20.) Ambutshi, onde nyu mbeyaka angɛnyi w’ananyu? Onde nyu sawolaka lawɔ ndo mbetshaka wenya kaamɛ lawɔ? Kakɔna kakokanyu nsala dia nkimanyiya ananyu dia vɔ mbɔtɔ lɔngɛnyi la wanɛ woka Jehowa ngandji? (1 Kɔr. 15:33) Nyu koka mbakimanyiya dia vɔ nsala ɛsɔnwɛlɔ wa lomba, lo mbelɛka anto amɔtshi wele la lonyuma la dimɛna dia ndjonga kaamɛ la nyu etena kasalanyu awui amɔtshi lo nkumbo.​—Os. 119:63.

15. Kakɔna kakoka ambutshi nsala dia nkimanyiya anawɔ dia monga l’angɛnyi w’amɛna?

¹⁵ Tɔsɛdingole ɛnyɛlɔ k’ombutshi ɔmɔtshi wa pami welɛwɔ Tony. Nde nembetshiyaka kɛnɛ kakandasale nde la wadɛnde dia nkimanyiya anawɔ dia monga l’angɛnyi w’amɛna ate: “L’edja k’ɛnɔnyi efula, dimi la wadɛmi takelɛka lakaso anangɛso l’akadiyɛso waki l’ɛnɔnyi wotshikitanyi ndo woye oma l’ahole wotshikitanyi. Takalɛka kaamɛ lawɔ yangɔ ya ndɛ ndo takasalaka kaamɛ lawɔ ɔtɛmwɛlɔ aso wa lo nkumbo. Ɔsɔ ekɔ yoho ya dimɛna ya mbeya wanɛ walanga Jehowa ndo wokambɛ l’ɔngɛnɔngɛnɔ. Taki la diɛsɛ dia mpangiya emendji w’etshimbedi, waa misiɔnɛrɛ ndo anto akina lakaso. Diewo diawɔ, ohetoheto awɔ ndo yimba yawɔ ya ndjahondja yakonge la shɛngiya y’efula le anaso ndo yakakimanyiya dia ndjasukanya la Jehowa.” Ambutshi, nyoyashikikɛ dia nkimanyiya ananyu dia monga l’angɛnyi w’amɛna.

TANYOSHISHAKE ELONGAMELO!

16. Akokanyu nsala naka ɔna ɔmɔtshi ambota dia nde halange kambɛ Jehowa?

¹⁶ Ko kayotota naka ɔnanyu ɔmɔtshi ambota dia nde halange kambɛ Jehowa? Tanyotake ɔnɛ hanyotondoyisha oko ambutshi. Jehowa akatosha sho tshɛ mbidja ndo ɔnanyu woshasha wa lotshungɔ la nsɔna kana dikoka dia nsɔna dia kambɛ Nzambi kana bu. Naka ɔnanyu ambɔsa yɛdikɔ ya nsɛka Jehowa, tanyoshishake elongamelo k’ɔnɛ lushi lɔmɔtshi nde ayokalola. Nyohɔke wɛɛla w’ɔna lakashishɔ. (Luka 15:11-19, 22-24) Ɔlɔngɔ a pami ɔsɔ akangana etale la mboka ka losembwe, koko l’ekomelo nde akakalola. Anto amɔtshi koka mbita ɔnɛ “ɔsɔ aki tsho wɛɛla. Onde dui sɔ koka salema lo lɔsɛnɔ mɛtɛ?” Eelo, diɔ koka salema! Lo mɛtɛ, kɛsɔ mbakakomɛ ɔlɔngɔ a pami welɛwɔ Elie.

17. Ngande wakokeketsha ɛnyɛlɔ kaki Elie?

¹⁷ Lo dikambo di’ambutshi ande, Elie mbutaka ate: “Vɔ wakasale la wolo awɔ tshɛ dia monɛ lemi ngandji ka Jehowa ndo k’Ɔtɛkɛta ande Bible. Koko lam’akimi l’ɛnɔnyi dikumi l’ɛmɔtshi, lakatatɛ ntɔmbɔkɔ.” Elie akatatɛ nsɛna lɔsɛnɔ la dungi pende, ndo welo tshɛ wakadje ambutshi ande dia mbokimanyiya lo nyuma wakɔtɔ l’ashi. L’ɔkɔngɔ diko, nde akamɔ oma la ngelo ndo nde akonge la lɔkɛwɔ la kɔlɔ efula. Kaanga mbakidiɔ ngasɔ, lo tena dimɔtshi nde akasawolaka l’ɔngɛnyi ande ɔmɔtshi awui wa lo Bible. Elie mbutaka ate: “Lam’akamatalekaka ntɛkɛta awui wendana la Jehowa l’ɔngɛnyi ami, mbakamatalekaka nkanyiya awui wendana la Jehowa. Ɔkɔkɛ ɔkɔkɛ koko l’eshikikelo tshɛ, ntɔngɔ y’akambo wa mɛtɛ wa lo Bible yaki l’otema ami, mbuta ate yakasale ambutshi ami la wolo dia monɛ yakatatɛ mpama.” L’edjedja ka wonya, Elie akakalola l’akambo wa mɛtɛ.c Ohokanyiya ɔngɛnɔngɛnɔ waki l’ambutshi ande l’ɔtɛ wakawawetsha lam’akinde dikɛnda dia nanga Jehowa!​—2 Tim. 3:14, 15.

18. Ngande wayaokayɛ lo kɛnɛ kendana l’ambutshi wasala la wolo dia mbetsha anawɔ dia nanga Jehowa?

¹⁸ Ambutshi le, nyu nyekɔ la diɛsɛ dia woke efula dia mbodia lɔlɔnga l’oyoyo l’atɛmɔdi wa Jehowa. (Os. 78:4-6) Ɔsɔ bu dui dia wɔdu ndo sho nyandolaka l’otema ɔtɔi l’ɔtɛ wa welo wadjanyu dia nkimanyiya ananyu! Naka nyu ntetemala nsala kɛnɛ tshɛ kakokanyu nsala dia nkimanyiya ananyu dia nanga Jehowa ndo mbaodia l’ohokwelo ndo l’alako ande, kete nyu koka monga l’eshikikelo dia Shɛso lele l’olongo loludi la ngandji ayɔngɛnangɛna.​—Ɛf. 6:4.