Onde wɛ kɛnɛmɔlaka lotombo la Jehowa?

‘Sho ngamulaka lotombo laki Jehowa oko talatala.’—2 KOR. 3:18.

NGANDE WAYOYOKADIMOLA?

Kânga mbeso atshi wa pɛkato, ngande wakokaso nkɛnɛmɔla lotombo la Jehowa?

Ngande watokimanyiya dɔmbɛlɔ ndo nsanganya dia nkɛnɛmɔla lotombo la Nzambi?

Kakɔna kakoka tokimanyiya dia ntetemala nkɛnɛmɔla lotombo la Jehowa?

1, 2. Lande na kataso ɔnɛ sho kokaka nkɛnɛmɔla waonga waki Jehowa?

LO YƐDIKƆ mɔtshi, sho tshɛ fɔnaka l’ambutshi aso. Ondo tambokaka ɛtɛkɛta wele oko: “Ɔna mbudi diwongo, kete nyango mbɔshinde.” Ngasɔ mbediɔ nɛ dia mbala efula ana mbokoyaka kɛnɛ kɛnawɔ ambutshi awɔ wasala. Onde ndo sho lawɔ kokaka mbokoya Jehowa Shɛso lele l’olongo? Kânga mbahatawɛnyi, sho kokaka mbeya waonga ande naka sho mbekaka Bible, sɛdingolaka diangɔ diakandatonge ndo kanaka yimba la Afundelo, djekoleko la ɛtɛkɛta ndo la etsha wa Yeso Kristo. (Joa. 1:18; Romo 1:20) Mbokɛmaka lâsɔ dia sho kokaka nkɛnɛmɔla lotombo laki Jehowa.

² La ntondo ka nde ntonga Adama l’Eva, Nzambi akalongamɛka ɔnɛ anto wayoyosala lolango lande, wayoyɔkɛnɛmɔla waonga ande ndo wayoyôtombola. (Adia Etatelu 1:26, 27.) Oko weso Akristo, sho pombaka nkɛnɛmɔla waonga waki Nzambi. Naka sho nsala ngasɔ, kete tayɔkɛnɛmɔla lotombo lande oyadi lokoho laso la demba, kalasa yakatɔtɔ ndo dioho dieso. Lande na kataso ngasɔ? Nɛ dia “[Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.”—Etsha 10:34, 35.

3. Ngande wakoka Akristo ndjaoka etena kakambɛwɔ Nzambi?

³ Akristo w’akitami kɛnɛmɔlaka lotombo la Jehowa. Ɔpɔstɔlɔ Paulo akate ate: ‘Sho tshɛ bu la okombɔ lo dungi diaso, koko sho ngamulaka lotombo la Jehowa oko talatala. Etena kasalaso dui sɔ, tekɔ lo nkadimɔ dia monga lo efanelo kande, tatatetemala nkɛnɛmɔla lotombo.’ (2 Kor. 3:18) Etena kakayaholɔka Mɔsɛ oma l’okongo wa Sinai okime pase di’ave diaki la Ɛlɛmbɛ dikumi, elungi kande kakahɛtaka esase nɛ dia nde aki oma la tosawola la Jehowa. (Etum. 34:29, 30) Kânga mbele ndoko onto la l’atei aso lambɔhɛtaka esase l’elungi l’ɔtɛ wakandasawola la Jehowa, sho mongaka l’ɔngɛnɔngɛnɔ etena kasambishaso awui wendana la nde, waonga ande ndo sangwelo diande diendana la nkɛtɛ. Oko watongadimɔka talatala, Akristo w’akitami ndo ɛkɔkɔ ekina kɛnɛmɔlaka lotombo la Jehowa l’olimu w’esambishelo. (2 Kor. 4:1) Onde wɛ kɛnɛmɔlaka lotombo la Jehowa oma lo lɔkɛwɔ layɛ la dimɛna ndo oma l’esambishelo ka Diolelo?

SHO KOMBOLAKA NKƐNƐMƆLA LOTOMBO LA JEHOWA

4, 5. a) Okakatanu akɔna waki la Paulo weso ndo sho la wɔ? b) Shɛngiya yakɔna yele la pɛkato le so?

⁴ Oko weso ekambi waki Jehowa, sho kombolaka mbɔlɛmiya ndo mbotombola l’awui tshɛ wasalaso. Kânga mbediɔ ngasɔ, tekɔ l’okakatanu dia nsala kɛnɛ kakombolaso. Ɛnyɛlɔ, Paulo akalɔshanaka la wɛɔdu ande. (Adia Romo 7:21-25.) Nde akɛnya okakatanu ɔsɔ lo mbuta ɔnɛ: “Anto tshe wakatshi kolo, hawukumi lu yediko ya lutumbu la [Nzambi].” (Romo 3:23) Pɛkato kakatahowɔ oma le Adama l’Eva mbakatokonya atshi wa pɛkato.—Romo 5:12; 6:12.

⁵ Ko pɛkato kɛdikɛdi na? Kɛdikɛdi dui tshɛ diahɔtɔnɛ la lonto, atɔndɔ ndo lolango la Jehowa. Tɔ ndanyaka diɔtɔnganelo diasaso la nde. Oko watohandjaka mengenga nyama la mpito yande, mbele ndo pɛkato toshimbaka dia sho nsala kɛnɛ kahombama. Onto koka nsala pɛkato l’okonda kana aha l’okonda. (Wal. 15:27-31) Koko pɛkato kekɔ lo dikila di’onto tshɛ ndo tɔ mbashimbaka dia monga la diɔtɔnganelo dia dimɛna la Nzambi. (Osam. 51:5; Is. 59:2; Kol. 1:21) Anto efula hawɔsɛnɛ lo yoho yɔtɔnɛ la lolango laki Jehowa ndo vɔ shishaka diɛsɛ dia nkɛnɛmɔla lotombo lande. Aha la tâmu, pɛkato pɛnyahɛnyaka anto lo yɛdikɔ y’efula.

6. Kânga mbekeso atshi wa pɛkato, diɛsɛ diakɔna diele la so?

⁶ Kânga mbeso atshi wa pɛkato, teye dia Jehowa ekɔ “[Nzambi k]’elungamelu.” (Romo 15:13) Nde akatome Yeso Kristo dia ndjofuta olambo wa tshungo dia totshungola oma lo pɛkato. Naka sho monga la mbetawɔ l’olambo ande ɔsɔ, kete hatotonga nto “fumbi y’akambu wa kolo,” koko tayɔkɛnɛmɔla lotombo la Jehowa. (Romo 5:19; 6:6; Joa. 3:16) Monga la diɔtɔnganelo dia dimɛna la Nzambi ayotokimanyiya dia tshɔkwama oma le nde ndo ndjokondja lɔsɛnɔ la pondjo lo nshi yayaye. Kânga mbekeso atshi wa pɛkato, tekɔ la diɛsɛ dia nkɛnɛmɔla lotombo la Nzambi.

TƆKƐNƐMƆLƐ LOTOMBO LAKI NZAMBI

7. Dia nkɛnɛmɔla lotombo laki Nzambi, kakɔna kahombaso mbeya lo dikambo diaso shoamɛ?

⁷ Dia sho nkɛnɛmɔla lotombo laki Nzambi, sho pombaka mbeya wɛɔdu aso. (2 Ek. 6:36) Sho pombaka mbeya di’atshi wa pɛkato mbeso ndo nsala la wolo dia mpama woho wa ntombola Nzambi. Ɛnyɛlɔ, naka tambotala lo djonga ya menda esato wɛnyawɔ anto etakataka, kete sho pombaka nyanga ekimanyielo ka lo nyuma le dikumanyi ndo nkamba l’alako wayowotosha. (Jak. 5:14, 15) Nsala ngasɔ ayotokimanyiya dia monga la yoho ya lɔsɛnɔ langɛnyangɛnya Nzambi. Oko weso atɛmɔdi waki Jehowa, sho pombaka ndjasɛdingolaka mbala la mbala dia ndjashikikɛ kana tekɔ lo nsɛna lo yoho yɔtɔnɛ l’atɔndɔ ande wosembwe. (Tuk. 28:18; 1 Kor. 10:12) Oyadi wɛɔdu akɔna wele la so, sho pombaka ntetemala ndɔshana la wɔ l’oyango wa sho nkɛnɛmɔla lotombo laki Nzambi.

8. Kakɔna kahombaso nsala kânga mbeso atshi wa pɛkato?

⁸ Yeso mbaki tshɔi y’onto yakakɛnɛmɔla lotombo laki Nzambi lo yoho ya kokele. Koko kânga mbeso bu kokele oko Yeso, sho kokaka ndo pombaka mbidja welo dia ndjela ɛnyɛlɔ kande. (1 Pet. 2:21) Jehowa ngɛnangɛnaka welo wadjaso dia mpama ndo nde tɔtshɔkɔlaka etena kotombolaso.

9. Shɛngiya yakɔna yele la Bible lo nsɛnɔ y’Akristo wakombola dia nsɛna lo yoho yɔtɔnɛ l’ɛlɛmbɛ waki Nzambi?

⁹ Ɔtɛkɛta waki Nzambi tokimanyiyaka dia ndjalowanya. Ɔnkɔnɛ, ekɔ ohomba sho salaka wekelo wa lotshimola w’Ɔtɛkɛta waki Nzambi ndo kanaka la wɔ yimba. (Osam. 1:1-3) Ndo nto, wadielo w’Afundelo wa lushi la lushi tokimanyiyaka dia nsala etshikitanu wahombama. (Adia Jakoba 1:22-25.) Ewo k’akambo wa mɛtɛ wa lo Bible mbatokimanyiya dia monga la mbetawɔ ndo mbakeketsha yɛdikɔ yaso ya mbewɔ dia nsala pɛkato ndo ngɛnyangɛnya Nzambi.—Osam. 119:11, 47, 48.

10. Ngande wakoka dɔmbɛlɔ tokimanyiya dia kambɛ Jehowa?

¹⁰ Dia nkɛnɛmɔla lotombo laki Nzambi, sho pombaka nto ‘ntetemala nɔmba.’ (Romo 12:12) Sho pombaka nɔmba Jehowa dia nde tokimanyiya dia mbokambɛ lo yoho yetawɔnde. Ndo nto, sho kokaka mbɔlɔmba nyuma kande k’ekila dia sho monga la mbetawɔ k’efula, wolo wa nshika tanga la ntondo k’ehemba ndo l’akoka wa ‘nembetshiya ɔtɛkɛta w’akambo wa mɛtɛ dimɛna.’ (2 Tim. 2:15; Mat. 6:13; Luka 11:13; 17:5) Oko watendɛka ɔna le she, sho lawɔ pombaka mendɛka le Jehowa Shɛso. Naka sho mbɔlɔmba dia nde tokimanyiya dia sho ndeka mbokambɛ, kete nde ayotokimanyiya. Tatɔfɔnyake pondjo ɔnɛ tayowosanya naka sho mbɔlɔmba. Lo dihole dia nsala ngasɔ, nyɛsɔ tôtombolake oma l’alɔmbɛlɔ aso, towokake losaka, toyangake ɛlɔmbwɛlɔ kande djekoleko etena keso la ntondo k’ehemba ndo tɔ̂lɔmbake dia nde tokimanyiya dia mbokambɛ lo yoho yatombola lokombo lande l’ekila.—Osam. 86:12; Jak. 1:5-7.

11. Ngande watokimanyiya nsanganya y’Akristo dia sho nkɛnɛmɔla lotombo la Nzambi?

¹¹ Nzambi akasha ‘ɔhɔmbɔ wa kɔlamelo ndo wa kɛsɔ’ ɔkɛndɛ wa nama ɛkɔkɔ ande w’oshinga wolo. (Mat. 24:45-47; Osam. 100:3) Ɔhɔmbɔ ɔsɔ mbidjaka yimba lo woho wakɛnɛmɔla asekawɔ ambetawudi lotombo laki Jehowa. Etena katshɔso lo nsanganya, sho tɛnaka dia tekɔ la waonga amɔtshi wahombaso ntshikitanya oko watɔlɔngɔsɔlaka ɔtɛdi w’ahɔndɔ dihɔndɔ diaso dia diɔ ndjotomba dimɛna wonya wayotodilɔta. (Heb. 10:24, 25) Ɔnkɔnɛ, katokomake la wonya lo nsanganya nɛ dia naka tekɔ la mbekelo ka komaka l’ɔkɔngɔ, kete tayohandjaka awui amɔtshi wa lo nyuma wahombaso ndjalowanya ndo mpama lɔkɔ.

NYESƆ TOKOYAKE NZAMBI

12. Ahombaso nsala dia mbokoya Nzambi?

¹² Dia nkɛnɛmɔla lotombo laki Jehowa, sho pombaka ‘mbôkoya.’ (Ef. 5:1) Yoho mɔtshi yakokaso nsala dui sɔ, ele mɛna akambo woho wawaɛnande. Naka sho nsɛna lo yoho yahɔtɔnɛ la lolango laki Nzambi, kete tayɛnya dia hatɔ̂lɛmiya ndo dui sɔ diayonga l’etombelo wa kɔlɔ efula le so. Lam’ele Satana Diabolo mbâkalɔmbɔla andja ɔnɛ, sho pombaka mbidja welo dia mpetsha kɛnɛ kahetsha Jehowa ndo nanga kɛnɛ kalangande. (Osam. 97:10; 1 Joa. 5:19) Sho pombaka mbeya dia yoho yoleki dimɛna ya kambɛ Nzambi, ele nsala akambo tshɛ dia lotombo lande.—Adia 1 Koreto 10:31.

13. Lande na kahombaso mpetsha pɛkato, ndo dui sɔ diayototshutshuya dia nsala na?

¹³ Lam’ele Jehowa petshaka pɛkato, sho lawɔ pombaka kihetsha. Diakɔ diele, sho pombaka mangana la pɛkato etale ndo aha mbetawɔ dia tɔ tahemɛ. Ɛnyɛlɔ, sho pombaka ndjalama diaha ndjokoma waa apɔsta nɛ dia dui sɔ diayotodjɛ wekamu diaha sho nkɛnɛmɔla lotombo la Nzambi. (Euh. 13:6-9) Tatongake pondjo la diɔtɔnganelo la waa apɔsta kana l’onto tshɛ layata di’Okristo mbende ko halɛmiya Nzambi. Kɛsɔ mbahombaso nsala oyadi kânga onto akɔ ekɔ ose nkumbo kaso. (1 Kor. 5:11) Hatotokondja ndoko wahɔ naka sho mbidjanaka tâmu la waa apɔsta kana l’anto wɔnyɔla okongamelo waki Jehowa. Lo mɛtɛ, ayonga tshondo ya wâle le so naka sho mbadiaka akambo wendana la wɔ oyadi l’abuku kana l’Ɛtɛrnɛtɛ.—Adia Isaya 5:20; Mateu 7:6.

14. Dia sho nkɛnɛmɔla lotombo laki Nzambi, dionga diakɔna diahombaso monga la diɔ, ndo lande na?

¹⁴ Monga la ngandji ka shikaa ekɔ yoho ya dimɛna efula yakokaso mbokoya Shɛso lele l’olongo. Lo mɛtɛ, sho pombaka mbokana ngandji l’ɛnyɛlɔ ka Nzambi. (1 Joa. 4:16-19) Ngandji kele lam’asaso mbateyanya oko ambeki waki Yeso ndo oko ekambi waki Jehowa. (Joa. 13:34, 35) Kânga mbele woho weso atshi wa pɛkato mbidjaka ngandji kele lam’asaso lo wâle, sho pombaka ndɔshana la dui sɔ ndo mbokaka asekaso ambetawudi ngandji tena tshɛ. Ɔnkɔnɛ, naka sho mboka anto akina ngandji ndo monga la waonga akina w’Okristo, kete dui sɔ diayotokimanyiya diaha sho ndjasha l’akambo wa kɔlɔ.—2 Pet. 1:5-7.

15. Shɛngiya yakɔna yele la ngandji lo diɔtɔnganelo diele lam’asaso l’anto akina?

¹⁵ Ngandji totshutshuyaka dia salɛ anto akina ɔlɔlɔ. (Romo 13:8-10) Ɛnyɛlɔ, ngandji kokana atshukanyi mbakimanyiyaka dia vɔ ntshikala la kɔlamelo lam’asawɔ. Ngandji kokaso dikumanyi ndo lowando lele la so l’olimu wakambawɔ tokimanyiyaka dia mbakitanyiya ndo mbalɛmbɛ. Ana woka ambutshi awɔ ngandji mbakitanyiyaka, mbalɛmiyaka ndo tɛkɛtaka dimɛna dikambo diawɔ. Naka sho mboka wanyaso Akristo ngandji, kete hatotowaɔsa oko anto w’anyanya kana mbatɛ akambo la lɔsɛndji. (Jak. 3:9) Dikumanyi dioka ɛkɔkɔ waki Nzambi ngandji pombaka monga la memakana otsha le wɔ.—Etsha 20:28, 29.

16. Ngande wakokaso mɛnya dia sho nangaka olimu w’esambishelo?

¹⁶ Sho pombaka nto mboka wanɛ wasambishaso ngandji. L’ɔtɛ wa ngandji k’efula kokaso Jehowa, hatohombe nkɔmɔ etena kahetawɔ anto losango laso. Lo dihole dia sho nsala ngasɔ, sho pombaka ntetemala mbasambisha. Ngandji kayototshutshuya dia sho ndjalɔngɔsɔlaka dimɛna dia sho nkoma embetsha wa tomanamana w’Ɔtɛkɛta waki Nzambi. Naka mɛtɛ sho mbokaka Nzambi ndo wanyaso anto ngandji, kete hatotosambisha paka dia minya okita, koko tayɔsa esambishelo oko diɛsɛ dia woke ndo tayosambishaka l’ɔngɛnɔngɛnɔ.—Mat. 10:7.

TOTETEMALE NTOMBOLA JEHOWA

17. Wahɔ akɔna wakondjaso lo mbeya di’atshi wa pɛkato mbeso?

¹⁷ Anto efula haweye etombelo wa kɔlɔ waya oma lo pɛkato, koko sho mbeyaka. Dui sɔ tokimanyika dia ndɔshana la nsaki kaso ka nsala pɛkato. Mbeyaka di’atshi wa pɛkato mbeso toshaka diaaso dia mbekiya nkum’otema kaso woho wa tɔ totshutshuya dia nsala kɛnɛ kele ɔlɔlɔ etena katoyɛ nsaki ka nsala pɛkato. (Romo 7:22, 23) Lo mɛtɛ, sho kokaka nkɔmɔ, koko Nzambi kokaka tokeketsha dia sho nsala kɛnɛ kele ɔlɔlɔ la ntondo k’oseka dui tshɛ.—2 Kor. 12:10.

18, 19. a) Kakɔna katokimanyiya dia mbidja otshumba lo ta dialɔso la nyuma ya kɔlɔ? b) Yɛdikɔ yakɔna yahombayɛ mbɔsa?

¹⁸ Dia nkɛnɛmɔla lotombo la Jehowa, sho pombaka nto ndɔshana la nyuma ya kɔlɔ. Nzambi akatosha ɛlɔtɔ wa ta wa lo nyuma watokimanyiya dia mbidja otshumba. (Ef. 6:11-13) Koko Satana ekɔ lo ntetemala tohemba dia sho mbotombola lo dihole dia ntombola Jehowa. Nde tetemalaka mbidja welo dia tolanyɛ diɔtɔnganelo diele lam’asaso la Jehowa. Ande woho washama Satana sɔnyi lo menda woho watshikala miliyɔ y’Ɛmɛnyi wa Jehowa wele kema kokele la kɔlamelo ndo watetemalawɔ nkɛnɛmɔla lotombo lande lee! Ɔnkɔnɛ, nyɛsɔ totetemale ntombola Jehowa l’ɛnyɛlɔ ka ditongami dia l’olongo diata ɔnɛ: “Khumesu la [Nzambi k]asu, we kukuki dia nungula lutumbu la kenemo la wulu, ne dia we kakatungi diango tshe. Dio diakatungama uma lu lulangu laye.”—Eny. 4:11.

¹⁹ Nyɛsɔ sho tshɛ toyashikikɛ dia ntetemala nkɛnɛmɔla lotombo laki Jehowa kânga l’asa eko la nyɔi. Nde mɛtɛ ngɛnangɛnaka etena kadja efula k’anto welo dia mbôkoya ndo kasalawɔ la wolo dia nkɛnɛmɔla lotombo lande. (Tuk. 27:11) Nyɛsɔ tɔshi yɛdikɔ yakɔshi Davidi lakate ate: “Dimi layukandulaka l’utema [ami] tshe, we Khumadiondjo; layutumbulaka lukumbu laye pundju, we [Nzambi k]ami.” (Osam. 86:12) Ande woho walomɔlomɔso dia mɛna lushi layotɔkɛnɛmɔla lotombo la Jehowa lo yoho ya kokele ndo woho wayotôtombolaka pondjo pondjo lee! Anto tshɛ wele l’okitanyiya wayonga l’ɔngɛnɔngɛnɔ wa pondjo. Onde wɛ ekɔ lo nkɛnɛmɔla lotombo laki Jehowa Nzambi kakianɛ ndo ayotetemala nsala dui sɔ pondjo pondjo?

[Esato wa lo lɛkɛ 27]

Onde wɛ kɛnɛmɔlaka lotombo lo Jehowa lo toho tɔnɛ?