Dikumanyi, onde nyu keketshaka anima “wambokomo”?

Angela,a kadiyɛso kɛmɔtshi k’onyemba kele l’ɛnɔnyi 30 l’ɛmɔtshi, ekɔ l’ekiyanu ɛmɔtshi wambookonya dia mbetsha nsanganya. Nde ekɔ lo nongamɛ dia dikumanyi ndja ndjowembola. Dikumanyi ahombawɔ towotɛ? Kɛnɛ kele mɛtɛ ele, nde aketsha nsanganya mɔtshi nɛ dia nde aki l’ɔlɛmbɛlɔ l’ɔkɔngɔ wa nkamba olimu lushi l’otondo dia nkimanyiya esombe w’anto. Laadiko dia laasɔ, nde akayakiyanyaka efula dikambo dia yoonge ya demba ya mama kande.

Otondongaka wɛ mbakahombe ntshɔ dia teembola Angela, ngande wotoyokeketsha anima “wambokomo” ɔsɔ? (Jer. 31:25) Naa dui dia ntondo diahombayɛ nsala etena kayalɔngɔsɔlayɛ dia tembola ɛkɔkɔ?

KANYOTAKANAKI YIMBA LO EKAKATANU WELE L’ANANGƐNYU

Sho tshɛ tɔkɔmɔka mbala efula l’ɔtɛ w’elimu wa l’emunyi ndo wa lo nyuma wakambaso. Ɛnyɛlɔ, omvutshi Danyɛlɛ “akako balakata” etena kakandɛnyi ɛnɛlɔ kakinde komonga l’akoka wa nshihodia. (Dan. 8:27) Nde akakeketshama etena kakɛnama ondjelo Gabriyɛlɛ le nde. Ɔkɛndji wakatomama oma le Nzambi ɔsɔ, akakimanyiya Danyɛlɛ dia nde nshihodia ɛnɛlɔ kakɔ, akooshikikɛ ɔnɛ Jehowa akoke alɔmbɛlɔ ande ndo akawotɛ ɔnɛ “we eko ulangimi.” (Dan. 9:21-23) L’ɔkɔngɔ wa laasɔ, ɛtɛkɛta wakasɔnama dimɛna wakawotɛ ondjelo okina wakakeketsha omvutshi wakalɛmbɛ efula ɔsɔ.​—Dan. 10:19.

Woho akɔ waamɛ mbele, la ntondo ka nyu ntshɔ dia tembola osekanyu ombetawudi lambɔkɔmɔ, nyotɔshi etena ka nkana yimba lo kɛnɛ kendana l’okakatanu wele la nde. Ekakatanu akɔna mɛtɛ wele la nde? Shɛngiya yakɔna yakoka monga l’ekakatanu ɛsɔ le nde? Naa waonga w’amɛna watongaka la nde? Richard laya ekumanyi l’edja k’ɛnɔnyi ndekana 20 mbutaka ate: “Dimi ndekaka mbidja yimba lo kɛnɛ kakokami nsala dia nkeketsha analengo. Kɛnɛ kakimanyiya dia nsala dui sɔ ele, dimi tasɛdingolaki la yambalo tshɛ ekakatanu wele la wɔ la ntondo ka ntshɔ towaembola.” Nde kotshaka ate: “L’ɔkɔngɔ wa nsala dui sɔ, hatongaka l’okakatanu dia ntana ɛtɛkɛta w’ekeketshelo dia nkotsha ehomba awɔ.” Ko naka dikumanyi pende mbayonyotshɔ, shi kete ayonga dimɛna dia nyu ahende tasɛdingodi dikambo diakɔ kaamɛ?

TANYODJAKE ANANGƐNYU PANDJU L’OLONGO

Ondo wɛ mbetawɔka dia keema dui dia tshitshɛ mbutɛ anto akina woho wayaokayɛ. Tɔshi ɛnyɛlɔ kɛnɛ: Anangɛso amɔtshi hawɔngɛnangɛna dia dikumanyi ntshɔ dia towaembola. Ngande wakokanyu ndɔshanya la dui sɔ? Nyu koka ndɔshana la diɔ lo mongaka la dungi di’ɛmɔnɔmɔnɔ ndo lo mbatondjɛka ɛtɛkɛta w’ekeketshelo nɛ dia dui sɔ mongaka la shɛngiya ya dimɛna. Michael laya ekumanyi l’edja k’ɛnɔnyi 40 mbutaka ɔnɛ etena katshɔnde dia tembola ɛkɔkɔ, nde tatɛka l’ɛtɛkɛta ɛnɛ: “Diɛsɛ dimɔtshi dioleki woke diele la so oko weso dikumanyi ele membola anangɛso l’akadiyɛso lawakawɔ ndo mbaeya dimɛna. Diakɔ diele, lakalomɔlomɔki dia ndja ndjokembola ɛlɔ.”

Wɛ kokaka ndjadjɛ oyango wa tasalaki dɔmbɛlɔ di’oma k’ɛsɛ otema la ntondo ka ntshɔ dia tembola ɔkɔkɔ. Lo alɔmbɛlɔ wakandasalaka, ɔpɔstɔlɔ Pɔɔlɔ akatɛkɛtaka ndo dikambo dia mbetawɔ, ngandji ndo dia ekikelo kaki la anango. (1 Tɛs. 1:2, 3) Lo mɛnya woho wɔsayɛ waonga w’amɛna wele l’ɔkɔkɔ, wɛ kokaka talɔngɔsɔdi otema ayɛ ndo wakinde dia nyu tosawola dimɛna. Ndo nto, ɛtɛkɛta wakokayɛ nkamba la wɔ kokaka monga la shɛngiya y’efula le nde. Ray lele ekumanyi kambohokɔ akambo mbutaka ate: “Lo tena dimɔtshi, sho tshɛ mbohɛka awui amɔtshi w’amɛna wasalaso. Koko etena katohola onto ɔmɔtshi awui akɔ, dui sɔ tongaka tshondo y’ekeketshelo le so.”

SHANDE WOSHASHA ƆMƆTSHI WA LO NYUMA

Lo ɛnyɛlɔ k’ɔpɔstɔlɔ Pɔɔlɔ, wɛ koka mbosha ‘woshasha ɔmɔtshi wa lo nyuma’ lo mbotɛ kanyi mɔtshi y’oma lo Bible, lo mbadiɛ kaanga divɛsa ɔtɔi. (Rɔmɔ 1:11) Ɛnyɛlɔ, ɔnangɛso ɔmɔtshi lakakɔmɔ mbeyaka ndjaɔsa oko onto l’anyanya, oko omembi w’esambo lakayaɛdika la “tapa di’ekuhu lu lukala.” (Osam. 119:83, 176) L’ɔkɔngɔ wa wɛ mbisha ɔkɔkɔ elembetshiyelo ɛmɔtshi wa etelo kɛsɔ, wɛ kokaka nshikikɛ ɔnanyɔ ɔnɛ hakote nte wɛ ‘ambohɛ ɛlɛmbɛ’ waki Nzambi.

Shi lo yoho yɔtɔnɛ la dui sɔ, wɛɛla wa womoto laki l’ekenga wa falanga ko akashisha okenga ɔmɔtshi, kokaka munanda kadiyɛso kɛmɔtshi kahayoyasha l’akambo wa l’etshumanelo kana kambɔla lo nyuma? (Luka 15:8-10) Oshishelo w’okenga ɔmɔtshi wa falanga mbeyaka mbɛdikama l’onto lamboshisha adidi w’oshinga a wolo wakasalema la mfɛsa. Lo nkɛtshanya la kadiyɛso kɛsɔ wɛɛla ɔnɛ, nde kokaka keketshama dia mɛna ɔnɛ nde ekɔ lo mbɔsama la nɛmɔ l’etshumanelo k’Akristo. L’ɔkɔngɔ wa nyu nkɛtshanya awui akɔ, wɛ kokaka mboshikikɛ dia Jehowa ndjakiyanyaka dikambo diande oko wende ɔmɔtshi wa lo lemba l’ɛkɔkɔ ande.

Nyeye dia mbala efula, anangɛso ngɛnangɛnaka mbisha tokanyi t’oma lo Bible etena kasawolanyu la wɔ. Diakɔ diele, nyosale la wolo diaha mamamala l’ɔtɛkɛta. L’ɔkɔngɔ wa mbadia divɛsa diendana la dikambo diele la nde, nyu koka nsɔtɔla tɔtɛkɛta kana ditelo dimɔtshi ndo mbɔlɔmba dia nde dilembetshiya. Ɛnyɛlɔ, l’ɔkɔngɔ wa mbadia 2 Kɔrɛtɔ 4:16, ekumanyi koka mimbola ɔnɛ: “Onde wɛ amboshihodia toho takamba la Jehowa dia kokimanyiya dia lonto layɛ nɔngɔswama?” Dimbola sɔ koka nyokonya dia nyu “keketshana, onto l’onto.”​—Rɔmɔ 1:12.

Nyu koka nto nkimanyiya osekanyu ombetawudi lo mombola dia nde mbuta ɔkɔndɔ ɔmɔtshi wa lo Bible, ko nyu nkɛtshanya. Ɔkɔkɔ ɔmɔtshi wele l’ɔkɔmwɛlɔ mbeyaka mbuta ɔkɔndɔ wa Hana kana wa Epafrodito, wanɛ waki l’ɔkɔmwɛlɔ lo tena dimɔtshi, koko wakɔsama la nɛmɔ lo washo wa Nzambi. (1 Sam. 1:9-11, 20; Flpɛ. 2:25-30) Shi nyu kokaka kɛtshanyaka l’ɛkɔkɔ bɛnyɛlɔ dimɔtshi di’amɛna di’oma lo Bible naka kokaka?

NYOSALAKE WEMBWELO W’ƐKƆKƆ MBALA LA MBALA

Nyu koka mɛnya woho wayakiyanyanyu dikambo di’anangɛnyu l’akadiyɛnyu lo mbaembolaka mbala la mbala. (Etsha 15:36) Etena kakomiyanyu sawo, nyu koka mbokana la nde dia nyu nsambisha kaamɛ lushi lɔmɔtshi. Etena kakatshɔka Bernard lele ekumanyi kambohokɔ akambo dia tɛnana nto la ɔnango kana la kadiyɛnde kakandembola, tena dimɔtshi nde akawelɛka yema lo shɔpɔ dia mombola lo kɛnɛ kendana la dako dimɔtshi diakandawosha ɔnɛ: “Oho mbutɛ yema, onde akambo wekɔ lo tatshu dimɛna?” Naka wɛ ndjasha le nde l’otema ɔtɔi, kete dui sɔ diayokokimanyiya dia mbeya dia kana nde eke l’ohomba w’ekimanyielo kekina.

Tanyohɛke dia nshi nyɛ mbamboleka anangɛso l’akadiyɛso monga l’ohomba wa ndjaoka dia nyu ndjakiyanyaka dikambo diawɔ, dia nyu mbaeyaka dimɛna ndo nyu mbaokaka ngandji. (1 Tɛs. 5:11) Ɔnkɔnɛ, la ntondo ka nyu ntshɔ dia tembola ɔkɔkɔ, kanyɔsake etena ka nkana yimba lo dikambo diele l’ɔkɔkɔ akɔ. Kanyɔlɔmbake Nzambi lo dikambo diakɔ. Kanyɔsɔnake avɛsa wɔtɔnɛ la dui diakɔ. Lo nsala ngasɔ, mbayonyokondja ɛtɛkɛta w’amɛna wayokeketsha anima “wamokomo.”