Waa na wasala lolango laki Jehowa ɛlɔ kɛnɛ?

1. Etena kakɔna kayototatɛ mbeka biukubuku Waa na wasala lolango laki Jehowa ɛlɔ kɛnɛ? ndo wahɔ akɔna wayotokondja oma lɔkɔ?

¹ Ntatɛ lomingu la Ngɔndɔ ka dikumi 28, tayotatɛ mbeka biukubuku Waa na wasala lolango laki Jehowa ɛlɔ kɛnɛ? lo Wekelo wa Bible wa l’etshumanelo. Biukubuku y’oyoyo shɔ yakatondjama lo Losanganya la distrikɛ laki l’ɔtɛ a dui ɔnɛ: ‘Olamake otema ayɛ’ yakalɔngɔswama dia tokimanyiya dia sho nɔmbɔla ambeki aso wa Bible oya l’okongamelo. Yɔ tokimanyiyaka aha tsho dia mfudia lowando laso le Jehowa lo woho weso l’okongamelo ande, koko ndo dia sho ndeka ndjaekesanyiya la ehomɔ k’ohomba kɛsɔ l’esambishelo.—Osam. 48:13.

2. Ngande wayotekaka biukubuku nyɛ l’etshumanelo?

² Woho wayotoyekaka: Ɔnɔmbɔdi pombaka nkahanya minitɛ yande lo wekelo la wekelo dia wekelo tshɛ sɛdingɔma dimɛna. Lo wekelo akɔ 28 tshɛ, nde ayotatɛka wekelo tshɛ lo mbadia dimbola diakenga ɔtɛ wa wekelo. Oma laasɔ, nde ayɔlɔmba ombadi dia mbadia odingɔ wa ntondo. L’ɔkɔngɔ wa wadielo w’odingɔ akɔ, ɔnɔmbɔdi ayoka ampokami dimbola diakandatalɔngɔsɔdi. L’ɔkɔngɔ wa laasɔ, etenyi tshɛ katatɛ l’ɛtɛkɛta wofundami l’alɛta w’edima pombaka mbadiema ndo kɛtshanyema ɔtɔi l’ɔtɔi. L’ɔkɔngɔ wa wadielo w’etenyi kakɔ, ɔnɔmbɔdi ayɔlɔmba ampokami dia vɔ nembetshiya woho wakadimola etenyi kakɔ lo dimbola diakenga ɔtɛ wa wekelo. Biukubuku yakɔ yekɔ nto l’esato efula wakoka ampokami nembetshiya. Naka wonya wekekɔ, kete ekɔ ohomba mbadia avɛsa amɔtshi woleki ohomba. La ntondo ka mbeta lo wekelo wayela, ɔnɔmbɔdi ayovusola wekelo lo mboka ambola wele l’ɛse ka dikatshi. Naka wekelo akɔ wekɔ la kiombo yata ɔnɛ: “Dia mbeya awui efula,” kete nde ayoyadia ndo oma laasɔ nde ayɔlɔmba ampokami dia vɔ mbuta woho wakoka ombeki wa Bible nkondja wahɔ lo ndjela alako wele lɔkɔ. Naka wekelo wahomba sɛdingɔma lushi lakɔ wamboshila ko wonya wekekɔ, kete ɔnɔmbɔdi ayokamba la ɛtɛ wa wekelo oko ambola w’ovuswelo. Tolembete dia bu ohomba nkamba la yoho yambotɛnya nyɛ etena kekaso l’onto Bible.

3. Ahombaso nsala dia kondjaka wahɔ tshɛ lo tshɛ oma lo wekelo wa biukubuku nyɛ?

³ Dia sho nkondja wahɔ tshɛ lo tshɛ, katɔlɔngɔsɔlake losanganya dimɛna. Katosalake la wolo dia mbishaka kɔmatɛrɛ. Etena katasalema ɔkɛtshanyelo, katokanake yimba dia mbeya woho wakoka ambeki wa Bible nkondja wahɔ oma l’akambo akɔ. Ɔnkɔnɛ, biukubuku y’oyoyo nyɛ yatokimanyiya dia sho nkimanyiya anto akina dia vɔ ndjala kaamɛ la so dia nsala lolango la Nzambi l’oyango wa vɔ lawɔ monga l’elongamelo ka ndjɔsɛna pondjo pondjo.—1 Jni. 2:17.