AMBOLA W’OMA LE AMBADI

Onde ase Isariyɛlɛ wakadiakaka andjakanyi lo mbahanɛ l’otamba?

Wedja efula wa lo nshi y’edjedja wakadiakaka andjakanyi lo mbahanɛ l’otamba kana l’ekundji. Ɛnyɛlɔ, ase Rɔmɔ wakahanɛka onto la ngasɔ l’otamba w’asui dia nde ntshikala lɔkɔ l’edja ka nshi efula adiɛnɛ la nkandji, mposa k’ashi, ndjala ndo shɔkɔ ya l’otamba akɔ. Ase Rɔmɔ wakɔsaka dia mpanɛ onto l’otamba ekɔ dilanya dioleki tshɛ kɔlɔ ndo di’ekomelo diakawashaka wanɛ wakasekolaka ɛlɛmbɛ.

Ko kayotota lo dikambo dia wodja w’Isariyɛlɛ wa lo nshi y’edjedja? Onde vɔ wakadiakaka andjakanyi lo mbahanɛ l’otamba? Ɛlɛmbɛ wa Mɔsɛ wakataka ɔnɛ: “Naka wayudiaka untu lakatshi kolo kukukindi ndjakema, ndu nyu nyambûhane l’utamba, udu andi tawutshikalaki utshu tshe l’utamba. Kanyûkhunde lushi lako.” (Euh. 21:22, 23) Mbokɛmaka dia lo nshi yakafundamaka Afundelo wa lo Hɛbɛru, onto lakahombaka ndjakema akahombaka ntondotondo ndjakema, ko oma laasɔ vɔ ndjoohanɛ l’otamba.

Lo kɛnɛ kendana la dikambo sɔ, Akambu w’Ase Lewi 20:2, mbutaka ɔnɛ: “Naka usi Isariyele kana ongendangenda wudjashi l’atei anyu ayukimo on’andi omotshi le Moleka, ndi ayudiakema; ase wudja kawuwuki ave.” Anto tshɛ ‘wakatɛkɛtshaka djimu kana waki akanga w’alɔhɔ’ wakahombe vɔ la wɔ ndjakema. Lo ngande? Lo ‘mbaoka ave.’​—Lew. 20:27.

Euhwelu k’Elembe 22:23, 24, mbutaka ɔnɛ: “Naka usekaseka a umuntu lahateyana la pami ambambema le pami, ku pami kemotshi ambuhumana la ndi l’usumba, ambeyana la ndi, Kanyutshu la wo, vo ahendi l’eotwelo k’usumba ako, kanyuwauki ave, kanyâdiaki. Usekaseka a umuntu, ne dia ndi nkumvuda kuku l’usumba, la pami, ne dia ndi akeyana la wadi unyandi la wulu. Osoku mbayunyunya kolo uma l’atei anyu.” Diakɔ diele ase Isariyele wakayongaka la mbekelo ka ndjakaka anto wakasalaka kɔlɔ ya weke l’ave.a

Euhwelu k’Elembe 21:23 mbutaka ɔnɛ: “Ne dia one lahanema eli engo ka mananu le [Nzambi].” Etena kaketetaka ase Isariyɛlɛ wa lo nshi y’edjedja ndo kakawɛnaka odo wa kanga kɔlɔ waki “mananu le [Nzambi]” lo sɛkɛ, dui sɔ diaki la shɛngiya y’efula le wɔ. Ladiko dia laasɔ, mpanɛ odo w’onto lodiakiwɔ l’otamba, aki tshondo ya ɔhɛmwɛlɔ le anto akina.