Bible tshikitanyaka nsɛnɔ y’anto
KAKƆNA kakakimanyiya onto ɔmɔtshi lakalangaka tɔkɛnyɔ ta falanga ndo laki wovi dia ntshika akambo asɔ? Adia ɔkɔndɔ ande.
“Lakayashaka efula lo tɔkɛnyɔ tendana la wahemelo wa mponda.”—RICHARD STEWART
ƆNƆNYI WA LOOTƆ: 1965
WODJA WA LOOTƆ: JAMAÏQUE
ƆKƆNDƆ: ƆKƐNYI WA TƆKƐNYƆ TA FALANGA NDO OTSHI W’AWUI WA KƆLƆ
NSHI YAMI YAKETE: Lakole la Kingston, kapitalɛ ka Jamaïque, ɛtshi ka nkɛtɛ kaki anto wola ndo kaki l’anto tɔɔ. Elimu komonga ndo awui wa ngala wakafulanɛ. Dengalenga diakakonya anto dia sɛnaka lo wɔma. Lakokaka wakanda ekoma suke la lushi tshɛ.
Mama, lakakambaka olimu wa wolo akasalaka tshɛ dikambo diami ndo dia kɔsɛmi ka pami la ka womoto. Nde akasale tshɛ dia sho nongola wetshelo wa dimɛna. Dimi kondekaka ndjasha lo kalasa, koko lakayashaka lo tɔkɛnyɔ ta ndawɔka la mponda. Lakalawɔka kalasa dia ntshɔ lo tɔkɛnyɔ tɔsɔ. Lakahemaka lo mponda.
Kombeta edja, lakayoyashaka tshɛ lo tɔkɛnyɔ ta falanga ta ndawɔka la mponda. Lakayasha l’awui wa mindo, mbuta ate l’awui wa wamato. Lakanɔka marijuana ndo lakavaka dia dimi mbeya ndjasha l’awui asɔ. Lakasombe ekoma efula, diɛsɛ ko dimi kondjaka ndooko onto lo mbala efula yakamavaka shɔ.
Koko, apulushi wakaminde ndo wakatome lo lokanu l’ɔtɛ w’awui ami wa kɔlɔ. Lam’akamatombe oma lo lokanu, lakakalolɛ yoho yami ya lɔsɛnɔ ya kɔlɔ. Lakayoleka ntsha kɔlɔ oleki lo nshi yakete. Kaanga mbakamɛnamaka l’elungi oko onto ɔlɔlɔ, dimi laki ngala, ɛkɛlɛkɛlɛ ndo esehe. Laki ewodja ewodja.
WOHO WAKATSHIKITANYA BIBLE LƆSƐNƆ LAMI: L’etena k’ofukutanu ka lo lɔsɛnɔ lami kɛsɔ, mama akeke Bible ndo akakome Ɔmɛnyi wa Jehowa. Lakɛnyi etshikitanu wakandasale ndo dui sɔ diakakotola yambalo yami. Lakalange mbeya kɛnɛ kakokimanyiya dia ntshikitana, ko lakatatɛ mbeka Bible l’Ɛmɛnyi wa Jehowa.
Lakayɛna dia wetshelo w’Ɛmɛnyi wa Jehowa wakatshikitana la wa l’ɛtɛmwɛlɔ ekina ndo lakayoshola di’awui wakawetshaka wakatombaka oma lo Bible. Vɔ ato mbakameyaka mbakasambishaka lo luudu la luudu, oko wakasalaka Akristo wa ntondo. (Mateo 28:19; Etsha 20:20) Laketawɔ dia lamboshola ɔtɛmwɛlɔ wa mɛtɛ lam’akamɛnyi ngandji ka mɛtɛ kokanawɔ.—Joani 13:35.
Oma lo kɛnɛ kakameke oma lo Bible, lakɛnyi ohomba wa nsala etshikitanu ɛmɔtshi wa weke lo lɔsɛnɔ lami. Lakashola dia Jehowa Nzambi petshaka loseka ndo ɔnɛ naka dimi nangaka mbɔɔngɛnyangɛnya, dimi pombaka ntshika ditshelo diadja demba mindo. (2 Kɔrɛtɔ 7:1; Hɛbɛru 13:4) Lakɔshi yɛdikɔ etena kakameke dia Jehowa ekɔ la nsaki ndo ɔnɛ ditshelo diami koka mboonyangiya kana mbɔɔngɛnyangɛnya. (Tokedi 27:11) Ɔnkɔnɛ, lakatshike ɔnwɛlɔ wa marijuana, lakatshike ekoma ami ndo lakasale la wolo dia ndowanya lonto lami. Tshika awui wa mindo ndo tɔkɛnyɔ ta falanga mbakaleke wolo le mi.
L’etatelo, dimi konanga di’angɛnyi ami mbeya dia lekɔ lo mbeka Bible l’Ɛmɛnyi wa Jehowa. Koko lakatshikitanya kanyi yami lam’akamadia Mateo 10:33, lɛnɛ akate Yeso ate: “Onto tshɛ lamanguna la ntondo k’anto, dimi lawɔ layowanguna la ntondo ka Papa lele l’olongo.” Ɛtɛkɛta ɛsɔ wakatshutshuya dia mbutɛ asekami dia leka Bible l’Ɛmɛnyi wa Jehowa. Vɔ wakanyange. Vɔ mbetawɔ di’onto oko dimi koka nkombola nkoma Okristo. Koko lakawatɛ dia hatokalolɛ yoho yami ya lɔsɛnɔ lami l’edjedja.
WAHƆ WAMOMOKONDJA: Mama aki l’ɔngɛnɔngɛnɔ w’efula lam’akandɛnyi dia lambotatɛ nsɛna lo yoho yɔtɔnɛ l’atɔndɔ wa lo Bible. Wonya ɔnɛ, nde aya bu l’okiyanu w’ɔnɛ dimi layosala awui wa kɔlɔ. Tosawolaka dia ngandji kokaso sho tshɛ Jehowa. Ntena dimɔtshi, lam’akanyiyami woho w’onto wakimi, lekɔ lo mamba lo menda etshikitanu wambomosala diɛsɛ l’ekimanyielo ka Nzambi. Laya bu la mposa k’awui wa mindo ndo ka lomombo.
Otondonga dimi kombetawɔ losango la Bible, tshike lambovɔka kana tshike lekɔ lo lokanu ɛlɔ kɛnɛ. Koko etena kɛnɛ, laya la nkumbo ka diambo ndo kele l’ɔngɛnɔngɛnɔ. Lekɔ l’ɔngɛnɔngɛnɔ efula dia kambɛ Jehowa Nzambi kaamɛ la wadɛmi lasukɛ ndo l’ɔnami la womoto lele l’okitanyiya. Lekɔ la lowando efula le Jehowa lo woho wakandakimanyiya dia monga ose nkumbo k’Akristo koludi la ngandji. Lekɔ nto la lowando lo woho wakadje onto ɔmɔtshi welo dia mbetshami akambo wa mɛtɛ wa lo Bible. Ndo lekɔ lo mbɔsa la nɛmɔ waaso wele la mi wa nkimanyiya anto akina dia mbeya kɛnɛ ketsha Bible. Lo yoho ya laande, lekɔ la lowando le Jehowa Nzambi l’ɔtɛ wa ngandji kande lo woho wakandakotola oya le nde.
[Efundelo wa l’etei]
“Lakeke dia Jehowa ekɔ la nsaki ndo ɔnɛ ditshelo diami koka mboonyangiya kana mbɔɔngɛnyangɛnya”
[Osato]
Lakɛnyi etshikitanu w’amɛna lo lonto la mama kami
[Osato]
Dimi la wadɛmi la ɔnaso la womoto