Awui wakimanyiya dia nkumbo monga l’ɔngɛnɔngɛnɔ

Nyonge la lonyuma la dimɛna lo diwala dianyu

Fredericka mbutaka ate: “Kam’akatatshukana, lakatɛtɛka wadɛmi dia sho mbeka Bible kâmɛ. Lakasalaka la wolo dia nde ndjasha l’akambo wakatekaka. Koko, Leanne kôkokaka mbidjasɛ ki. Ndo etena kakamokaka ambola nde akakadimolaka tsho ate eelo kana akatshikalaka ki. Ekadimwelo wakandashaka kɔmbɔtɔnɛka la kɛnɛ kakamafɔnyaka lo woho wahomba wekelo wa Bible nɔmbwama.”

Leanne mbutaka ate: “Etena kakatshuke Frederick laki l’ɛnɔnyi 18. Takekaka Bible kâmɛ mbala la mbala, koko Frederick akakambaka la wekelo oko waaso wa ntondja kɔlɔ yami sɛkɛ ndo woho wakamahombe ndjalowanya oko wadi. Dui sɔ diakakɔmɔlaka ndo diakambishaka lonyangu.”

OKO le yɛ, okakatanu akɔna waki lam’asa Frederick nde la Leanne? Vɔ waki l’eyango w’amɛna. Vɔ akɔ ahende wakokaka Nzambi ngandji. Ndo wakɛnyi ohomba wa mbeka Bible kâmɛ. Koko akɛnamaka dia dui diakakoke mbakimanyiya dia vɔ monga kâmɛ diaki l’etombelo wotshikitanyi. Vɔ wakekaka kâmɛ, koko vɔ komonga la lonyuma la dimɛna oko atshukanyi.

Lonyuma la dimɛna kɛdikɛdi na? Lande na kahomba atshukanyi nsala la wolo dia monga la lonyuma la dimɛna? Ekakatanu akɔna wakokawɔ mpomana la wɔ ndo ngande wakokawɔ mbatondoya?

Lonyuma la dimɛna kɛdikɛdi na?

Tshɛkɛta “lonyuma” oko wokambiwɔ la yɔ lo Bible nembetshiyaka dionga diele l’onto ndo woho wɔsande lɔsɛnɔ. (Jude 18, 19) Ɛnyɛlɔ, Paulo laki ofundji wa Bible akɛnya otshikitanu wele lam’asa onto lele la lonyuma la dimɛna ndo onto layela nsaki ya demba. Paulo akɛnya dia wanɛ wayela nsaki ya demba ndjashaka paka lo wahɔ awɔ vɔamɛ koko aha dia wahɔ w’anto akina. Vɔ salaka kɛnɛ kele ɔlɔlɔ lo washo awɔ hita lo dihole dia nsɛna lo yoho yɔtɔnɛ l’ɛlɛmbɛ wa Nzambi.—1 Koreto 2:14; Ngalatiya 5:19, 20.

Lo yoho yotshikitanyi, wanɛ wele la waonga wa lo nyuma mbɔsaka ɛlɛmbɛ wa Nzambi la nɛmɔ. Vɔ mbɔsaka Jehowa Nzambi oko Ɔngɛnyi awɔ ndo salaka la wolo dia mbokoya lonto lande. (Efeso 5:1) Ɔnkɔnɛ, vɔ salɛka anto akina akambo la ngandji, la kɛtshi ndo la memakana. (Etumbelu 34:6) Ndo vɔ kitanyiyaka Nzambi kânga etena konga dikambo sɔ wolo. (Osambu 15:1, 4) Darren, ladjasɛ lo wodja wa Canada lambotshukana ambeta ɛnɔnyi 35, mbutaka ate: “Lo ndjela eokelo kami, mbala tshɛ onto lele la lonyuma la dimɛna kanyiyaka shɛngiya yayonga l’ɛtɛkɛta ndo la ditshelo diande lo lɔngɛnyi lasande la Nzambi.” Wadɛnde Jane kotshaka ate: “Dimi kanyiyaka dia womoto lele la lonyuma la dimɛna salaka la wolo lushi tshɛ dia nkɛnɛmɔla elowa wa nyuma kaki Nzambi lo lonto lande.”—Ngalatiya 5:22, 23.

Lo mɛtɛ, aha paka onto ambotshukana mbahombande ndjɔkɛnɛmɔla waonga wa lo nyuma. Bible mbetshaka dia onto tshɛ ekɔ l’ɔkɛndɛ wa mbeka akambo wendana la Nzambi ndo mbôkoya.—Etsha 17:26, 27.

Lande na kahombanyu monga la lonyuma la dimɛna lo diwala dianyu?

Ko, lande na kahomba atshukanyi nsala la wolo dia monga la lonyuma la dimɛna lo diwala diawɔ? Tɔshi ɛnyɛlɔ kɛnɛ: Anto ahende wasala tojardɛ wambokana dia nsala jardɛ tshɔi woho wa vɔ monɛ diononɛ. Ɔmɔtshi ambɔsa yɛdikɔ ya monɛ ntɔngɔ etena kɛmɔtshi ka l’ɔnɔnyi, koko okina ambota dia vɔ pombaka ndjoyonɛ l’ɔkɔngɔ. Ɔmɔtshi nangaka mbutɛ diangɔ diasha ɛtɛtɔ koko okina halange, nde mbɔsaka dia diononɛ bu l’ohomba w’ɛtɛtɔ. Ɔmɔtshi nangaka mbutɛka ashi lushi tshɛ lo jardɛ. Okina halange, nde nangaka ntshika dia diononɛ dwamɛ ntomba aha la mbutɛ ashi. Lo nsala ngasɔ, asadi wa tojardɛ asɔ mbeyaka nkondja etombelo ɛmɔtshi koko diononɛ hadiotɔngɔna efula oko wotodiɔngɔna otondonga vɔ ahende nsanga lolemi lo kɛnɛ kakawahombe nsala ndo vɔ nkamba kâmɛ dia nkotsha eyango akɔ.

Wadi la omi wekɔ oko asadi wa tojardɛ asɔ. Naka ɔmɔtshi monga la lonyuma la dimɛna, kete diokanelo diele lam’asawɔ mbeyaka ndowana. (1 Petero 3:1, 2) Ayonga mɛtɛ dui dia dimɛna naka atshukanyi akɔ ahende mbetawɔ dia nsɛna lo yoho yɔtɔnɛ l’ɛlɛmbɛ waki Nzambi ndo nsala la wolo dia sukanɛ lam’asawɔ etena kakambɛwɔ Nzambi. Nkumekanga Sɔlɔmɔna akafunde ate: “Antu ahendi ndeka untu otoi.” Lande na? “Ne dia vo watulungulaka difutu di’ololo uma l’ulimu awo. Naka vo wamboko, omotshi mbeyaka mbetula unyandi.”—Undaki 4:9, 10.

Ondo ndo wɛ lawɔ mbakombola monga la lonyuma la dimɛna wɛ l’olonganyi ayɛ. Koko, l’ɛnyɛlɔ k’asadi wa tojardɛ, nsaki keto hatondja etombelo w’amɛna. Tende ekakatanu ehende wakokanyu mpomana lawɔ ndo woho wakokanyu mbatondoya.

OKAKATANU 1: Hatokondjɛ etena. Sue laki ka tshukama mbutaka ate: “Omɛmi akambɔsaka oma l’olimu l’eshidi 7:00 wa dikɔlɔ. Etena kakatakomaka la ngelo elimu tshɛ wakatokongɛka. Aki tshondo ya ta lam’asa yimba la alemba aso; timba taso takatotɛka dia sho tshungola etena ka mbeka akambo wendana la Nzambi kâmɛ koko alemba aso wakatotshutshuyaka dia sho momuya.”

Woho wa nkadola dikambo sɔ: Nyoyaekesanyiya ndo nyokambe kâmɛ. Sue mbutaka ate: “Dimi l’omɛmi takɔshi yɛdikɔ ya mbetɔka la lɔkɛsɛ dia mbadia ndo kɛtshanya avɛsa amɔtshi wa lo Bible kâmɛ la ntondo ka sho ntshɔ l’olimu. Nde kimanyiyakami nto l’elimu ɛmɔtshi wa la ngelo dia dimi nkondja etena ka sho monga kâmɛ.” Ɛtshɔkɔ akɔna waya lo mbidja welo wa lâdiko wa ngasɔ? Ed omaki Sue mbutaka ate: “Lakayɛnaka dia etena kakatakɛtshanyaka dimi la Sue akambo wa lo nyuma mbala la mbala, takonge l’akoka wa nkandola ekakatanu wakahomana la so ndo takakitshakitsha ekiyanu waki la so.”

Lâdiko dia sawolaka kâmɛ lam’asanyu, ekɔ ohomba efula dia nyu tshungolaka minitɛ ngana lushi tshɛ dia nɔmba kâmɛ. Ngande wakoka dui sɔ nyokimanyiya? Ryan, lambotshukana ambeta ɛnɔnyi 16 mbutaka ate: “L’etena kɛmɔtshi, dimi la wadɛmi takahomana l’ekakatanu wa wolo lo diwala diaso. Koko, takatshungolaka etena otsho tshɛ dia nɔmba kâmɛ ndo kɛnɛmɔlɛ Nzambi ekiyanu aso. Lakɛnyi dia nɔmba kâmɛ akatokimanyiya dia sho nkandola ekakatanu aso ndo nyomonga l’ɔngɛnɔngɛnɔ lo diwala diaso.”

HEMBA DIA NSALA NGANƐ: Nyoyaombɛke minitɛ ngana l’ekomelo ka lushi tshɛ dia nkɛtshanya dui dimɔ dia dimɛna diakahomanyi la nyu oko atshukanyi, dui diakokanyu nkaloya Nzambi losaka. Ndo nto, nyosawole lo kɛnɛ kendana la ekakatanu wahomana lanyu, djekoleko wɛnɛ wenyu l’ohomba w’ekimanyiyelo k’oma le Nzambi dia nyu mbakandola. Ɔhɛmwɛlɔ: Tokambake la diaaso sɔ dia mbutɛ olonganyi ayɛ wandja wele la nde. Koko, etena kalɔmbanyu kâmɛ ntɛkɛta di’akambo wahombanyu ndjalowanya nyu akɔ ahende. La wedi a pindju, nyosale akambo lo yoho yɔtɔnɛ la dɔmbɛlɔ dianyu.

OKAKATANU 2: Tekɔ la waonga wotshikitanyi. Tony mbutaka ate: “Ndoko lushi lakadjasɛ dia mbadia dibuku dimɔtshi.” Natalie ka wadɛnde mbutaka ate: “Dimi nangaka mbadia ndo dimi ngɛnanɛngaka mbuta akambo wadishami. Tena dimɔtshi, dimi fɔnyaka dia dimi momadiaka Tony etena kasawolaso awui wekaso oma lo Bible.”

Woho wa nkadola dikambo sɔ: Sukɛ olonganyi ayɛ, tɔsɛmanɛke la nde kana mbolombosha. Nkimanyiya olonganyi ayɛ ndo keketshande. Tony mbutaka ate: “Ohetoheto wele la wadiɛmi wa sawolaka awui wa lo Bible tɔnɛndjaka lo tena dimɔtshi. Lo nshi yakete lakatonaka sawola la nde akambo wa lo nyuma. Koko, Natalie akasukɛka efula. Kakianɛ, tosawola akambo wa lo nyuma kâmɛ mbala la mbala ndo lamboyɛna dia ndoko kahombami mboka wɔma. Lɔngɛnangɛnaka dia sawola la nde awui asɔ. Dui sɔ diakatokimanyiya dia sho kɔkɔlaka demba lo wɔladi lo diwala diaso.”

Atshukanyi efula wambɛna dia awala awɔ wambolowana etena katshungolawɔ etena lomingu tshɛ dia mbadiaka ndo mbekaka Bible kâmɛ. Koko, nyonge la yewo: Etena kadiayɛ dako dia l’Afundelo, enda woho wakokayɛ nkamba ladiɔ wɛmɛ koko aha lo dikambo dia olonganyi ayɛ. (Ngalatiya 6:4) Nyɔkɛtshanya ekakatanu wele la nyu lo diwala wonya okina koko aha wonya wa wekelo. Lande na?

Tɔshi ɛnyɛlɔ kɛnɛ: Naka wɛ ekɔ lo ndɛ mma wɛ la nkumbo kayɛ, onde wɛ ayosola mpota ka nsolo ko kiɔmba la bandɛ wonya akɔ wâmɛ? Ndooko. Nɛ dia wɛ ayoshishiyɛ anto tshɛ mposa ka vɔ ndɛ. Yeso akɛdika wekelo w’akambo wendana la Nzambi la mbo ya ndɛ. (Mateu 4:4; Joani 4:34) Naka wɛ tɛkɛtaka mbala tshɛ akambo wahomuya l’asolo wonya wadianyu Bible, kete wɛ kokaka shishiyɛ olonganyi ayɛ mposa ka nde mbeka akambo wa lo nyuma. Lo mɛtɛ, nyu pombaka kɛtshanya ekakatanu anyu. Koko, kanyɔsɛdingolake akambo asɔ l’etena kekina aha wonya wa wekelo.—Tukedi 10:19; 15:23.

HEMBA DIA NSALA NGANƐ: Mfunda waonga ahende kana asato woleki kɔngɛnyangɛnya wele l’olonganyi ayɛ. Mbala kekina kayonyɔkɛtshanya akambo wa lo nyuma wendana la waonga asɔ, tɛ olonganyi ayɛ woho w’ɔngɛnangɛnayɛ lo woho wakɛnɛmɔlande waonga akɔ.

Wɛ ayona kɛnɛ konɛyɛ

Naka nyu nkɛnɛmɔla lonyuma la dimɛna lo diwala dianyu, kete nyayonga la wɔladi ndo nyayokondja ɛtshɔkɔ efula. Lo mɛtɛ, Ɔtɛkɛta wa Nzambi toshikikɛka ɔnɛ: “Untu tshe ayuna diango diakandune.”—Ngalatiya 6:7.

Frederick nde la Leanne lakatatɛkɛtshi l’etatelo ka sawo nɛ, wakɛnyi mɛtɛ ka tɔndɔ dia lo Bible sɔ. Kakianɛ, vɔ wambotshukana aya ɛnɔnyi 45 ndo wambokondja ɛtshɔkɔ efula lo woho wakawakasale la wolo dia monga la lonyuma la dimɛna lo diwala diawɔ. Frederick mbutaka ate: “Lakahangwɛka wadɛmi l’ɔtɛ wakiso kosawolaka dimɛna. Koko, l’ɔkɔngɔ diko, lakayɛnaka dia dimi lawɔ lakahombe ntshikitanya dionga diami.” Leanne mbutaka ate: “Kɛnɛ kakatokimanyiya l’atei wa tena dia pâ ele ngandji kakatokaka Jehowa Nzambi. L’edja k’ɛnɔnyi efula sho mbekaka Bible ndo nɔmbaka kâmɛ mbala la mbala. Etena kakamɛnyi welo wakadje Frederick dia nkɛnɛmɔla waonga w’Okristo, akayonga wɔdu le mi dia dimi mbôka ngandji.”

[Nɔte ka l’ɛse ka dikatshi]

YAMBOLA WATE . . .

▪ Etena kakɔna kakatakomɛ nsala dɔmbɛlɔ kâmɛ oko wadi la omi?

▪ Kakɔna kakokami nsala dia nkeketsha olonganyi ami woho wa sho sawolaka akambo wa lo nyuma dimɛna?