Yasukanya la Nzambi

Wɛ kokaka nkondja ‘ewo ka Nzambi’

JEHOWA NZAMBI akasale woho wa sho nkondja ɛngɔ kɛmɔtshi k’oshinga wolo ndo nde kombolaka dia sho kikondja. Ɛngɔ k’oshinga wolo kɛsɔ hatela ɔngɔnyi wa l’emunyi, koko tɔ kokaka tokondjiyɛ ɛngɔ kele kânga falanga tshɛ ya l’andja w’otondo hakoke kisomba, mbuta ate wɔladi wa l’etei k’otema, ɔlɔ ndo lɔsɛnɔ l’ɔngɛnɔngɛnɔ. Ɛngɔ kakɔna kɛsɔ k’oshinga wolo? Ɛtɛkɛta waki Sɔlɔmɔna nkumekanga ka lomba wofundami lo Tukedi 2:1-6 nembetshiyaka ɛngɔ kɛsɔ.

Sɔlɔmɔna mbutaka dia ‘ewo ka Nzambi’ mbele ɛngɔ k’oshinga wolo kɛsɔ, mbuta ate akambo wa mɛtɛ wendana la Nzambi ndo l’asangwelo ande oko wadiɛnya Bible. (Divɛsa 5) Ɛngɔ k’oshinga wolo kɛsɔ kekɔ l’awui wotshikitanyi.

Wetshelo wa mɛtɛ. Bible kadimolaka ambola wele oko wanɛ: Ele lokombo la Nzambi? (Osambu 83:18) Ngande wayala onto lam’avɔnde? (Osambu 146:3, 4) Lande na keso la nkɛtɛ? (Etatelu 1:26-28; Osambu 115:16) Onde ekadimwelo wa ambola asɔ wekɔ ohomba efula le yɛ?

Alako wa lomba. Bible tɛnyaka yoho ya lɔsɛnɔ yoleki dimɛna le so. Ngande wakoka diwala diayɛ nomba? (Efeso 5:28, 29, 33) Ngande wakokayɛ mbodia ana weya mɛmba ɛkɛndɛ? (Euhwelu k’Elembe 6:5-7; Efeso 6:4) Ngande wakokayɛ monga la lɔsɛnɔ l’ɔngɛnɔngɛnɔ? (Mateu 5:3; Luka 11:28) Ndo nto, oko le yɛ nɛmɔ dia ngande diele l’alako wendana l’akambo asɔ?

Nshihodia eongelo ndo lonto la Nzambi. Bible mbele kiɔkɔ yâmɛ y’akambo wa mɛtɛ wendana la Nzambi. Ngande wende? (Joani 1:18; 4:24) Onde nde ndjakiyanyaka dikambo diaso? (1 Petero 5:6, 7) Naa waonga ande amɔtshi woleki weke? (Etumbelu 34:6, 7; 1 Joani 4:8) Shi wɛ ayota di’awui asɔ wekɔ mɛtɛ akambo w’ohomba efula wahombayɛ mbeya lo kɛnɛ kendana l’Otungi aso?

Lo mɛtɛ, ‘ewo ka Nzambi’ kekɔ ɛngɔ ka lo nyuma k’oshinga wolo. Ngande wakokayɛ kikondja? Divɛsa 4 dia Tukedi tshapita 2, mɛnyaka nganɛ wakokaso kikondja, lɔkɔ Sɔlɔmɔna mbɛdikaka ewo kɛsɔ la ‘ɛngɔ k’oshinga wolo koshami.’ Tɔshi ɛnyɛlɔ kɛnɛ: Ɛngɔ k’oshinga wolo koshami hatotomba la shashimoya oma lɛnɛ oshamitɔ ko tɔ nkoma mbala kakɔ ɔtɔi l’anya w’onto latakiyange. Sho pombaka mbidja welo dia kishola. Ngasɔ mbediɔ ndo lo kɛnɛ kendana la ewo ka Nzambi. Lo mɛtɛ, ɛngɔ k’oshinga wolo kɛsɔ kakashɛma lo Bible. Dia kikondja, sho pombaka mbidja welo wa l’otema ɔtɔi.

Sɔlɔmɔna akalembetshiya kɛnɛ kahombaso nsala dia nkondja ‘ewo ka Nzambi.’ Ɛtɛkɛta w’ɔnɛ “ayulunga aui ami” ndo “ayediya utema aye” mɛnyaka dia sho pombaka monga suke dia mbetawɔ dako. (Divɛsa 1, 2) Ɛtɛkɛta w’ɔnɛ “lam’ayuyulelela,” “ayukiyanga” ndo “ayukiyanga wulu,” mɛnyaka dia sho la dia ndjasha l’etondo aso tshɛ ndo mbidja welo wa l’otema ɔtɔi. (Divɛsa 3, 4) Ɔnkɔnɛ, dia nkondja ɛngɔ k’oshinga wolo kɛsɔ, sho la dia mbeka Bible l’etete ndo nsala dui sɔ l’otema ɔtɔi.—Luka 8:15.

Naka sho nsala la wolo tshɛ, kete Jehowa ayotokimanyiya dia sho nkondja ɛngɔ k’oshinga wolo kɛsɔ. Divɛsa 6 mbutaka ɔnɛ: “[Jehowa] atushaka antu yimba.” Paka oma l’ekimanyiyelo ka Nzambi mbakokaso nshihodia tshɛ lo tshɛ akambo wa mɛtɛ wele lo Bible. (Joani 6:44; Etsha 16:14) Wɛ kokaka monga l’eshikikelo k’ɔnɛ: Naka wɛ nyangiayangia l’Ɔtɛkɛta wa Nzambi l’otema ɔtɔi, kete wɛ ayotana ‘ewo ka Nzambi,’ mbuta ate ɛngɔ k’oshinga wolo kayolowanya lɔsɛnɔ layɛ dimɛna efula.—Tukedi 2:10-21.a

[Nɔte ka l’ɛse ka dikatshi]