Nzambi kele “suke dia dimanyiya”

1-3. a) Wotsho akɔna wakɛmbɛ omembi w’esambo Davidɛ, ndo ngande wakandasambema lo lonyangu laki la nde? b) Etena kasalaso pɛkato, wotsho akɔna wɛmbaso, ndo kakɔna katoshikikɛ Jehowa?

OMEMBI w’esambo Davidɛ akafunde ate: “Munga yami yambombahema l’ɔtɛ; oko oshikɔ wa wotsho, dimi haakoke mɛmba. Dimi lambondama l’oshishi ndo lambominɔma tshɛ lo tshɛ.” (Osambo 38:4, 8) Davidɛ akeyaka wotsho wakoka monga la nkum’otema kele l’onongo. Koko nde akasambema oma lo lonyangu laki la nde. Nde akeye dia kaanga mbahetsha Jehowa pɛkato nde hahetsha otshi wa pɛkato wayatshumoya oma k’ɛse otema ndo latshika dionga diande dia pɛkato. Oko wakinde la wɛkamu w’efula lo woho walanga Jehowa mboka atshi wa pɛkato kɛtshi, Davidɛ akafunde ate: “Jehowa le, wɛ ekɔ suke dia dimanyiya.”​—Osambo 86:5.

² Etena kasalaso pɛkato sho la wɔ mbeyaka minɔma la wotsho wa nkum’otema kele la lonyangu. Lonyangu lɔsɔ lekɔ ohomba nɛ dia lɔ koka totshutshuya dia nɔngɔsɔla wandja aso. Koko, sho koka ndjonga lo waale naka tamboleka ndjakiyanya lo yoho ya tshambandeko l’ɔtɛ wa pɛkato kosadiso. Otema aso wele la onongo mbeyaka ntetemala la tɛnya dia Jehowa hatotodimanyiya oyadi kaanga sho koyatshumuyaka woho akɔna tshɛ. Naka tambɔkɔmɔ l’ɔtɛ wa kɔlɔ kosadiso, kete Satana ayoyanga dia tohekoya lo tokonya lo sho mbɔsa oko Jehowa otɔsa anto w’anyanya ndo wahayokoka mbokambɛ.​—2 Kɔrɛtɔ 2:5-11.

³ Onde ngasɔ mbediɔ? Ndooko! Edimanyielo ekɔ yoho mɔtshi yɛnama ngandji k’efula kaki Jehowa. Nde toshikikɛka l’Ɔtɛkɛta ande dia naka sho ndjatshumoya la otema ɔtɔi ndo oma k’ɛse otema, kete nde ayetawɔ dia todimanyiya. (Tokedi 28:13) Di’aha sho ndjoyaoka lushi lɔmɔtshi oko Jehowa hakoke todimanyiya, tɔsɛdingole lande na ndo polo lo yɛdikɔ yakɔna yadimanyiyande.

Ɔkɔkɔ wele Jehowa “suke dia dimanyiya”

4. Kakɔna kohɔ Jehowa lo woho wakatatongama, ndo shɛngiya yakɔna yele la dui sɔ lo woho watosalɛnde akambo?

⁴ Jehowa mbeyaka elelo aso. Osambo 103:14 mbutaka ɔnɛ: “Nde mbeyaka dimɛna woho wakatakengama, nde mbohɔka dia tekɔ ditshu.” Nde hohɛ dia tekɔ ditongami diakasalema la ditshu, ndo dia l’ɔtɛ weso bu kokele, sho tekɔ wɛɔdu. Etelo k’ɔnɛ “nde mbeyaka dimɛna woho wakatakengama” toholaka dia Bible mbɛdikaka Jehowa l’okengi ndo sho la diangɔ di’awomba diakengande. (Jɛrɛmiya 18:2-6) Okengi wa Woke kɛndakɛndaka la so lo ndjela wɛɔdu aso lo woho weso bu kokele ndo yoho yetawɔso kana yatonaso ɛlɔmbwɛlɔ kande.

5. Ngande wɛnya dibuku dia Rɔmɔ wolo w’efula wele la pɛkato?

⁵ Jehowa mbeyaka nto wolo wele la pɛkato. Ɔtɛkɛta ande mɛnyaka dia pɛkato ekɔ oko wolo ɔmɔtshi wakotola anto otsha lo nyɔi. Pɛkato mɛtɛ kotolaka onto wolo efula! Lo dibuku dia Rɔmɔ, ɔpɔstɔlɔ Pɔɔlɔ mbutaka ɔnɛ: Tekɔ “l’ɛse ka pɛkato,” woho wele asɔlayi l’ɛse ka kɔmanda kawɔ (Rɔmɔ 3:9); pɛkato ‘mbahemɛ’ anto oko nkumekanga (Rɔmɔ 5:21); tɔ “kekɔ,” kana “mbidjasɛ,” l’etema aso (Rɔmɔ 7:17, 20); “ɔlɛmbɛ” atɔ wekɔ lo ntetemala nkamba olimu l’atei aso dia nɔmbɔla etsha aso. (Rɔmɔ 7:23, 25) Pɛkato kekɔ mɛtɛ la wolo w’efula laadiko dia demba diaso diele bu kokele!​—Rɔmɔ 7:21, 24.

6, 7. a) Ngande wɔsa Jehowa wanɛ wayanga kɛtshi kande la otema wa ndjatshumoya? b) Lande na kahatahombe nkamba la kɛtshi ka Jehowa lo yoho ya kɔlɔ?

⁶ Jehowa mbeyaka dia hatokokaki mbokitanyiya lo yoho ya kokele pondjo oyadi sho kosalaka woho akɔna tshɛ. Koko, oma lo ngandji kande, nde toshikikɛka dia ayotodimanyiya naka sho nyanga kɛtshi kande l’otema wa ndjatshumoya. Osambo 51:17 mbutaka ɔnɛ: “Elambo wangɛnyangɛnya Nzambi ele yimba yambohandjɔ; otema wambatɛ ndo wambatshatshema Nzambi le, wɛ hatotona.” Jehowa hakalɛki kana nsɛka pondjo otema “wambatɛ ndo wambatshatshema” la wotsho w’onongo.

⁷ Onde laasɔ kɛsɔ nangaka mɛnya dia sho koka nkamba la kɛtshi kaki Nzambi lo yoho ya kɔlɔ lo mbɔsa eongelo kaso k’anto wele bu kokele oko yɛkɛ nɛndɛ ya salaka pɛkato? Ndooko! Jehowa halɔmbwama la nsaki yande tsho. Kɛtshi kande kekɔ la elelo. Nde hadimanyiya anto w’ɛtɛ wolo wasala pɛkato l’okonda aha la ndjatshumoya. (Hɛbɛru 10:26) Koko, etena kɛnande otema wayatshumoya, nde mongaka suke dia dimanyiya. Tɔsɛdingole ditelo di’akawakambe ladiɔ lo Bible dia mɛnya yoho ya diambo yɛnama ngandji ka Jehowa kɛsɔ.

Polo lo yɛdikɔ yakɔna yadimanyiya Jehowa?

8. Ngande wasala Jehowa etena kadimanyiyande pɛkato yaso, ndo dikambo sɔ toshaka wɛkamu akɔna?

⁸ Davidɛ lakayatshumoya akate ate: “L’ekomelo, dimi lakashola pɛkato kami le yɛ; dimi kokomba munga kami . . . Ko wɛ akadimanyiya munga ndo pɛkato yami.” (Osambo 32:5) Vɛrbɛ “dimanyiya” yokambiwɔ layɔ lanɛ kadimɔma oma lo tshɛkɛta ya lo Hɛbɛru yalembetshiya “monyiya” kana “mɛmba.” Okambelo ayɔ lanɛ nembetshiyaka minya “onongo, kɔlɔ, kana pɛkato.” Ɔnkɔnɛ, aki oko Jehowa akonyiya pɛkato yaki Davidɛ ko ndjiɛmba. Kɛsɔ mɛtɛ akakimanyiya Davidɛ dia nde ndjaoka dia nde aya bu nto l’onongo. (Osambo 32:3) Sho la wɔ koka ndjaɛkɛ tshɛ le Nzambi kɛmba pɛkato ya wanɛ wayanga edimanyielo kande oma lo mbetawɔ kele lawɔ l’oshinga w’etshungwelo wa Yeso.​—Mateo 20:28.

9. Etale ka ngande kanganya Jehowa pɛkato yaso?

⁹ Davidɛ akakambe la etelo kekina kasalanganya otema dia mɛnya woho wadimanyiya Jehowa. Nde akate ate: “Oko wanganyi ehotwelo la edjelo ka wonya etale, ngasɔ mbakandanganya kɔlɔ yaso etale la so.” (Osambo 103:12) Wonya potɔka oma lo ɛstɛ ndo mbidjaka lo owɛstɛ. Etale ka ngande kanganyi ɛstɛ la owɛstɛ? Ɛstɛ la owɛstɛ mangana etale kaheyama mbuta ndo tokoma tɔsɔ tohende hatohomanaki pondjo. Ombewi ɔmɔtshi wa Bible mbutaka ɔnɛ etelo kɛsɔ nembetshiyaka ɔnɛ “etale kahadjama anya ndo kaheyama kanyiya.” Lam’akandasambiya Davidɛ ɛtɛkɛta ɛsɔ, Jehowa akalange totɛ dia etena katodimanyiyande, nde manganyaka pɛkato yaso etale kahatakoke ndo kanyiya.

10. Etena kadimanyiya Jehowa pɛkato yaso, lande na kahatahombe fɔnya dia tekɔ la vadi ya pɛkato yakɔ nto lo lɔsɛnɔ laso l’otondo?

¹⁰ Onde wɛ ambohembaka minya diwadi dia mindo lo dihɔndɔ dia wɛma? Mbala mɔtshi ndjaka wɛ kosalaka la wolo tshɛ ko diwadi diakɔ hadiomɔ. Ohenda woho wɛnya Jehowa dikoka diele lande dia dimanyiya: “Kaanga pɛkato yanyu yaya beela k’efula, yɔ yayonga wɛma oko loonge l’ekama. Kaanga yɔ yaya beela oko dihɔndɔ dia beela ka telele, yɔ yayonga oko wɛɔsa wa nyama.” (Isaya 1:18) Etelo “beela k’efula” mɛnyaka dangi dia telele.a “Beela oko dihɔndɔ dia beela ka telele” aki ɔtɔi ɔmɔtshi wa dangi di’akakakatɛka wolo lo diangɔ diakawasalaka ahɔndɔ ntondo. (Nahuma 2:3) Hatokokaki pondjo minya diwadi dia pɛkato la welo aso hita. Koko Jehowa kokaka mbɔsa pɛkato yaso yele telele kana beela ko ndjikonya wɛma fifɔ oko longe kana oko diɔsa diahawadjisha dangi. Laasɔ, etena kadimanyiya Jehowa pɛkato yaso, hatohombe fɔnya dia tekɔ la vadi ya pɛkato yakɔ nto lo lɔsɛnɔ laso l’otondo.

11. Lo yoho yakɔna yakasha Jehowa pɛkato yaso l’ɔkɔngɔ ande?

¹¹ L’osambo ɔmɔtshi wa lowando wakembɛ Hɛzɛkiya Jehowa l’ɔkɔngɔ wa nde mbɔkɔnɔla oma lo hemɔ ka nyɔi, nde akatɛ Jehowa ate: “Wɛ akakasha pɛkato yami tshɛ l’ɔkɔngɔ ayɛ.” (Isaya 38:17) Jehowa mɛnyamaka lanɛ oko onto lɔsa pɛkato yaki otshi wa kɔlɔ wayatshumoya ko nde ndjikasha l’ɔkɔngɔ Ande lɛnɛ ahandakoke mboyɛna kana mbidja yimba nto. Lo ndjela dibuku dimɔtshi, kanyi yele lanɛ mbeyaka mbutama ɔnɛ: “Wɛ ambetɛ [pɛkato yami] watekana yɔ kosalema ndooko lushi.” Shi kɛsɔ keketshaka?

12. Ngande wakɛnya omvutshi Mika dia naka Jehowa ambotodimanyiyɛ pɛkato, nde tonyɛkayɔ lo pondjo?

¹² Lo daka dimɔtshi diendana l’okalwelo, omvutshi Mika akakɛnɛmɔla eshikikelo kaki lande k’ɔnɛ Jehowa ayodimanyiya wodja ande wayatshumoya lo mbuta ate: “Ele Nzambi oko wɛ, . . . kohɛ kɔlɔ k’atshikadi w’etenyi kande k’okitɔ? . . . Wɛ ayokasha pɛkato yawɔ tshɛ lo ɛhɔngɔ wa ndjale.” (Mika 7:18, 19) Ohokanyiya shɛngiya yaki l’ɛtɛkɛta ɛsɔ le anto wakasɛnaka lo nshi yakafundamaka Bible. Onde akakokaka nongamɛ dia nyomɛna ɛngɔ kakakadjema “l’ɛhɔngɔ wa ndjale”? Laasɔ, ɛtɛkɛta wa Mika mɛnyaka dia naka Jehowa ambodimanyiya pɛkato, kete nde tonyɛkayɔ lo pondjo.

13. Ɛtɛkɛta waki Yeso w’ɔnɛ “otokimwe abasa aso” alembetshiyawɔ?

¹³ Yeso akakambe la diɔtɔnganelo diele lam’asa onto lokole la ɔnɛ lokolami dia mɛnya woho wadimanyiya Jehowa pɛkato. Yeso akatokeketsha dia nɔmbaka ɔnɛ: “Otokimwe abasa aso.” (Mateo 6:12) Yeso akɛdika pɛkato la abasa. (Luka 11:4) Etena kasalaso pɛkato, sho mongaka ‘akolami’ le Jehowa. Lo kɛnɛ kendana la vɛrbɛ ya lo Grɛkɛ yokadimɔmi ɔnɛ ‘dimanyiya,’ dibuku dimɔtshi mbutaka dia yɔ nembetshiyaka “tshika dibasa, kimwɛ dibasa, aha la diotsha nto.” Lo yoho mɔtshi, etena kadimanyiya Jehowa, nde tokimwɛka dibasa di’ototohomba mfuta. Laasɔ, atshi wa pɛkato wele la ndjatshumoya koka sambema etena keyawɔ ɔnɛ Jehowa hahike pondjo dibasa diambondokimwɛ onto!​—Osambo 32:1, 2.

14. Kanyi yakɔna yele l’etelo k’ɔnɛ “dia pɛkato yanyu dimɔ”?

¹⁴ Woho wadimanyiya Jehowa tɛkɛtamaka nto lo Etsha 3:19, lɛnɛ adiaso ɔnɛ: “Nyoyatshumoya ndo nyokadimole etema dia pɛkato yanyu dimɔ.” Etelo k’ɔnɛ dia pɛkato yanyu “dimɔ” kadimɔma oma lo vɛrbɛ ya lo Grɛkɛ yakoka nembetshiya “kitola, ndjaka, kana nanya.” Oko wadita ambewi wa Bible amɔtshi, kanyi yele lanɛ ele nimola efundelo wakafundama l’anya. Ngande wakakoke salema dui sɔ? Ashi wa mfunda wakawalekaka nkamba lawɔ lo nshi y’edjedja aki ɔsɔhanyelo wa lodima, olembo w’esongo ɛmɔtshi la ashi. Yema tshitshɛ l’ɔkɔngɔ w’onto mfunda, nde akakokaka mbɔsa odimɔ wɔlɔwi yema l’ashi ko nde nimola awui wofundjinde. Ɔsɔ ekɔ yoho kina ya dimɛna efula yɛnyama kɛtshi ka Jehowa. Etena kadimanyiyande pɛkato yaso ekɔ oko nde ndjidimolaka l’odimɔ.

15. Kakɔna kalanga Jehowa sho mbeya lo dikambo diande?

¹⁵ Etena kakanaso yimba la bɛnyɛlɔ diotshikitanyi sɔ, mbokɛmaka hwe dia Jehowa nangaka sho mbeya ɔnɛ nde ekɔ mɛtɛ suke dia dimanyiya pɛkato yaso edja tshɛ kɛnande dia tekɔ lo ndjatshumoya l’otema ɔtɔi. Ndo nto, hatohombe mboka wɔma dia Jehowa ayotombɛ okita wa pɛkato yakandatodimanyiya lo nshi yayaye nɛ dia Bible mɛnyaka yoho kina yɛnama kɛtshi kande k’efula mbuta ate, lam’atodimanyiyande, nde mbohɛka.

“Hantohɔ pɛkato kawɔ nto”

16, 17. Etena kata Bible ɔnɛ Jehowa mbohɛka pɛkato yaso, alangatɔ nembetshiya ndo lande na kakadimolayɛ ngasɔ?

¹⁶ Lo kɛnɛ kendana l’anto wa lo sheke y’oyoyo, Jehowa akalake ate: “Dimi layowadimanyiya munga kawɔ ndo hantohɔ pɛkato kawɔ nto.” (Jɛrɛmiya 31:34) Onde dui sɔ mɛnyaka ɔnɛ naka Jehowa ambodimanyiya pɛkato, kete nde hayokoka ndjiohɔ nto? Ndooko. Bible tɛkɛtaka dikambo dia pɛkato yaki anto wele Jehowa akaakimwɛyɔ, ɛnyɛlɔ oko Davidɛ. (2 Samuɛlɛ 11:1-17; 12:13) Jehowa mbeyaka munga yakasale anto asɔ. Ɔkɔndɔ wa pɛkato yakawasale, wa ndjatshumoya kawɔ ndo woho wakaadimanyiya Nzambi akalamema dikambo dia wahɔ aso. (Rɔmɔ 15:4) Ko Bible alangatɔ nembetshiya lam’atatɔ ɔnɛ Jehowa ‘hohɔ’ pɛkato ya wanɛ wadimanyiyande?

¹⁷ Vɛrbɛ ya lo Hɛbɛru yokadimɔmi ɔnɛ ‘mbohɔ’ nembetshiyaka awui efula koko aha tsho kanyiya dikambo diambetaka. Oko wadiɛnya dibuku Diksionɛrɛ dia ɛtɛkɛta wa teoloji wa lo Daka di’Edjedja (Angɛlɛ), “tshɛkɛta shɔ nembetshiyaka nto mbɔsa tɛdikɔ tahombama.” Lo ndjela kanyi shɔ, ‘mbohɔ’ pɛkato kɛdikɛdi mbɔsɛ atshi wa pɛkato tɛdikɔ tɔmɔtshi. (Hɔsɛya 9:9) Lo wedi okina, lam’ata Jehowa ate “hantohɔ pɛkato kawɔ nto,” nde ekɔ lo toshikikɛ dia naka nde ambodimanyiya otshi a pɛkato wamboyatshumoya, kete nde hawɔsɛ yɛdikɔ nto lo nshi y’otsha la ntondo dia mbosha dilanya l’ɔtɛ wa pɛkato yakɔ. (Ɛzɛkiyɛlɛ 18:21, 22) Nde mbohɛka lo yoho yele nde hohɔ pɛkato yaso mbala la mbala dia taanyaka kana toshaka dilanya mbala la mbala l’ɔtɛ wa pɛkato yakɔ. Shi ekɔ mɛtɛ ekeketshelo dia mbeya ɔnɛ Nzambi kaso dimanyiyaka ko mbohɛ?

Kayotota dikambo di’etombelo w’oma lo pɛkato yaso?

18. Lande na kele edimanyielo ka pɛkato hahandoya otshi wa pɛkato wayatshumoya oma lo etombelo wa lɔkɛwɔ lande la kɔlɔ?

¹⁸ Onde woho wele Jehowa suke dia dimanyiya mɛnyaka ɔnɛ otshi wa pɛkato wamboyatshumoya hadiɛnɛ l’etombelo ɛmɔtshi w’oma lo lɔkɛwɔ lande la kɔlɔ? Ndooko. Hatokoke nsala pɛkato aha la mina etombelo w’oma lɔkɔ. Pɔɔlɔ akafunde ate: “Onto l’onto ayona kɛnɛ konɛnde.” (Ngalatiya 6:7) Sho mbeyaka diɛnɛ l’etombelo ɛmɔtshi wa kɔlɔ oma l’etsha aso. Koko kɛsɔ halange mbuta ɔnɛ Jehowa telaka ekakatanu l’ɔkɔngɔ wa nde todimanyiya. Lam’atomba ekakatanu, Okristo hahombe pondjo fɔnya ɔnɛ ‘ondo Jehowa ambombisha dilanya l’ɔtɛ wa pɛkato yami y’edjedja.’ (Jakoba 1:13) Lo wedi okina, Jehowa hatohandja oma l’etombelo tshɛ w’etsha aso wa kɔlɔ. Odiakelo wa diwala, diemi diaha la lolango, hemɔ ya nsɔnyi, anto hawoyotɔsa la nɛmɔ kana hawoyotɛkɛ otema. Awui asɔ tshɛ mbeyaka monga etombelo wa kɔlɔ ndo waheyama mbewɔ w’oma lo pɛkato. Tohɔ dia kaanga mbakandadimanyiyɛ Davidɛ pɛkato yakandasale lo dikambo dia Batɛshɛba la Uriya, Jehowa kookokɛ Davidɛ oma lo etombelo wa kɔlɔ efula w’oma lo lɔkɛwɔ lande.​—2 Samuɛlɛ 12:9-12.

19-21. a) Ngande waki ɔlɛmbɛ wele lo Eohwelo k’Ɛlɛmbɛ 6:1-7 la wahɔ le onto lakawasalɛka kɔlɔ ndo le otshi wa kɔlɔ? b) Naka takasalɛ anto akina kɔlɔ oma lo pɛkato yaso, kakɔna kayɔngɛnangɛna Jehowa dia sho nsala?

¹⁹ Pɛkato yaso mbeyaka monga l’etombelo ekina nto djekoleko naka yɔ yakasalɛ anto akina kɔlɔ. Enda ɔkɔndɔ wele lo Akambo w’ase Lɛwi tshapita 6. Lo tshapita nyɛ, Ɛlɛmbɛ wa Mɔsɛ wekɔ lo ntɛkɛta di’onto lasala pɛkato ka woke lo mpɔtɔla osekande ose Isariyɛlɛ diangɔ diande la wolo, lo wovi kana la lokeso. Otshi wa pɛkato kɛsɔ mbeyaka manguna onongo ande ndo kaanga tshiba lo kashi. Etena kɛsɔ kombeyamaka ata mɛtɛ kana kashi l’asa onto lakawave la ɔnɛ latande ate nde mbakambive. Koko, l’ɔkɔngɔ diko, nkum’otema kaki onto lakatshelɛ osekande kɔlɔ mbeyaka ndjɔhɛnyahɛnyama ko nde ndjoshola pɛkato kande. Dia Nzambi mbodimanyiya, nde akahombaka nsala akambo akina anɛ asato: Kaloya kɛnɛ kakandɔshi, mfuta kanga diangɔ kibawo ka pursa 20, ndo nkimɔ ɔkɔkɔ w’omi oko olambo w’onongo ande. Laadiko dia laasɔ, ɛlɛmbɛ mbutaka ɔnɛ: “Ɔlɔmbɛdi ayokomba pɛkato kande la ntondo ka Jehowa, ko nde ayodimanyiyama.”​—Akambo w’ase Lɛwi 6:1-7.

²⁰ Ɔlɛmbɛ ɔsɔ aki yɛdikɔ y’oma le Nzambi yoludi la kɛtshi. Ɔnɛ lakawasalɛ kɔlɔ akakondjaka wahɔ oma lɔkɔ, nɛ dia wakokaloyɛka diangɔ diande ndo nde akangɛnangɛnaka efula lam’aketawɔka otshi wa kɔlɔ pɛkato kande. Otshi wa pɛkato lawɔ akakondjaka wahɔ oma l’ɔlɛmbɛ akɔ nɛ dia nkum’otema kande kakɔhɛnyahɛnyaka kakayomɛ la mbotshutshuya dia nde suya kɔlɔ kande ndo kilɔngɔsɔla. Lo mɛtɛ, ndooko edimanyielo kakahombe onto ɔsɔ nkondja oma le Nzambi naka nde ntona nsala ngasɔ.

²¹ Kaanga mbeso bu l’ɛse k’Ɛlɛmbɛ wa Mɔsɛ, vɔ tokimanyiyaka dia shihodia kanyi ya Jehowa, djekoleko lo dikambo di’edimanyielo. (Kɔlɔsayi 2:13, 14) Naka pɛkato kaso kakasalɛ anto akina kɔlɔ, kete Nzambi ayɔngɛnangɛna naka sho nsala tshɛ kakokaso nsala dia nɔngɔsɔla kɔlɔ kɛsɔ. (Mateo 5:23, 24) Dui sɔ mbeyaka tɔlɔmba dia suya pɛkato kaso, mbetawɔ onongo aso, ndo kaanga nɔmba ɔnɛ losaleso kɔlɔ edimanyielo. Paka lo nsala ngasɔ, mbakokaso nɔmba Jehowa edimanyielo lo tshimbo y’olambo wakakimɔ Yeso ko sho ndjashikikɛ dia Nzambi ambotodimanyiya.​—Hɛbɛru 10:21, 22.

22. Kakɔna kakoka kakatana l’edimanyielo ka Jehowa?

²² Oko ombutshi tshɛ woka anande ngandji, Jehowa mbeyaka kakatanya edimanyielo kande la dilanya dimɔtshi. (Tokedi 3:11, 12) Okristo wayatshumoya mbeyaka nshisha waɛsɛ ande wa nkamba oko ekumanyi, okambi wakimanyiya, kana osambisha wa lo tena tshɛ. Nde mbeyaka monga la paa efula dia nshisha waɛsɛ asɔ lo tshanda mɔtshi nɛ dia vɔ waki la nɛmɔ efula le nde. Koko, dilanya dia ngasɔ hɛnya ɔnɛ Jehowa halange mbodimanyiya. Aha sho mbohɛ ɔnɛ dilanya di’oma le Jehowa ekɔ djembetelo yɛnya ngandji kande oya leso. Tayokondja wahɔ naka sho mbetawɔ ndo nkamba l’ohokwelo watoshande.​—Hɛbɛru 12:5-11.

23. Lande na kahatahombe mbɔsa pondjo di’oko Jehowa hayokoka toka kɛtshi, ndo lande na kahombaso mbokoya edimanyielo kande?

²³ Ekɔ mɛtɛ ekeketshelo dia mbeya ɔnɛ Nzambi kaso ekɔ ‘suke dia dimanyiya’! Oyadi munga ya ngande yambotosala, hatohombe mbɔsa pondjo di’oko Jehowa hayokoka toka kɛtshi. Naka sho ndjatshumoya l’otema ɔtɔi, nɔngɔsɔla kɔlɔ kaso ndo nɔmba Jehowa oma k’ɛse otema dia nde todimanyiya l’ɔtɛ wa dikila diakakɛdia Yeso, kete sho koka monga l’eshikikelo dia Jehowa ayotodimanyiya. (1 Joani 1:9) Sho la wɔ tonge la mbekelo ka dimanyiya oko nde lo diɔtɔnganelo diasaso la asekaso. Nɛ dia naka Jehowa lahasale pɛkato, todimanyiyaka la ngandji tshɛ, onde sho anto wele atshi wa pɛkato hatohombe nsala tshɛ dia dimanyiyana lam’asaso?