EKADIMWELO WA AMBOLA W’OMA LO BIBLE

Onde sho kokaka dimanyiyama pɛkato yaso?

Lo ndjela Bible, anto tshɛ wekɔ atshi wa pɛkato. Takahowɔ pɛkato kɛsɔ oma le tshɛso ka ntondo, Adama. Lo tena dimɔtshi, sho salaka akambo wa kɔlɔ wayotonyangaka l’ɔkɔngɔ diko. Koko Yeso Kristo y’Ɔna Nzambi akatotshungola oma lo pɛkato lo tovwɛ. Diɛsɛ oma l’olambo ande w’etshungwelo mbakokaso dimanyiyama pɛkato yaso. Ɔsɔ ekɔ woshasha w’oma le Nzambi.​—Adia Rɔmɔ 3:23, 24.

Anto amɔtshi wakasale pɛkato ya weke ndjambolaka dia kana Nzambi ayowadimanyiya. Koko Ɔtɛkɛta wa Nzambi mbutaka ate: “Dikila dia Yeso y’Ɔnande diekɔ lo tɛdia oma lo pɛkato tshɛ.” (1 Joani 1:7) Jehowa ayotodimanyiya pɛkato yaso, oyadi ya weke naka sho ndjatshumoya.​—Adia Isaya 1:18.

Kakɔna kahombaso nsala dia sho dimanyiyama pɛkato yaso?

Naka sho nangaka dia Jehowa Nzambi todimanyiya pɛkato yaso, kete sho pombaka mbeka akambo efula wendana la nde, mbuta ate nyanga dia nshihodia mboka yande, alako ande ndo kɛnɛ katɔlɔmbande. (Joani 17:3) Jehowa ekɔ suke dia dimanyiya wanɛ wayatshumoya oma lo kɔlɔ yawɔ ndo wanɛ wasala la wolo dia ntshikitana.​—Adia Etsha 3:19.

Bu dui dia wolo dia sho mbetawɔma le Nzambi, nɛ dia Jehowa mbeyaka wɛɔdu aso. Nde ekɔ la kɛtshi ndo la lɔsɛngɔ l’efula. Onde ngandji ka lɔsɛngɔ kaki Nzambi hatotshutshuya dia sho mbeka awui efula dia mbeya mbɔngɛnyangɛnya?​—Adia Osambu 103:13, 14.