“[To]shikikɛ Akambo Woleki Ohomba”

1, 2. Prɔfɛsiya kakɔna kendana l’ekomelo k’andja ɔnɛ kakaleke nkutola yambalo y’ambeki wa Yeso, ndo lande na?

PETERO, Jakɔba, Joani ndo Andɛlɛ wakayotshikalaka l’ekomelo vɔ la Ombetsha awɔ ato. Yema la ntondo ka laasɔ, Yeso akatɛ ambeki ande dia ohandjwelo wa tɛmpɛlɔ ndo dui sɔ diakaahandjola wɔɔngɔ. (Makɔ 13:1-4) Ɔnkɔnɛ, vɔ wakawombola ɔnɛ: “Ototɛ, etena kakɔna kayosalema akambo asɔ, ndo djembetelo yakɔna yayɛnya woongelo ayɛ ndo etena k’ekomelo k’andja?” (Mat. 24:1-3) Lo okadimwelo wakandawasha, Yeso akawatɛ aha tsho etshikitanu wa weke wendana la lɔsɛnɔ wayosalema, koko ndo tolembetelo tayɛnya dia dikongɛ di’akambo diaki Satana dia kɔlɔ diaya suke la nkomɛ. Koko ekɔ djembetelo mɔtshi yakatɛ Yeso ambeki ande yakaleke nkutola yambalo yawɔ efula. L’ɔkɔngɔ wa nde mbatɛ tolembetelo t’ohomba efula tele oko ata, ndjala ya kasha ndo ɛɔnywɛlɔ k’ɛlɛmbɛ, Yeso akawatɛ nto dia dikambo dimɔtshi di’ɔlɔlɔ diayosalema oko djembetelo y’ekomelo k’andja. Nde akawatɛ ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”​—Mat. 24:7-14.

² Ambeki waki Yeso waki l’ɔngɛnɔngɛnɔ dia nsambisha lokumu l’ɔlɔlɔ la Diolelo kaamɛ la Kristo. (Luka 8:1; 9:1, 2) Vɔ wakakokaka mbohɔ ɔnɛ nde akate ate: “Dinela diekɔ woke, koko ekambi mbele yema tshitshɛ. Ɔnkɔnɛ, nyɔlɔmbɛ Owandji wa dinela dia nde ntoma ekambi lo dinela diande.” (Luka 10:2) Ko, ngande wakawakoke nsambisha “lo nkɛtɛ k’otondo” ko lokumu l’ɔlɔlɔ lɔsɔ ndjala oko “ɔmɛnyi le anto wa lo wedja tshɛ”? Oma lende akahombe ndja ekambi ɛsɔ? Etena kakadjasɛ ambeki waki Yeso kaamɛ la nde, vɔ wakalangaka mɛna ekotshamelo k’akambo asɔ lo nshi yakayelana. Aha la taamu, vɔ wotamba dia mɛna woho wa diambo watakotshama ɛtɛkɛta wele lo Mateo 24:14.

3. Lande na kele ɛtɛkɛta waki Yeso wele lo Luka 21:34 wekɔ ohomba efula ɛlɔ kɛnɛ, ndo ambola akɔna wahomba onto l’onto ndjaoka?

³ Prɔfɛsiya kaki Yeso kekɔ lo takotshama lo nshi yaso nyɛ. Miliyɔ y’anto yekɔ lo nsambisha lokumu l’ɔlɔlɔ la Diolelo lo nkɛtɛ k’otondo. (Is. 60:22) Koko, Yeso akɛnya nto di’anto amɔtshi wayonga l’okakatanu dia ntetemala ndjasha l’olimu w’esambishelo lo nshi y’ekomelo nyɛ. Vɔ wayoyasha l’akambo wekola yimba ndo etema awɔ wayoyala “wotsho.” (Adia Luka 21:34.) Ɛtɛkɛta waki Yeso ɛsɔ wekɔ ohomba efula ndjekoleko lo nshi yaso nyɛ, nɛ dia ekambi waki Nzambi ɛmɔtshi hawoyetsha akambo woleki ohomba lo dihole dia ntondo. Dui sɔ mɛnamaka oma lo tɛdikɔ tɔsawɔ tendana l’elimu wa lo demba, kalasa ya laadiko, eyango wa lomombo, lofulo la wenya letshawɔ lo tɔkɛnyɔ ndo l’awui wa nkɔkɔla demba. Anto amɔtshi wambɔkɔmɔ l’ɔtɛ wa tɔsɛngiya t’oma le anto akina ndo ekiyanu wa lɔsɛnɔ la lushi la lushi. Onto l’onto ayambole ɔnɛ: ‘Kakɔna katomosalaka la ntondo k’akambo asɔ? Onde tɛdikɔ tɔsami mɛnyaka dia dimi mbetshaka akambo woleki ohomba lo dihole dia ntondo lo lɔsɛnɔ lami?’

4. a) Kakɔna kakalɔmbɛ Pɔɔlɔ lo dikambo di’Akristo wa la Filipɛ, ndo lande na? b) Kakɔna kayotɔsɛdingola lo sawo nɛ ndo diayela, ndo l’oyango akɔna?

⁴ Akristo wa lo ntambe ka ntondo wakasalaka la wolo dia mbetsha akambo wa lo nyuma lo dihole dia ntondo. Diakɔ diakalɔmbɛ ɔpɔstɔlɔ Pɔɔlɔ dikambo di’ase Filipɛ dia vɔ “nshikikɛ akambo woleki ohomba.” (Adia Filipɛ 1:9-11.) L’ɛnyɛlɔ k’ɔpɔstɔlɔ Pɔɔlɔ, Akristo efula “wekɔ lo mɛnya dihonga di’efula diele la wɔ dia mbewoya ɔtɛkɛta wa Nzambi aha la mboka wɔma.” (Flpɛ. 1:12-14) Woho akɔ waamɛ mbele ɛlɔ kɛnɛ, anto efula l’atei aso wekɔ lo nsambisha Ɔtɛkɛta waki Nzambi la dihonga tshɛ. Ko, onde nsɛdingola kɛnɛ kasala okongamelo wa Jehowa ɛlɔ kɛnɛ, koka tokimanyiya dia ndeka ndjasha l’olimu w’esambishelo? Eelo. Lo sawo nɛ, tayɔsɛdingola tɛdikɔ takɔshi Jehowa takimanyiya dia Mateo 24:14 kotshama. Kakɔna kasala okongamelo waki Jehowa? Ndo ngande wele mbeya akambo asɔ tokeketshaka sho l’ase nkumbo yaso? Lo sawo diayela, tayɔsɛdingola kɛnɛ kayotokimanyiya dia sho monga l’ekikelo l’olimu waki Nzambi ndo ntetemala ndjela ɛlɔmbwɛlɔ katosha okongamelo wa Jehowa.

ETENYI K’OKONGAMELO WA JEHOWA KA L’OLONGO KEKƆ LO TATSHU LA NTONDO

5, 6. a) Lande na kakɛnya Jehowa ekambi ande waɛnɛlɔ wa kɛnɛ kasalema l’olongo? b) Kakɔna kakɛnyi Ezekiyɛlɛ lo ɛnɛlɔ?

⁵ Ekɔ awui efula waki Jehowa kombetawɔ dia vɔ fundama lo Bible. Ɛnyɛlɔ, nde kombisha elembetshiyelo efula lo woho wakamba wɔɔngɔ olimu ndo woho wakɛndakɛnda loowa, kaanga mbele awui asɔ wekɔ ohomba. Koko, Jehowa akatosha akambo weso l’ohomba dia sho nshihodia sangwelo diande ndo nsɛna lo yoho yɔtɔnɛ la wɔ. (2 Tim. 3:16, 17) Ande dui dia dimɛna dia Jehowa totɛ akambo wendana l’etenyi k’okongamelo ande wahɛnama lee! Tayɔngɛnangɛna efula dia mbeya akambo wendana l’etenyi k’okongamelo wa Jehowa ka l’olongo, lo mbadia akambo wele lo Isaya, Ezekiele, Danyele, ndo Ɛnyɛlɔ! (Is. 6:1-4; Ezek. 1:4-14, 22-24; Dan. 7:9-14; Ɛny. 4:1-11) Ekɔ oko Jehowa ambotodiholɛ olongo ndo ambotosha diaaso dia sho nsɛdingola kɛnɛ kele lɔkɔ. Lande na katosha Jehowa diaaso dia sho mbeya akambo amɔtshi wendana la kɛnɛ kasalema l’olongo?

⁶ Jehowa halange dia sho mbohɛ ɔnɛ tekɔ anto wa l’okongamelo ande wa l’andja w’otondo. Etenyi k’okongamelo wa Jehowa kahɛnama kekɔ lo nkamba olimu la wolo dia nkotsha lolango laki Jehowa. Ɛnyɛlɔ, Ezekiyɛlɛ akɛnyi lo ɛnɛlɔ etenyi k’okongamelo wa Jehowa kahɛnama lo efanelo ka pusupusu ka woke efula l’olongo. Pusupusu kɛsɔ kakakadimɔka esadi esadi ndo kakatshɔka otsha lɛnɛ tshɛ alangatɔ wonya akɔ waamɛ. (Ezek. 1:15-21) L’ekimanyielo k’etshimbi atɔ, pusupusu kɛsɔ kakakokaka ntshɔ etale efula. Lo ɛnɛlɔ kɛsɔ, Ezekiyɛlɛ akɛnyi nto didjidji dia Ɔnɛ lakatakɛndjakɛndjaka pusupusu kakɔ. Nde akate ate: “Dimi lakenyi ohotela wangadimo uku efanelu ka dja l’utshimba tshe . . . Osoku mbaki efanelu ka lutumbu la [Jehowa].” (Ezek. 1:25-28) Ande woho wakahombe Ezekiyɛlɛ mamba lo mɛna ɛnɛlɔ kɛnɛ lee! Nde akɛnyi dia Jehowa ekɔ lo nɔmbɔla okongamelo ande lo tshimbo ya nyuma kande k’ekila. Woho watakɛndakɛnda pusupusu kɛsɔ mɛnyaka olimu wa diambo wakamba etenyi k’okongamelo wa Jehowa wa l’olongo.

7. Ngande waleka waɛnɛlɔ wakɛnyi Danyɛlɛ nkeketsha wɛkamu aso?

⁷ Danyɛlɛ nde lawɔ akɛnyi ɛnɛlɔ kakeketsha wɛkamu aso. Nde akonge la diaaso dia mɛna didjidji dia Jehowa “Tangu andja” odjashi lo kiti kande ka diolelo kaki la nyombe ya dja. Kiti kakɔ kaki l’etshimbi. (Dan. 7:9) Jehowa akalange dia Danyɛlɛ mɛna dia okongamelo Ande wekɔ lo takɛndakɛnda dia nkotsha sangwelo Diande. Danyɛlɛ akɛnyi nto “one lufanyi la on’a untu,” mbuta ate Yeso alongola lowandji dia mbolɛ etenyi k’okongamelo kaki Jehowa ka la nkɛtɛ. Lam’ele Kristo ekɔ ɔnɔmbɔdi wa kokele, nde hɔlɔmbɔla lo tshanda mɔtshi tsho ko pe. Koko, ɔsɔ ayonga “luwandji la pundju, lahashilaki. La diulelu diandi, hadiulanyemaki pundju.” (Dan. 7:13, 14) Ɛnɛlɔ kaki Danyɛlɛ totshutshuyaka dia sho ndjaɛkɛ le Jehowa ndo mbetawɔ kɛnɛ kasalande. Nde akasha Yeso y’Ɔnande ndo y’okitami ande “luwandji, lutumbu, la diulelu.” Jehowa ndjaɛkɛka le Ɔnande ɔsɔ. Laasɔ, nyɛsɔ toyaɛkɛke nshi tshɛ lo ɛlɔmbwelɔ ka dimɛna kaki Yeso.

8. Shɛngiya yakɔna yaki la waɛnɛlɔ w’oma le Jehowa le Ezekiyɛlɛ nde la Isaya, ndo ngande wendanaso la dikambo sɔ?

⁸ Shɛngiya yakɔna yele la waɛnɛlɔ wendana l’etenyi k’okongamelo waki Jehowa kahɛnama kakɛnyi anto asɔ le so? Lo ɛnyɛlɔ k’Ezekiyɛlɛ, sho mambiyamaka ndo tshikalaka enyɔ ku lo menda kɛnɛ kasala Jehowa. (Ezek. 1:28) Nkana yimba lo kɛnɛ kendana l’okongamelo wa Jehowa, ayotokimanyiya dia nsala dui dimɔtshi oko wakasale Isaya. Lam’akandakondja diaaso dia mbewoya anto akina kɛnɛ kaki lo nsala Jehowa, nde akakambe la diɔ aha la ntshimbatshimba. (Adia Isaya 6:5, 8.) Isaya aki l’eshikikelo dia l’ekimanyielo ka Jehowa, nde akakoke nshika tanga la ntondo k’ekakatanu tshɛ wakakoke mbokomɛ. Woho akɔ waamɛ mbele, waɛnɛlɔ wendana la etenyi k’okongamelo wa Jehowa ka l’olongo totshutshuyaka dia sho ndjasha efula l’olimu w’esambishelo. Ande ekeketshelo kakondjaso lo mbeya dia tekɔ l’atei w’okongamelo wasala la wolo dia nkotsha asangwelo wa Jehowa lee!

ETENYI K’OKONGAMELO WA JEHOWA KA LA NKƐTƐ

9, 10. Lande na kakɛnyi Jehowa ohomba dia nsala etenyi k’okongamelo ande ka la nkɛtɛ?

⁹ Lo tshimbo y’Ɔnande, Jehowa akasale etenyi k’okongamelo ande kɛmɔtshi la nkɛtɛ kakamba kaamɛ la etenyi k’okongamelo ande kele l’olongo. Lande na kaki etenyi k’okongamelo ka la nkɛtɛ ohomba dia nkotsha kɛnɛ kofundami lo Mateo 24:14? Dia nkadimola dimbola sɔ, tɔsɛdingole ɛkɔkɔ esato.

¹⁰ Ɔkɔkɔ wa ntondo ele, Yeso akatatshi di’ambeki ande wayosambisha “polo ndo l’ahole woleki etale wa lo nkɛtɛ.” (Etsha 1:8) Ɔkɔkɔ wa hende ele, diɛsɛ l’okongamelo ɔsɔ mbakahombe tɛdikɔ mbɔsama dia mbisha wanɛ wakamba olimu akɔ mbo ya ndɛ ya lo nyuma ndo mbakokɛ. (Jni. 21:15-17) Ɔkɔkɔ wa sato ele, di’okongamelo akɔ mbɔsaka tɛdikɔ dia wanɛ wasambisha lokumu l’ɔlɔlɔ sanganaka kaamɛ dia tɛmɔlaka Jehowa ndo mbekaka toho ta nkamba la tɔ dia nsambisha. (Hɛb. 10:24, 25) Awui asɔ tshɛ hawokoke salema osalemasalema. Di’ambeki wa Yeso nkotsha awui asɔ tshɛ, vɔ pombaka kongɛma dimɛna.

11. Ngande wakokaso mɛnya dia tekɔ lo sukɛ tɛdikɔ tɔsama l’okongamelo wa Jehowa?

¹¹ Ngande wɛnyaso dia tekɔ lo sukɛ tɛdikɔ tɔsama l’okongamelo wa Jehowa? Yoho mɔtshi ele, ndjaɛkɛ le anangɛso wakasɔnama dia nɔmbɔlaka olimu w’esambishelo nɛ dia Jehowa nde la Yeso ndjaɛkɛka le wɔ. Anangɛso asɔ wotokoka nkamba la wenya ndo la wolo awɔ dia nkandola ekakatanu wambololanɛ l’andja ɔnɛ, koko aha kɛsɔ mbasalawɔ. Ko, l’akambo akɔna mɛtɛ waleka etenyi k’okongamelo wa Jehowa ka la nkɛtɛ ndjasha?

TOLEKE NDJASHA LO “AKAMBO WOLEKI OHOMBA”

12, 13. Ngande wasala dikumanyi di’Akristo dia nkotsha ɛkɛndɛ awɔ, ndo lande na kele dui sɔ tokeketshaka?

¹² L’andja w’otondo, dikumanyi di’Akristo diambohokɔ akambo sɔnamaka dia nɔmbɔla ndo sukɛ olimu w’esambishelo ka Diolelo l’ahole wewɔ. Etena kalanga anangɛso asɔ mbɔsa tɛdikɔ, vɔ nyangaka ɛlɔmbwɛlɔ oma l’Ɔtɛkɛta wa Nzambi lo mbowɔsa oko tala l’ ekolo awɔ ndo oko osase lo mboka kawɔ ndo lo salaka alɔmbɛlɔ wa l’otema ɔtɔi dia nyanga ɛlɔmbwɛlɔ ka Jehowa.​—Osam. 119:105; Mat. 7:7, 8.

¹³ L’ɛnyɛlɔ k’ɛnɔmbɔdi wa lo ntambe ka ntondo, dikumanyi di’Akristo dialɔmbɔla olimu w’esambishelo ɛlɔ kɛnɛ ndjashaka “l’olimu wa mbetsha anto ɔtɛkɛta wa Nzambi.” (Etsha 6:4) Vɔ ngɛnangɛnaka efula lo menda woho watahame olimu w’esambishelo ka lokumu l’ɔlɔlɔ lo ngelo yewɔ ndo l’andja w’otondo. (Etsha 21:19, 20) Lo dihole dia vɔ mbidjɛ anto dɛmbɛlɛmbɛ, vɔ ndjelaka Afundelo ndo ɛlɔmbwɛlɔ k’oma le nyuma k’ekila kaki Nzambi etena kɔsawɔ tɛdikɔ tahombama dia nkimanyiya di’olimu w’esambishelo ntshɔ otsha la ntondo. (Adia Etsha 15:28.) Lo nsala ngasɔ, anangɛso wele l’ɛkɛndɛ asɔ mbishaka anangɛwɔ l’akadiyɛwɔ wa lo tshumanelo ɛnyɛlɔ ka dimɛna ka ndjela.​—Ɛf. 4:11, 12.

14, 15. a) Tɛdikɔ takɔna takɔsama dia tokimanyiya dia sho nsambisha l’andja w’otondo? b) Ngande wayaokayɛ l’ɔtɛ wa wa kɛnɛ kasalayɛ dia nsukɛ esambishelo ka Diolelo?

¹⁴ Aha l’anto akina mɛna, anangɛso efula wekɔ lo nkamba olimu wa wolo dia tɔlɔngɔsɔlɛ mbo ya ndɛ ya lo nyuma lo mfunda ekanda aso, lo nkongɛ nsanganya ya l’etshumanelo ndo ya weke. Nunu di’anangɛso l’akadiyɛso ndjakimɔka la lolango, lo nkamba la wolo awɔ tshɛ dia nkadimola ekanda akɔ washa mbo ya ndɛ ya lo nyuma l’ɛtɛkɛta oko 600 di’anto efula mbeka awui wendana la “akambo wa diambo waki Nzambi” lo ɛtɛkɛta awɔ hita. (Etsha 2:7-11) Ɛlɔngɔlɔngɔ l’esekaseka efula wekɔ lo nkamba lɛnɛ ele mashinyi wakakatanya abuku aso ndo watondja ekanda aso efula mbala kakɔ ɔtɔi l’ɛtɛkɛta efula. Oma laasɔ, ko vɔ nkahanya ekanda akɔ lo tshumanelo tshɛ ndo nɛ diele l’ahole wa tale.

¹⁵ Ndo lo bɛtshi diaso dia nkɛtɛ, anangɛso l’akadiyɛso efula ndjakimɔka dia nkamba olimu wa wolo, dia tokimanyiya dia sho ndjasha efula l’olimu w’esambishelo ka lokumu l’ɔlɔlɔ. Ɛnyɛlɔ, nunu di’anangɛso l’akadiyɛso ndjakimɔka la lolango lo wokelo wa Mbalasa ya Diolelo ndo ya nsanganya ya weke, dia tokimanyiya wanɛ wambohomɔ mpokoso k’oma lo diangɔ diakatongama kana wahomba nkondja esakelo ka wanyandja, dia nkongɛ nsanganya ya weke ndo dia ndowanya anto akina lo kalasa ya teokrasi ndo lo elimu ekina. Ko oyango akɔna wele l’elimu ɛsɔ tshɛ? Ele dia ndeka tokimanyiya dia sho nsambisha lokumu l’ɔlɔlɔ, mpama lo nyuma ndo nkimanyiya anto akina dia vɔ ntɛmɔla Jehowa. Onde etenyi k’okongamelo wa Jehowa ka la nkɛtɛ kekɔ lo ntetemala ndjasha l’akambo woleki ohomba? Ngasɔ mbediɔ.

TOYELE ƐNYƐLƆ K’OKONGAMELO WA JEHOWA

16. Eyangelo akɔna wakokaso salaka etena kasalaso ɔtɛmwɛlɔ wa lo nkumbo kana wekelo w’onto ndamɛ?

¹⁶ Onde sho mbɔsaka etena mbala la mbala dia nkana yimba lo woho watakɛndakɛnda okongamelo wa Jehowa? Anto amɔtshi wakɔshi ekongelo ka mbɔsaka minitɛ mɔtshi etena kasalawɔ ɔtɛmwɛlɔ awɔ wa lo nkumbo kana wekelo w’onto ndamɛ, dia salaka eyangelo wendana l’akambo akɔ ndo kanaka la wɔ yimba. Dia sho ndeka mbeya woho watakɛndakɛnda okongamelo wa Jehowa, sho kokaka ndjasha dia mbeka waɛnɛlɔ wakɛnyi Izaya, Ezekiyɛlɛ, Danyɛlɛ ndo Joani. Ndo nto, naka sho mbadiaka dibuku Les Témoins de Jéhovah : Prédicateurs du Royaume de Dieu kana mendaka DVD yatondjama, kete tayeya awui efula wendana l’okongamelo waki Nzambi.

17, 18. a) Wahɔ akɔna wamboyokondja oma lo sawo nɛ? b) Ambola akɔna wahombaso ndjaoka?

¹⁷ Kanaka yimba la kɛnɛ kambosala Jehowa diɛsɛ l’okongamelo ande ekɔ ohomba efula. Lo nkamba kaamɛ l’okongamelo wa diambo ɔsɔ, nyɛsɔ toleke ndjasha l’akambo woleki ohomba. Nsala ngasɔ ayotokeketsha dia sho ndjashikikɛ oko Pɔɔlɔ lakafunde ate: “Lam’ele tekɔ la olimu ɔnɛ oma lo kɛtshi katoka Nzambi, sho hatohekɔ.” (2 Kɔr. 4:1) Ndo nto, nde akakeketsha asekande ambetawudi lo mbafundɛ ate: “Tatotshikake nsala kɛnɛ kele ɔlɔlɔ, nɛ dia l’etena kahombama, tayona naka hatohekwe.”​—Ngal. 6:9.

¹⁸ Onde ekɔ etshikitanu ɛmɔtshi wahombayɛ wɛ kana nkumbo kayɛ nsala lo lɔsɛnɔ lanyu la lushi la lushi dia mbetsha akambo woleki ohomba lo dihole dia ntondo? Shi ondo taakahombe mbetɛ lɔsɛnɔ laso ɔsɛlɛngɛ, lo mbewɔ akambo tshɛ wekola yimba l’oyango wa sho ndeka ndjasha l’olimu w’esambishelo? Lo sawo diayela, tayɔsɛdingola akambo atanu wayotokimanyiya dia ndjela ɛlɔmbwɛlɔ k’okongamelo wa Jehowa.