“Ohenda osato ɔnɛ!”

Mbala ngana yamboyotɛka anto akina ngasɔ kana yamboyodjaka yimba lɔkɔ etena kakayafola sawo dimɔtshi dia lo periodikɛ kɛnɛ? Esato ndo asango w’amɛna wakalɔngɔswama wele lɔkɔ wekɔ la oyango ɔmɔtshi. Vɔ wekɔ dihomɔ diendana la wetshelo diatokimanyiya dia sho nkanyiya ndo nkondja wetshelo. Esato ɛsɔ wekɔ ohomba efula etena kalɔngɔsɔlaso kana kashaso kɔmatɛrɛ lo Wekelo wa Tshoto y’Etangelo.

Ɛnyɛlɔ, wɛ koka nembetshiya lande na kakasɔnama osato wa l’etatelo ka sawo dia wekelo tshɛ. Wetshelo akɔna wele la osato akɔ? Ngande wɔtɔnɛwɔ la ɔtɛ wa sawo kana la divɛsa diɔsami sawo diakɔ? Lo kɛnɛ kendana l’esato ekina, onto koka mɛnya woho wɔtɔnɛwɔ l’ɔtɛ wa sawo watanyakɛtshanya ndo woho wendanawɔ la lɔsɛnɔ lande.

Ɔnɔmbɔdi wa Tshoto y’Etangelo ayosha ase etshumanelo diaaso dia mbisha kɔmatɛrɛ yendana l’esato wele lo sawo diakɔ, wetshelo akɔna wakondjawɔ oma lɔkɔ ndo woho wendanawɔ la dui diakɔ. Lo tena dimɔtshi, ɛtɛkɛta wɔtɔnganyiya osato la odingɔ ɔmɔtshi tanemaka l’omamu w’osato. Koko lo tena dikina, ɔnɔmbɔdi koka nshikikɛ odingɔ wayoleka dimɛna dia kɔmatɛrɛ yendana l’osato akɔ mbishama. Lo nsala ngasɔ, anto tshɛ wayokondja wahɔ oma lo welo wakadjama dia nkimanyiya ambadi dia vɔ ndjala oko anto wɛɛna wetshelo watanema l’Ɔtɛkɛta wa Nzambi.

Ɔnangɛso ɔmɔtshi akashikikɛ dui sɔ lo mbuta ate: “L’ɔkɔngɔ wa mbadia sawo dimɔtshi dia diambo, esato ndjolekaka mbetɛ sawo diakɔ ɔlɔ.”