Wekelo wa dibuku mbishaka wetshelo w’ohomba efula
1 Wekelo wa dibuku ekɔ ohomba efula lo ekongelo ka wetshelo wa l’ɔlɔngɔswamelo wa Jehowa. Wekelo wa dibuku wakakahanyema lo mbilo k’otondo, ɔsɔku mbokoki anto tshɛ monga lawɔ aha l’okakatanu. Ondo anto wele l’etema w’ɛlɔlɔ wayetawɔ dia mbɔtɔ lo wekelo wa dibuku naka vɔ salemaka suke la mvudu yawɔ.
2 Vɔ namaka dia elui akɔ watshikalake totshitshɛ. Ɔsɔku mbayokoka ɔlɔmbɔdi mbisha ekimanyielo le onto l’onto. Aha anto tshɛ mbôka aui esadi esadi. Naka onto ɔmɔtshi ekɔ l’ekakatanu lo mboka dikambo dimɔtshi, kânga nde akayalɔngɔsɔla, ɔlɔmbɔdi ayɔsɛdingola dikambo diakɔ kamɛ lande lo yoho y’ɔmɔmɔ l’ɔkɔngɔ a wekelo. Ndo nto, l’olui wa tshitshɛ diaaso tanemaka mbala efula dia mbisha waɔmbwɛlɔ ndo dia mbala avɛsa w’oma lo Bible. Onde sho ndjashaka tena la tena l’ɔkɛtshanyelo oka? Onde sho mbidjaka weolo dia kadimola l’ɛtɛkɛta aso shoamɛmɛ oka? Toshake waɔmbwɛlɔ l’ohetoheto di’ɔlɔlɔ aso ndo w’akina. Wonya wayalɔngɔsɔlaso, tokambe olimu l’akoka aso wa lo tokanyi dia mbeya woho akɔna wokokiso kamba olimu l’akambo amɔtshi wa lo wekelo.—Heb. 5:14.
3 Lo ndjela yoho yalakanya ɔlɔmbɔdi wa wekelo wa dibuku, sho kokaka mbeka woho wa nɔmbɔla wekelo wa Bible lo yoho yoleki kotola tambalo t’anto ndo yoleki mbalowanya. Ɔnangɛso ɔmɔtshi lakoka ayala palagalafɛ, ko l’ɔkɔngɔ wayɔsɛdingola wembola. Ɔlɔmbɔdi keketshaka ampokami dia vɔ tɛkɛta yema la wolo. Naka etena kekɔ, nde ayohemba mumbola waɔmbwɛlɔ w’avɛsa amɔtshi dia mbeya woho wakamba l’awui akɔ olimu. (Enda Nehemiya 8:8.) Mbala mɔtshi, nde kokaka nembetshiya ndamɛmɛ dikambo dimɔtshi kana mumbola wembola ekina wa lâdiko dia tondja lokanyi lɔmɔtshi l’ohomba. Ɛnyɛlɔ kɛmɔtshi kana ɔkɛla kokaka tokimanyiya dia sho mbɔtɔnganyiya aui wekami la lɔsɛnɔ laso.
4 Koko, lo wekelo ɛmɔtshi wa dibuku anto yema tshitshɛ tsho mbɔ̂tɔ. Onde sho tanemaka tena la tena oka? Naka kema kete sho hatokondja wahɔ oma l’ekongelo k’ohomba kɛsɔ. Ndo, ekɔ nto l’ekimanyielo ka wekelo wa Bible mbatɛnya Jehowa dia nde ekɔ lo ndjakiyanya dikambo diaso. (1 Petero 5:7) Nde kombolaka dia sho pama lo ewo ndo lo lomba woho wa sho ndjâla nge lo nyuma. Koko, Satana ayolanga dia tutsha ohamelo aso wa lo nyuma ndo tɔlɛndja; laso kete hatotonga ohomba efula nto le Jehowa ndo l’ɔlɔngɔswamelo ande. Dikambo sɔ diatosalemake pondjo! Totshike ohetoheto la ngandji kele l’olui ɔsɔ wokana efula etena ka kɛtsha otema aso ndo totshutshuya dia sho tetemala la tombola Jehowa.—Enda Osambu 111:1.
5 Sanganya y’eshika dikambo dia ntshɔ otsha l’esambishelo salemaka lo ahole efula wasalema wekelo wa dibuku. Yɔ mbeyaka salema l’atei atei wa lomingu, lo wikɛndɛ kana la dikɔlɔ. Ɔlɔmbɔdi wa wekelo wa dibuku pombaka ndjashikikɛ dia kana mbilo yekɔ efula ndo dia kana onto ɔmɔtshi ayônga lawɔ dia nɔmbɔla olimu. Sanganya y’otsha l’esambishelo hayokoke mbiviya ndekana taahe dikumi kana 15. Onto lalɔmbɔla mbeyaka sɛdingola divɛsa dia lushi lakɔ lo tshena pe naka diɔ mbɔtɔnɛka l’esambishelo, ko l’ɔkɔngɔ diko nde ayosha dako ɔtɔi kana alako ahende w’eshika w’endana l’olimu, kana talɔngɔsɔdi ɛnyɛlɔ kɛmɔtshi ka tshena pe lo dikambo di’okanda wɛnyanyema lo ngɔndɔ kakɔ.
6 Ɔlɔmbɔdi ayoyatshutshuyaka l’edjedja ka wonya dia sambisha l’onto tshɛ lele l’olui ande, dia nde mbokeketsha ndo mbolowanya lo woho wasungana.—Enda Mako 3:14; Luka 8:1.