Ambola w’oma le ambadi

Lo woho akɔna wele “lu washo [wa Jehowa], nyoi k’ekilami andi keko ushinga a wulu”?

▪ Omembi w’esambo akate ate: “Lu ashu [wa Jehowa], nyoi k’ekilami andi keko ushinga a wulu.” (Osam. 116:15) Lɔsɛnɔ l’okambi tshɛ waki Jehowa lekɔ la nɛmɔ lo washo ande. Koko Osambu 116 mɛnyaka di’omembi w’esambo akatɛkɛtaka dia nyɔi k’ekambi waki Nzambi efula.

Ɔtɛkɛtshi washa sawo di’okundelo hahombe nkamba l’ Osambu 116:15 lo dikambo di’onto lambovɔ oyadi onto akɔ akavu la kɔlamelo. Lande na? Nɛ dia divɛsa nɛ hatɛkɛta dia nyɔi k’okambi ɔtɔi waki Jehowa, koko k’ekambi efula. Ɔnkɔnɛ Nzambi mbɔsaka la nɛmɔ nyɔi k’ekambi ande wa kɔlamelo tshɛ nde hetawɔki dia vɔ tshɛ mvɔ.—Enda Osambu 72:14; 116:8.

Osambu 116:15 toshikikɛka dia Jehowa hetawɔki pondjo di’ekambi ande wa kɔlamelo wa l’andja w’otondo shilama oshiki. Lo mɛtɛ, ɔkɔndɔ aso wa nshi nyɛ mɛnyaka woho wakikɛwɔ ehemba ndo ɛhɛnyɔhɛnyɔ ndo dui sɔ mɛnyaka ɔnɛ nde hetawɔki pondjo dia vɔ shilama oshiki.

Lam’ele Jehowa ekɔ Kanga-Wolo-Tshɛ ndo Ɔtɛkɛta ande hawetaka pa, nde hetawɔki pondjo di’ekambi ande wa l’andja w’otondo shilama oshiki. Naka nde mbetawɔ dia dui sɔ salema, shi kete ayɛnama oko atunyi ande mboleka wolo? Naka akambo salema ngasɔ, kete sangwelo diande di’ɔnɛ ekambi ande wa kɔlamelo wayodjasɛ la nkɛtɛ hadiotokotshama. Koko kɛnɛ kele mɛtɛ ele, dui sɔ hadiosalemaki pondjo. (Is. 45:18; 55:10, 11) Olimu w’ekila wakambɛso Jehowa lo tɛmpɛlɔ ka woke ka lo nyuma wayemala naka ekambi ande tshɛ ndjakema. Ndo nto, otondonga ngasɔ, tshike ndoko anto wototshikala dia ndjokenga “kete y’uyuyu,” mbuta ate tshunda di’anto w’ɔlɔlɔ diayɔlɔmbwama oma le “ulungu w’uyuyu.” (Eny. 21:1) Ndo naka akambo salema ngasɔ, kete ndoko ambolami wayonga l’Ɛlɔmbwɛlɔ ka Kristo k’ɛnɔnyi kinunu.—Eny. 20:4, 5.

Lokombo laki Nzambi ndo lowandji lande layoshama sɔnyi naka ekambi ande wa lo nkɛtɛ k’otondo shilama oshiki. Ndo nto, lam’ele Jehowa mbishaka lokombo lande l’ekila nɛmɔ, nde hetawɔki pondjo di’ekambi ande wa kɔlamelo shilama oshiki. Ɔkɔkɔ okina ele, lam’ele ‘Nzambi hasalaka kɔlɔ,’ nde ayosala kɛnɛ tshɛ kahombama dia nkokɛ wanɛ wôkambɛ la kɔlamelo. (Euh. 32:4; Etat. 18:25) Lâdiko dia lâsɔ, naka Nzambi mbetawɔ di’ekambi ande shilama oshiki, kete dui sɔ diayotshikitana la kɛnɛ kata Ɔtɛkɛta ande ɔnɛ: “[Jehowa] hoseka wudja andi, ne dia lukumbu landi la wuki.” (1 Sam. 12:22) Ngasɔ mbediɔ nɛ dia “[Jehowa] hatukadjaka antu andi, ndu hatosekaka wudja andi.”—Osam. 94:14.

Ande ekeketshelo kambotokondja lo mbeya dia Jehowa hetawɔki pondjo di’ekambi ande wa l’andja w’otondo shilama oshiki lee! Ɔnkɔnɛ, nyɛsɔ totetemale monga la kɔlamelo le Nzambi lo ndjaɛkɛ lo daka diande diata ɔnɛ: “Ehumo tshe kambutshulama dia ndo la ye huluwana. Lulimi tshe layukutungela dikambo l’elumbwelu, we ayuludja mananu. Oso eli sangu di’ekambi wa [Jehowa]. Oso eli eyindjamelu kawo uma le mi.”—Is. 54:17.

[Efundelo wa l’etei w’odingɔ wa lo lɛkɛ 22]

Nzambi hetawɔki pondjo di’ekambi ande shilama oshiki