Dikumanyi diekɔ ‘asekaso ekambi wakamba dia ɔngɛnɔngɛnɔ aso’

1. Kakɔna kakakonya Pɔɔlɔ dia nde ngɛnangɛna lo dikambo di’Akristo wa la Kɔrɛtɔ?

LO ƆNƆNYI wa 55 T.D., etena kaki ɔpɔstɔlɔ Pɔɔlɔ lo dibongo dia l’osomba wa Tɔrɔa, dui dimɔtshi diakasalemaka l’etshumanelo k’ase Kɔrɛtɔ diakoonyangiyaka efula. Yema tshitshɛ la ntondo k’ɔnɔnyi ɔsɔ, nde aki la paa l’asolo dia mboka ɔnɛ anangɛso wa lɛkɔ wakawanaka lam’asawɔ. Oko wakandayakiyanyaka efula dikambo diawɔ, nde akaatomɛ mukanda dia mbangola. (1 Kɔr. 1:11; 4:15) Nde akatome ndo otshindedi ande Tito le wɔ ndo akawotɛ dia nde ndjowewoya nsango y’oma lɛkɔ. Ɔpɔstɔlɔ Pɔɔlɔ akakongaka Tito la Tɔrɔa alomɔlomɔ dia mboka kɛnɛ kakasale ase Kɔrɛtɔ l’ɔkɔngɔ wa vɔ nongola mukanda ande. Koko Pɔɔlɔ akanyange efula nɛ dia Tito kondjokalola le nde. Kakɔna kakandahombe nsala? Nde akɔshi yɛdikɔ ya ntshɔ la Makɛdɔniya ndo nde akatonga l’ɔngɛnɔngɛnɔ efula etena kakandatohomana la Tito lɛkɔ. Tito akatɛ Pɔɔlɔ di’anangɛso wa la Kɔrɛtɔ wakakambe l’alako waki lo mukanda wakandatomɛ ndo ɔnɛ vɔ wakalomɔlomɔka dia mbɛna. Etena kakoke Pɔɔlɔ nsango y’amɛna shɔ, nde “akaleke ngɛnangɛna.”​—2 Kɔr. 2:12, 13; 7:5-9.

2. a) Kakɔna kakafundɛ Pɔɔlɔ ase Kɔrɛtɔ lo kɛnɛ kendana la mbetawɔ ndo l’ɔngɛnɔngɛnɔ? b) Ambola akɔna wayangaso nsɛdingola lo sawo nɛ?

² Yema tshitshɛ l’ɔkɔngɔ, Pɔɔlɔ akayotomɛ ase Kɔrɛtɔ mukanda wa hende. Lo mukanda akɔ, nde akawatɛ ate: “Aha ɔnɛ sho tambahemɛ mbetawɔ kanyu, koko sho tekɔ asekanyu ekambi wakamba dia nyu monga l’ɔngɛnɔngɛnɔ, nɛ dia oma lo mbetawɔ kanyu mbatshikalanyu nge.” (2 Kɔr. 1:24) Kakɔna kakalange Pɔɔlɔ mbuta oma l’ɛtɛkɛta ɛsɔ? Ndo wetshelo akɔna wakoka dikumanyi di’Akristo nkondja ɛlɔ kɛnɛ oma l’ɛtɛkɛta ɛsɔ?

MBETAWƆ NDO ƆNGƐNƆNGƐNƆ ASO

3. a) Kakɔna kakalange Pɔɔlɔ mbuta etena kakandafunde ate: “Oma lo mbetawɔ kanyu mbatshikalanyu nge”? b) Ngande wayela dikumanyi dia nshi nyɛ ɛnyɛlɔ ka Pɔɔlɔ?

³ Pɔɔlɔ akatɛkɛta dia waonga ahende w’ohomba wa l’ɔtɛmwɛlɔ aso, mbuta ate mbetawɔ ndo ɔngɛnɔngɛnɔ. Tohɔ dia lo kɛnɛ kendana la mbetawɔ, nde akafunde ate: “Aha ɔnɛ sho tambahemɛ mbetawɔ kanyu, . . . nɛ dia oma lo mbetawɔ kanyu mbatshikalanyu nge.” Lo nkamba l’ɛtɛkɛta ɛsɔ, Pɔɔlɔ akɛnyaka di’anango wa la Kɔrɛtɔ waki nge lo nyuma, aha l’ɔtɛ ande kana w’onto okina, koko l’ɔtɛ wa mbetawɔ kawɔ hita le Nzambi. Diakɔ diele, Pɔɔlɔ kombidja mbetawɔ kaki l’Akristo wa la Kɔrɛtɔ taamu, ndo nde kookombola nsala dui sɔ. Nde aki l’eshikikelo ɔnɛ vɔ waki Akristo wele la kɔlamelo ndo wakasalaka akambo w’ɛlɔlɔ. (2 Kɔr. 2:3) Ɛlɔ kɛnɛ, dikumanyi di’Akristo ndjelaka ɛnyɛlɔ ka Pɔɔlɔ lo mbeya di’anangɛwɔ wekɔ la mbetawɔ ndo wekɔ lo kambɛ Nzambi l’eyango w’amɛna. (2 Tɛs. 3:4) Lo dihole dia vɔ mbidjɛ ase etshumanelo dɛmbɛlɛmbɛ diawɔ hita, dikumanyi kambaka la Afundelo ndo ndjelaka ɛlɔmbwɛlɔ kasha okongamelo waki Jehowa. Laadiko dia laasɔ, dikumanyi dia nshi nyɛ bu ewandji wahemɛ mbetawɔ y’anangɛwɔ.​—1 Pet. 5:2, 3.

4. a) Kakɔna kakalange Pɔɔlɔ mbuta etena kakandafunde ɔnɛ: “Sho tekɔ asekanyu ekambi wakamba dia nyu monga l’ɔngɛnɔngɛnɔ”? b) Ngande wokoya dikumanyi dia nshi nyɛ ɛnyɛlɔ kande?

⁴ Pɔɔlɔ akayofunda nto ate: “Sho tekɔ asekanyu ekambi wakamba dia nyu monga l’ɔngɛnɔngɛnɔ.” Lo nkamba l’ɛtɛkɛta ɛsɔ, nde akatɛkɛta dikambo diande ndamɛ ndo di’atshindedi ande. Lande na kataso ngasɔ? Nɛ dia lo mukanda akɔ waamɛ, Pɔɔlɔ akohola ase Kɔrɛtɔ dikambo di’atshindedi ande ahende etena kakandafunde ate: “Yeso lakatanyosambisha dimi la Silvano la Timɔte.” (2 Kɔr. 1:19) Ndo nto, etena tshɛ kakakambaka Pɔɔlɔ la tshɛkɛta “aseka[mi] ekambi” lo mikanda ande, nde akatɛkɛta di’atshindedi ande, mbuta ate Apolo, Akula, Piriskila, Timɔte, Tito ndo akina. (Rɔmɔ 16:3, 21; 1 Kɔr. 3:6-9; 2 Kɔr. 8:23) Laasɔ, lo mbuta ɔnɛ: “Sho tekɔ asekanyu ekambi wakamba dia nyu monga l’ɔngɛnɔngɛnɔ,” Pɔɔlɔ akashikikɛka ase Kɔrɛtɔ dia nde l’asekande wakasalaka la wolo di’ase etshumanelo tshɛ monga l’ɔngɛnɔngɛnɔ. Ɛlɔ kɛnɛ, dikumanyi di’Akristo salaka woho akɔ waamɛ. Vɔ salaka kɛnɛ tshɛ kewɔ l’akoka dia nkimanyiya anangɛwɔ l’akadiyɛwɔ dia vɔ ‘kambɛ Jehowa olimu l’ɔngɛnɔngɛnɔ.’​—Osam. 100:2; Flpɛ. 1:25.

5. Tayanga nsɛdingola ekadimwelo wa ambola akɔna ndo lo na ahombaso mbidja yimba?

⁵ Atete edja, wakambola anangɛso ndo akadiyɛso amɔtshi wele l’ohetoheto ndo wodjashi lo wedja w’otshikitanyi dimbola nɛ: “Ɛtɛkɛta wa ngande ndo waonga akɔna wa dikumanyi wakanyokimanyiya dia nyu mfudia ɔngɛnɔngɛnɔ anyu?” Etena katatasɛdingola kɛnɛ kakate Akristo asɔ, tɛdike kɛnɛ kakawakadimola la kɛnɛ kototokadimola otondonga sho mbakawambola dimbola sɔ. Oma laasɔ, ko sho nkana yimba lo woho wakokaso mbisha lonya di’ɔngɛnɔngɛnɔ monga l’etshumanelo kaso.a

“NYOSHA PIRISI, KADIYƐSO KA NGANDJI MƆYƆ”

6, 7. a) Naa yoho mɔtshi yakoka dikumanyi mbokoya Yeso, Pɔɔlɔ ndo ekambi waki Nzambi ekina? b) Lande na kele mbelɛka anangɛso l’akadiyɛso lo nkombo yawɔ fudiaka ɔngɛnɔngɛnɔ awɔ?

⁶ Anangɛso l’akadiyɛso efula mbutaka ɔnɛ ɔngɛnɔngɛnɔ awɔ fulaka etena kayasha dikumanyi le wɔ l’onto ndo l’onto. Yoho mɔtshi ya dimɛna yakoka dikumanyi nsala dui sɔ ele, ndjela ɛnyɛlɔ ka Davidɛ, Elihu ndo ka Yeso. (Adia 2 Samuele 9:6; Jobo 33:1; Luka 19:5.) Ekambi waki Jehowa ɛsɔ tshɛ wakɛnya woho wakawayashaka le anto akina lo mbaelɛ lo nkombo yawɔ. Ɔpɔstɔlɔ Pɔɔlɔ nde lawɔ akɛnya ohomba wa mbohɔka ndo mbelɛka asekande ambetawudi lo nkombo yawɔ. Nde akakomiya mukanda ande ɔmɔtshi lo mbisha anango l’akadiyɛnde ndekana 25 mɔyɔ lo mbaelɛ lo nkombo yawɔ. L’atei awɔ mbaki ndo Pirisi laki kadiyɛso k’Okristo lele Pɔɔlɔ akate lo dikambo diande ate: “Nyosha Pirisi, kadiyɛso ka ngandji mɔyɔ.”​—Rɔmɔ 16:3-15.

⁷ Dikumanyi dimɔtshi diekɔ l’okakatanu dia mbohɔ nkombo y’ɛkɔkɔ. Koko, etena kasalawɔ la wolo dia mbelɛka asekawɔ ambetawudi tshɛ lo nkombo yawɔ, ekɔ oko dikumanyi wekɔ lo mbatɛ ɔnɛ: ‘Nyu nyekɔ ohomba efula le so.’ (Etum. 33:17) Dikumanyi fudiaka ɔngɛnɔngɛnɔ w’asekawɔ ambetawudi etena kawaelɛwɔ lo nkombo yawɔ dia vɔ mbisha kɔmatɛrɛ lo Wekelo wa Tshoto y’Etangelo kana lo nsanganya kina.​—Ɛdika la Joani 10:3.

“NDE AKAKAMBE ELIMU EFULA WA WOLO LO NKUMADIƆNDJƆ”

8. Naa yoho mɔtshi ya dimɛna yakokoya Pɔɔlɔ Jehowa nde la Yeso?

⁸ Pɔɔlɔ akɛnyaka nto woho wakandayashaka le anto akina lo mbawandola l’otema ɔtɔi, nɛ dia ɔsɔ ekɔ yoho kina yakoka mfudia ɔngɛnɔngɛnɔ w’asekaso ambetawudi. Lo mukanda akɔ waamɛ wakandaafundɛ, Pɔɔlɔ akɛnya nsaki kaki la nde ka nkamba olimu di’anango monga la ɔngɛnɔngɛnɔ lo mbatɛ ate: “Lekɔ lo ndjafuna efula dikambo dianyu.” (2 Kɔr. 7:4) Aha la taamu, ɛtɛkɛta wa lowando ɛsɔ wakasalanganya etema w’anango wa la Kɔrɛtɔ. Pɔɔlɔ akakɛnɛmɔla nsaki kakɔ kaamɛ le ase tshumanelo dikina. (Rɔmɔ 1:8; Filpɛ. 1:3-5; 1 Tɛs. 1:8) Koko l’ɔkɔngɔ wa nde ntɛkɛta dikambo dia Pirisi lo mukanda wakandafundɛ ase etshumanelo ka Rɔma, Pɔɔlɔ akakotsha ate: “Nde akakambe elimu efula wa wolo lo nkumadiɔndjɔ.” (Rɔmɔ 16:12) Ande woho wakakeketshama kadiyɛso ka kɔlamelo kɛsɔ oma l’ɛtɛkɛta ɛsɔ lee! Lo mandola anto akina, Pɔɔlɔ akokoya Jehowa nde la Yeso.​—Adia Makɔ 1:9-11; Joani 1:47; Ɛny. 2:2, 13, 19.

9. Lande na kele nkamba l’ɛtɛkɛta wa lowando fudiɛka ase etshumanelo ɔngɛnɔngɛnɔ?

⁹ Dikumanyi dia nshi nyɛ vɔ lawɔ mandolaka anangɛwɔ l’akadiyɛwɔ. (Tuk. 3:27; 15:23) Etena tshɛ kaandola ekumanyi ɔkɔkɔ ɔmɔtshi, ekɔ oko nde ekɔ lo mbotɛ ate: ‘Lekɔ lo mɛna kɛnɛ kasalayɛ, dimi ndjakiyanya dikambo diayɛ.’ Dikumanyi le, nyeye di’anangɛso l’akadiyɛso kombolaka dia nyu mbawandolaka lo kɛnɛ kasalawɔ. Kadiyɛso kɛmɔtshi kaya l’ɛnɔnyi 55 akate ate: “Lɛnɛ akambami olimu lɛnɛ, anto hawandɔna kaanga yema ndo wekɔ la yimba ya shɛmanedi. Ɔnkɔnɛ, etena kamandola ekumanyi kɛmɔtshi l’ɔtɛ wa dui diosadimi l’etshumanelo, kɛsɔ keketshakami efula, ndo dimi ndjaokaka dia Shɔmi lele l’olongo mbokakami ngandji.” Ɔnangɛso okina loodia ana ahende ndamɛ akayaoke woho akɔ waamɛ etena kakawandola ekumanyi kɛmɔtshi l’otema ɔtɔi. Shɛngiya yakɔna yakonge la dui sɔ le ɔnangɛso ɔsɔ? Nde mbutaka ate: “Ɛtɛkɛta wakambutɛ ekumanyi kɛsɔ wakafudia ɔngɛnɔngɛnɔ ami.” Lo mɛtɛ, etena kandola dikumanyi asekawɔ ambetawudi, vɔ mbakimanyiyaka dia kambɛ Nzambi l’ɔngɛnɔngɛnɔ. Dui sɔ kimanyiyaka nto asekawɔ ambetawudi dia vɔ ntetemala nkɛndakɛnda lo mboka ka lɔsɛnɔ ‘aha la nkɔmɔ.’​—Is. 40:31.

“NYOLAMAKE . . . ETSHUMANELO KA NZAMBI”

10, 11. a) Ngande wakoka dikumanyi mbokoya Nɛhɛmiya? b) Kakɔna kayokimanyiya dikumanyi dia vɔ nkeketsha mbetawɔ k’anangɛwɔ l’akadiyɛwɔ etena kawaembolawɔ?

¹⁰ Naa yoho yoleki dimɛna yakoka dikumanyi mɛnya woho wayashawɔ le anangɛwɔ l’akadiyɛwɔ dia mbafudiɛ ɔngɛnɔngɛnɔ? Ele lo nsala la wolo dia nkeketsha wanɛ tshɛ wele la ohomba w’ekeketshelo lo etshumanelo. (Adia Etsha 20:28.) Etena kasala dikumanyi ngasɔ, vɔ mbokoyaka alami w’ɛkɔkɔ wa lo nshi y’edjedja. Ɛnyɛlɔ, tende kɛnɛ kakasale Nɛhɛmiya laki omendji wa kɔlamelo etena kakandɛnyi di’ase Juda amɔtshi wambɔkɔmɔ lo nyuma. Ɔkɔndɔ mɛnya dia aha la ntshimbatshimba, nde akaakeketsha. (Neh. 4:14) Woho akɔ waamɛ mbele ndo ɛlɔ kɛnɛ, dikumanyi dia lo tshumanelo salaka woho akɔ waamɛ, lo nkimanyiya asekawɔ ambetawudi dia vɔ ntshikala nge lo mbetawɔ. Dia mbakeketsha, vɔ membolaka anangɛwɔ l’akadiyɛwɔ la wakawɔ etena kakondjawɔ diaaso. Etena kasalawɔ wembwelo w’ɛkɔkɔ wa ngasɔ, dikumanyi “nomɔlomɔka dia [mba]sha woshasha ɔmɔtshi.” (Rɔmɔ 1:11) Ko kakɔna kayokimanyiya dikumanyi dia vɔ nsala dui sɔ?

¹¹ La ntondo ka vɔ ntshɔ dia tembola ɔkɔkɔ ɔmɔtshi, dikumanyi pombaka mbɔsa etena ka nkana yimba lo dikambo diande. Ɛnyɛlɔ, lo ndjaoka ambola wele oko wanɛ: Ekakatanu akɔna wele la nde? Dako diakɔna diakoka mbokeketsha? Avɛsa ndo bɛnyɛlɔ di’anto akɔna wa lo Bible diakoka mbokimanyiya lo okakatanu wele la nde? Naka dikumanyi taakanyi yimba ntondo lo akambo asɔ, kete vɔ wayoleka nkimanyiya ɔnɛ lotshwewɔ dia tembola, lo dihole dia ntɛkɛta akambo lahahɛ. Etena kasawolawɔ la ɔkɔkɔ wotshwewɔ dia tembola, dikumanyi pombaka mbosha diaaso dia nde ntɛkɛta ndo mbohokamɛ la yambalo tshɛ. (Jak. 1:19) Kadiyɛso kɛmɔtshi akate ate: “Ekɔ tshondo y’ekeketshelo etena kahokamɛ dikumanyi ɔkɔkɔ la yambalo tshɛ.”—Luka 8:18.

12. Waa na wele la ohomba w’ekeketshelo l’etshumanelo, ndo lande na?

¹² Ko laasɔ, dikumanyi waa na wahombawɔ membola? Ɔpɔstɔlɔ Pɔɔlɔ akalake wanyande dikumanyi dia vɔ ‘namaka lemba tshɛ l’ɛkɔkɔ.’ Lo mɛtɛ, anto tshɛ wa l’etshumanelo wekɔ l’ohomba w’ekeketshelo, mbidja ndo apandjudi la ambatshi mboka wambokamba la kɔlamelo tshɛ l’edja k’ɛnɔnyi efula. Lande na kele anto asɔ tshɛ la ohomba w’ekeketshelo ka lo nyuma? Nɛ dia lo tena dimɔtshi, kaanga anto wele la kɔlamelo kɔmɔka l’ɔtɛ wadiɛnɛwɔ la tɔsɛngiya ta lo dikongɛ nɛ dia kɔlɔ. Dia mɛnya lande na kele kaanga ekambi waki Nzambi wele la lonyuma la wolo koka monga l’ohomba w’ekimanyielo lo tena dimɔtshi, nyɛsɔ tɔsɛdingole kɛnɛ kakakomɛ nkumekanga Davidɛ.

“ABISHAI . . . AKASHIMBELA DAVIDI”

13. a) Etena kakɔna kakalange Ishibi-Benobe ndjaka Davidɛ? b) Ngande wakayokoma Abishai lo mbitsha Davidɛ?

¹³ Yema tshitshɛ l’ɔkɔngɔ w’ɔlɔngɔlɔngɔ Davidɛ kitama esɔ dia monga nkumekanga, nde akatshu dia tɔlɔ la Ngɔliyatɛ, dikongote dia lo dioho di’ase Efarayimɛ. La dihonga tshɛ, Davidɛ akadiake dikongote sɔ. (1 Sam. 17:4, 48-51; 1 Ek. 20:5, 8) L’ɔkɔngɔ w’ɛnɔnyi efula, etena kakandalɔka nde l’ase Filistiya, Davidɛ akahomana nto la dikongote dikina diakawelɛka Ishibi-Benobe laki nde lawɔ lo dioho di’ase Efarayimɛ. (2 Sam. 21:16) Koko mbala kɛsɔ, dikongote sɔ aki suke la ndjaka Davidɛ. Lande na? Aha l’ɔtɛ w’ɔnɛ Davidɛ komonga la dihonga, koko l’ɔtɛ wakinde ambɔlɛmba. Bible mbutaka ɔnɛ: “Davidi aka[lɛmbɛ] dimba.” Kam’akɛnyi Ishibi-Benobe ɔnɛ Davidɛ ambɔlɛmba, nde “aki la kanyi ya ndjaka Davidi.” Koko la ntondo ka nde mbooka dikɔnga, mbala kakɔ ɔtɔi “Abishai, on’a Zeruya, akashimbela Davidi, akakomola [dikongote diakɔ d’]usi Filistiya akûdiaki.” (2 Sam. 21:15-17) Ande woho wakandatsha Davidɛ lee! Ohonyokanyiya lowando lakahombe Davidɛ monga la lɔ otsha le Abishai lo woho wakandawodje yimba ndo wakandokokɛ oma lo waale! Wetshelo akɔna wakondjaso oma l’ɔkɔndɔ ɔsɔ?

14. a) Kakɔna katokimanyiya dia ndɔshana l’ekakatanu wa wolo? b) Ngande wakoka dikumanyi nkeketsha ndo nkimanyiya anto akina dia vɔ monga l’ɔngɛnɔngɛnɔ? Sha Ɛnyɛlɔ.

¹⁴ L’andja w’otondo ɛlɔ kɛnɛ, oko weso ekambi waki Jehowa, tekɔ lo ntetemala nsambisha lokumu l’ɔlɔlɔ kaanga mbatodjɛ Satana l’anto ande wekamu. Amɔtshi l’atei aso wekɔ lo mpomana l’ekakatanu wa wolo, koko lo ndjaɛkɛ tshɛ le Jehowa, sho shikaka tanga la ntondo k’ekakatanu ndo mbatondoyaka. Koko, ɔlɔshamelo wetshaka wenya walɔshanaso la tɔsɛngiya ta l’andja waki Satana ɔnɛ koka tɔkɔmɔla lo tena dimɔtshi. Etena kakɔmɔso, sho ndjongaka ko taya bu ndo l’akoka wa ntondoya ekakatanu wakokaso ntondoya esadi eto. Lo tena dia ngasɔ, ekimanyielo k’oma le ekumanyi kokaka nyomosha onto ɔngɛnɔngɛnɔ ndo ekeketshelo. Ombatshi mboka ɔmɔtshi wele l’ɛnɔnyi 65 mbutaka ate: “Dimi mbohɔka dia l’etena kɛmɔtshi, dimi kondjaokaka dimɛna ndo olimu w’esambishelo wakatatɛ nɛndjami. Kam’akɛnyi ekumanyi kɛmɔtshi dui sɔ, nde akasawola la mi. Nde akambisha alako efula w’oma lo Bible wakakeketsha. Lam’ele lakakambe l’alako akɔ, lakakondja ɛtshɔkɔ efula.” Nde kotshaka ate: “Lekɔ la lowando l’efula le ekumanyi kɛsɔ l’ɔtɛ wa ngandji kakandamboke, wakandambidje yimba, wakandɛnyi wɛɔdu ami ndo wakandasasikɔ dia kimanyiyami.” Lo mɛtɛ, etema aso salanganaka lo mbeya ɔnɛ tekɔ la dikumanyi diatodja yimba ndo ‘diatokimanyiya,’ lo ɛnyɛlɔ k’Abishai.

“[NYEYE] WOKE WOKE WA NGANDJI KELE LA MI OTSHA LE NYU”

15, 16. a) Lande na kakalangemaka Pɔɔlɔ efula oma le asekande ambetawudi? b) Lande na kokaso dikumanyi dia l’etshumanelo ngandji?

¹⁵ Dikumanyi mɛtɛ wekɔ lo nkamba olimu wa wolo. Lo tena dimɔtshi, vɔ ndalaka engondo dia nɔmba Nzambi dikambo di’ɛkɔkɔ kana dia mbakimanyiya lo nyuma. (2 Kɔr. 11:27, 28) Koko vɔ kotshaka ɛkɛndɛ awɔ ɛsɔ dimɛna ndo l’ɔngɛnɔngɛnɔ, oko wakasale ɔpɔstɔlɔ Pɔɔlɔ. Nde akafundɛ ase Kɔrɛtɔ ate: “Layokimɔ kɛnɛ kele la mi l’ɔngɛnɔngɛnɔ tshɛ ndo layoyakimɔ tshɛ dikambo dia anima anyu.” (2 Kɔr. 12:15) Diɛsɛ la ngandji kakandokaka anango l’akadiyɛnde, Pɔɔlɔ akayakimɔ tshɛ dia mbakeketsha lo nyuma. (Adia 2 Kɔrɛtɔ 2:4; Flpɛ. 2:17; 1 Tɛs. 2:8) Diakɔ mɛtɛ mbakandalangemaka efula oma le wɔ.​—Etsha 20:31-38.

¹⁶ Oko weso ekambi waki Nzambi, sho lawɔ mbokaka dikumanyi di’Akristo ngandji ndo kaloyaka Jehowa losaka lo woho wakandatoshawɔ dia vɔ tokokɛka. Vɔ tofudiɛka ɔngɛnɔngɛnɔ lo woho wayashawɔ le so l’onto ndo l’onto. Woho wembolawɔ ɛkɔkɔ tokeketshaka efula. Tekɔ nto la lowando lo woho wewɔ suke dia tokimanyiya lo tena diadiɛnɛso la tɔsɛngiya t’oma l’andja ɔnɛ. Lo mɛtɛ, dikumanyi di’Akristo diekɔ ‘asekaso ekambi wakamba di’ɔngɛnɔngɛnɔ aso.’