‘Otamba wa ntakanya’ keema le wanɛ woka Jehowa ngandji

1. Lo ɛnyɛlɔ k’ondawi wa lowango, ngande wakokaso mɛnya dia tamboyashikikɛ diaha mpekɔ?

LAM’AKINDE eke kodikotshaka ɛnɔnyi dikumi l’ɛmɔtshi, Mary Decker akeyama l’andja w’otondo l’ɔtɛ wakinde ondawi wa manana. Anto tshɛ wakataka ɔnɛ nde mbayonga pidi lo lowango l’ekomelo la mɛtrɛ 3 000 lakandahombe sɛmanɛ l’anto akina lo 1984. Koko, nde kondjokoma l’oshidi w’ekomelo. Nde akatakana lo lokolo laki ondawi ɔmɔtshi ko akakɔ aha la nshidiya esakelo kande ka lowango. Wakawɛmbɛ atalele nɛ dia nde akahomɔ ndo kokoka ntetemala ndawɔ. Koko, Mary kotshika kɛnyɔ shɔ. L’ɔkɔngɔ wa ngɔndɔ mɔtshi, nde akanyomoyotatɛ ndawɔ nto ndo lo 1985, nde akayodjaka otshumba lo lowango lakandasɛmanɛ la wamato akina.

2. Lo yoho yakɔna yatalawɔ Akristo wa mɛtɛ, ndo lo na ahombawɔ mbika washo?

² Oko weso Akristo, sho tshɛ tekɔ lo talawɔ lowango la didjidji ndo sho pombaka ndawɔ l’oyango wa nkondja difuto. Lo lowango laso, aha ndawɔ esadi esadi mbele ohomba dia mbidja otshumba. Ndo lɔ keema lowango lele oko onto latalawɔ dia nkɔkɔla demba. Koko, lɔ lekɔ lowango lahomba onto monga l’etete dia mbidja otshumba. Ɔpɔstɔlɔ Pɔɔlɔ akakambe la tshɛkɛta ondawi wa lowango lo mukanda ande ɔmɔtshi wakandafundɛ Akristo wa la Kɔrɛtɔ, osomba wakanyanyemaka efula l’awui wa tɔkɛnyɔ. Nde akafunde ate: “Onde nyu hanyeye dia wanɛ walawɔ lo tɔkɛnyɔ ta lowango ndawɔka vɔ tshɛ, koko onto ɔtɔi oto mbalongola difuto? Nyolawɔ woho wa nyu nongola difuto.”​—1 Kɔr. 9:24.

3. Andawi akɔna wakoka nkondja difuto dia lɔsɛnɔ la pondjo?

³ Bible tɔlɔmbaka dia sho ndawɔ lowango la didjidji lɔsɔ. (Adia 1 Kɔrɛtɔ 9:25-27.) Difuto diayokondja Akristo w’akitami kana ɛkɔkɔ ekina ele lɔsɛnɔ la pondjo. Otshikitanyi la tɔkɛnyɔ efula ta l’andja ɔnɛ, wanɛ tshɛ walawɔ lowango lɔsɔ l’ekikelo tshɛ polo l’ekomelo mbayokondja difuto. (Mat. 24:13) Andawi wahatokondja difuto ele wanɛ wahalawɔ lo ndjela ɛlɛmbɛ ndo wahakikɛ polo ndo l’ekomelo. Ndo nto, paka oma lo lowango lɔsɔ loto mbakoka anto nkondja lɔsɛnɔ la pondjo.

4. Kakɔna ketɛ lowango laso l’otsha lo lɔsɛnɔ la pondjo dui dia wolo?

⁴ Bu dui dia tshitshɛ di’ondawi nkoma l’oshidi w’ekomelo. Dui sɔ mbɔlɔmbaka dia nde ndjaekiya ndo ndjashikikɛ dia nkotsha oyango akɔ. Yeso Kristo oto mbakasake esakelo kande ka lowango polo ndo l’ekomelo aha la ntakana kaanga mbala ɔtɔi. Koko Jakɔba y’ombeki ande akafunde dia ambeki wa Kristo “tshɛ takanaka mbala efula.” (Jak. 3:2) Ɔsɔ ekɔ dui dia mɛtɛ! Sho tshɛ takanaka l’ɔtɛ wa munga yaso hita kana y’anto akina. Ɔnkɔnɛ, koka tokomɛ lo tena dimɔtshi dia sho ntakana, ntshingatshinga ndo kaanga nkɔ. Koko kaanga tambɔkɔ, tetɔ ndo totetemale la lowango laso. Apandjudi amɔtshi wakakɔ wolo wakakimanyiyama dia mbetɔ ndo wakatetemala la lowango lawɔ polo l’ekomelo. Ɔnkɔnɛ, lo tena dimɔtshi kana mbala efula, sho kokaka ntakana kana nkɔ.​—1 Khum. 8:46.

TOTETEMALE NDAWƆ OYADI TAMBOTAKANA

5, 6. a) Lande na kele ‘otamba wa ntakanya’ keema le Okristo, ndo kakɔna kakoka mbokimanyiya dia nde ‘mbetɔ’? b) Lande na konga anto amɔtshi l’okakatanu dia mbetɔ naka wambɔkɔ?

⁵ Mbeyaka monga ko tambookambaka la tshɛkɛta ‘ntakana’ kana ‘nkɔ’ dia ntɛkɛta dikambo dia lonyuma laki onto ɔmɔtshi. Lo Bible tɔtɛkɛta tɔsɔ kambemaka mbala efula, koko aha mbala tshɛ mbalembetshiyatɔ dui diakɔ diaamɛ. Ɛnyɛlɔ, Tukedi 24:16 mbutaka ɔnɛ: “Untu ololo atokokaka tena esambeli, ku ndi atunelaka ntu. Keli untu a kolo ayolembiama lu asui.”

⁶ Jehowa hatetawɔ dia wanɛ wayaɛkɛ le nde ntakana kana nkɔ aha la mbetɔ, mbuta ate naka wambosala wandja amɔtshi kana wambohomana l’ekakatanu wahawakoke nkandola etena kɔɔtɛmɔlawɔ. Tekɔ l’eshikikelo dia Jehowa ayotokimanyiya dia sho ‘mbetɔ’ ndo ntetemala mbosha kɛnɛ koleki ɔlɔlɔ le so. Ɔsɔ ekɔ mɛtɛ dui di’ekeketshelo le wanɛ tshɛ woka Jehowa ngandji k’oma k’ɛse otema! Anto wa kɔlɔ tonaka mbetɔ naka wambɔkɔ. Vɔ hawoyange ekimanyielo ka nyuma k’ekila kaki Nzambi kana k’ekambi ande, ndo etena kawashawɔ ekimanyielo kɛsɔ vɔ kitonaka. Koko le wanɛ ‘walanga ɛlɛmbɛ waki Jehowa,’ ndooko otamba wa ntakanya wakoka mbashimba dia vɔ ntetemala nsaka lowango lawɔ l’otsha lo lɔsɛnɔ la pondjo.​—Adia Osambu 119:165.

7, 8. Ngande wakoka onto ‘lambɔkɔ’ mbetawɔma nto le Nzambi?

⁷ Anto amɔtshi komaka dia nsala pɛkato ya totshitshɛ mbala la mbala l’ɔtɛ wa wɛɔdu awɔ ɛmɔtshi. Koko, vɔ kokaka ntetemala mbɔsama oko anto w’ɛlɔlɔ lo washo wa Jehowa naka vɔ nsala la wolo dia ‘mbetɔ,’ mbuta ate ndjatshumoya l’otema ɔtɔi ndo nyomotatɛ kambɛ Jehowa la kɔlamelo. Sho koka nshihodia dui sɔ lo nsɛdingola kɛnɛ kakasalɛka Jehowa ase Isariyɛlɛ w’edjedja. (Is. 41:9, 10) Divɛsa diakatashidi l’etatelo dia Tukedi 24:16 hake epole ɔsɛkɛ lo kɛnɛ kele kɔlɔ, mbuta ate lo woho ‘wakɔso,’ koko lo kɛnɛ kele ɔlɔlɔ, mbuta ate lo woho ‘wetɔso’ oma l’ekimanyielo ka Nzambi kaso ka kɛtshi. (Adia Isaya 55:7.) Lo mɛnya woho wɛkɛwɔ etema awɔ le so, Jehowa Nzambi nde la Yeso Kristo tokeketshaka la ngandji tshɛ dia sho ‘mbetɔ.’​—Osam. 86:5; Jni. 5:19.

⁸ Oyadi ondawi ambotakana kana ambɔkɔ, nde koka mbetɔ ndo ntetemala ndawɔ polo l’ekomelo naka nde mbetɔ esadi. Lo lowango latatalawɔ dia nkondja lɔsɛnɔ la pondjo, sho hateye ‘lushi kana wonya’ wayokomɛ lowango lɔsɔ. (Mat. 24:36) Koko, lo yɛdikɔ yayotoleka nsɛna wolo diaha ntakana, mbayotoleka ntetemala ndawɔ dimɛna aha la mpekɔ, ndo tayoshidiya esakelo kaso ka lowango. Ko ngande wakokaso mbewɔ dia ntakana?

ETAMBA WA NTAKANYA WASHIMBA ONTO DIA MPAMA LO NYUMA

9. Akambo akɔna watakanya wayangaso nkɛtshanya?

⁹ Nyɛsɔ tɔsɛdingole akambo atanu watakanya anto. Akambo akɔ ko: Wɛɔdu wa demba, nsaki ya demba, wɛngiya w’oma le asekaso ambetawudi, asui kana ɛhɛnyɛhɛnyɔ ndo wandja w’anto akina. Koko, naka tambotakana lo dikambo dimɔtshi, kete tohɔ dia Jehowa ekɔ la solo dia lotutsha di’efula. Nde hotɔsa mbala kakɔ ɔtɔi oko anto wele bu la kɔlamelo.

10, 11. Wɔdu akɔna wakalɔshanaka la Davidɛ?

¹⁰ Wɛɔdu wa demba mbeyaka mbɛdikama la ave wele lo mboka katatalawɔ. Naka sho nsɛdingola akambo wakakomɛ nkumekanga Davidɛ nde l’ɔpɔstɔlɔ Petero, kete tayeya wɛɔdu ehende waki la wɔ, mbuta ate vɔ komonga la ndjakimɛ ndo waki la wɔma w’onto.

¹¹ Wɔdu waki la nkumekanga Davidɛ ele nde komonga la ndjakimɛ oko wadiɛnya ɔkɔndɔ wa pɛkato kakandasale la Batɛ-shɛba. Ndo lo diaaso dikina lam’akɔtɛngɛ Nabala, Davidɛ aki suke la nsala akambo aha la ndjakimɛ. Lo mɛtɛ, ndjakimɛ kande kakayɛkayɛkaka, koko nde kompekɔ dia nsala la wolo dia ngɛnyangɛnya Jehowa. Diɛsɛ l’ekimanyielo k’anto akina, nde akayongaka nto la lonyuma la dimɛna.​—1 Sam. 25:5-13, 32, 33; 2 Sam. 12:1-13.

12. Kakɔna kɛnya dia Petero akatetemala la esakelo kande ka lowango kaanga mbakandatakana lo tena dimɔtshi?

¹² Wɔdu waki la Petero ele wɔma w’onto nɛ dia lo tena dimɔtshi, nde akatakana lo yoho ya kɔlɔ efula, koko nde akatshikala la kɔlamelo le Yeso ndo Jehowa. Ɛnyɛlɔ, nde akanguna Yeso lo sɛkɛ aha mbala ɔtɔi, koko mbala shato. (Luka 22:54-62) L’ɔkɔngɔ wa laasɔ, lo diaaso dimɔtshi Petero kosala akambo oko Okristo, mbuta ate nde akɔshi di’Akristo w’ase Juda wakaleke ambetawudi w’ase Wedja nɛmɔ l’ɔtɛ wakawahenyama ohekele. Koko ɔpɔstɔlɔ Pɔɔlɔ akɛnya hwe dia l’etshumanelo k’Akristo, shɔnɔdi hayohombe monga. Dionga diaki la Petero sɔ diaki kɔlɔ ndo la ntondo ka diɔ ndjonga la shɛngiya ya kɔlɔ le Akristo akina, Pɔɔlɔ akasha Petero dako mbala kakɔ ɔtɔi, elungi l’elungi. (Ngal. 2:11-14) Ko onde Petero akatshike ndawɔ dia nkondja lɔsɛnɔ la pondjo l’ɔtɛ wa dako diakawawosha? Ndooko. Nde akakane yimba la dako diaki Pɔɔlɔ, akakambe la diɔ ndo akatetemala la esakelo kande ka lowango.

13. Ngande wakoka yoonge ya demba monga otakanya?

¹³ Lo tena dimɔtshi, wɔdu wele l’onto mbeyaka mendana la yoonge ya demba. Yoonge ya demba shɔ mbeyaka monga nto otamba wa ntakanya. Yɔ kokaka nkitshakitsha lonyuma laso, totakanya ndo tokonya dia nkɔ. Ɛnyɛlɔ, kadiyɛso kɛmɔtshi k’ose Japon akadiɛnɛ la hemɔ ɛnɔnyi 17 l’ɔkɔngɔ wa batisimu kande. Nde akayakiyanya efula lo dikambo sɔ ndo dui sɔ diakayɔdiaka lonyuma lande. L’etena kɛmɔtshi, nde akayotshikaka nsambisha. Dikumanyi pende diakatshu dia towembola. Lam’ele nde akakeketshama oma l’ɛtɛkɛta awɔ wa la ngandji tshɛ, kadiyɛso kɛsɔ akayotatɛ mbɔtɔ lo nsanganya nto. Nde mbutaka ate: “Lakakɛdia ndo asɔi lo woho wakandjayola anangɛso l’akadiyɛso la wangasanu tshɛ lo losanganya.” Kakianɛ, kadiyɛso ambokalolɛ esakelo kande ka lowango.

14, 15. Naa yɛdikɔ ya wolo yahombaso mbɔsa etena katoyɛ nsaki ya kɔlɔ lo yimba? Sha ɛnyɛlɔ.

¹⁴ Nsaki ya demba djɔ layɔ yambotakanya anto efula. Etena kahembamaso dia nkotsha nsaki shɔ, sho pombaka nsala la wolo dia ntetemala monga pudipudi lo yimba, lo lɔkɛwɔ ndo lo nyuma. Tohɔ dako dia Yeso diata dia ‘mbikasha’ lo yoho ya didjidji ɛngɔ tshɛ kakoka totakanya, mbuta ate sso kana lonya laso. Shi dui sɔ mendanaka nto la tokanyi ndo la ditshelo dia mindo diakakonya anto amɔtshi dia ntshika esakelo kawɔ ka lowango?​—Adia Mateo 5:29, 30.

¹⁵ Ɔnangɛso ɔmɔtshi lakodiama lo nkumbo kɛmɔtshi k’Akristo akafunde dia nde mbohɔka dia l’etena k’otale, nde akalɔshana la tokanyi ta mindo tendana la dieyanelo dia lam’asa pami la pami. Nde mbutaka ate: “Dimi lakayaokaka dia haasungana monga l’atei w’anto ndo dimi komongaka l’ɔngɛnɔngɛnɔ dihole tshɛ diakimi.” Lam’akandakotsha ɛnɔnyi 20, nde akakome ombatshi mboka wa pondjo ndo okambi wakimanyiya l’etshumanelo. Oma laasɔ, nde akayotakana wolo, akalongola ohokwelo w’oma l’Afundelo ndo ekimanyielo oma le dikumanyi. L’ekimanyielo ka dɔmbɛlɔ, ka wekelo w’Ɔtɛkɛta wa Nzambi ndo lo nkimanyiya anto akina lo nyuma, nde akayɔkɔlɔngana lo nyuma ndo akayonga la lonyuma la dimɛna. Nde akayotaka ɛnɔnyi efula l’ɔkɔngɔ ate: “Lo tena dimɔtshi, tokanyi ta kɔlɔ ndjɛkami lo yimba, koko haletawɔ dia tɔ mbahemɛmi. Lakayeyaka dia Jehowa hetawɔki pondjo dia dimi pembama lo yɛdikɔ yahamakoke ntondoya. Ɔnkɔnɛ, lekɔ la mbetawɔ dia Nzambi mɛnaka dia dimi kokaka ntondoya.” Ɔnangɛso ɔsɔ komiyaka ate: “Layoyokondja difuto l’andja w’oyoyo l’ɔtɛ wa welo wadjami dia mbikikɛ ehemba. Layotetemala ndɔshana l’ehemba polo l’ekomelo.” Nde amboyashikikɛ dia ntetemala la esakelo kande ka lowango.

16, 17. a) Kakɔna kakakimanyiya ɔnangɛso ɔmɔtshi lakafɔnyaka dia wamboosalɛ akambo la wɛngiya? b) Le na ahombaso mbika washo diaha sho ntakana?

¹⁶ Wɛngiya w’oma le asekaso ambetawudi kokaka totakanya. Ɛnyɛlɔ, lo wodja wa France, ɔnangɛso ɔmɔtshi lakashisha ɛkɛndɛ ande w’ekumanyi akafɔnya dia wakosalɛ akambo la wɛnginya ndo dui sɔ diakawomadia efula. L’ɔtɛ wa dikambo sɔ, nde akatshike nsangana kaamɛ l’etshumanelo ndo akatshike nsambisha. Dikumanyi pende diakatshu dia tosawola la nde ndo wakohokamɛ la ngandji tshɛ aha la mbohembola ɔtɛkɛta, etena kakandaakɔndɔlɛka lo ndjela kanyi yande. Vɔ wakookeketsha dia nde nkitsha wotsho ande le Jehowa ndo ndeka ndjakiyanya dia mbɔngɛnyangɛnya. Nde aketawɔ alako wakawawosha ndo kombeta edja nde akakalolɛ esakelo kande ka lowango ndo elimu ekina wa l’etshumanelo.

¹⁷ Akristo tshɛ pombaka ntetemala mbika washo le Ɔtɛ w’etshumanelo wakasɔnwama, mbuta ate Yeso Kristo, koko aha le ana w’anto wele keema kokele. Yeso lele washo ande wekɔ “oko lombe la dja,” mɛnaka akambo tshɛ la sso di’ɔlɔlɔ ndo mɛnaka kɛnɛ kahatakoke mɛna. (Ɛny. 1:13-16) Ɛnyɛlɔ, nde mbeyaka dia sho kokaka mɛna diele oko wambotosalɛ akambo la wɛngiya, ko tete le aha ngasɔ mbediɔ. Laasɔ tonge l’eshikikelo ɔnɛ Yeso ayokandola ekakatanu wa l’etshumanelo lo yoho ya kokele ndo lo etena kahombama. Ɔnkɔnɛ, hatohombe mbetawɔ di’etsha kana tɛdikɔ t’asekaso Akristo monga tshondo y’otamba a ntakanya le so.

18. Ngande wakokaso nshika tanga la ntondo k’ehemba?

¹⁸ Etamba ekina ehende wa ntakanya ko asui kana ɛhɛnyɔhɛnyɔ ndo wandja w’ase etshumanelo akina. Lo wɛɛla ande w’omboki a woho, Yeso akate di’anto amɔtshi wayotakana l’ɔtɛ wa ‘asui la ɛhɛnyɔhɛnyɔ’ wahomana la wɔ. Oyadi oma lende oye ɛhɛnyɔhɛnyɔ akɔ, oma le ase nkumbo, oma le asukanyi kana oma le mandji y’ana w’anto, vɔ kokaka monga la shɛngiya le opandjudi wele “ɔtɛkɛta akɔ [wa Nzambi] hawonandji otema ande” kana wele bu la lonyuma la wolo. (Mat. 13:21) Koko naka sho ntetemala monga la eongelo k’otema k’ɔlɔlɔ, kete lɔtɔngɔ la Diolelo layotokimanyiya dia mbetawɔ kaso monga nge. Etena kadiɛnɛso la ehemba, tosale la wolo dia nkana yimba lo dɔmbɛlɔ lo akambo wakoka mandɔma. (Adia Filipɛ 4:6-9.) Lo ekimanyielo ka Jehowa, tayoshika tanga la ntondo k’ehemba tshɛ ndo hatotetawɔ di’ekakatanu totakanya.

19. Ngande wakokaso mbewɔ diaha dui dia kɔlɔ diotosale onto nkoma otamba wa ntakanya?

¹⁹ Lonyangu ko, Akristo amɔtshi wakatshike esakelo kawɔ ka lowango l’ɔtɛ wa wandja w’asekawɔ akina. Akristo akina takanaka l’ɔtɛ wasala anto akina akambo wahɔtɔnɛ la nkum’etema yawɔ. (1 Kɔr. 8:12, 13) Ko naka onto ɔmɔtshi ambotosalɛ kɔlɔ, onde tayotshika mbɔtɔ nsanganya? Tohɔ dia Bible ndakaka Akristo diaha vɔ nomboshana, mbewɔ ntshininala lo tokanyi tawɔ hita ndo monga suke dia dimanyiya anto akina. (Luka 6:37) Laasɔ, etena kahomanayɛ la dui diakoka kotakanya, yambola wate: ‘Onde dimi nomboshaka anto akina lo ndjela tokanyi tami hita? Lam’ele sho tshɛ keema kokele, onde layetawɔ dia wandja w’Akristo akina shimbami dia ntetemala ndawɔ lowango dia nkondja lɔsɛnɔ la pondjo?’ Ngandji kokaso Jehowa kokaka tokimanyiya diaha mbetawɔ kɛnɛ tshɛ kotosale onto okina toshimba dia nkoma l’oshidi w’ekomelo.

TOLAWƆ LA EKIKELO NDO TEWƆ DIA NTAKANA

20, 21. Kakɔna kambotoyashikikɛ dia nsala lo esakelo kaso ka lowango dia nkondja lɔsɛnɔ la pondjo?

²⁰ Onde tamboyashikikɛ dia ‘nshidiya ndawɔ lowango laso’? (2 Tim. 4:7, 8) Naka eelo, kete sho pombaka salaka wekelo w’onto ndamɛ. Tokambake la Bible ndo l’ekanda walembetshiya Bible dia salaka eyangelo, kanaka yimba la kɛnɛ kekaso ndo mbeya akambo wakoka totakanya. Tɔlɔmbake Jehowa nyuma k’ekila dia tɔ tosha wolo wa lo nyuma weso l’ohomba. Tohɔ dia hatohombe ntshika esakelo kaso ka lowango k’otsha lo lɔsɛnɔ la pondjo l’ɔtɛ w’ɔnɛ tambotakana kana tambɔkɔ l’etena kɛmɔtshi. Naka tambɔkɔ, teetɔ ndo totetemale la lowango laso. Ndo nto, tokondja wetshelo oma lo akambo tshɛ wakatotakanya l’oyango wa sho ntetemala ndawɔ.

²¹ Bible mɛnyaka dia paka wanɛ wadja welo lo lowango lawɔ mbayokondja lɔsɛnɔ la pondjo. Lowango laso bu oko onto lɔtɔ lo mutuka ko mutuka mɛɛmba. Shoamɛ mbahomba ndawɔ polo l’ekomelo dia ndjokondja lɔsɛnɔ la pondjo. Naka sho nsala ngasɔ, kete “ki ka mamba” k’oma le Jehowa kayotosha wolo wa ntetemala ndawɔ lowango laso. (Osam. 119:165) Sho kokaka ndjashikikɛ dia Nzambi ayotetemala tɔtshɔkɔla oma ko kakianɛ ndo pondjo pondjo, naka sho ntetemala ndawɔ polo l’ekomelo.​—Jak. 1:12.