Esambishelo kokongɛmi dimɛna mongaka l’etombelo w’ɛlɔlɔ

María Isabel ekɔ opandjudi wele l’ohetoheto wodjashi l’osomba wa San Bernardo la Amɛrikɛ wa lo sidɛ lo wodja wa Chilie. Nde la nkumbo kande wekɔ lo tosamba t’ase Mapuche. Nkumbo kɛsɔ k’otondo wakasukɛ l’ohetoheto tshɛ welo wakadjama dia mbata etshumanelo k’oyoyo l’ɔtɛkɛta wa Mapuche kelɛwɔ nto ɔnɛ Mapudungun.

Etena kakawewoya ɔnɛ Eohwelo ka nyɔi ka Kristo kayosalema lo Mapudungun ndo kakawate ɔnɛ akatshi wa leeta 2000 wekɔ lo ɔtɛkɛta awɔ, María Isabel akakane yimba lo dikambo sɔ. Kakɔna kakandahombe nsala dia nsukɛ yɛdikɔ shɔ? Nde akohɔ bɛnyɛlɔ di’ɛlɔngɔlɔngɔ l’esekaseka wakakondja etombelo w’ɛlɔlɔ lo nsambisha asekawɔ wa la kalasa ndo embetsha awɔ. Nde akasawola l’ambutshi ande dikambo sɔ ndo vɔ tshɛ wakɔshi yɛdikɔ ya María Isabel nsala ekongelo kɛmɔtshi ka woho wayondotokahɛ anto akatshi wa leeta la kalasa. Kakɔna kakandasale?

Ntondotondo, nde akalɔmɛ ewandji wa la kalasa lotshungɔ la nde nkitsha akatshi wa leeta la soko dia lokombo la kalasa. Vɔ wakawosha lotshungɔ ndo wakawandola efula l’ɔtɛ wa dihonga diande. Lushi lɔmɔtshi la pindju, dikitɛlɛ dia kalasa akasha diewoyelo lo kɛnɛ kendana la akatshi wa leeta akɔ wakatɔlɛ María Isabel.

Ɔnkɔnɛ María Isabel akalɔmbɛ lotshungɔ la nde mbɔtɔ l’oseka kalasa tshɛ. L’ɔkɔngɔ w’embetsha mbosha lotshungɔ, nde akambola ambeki tshɛ dia mbeya kana amɔtshi l’atei awɔ wakeyaka ntɛkɛta Mapudungun. Nde mbutaka ate: “Lakafɔnyaka dia aki paka ambeki 10 kana 15 ato mbakeyaka ntɛkɛta Mapudungun, ko tete le waki efula ka mamba ndo lakakahe akatshi wa leeta ndekana 150.”

“NDE AKAFƆNYA ƆNƐ DIMI LAKI OPALANGA W’ONTO”

Mama kɛmɔtshi kakɛnyi akatshi wa leeta wakawakitsha la soko dia kalasa, akayombola dia mbeya onto akɔna ahombande mimbola dia mbolembetshiya kɛnɛ kayanga salema. Ohokanyiya woho wakandaambe etena kakawawɛnyanya la yana ya yimato yele l’ɛnɔnyi dikumi l’ɛmɔtshi! María Isabel mbutaka la yema y’ɔmɔnɔmɔnɔ ate: “Nde akafɔnya ɔnɛ dimi laki opalanga w’onto.” L’ɔkɔngɔ wa nde mbosha dikatshi dimɔtshi dia leeta ndo mbolembetshiya lo tshena pe, María Isabel akawombola dihole diadjasɛnde l’oyango wa nde l’ambutshi ande ndjotshɔ dia towembola ndo toolembetshiya akambo akina efula wendana la Diolelo dia Nzambi. Ande ɔngɛnɔngɛnɔ waki l’apandjudi 20 waki l’etshumanelo kasala nsanganya lo Mapudungun etena kakawɛnyi mama kɛsɔ ayaye l’anto akina 26 oya lo Eohwelo lee! Ɛlɔ kɛnɛ, etshumanelo kakɔ kaya l’anto efula.

Oyadi ɛnɔnyi akɔna wele la yɛ, shi wɛ kokaka mbɔsa tɛdikɔ takɔ taamɛ dia mbelɛ asekayɛ wa la kalasa kana wa l’olimu oya lo Eohwelo, lo sawo dia lo sɛkɛ kana lo Losanganya la distrikɛ? Shi wɛ kokaka nsala eyangelo l’ekanda aso dia mbeya akambo amɔtshi wakasalema wakoka kokimanyiya dia wɛ nsala ekongelo ka ngasɔ kele l’etombelo w’amɛna? Ndo nto, lɔmba Jehowa dia nde kosha nyuma k’ekila kayokokimanyiya dia wɛ monga la dihonga dia ntɛkɛta akambo wendana la nde. (Luka 11:13) Naka wɛ nsala ngasɔ, kete wɛ lawɔ ayonga l’ɔngɛnɔngɛnɔ ndo ayokeketshama oma l’etombelo w’ɛlɔlɔ waya oma lo nsambisha lo yoho yokongɛmi dimɛna.