Nyokanyiya weho w’anto wahombanyu monga

1, 2. ‘Weho w’anto wa ngande wahombaso monga’ dia sho mbetawɔma le Nzambi?

BU KƆLƆ sho ndjakiyanya dia woho watɔɔsa anto akina. Koko oko weso Akristo, sho pombaka ndeka ndjakiyanya lo woho watɔɔsa Jehowa nɛ dia nde mbele Onto loleki woke l’andja w’otondo ndo nde mbele ‘kiɔkɔ ya lɔsɛnɔ.’​—Osam. 36:9.

² Dia ntɔtɔmiya ‘woho w’anto wahombaso monga’ la ntondo ka Jehowa, ɔpɔstɔlɔ Petero tɔhɛmɔlaka dia sho monga la ‘lɔkɛwɔ l’ekila ndo ditshelo diɛnya dia tekɔ lo mamema Nzambi.’ (Adia 2 Petero 3:11.) Dia sho mbetawɔma le Nzambi, sho pombaka monga la “lɔkɛwɔ l’ekila” lo yimba ndo lo nyuma. Ndo nto, sho pombaka monga la “ditshelo diɛnya dia [t]ekɔ lo mamema Nzambi.” Mbokɛmaka hwe dia nyanga dia mbetawɔma le Nzambi halɔmbɛ tsho monga la lɔkɛwɔ la dimɛna, koko dui sɔ mendanaka ndo la lonto laso la l’etei k’otema. Lam’ele Jehowa “atukembaka utema,” nde mbeyaka dia kana tekɔ ekila lo lɔkɛwɔ laso ndo kana takayakimɔ tshɛ le nde kana bu.​—1 Ek. 29:17.

3. Ambola akɔna wahombaso ndjaoka lo kɛnɛ kendana la diɔtɔnganelo diasaso la Nzambi?

³ Satana Diabolo halange dia sho mbetawɔma le Nzambi. Diakɔ diadjande welo dia tolanyɛ diɔtɔnganelo diasaso la Jehowa. Satana hengenga dia tokesa ndo dia taanganya la Nzambi katɛmɔlaso. (Jni. 8:44; 2 Kɔr. 11:13-15) Ɔnkɔnɛ, ayonga dui dia lomba sho ndjambola ɔnɛ: ‘Ngande wakesa Satana anto? Kakɔna kakokami nsala dia nkokɛ diɔtɔnganelo diasami la Jehowa?’

NGANDE WAKESA SATANA ANTO?

4. Kakɔna kasala Satana dia ndanya omamemelo aso le Nzambi, ndo lande na?

⁴ Ombeki Jakɔba akafunde ate: “Onto l’onto pembamaka etena ketawɔnde kotwama ndo kesama la nsaki kande hita. Ko nsaki kakɔ lam’atshɔtɔ diemi, tɔ mbotaka pɛkato, ko pɛkato lam’asalematɔ, tɔ ndjotaka nyɔi.” (Jak. 1:14, 15) Dia nde ndanya omamemelo wakiso le Nzambi, Satana ndekaka sɔmana la kiɔkɔ ya nsaki yaso, mbuta ate otema aso.

5, 6. a) Lo tshimbo y’akambo akɔna wayanga Satana dia tokesa? b) Naa tolonga takamba la Satana dia nkesa etema aso ndo etombelo akɔna wakondjande lo nkamba la tɔ?

⁵ Lo tshimbo y’akambo akɔna walanya Satana etema aso? Bible mbutaka ɔnɛ: “Andja w’otondo wekɔ lo nɔmbɔma oma le Kanga kɔlɔ.” (1 Jni. 5:19) “Diangɔ dia l’andja ɔnɛ” diekɔ l’atei wa dihomɔ diakamba la Satana dia tokesa. (Adia 1 Joani 2:15, 16.) Diabolo ambokesa anto wa l’andja ɔnɛ la mayɛlɛ tshɛ l’edja k’ɛnɔnyi efula. Lam’ele tekɔ lo nsɛna l’andja ande, sho pombaka ndjalama oma lo tolonga tande ta mayɛlɛ.​—Jni. 17:15.

⁶ Satana kambaka la toho ta mayɛlɛ dia nomialomia nsaki y’etema aso. Ɔpɔstɔlɔ Joani shilaka toho tosato takamba la nde tɔnɛ: 1) “nsaki ka demba,” 2) “nsaki ka washo” ndo 3) “ɔsɛmɔ wa kɛnɛ kele l’onto lo lɔsɛnɔ.” Satana akakambe la toho tɔsɔ dia mpemba Yeso l’oswe. Lam’ele Satana ambokamba la tolonga ta mayɛlɛ tɔsɔ l’edja k’ɛnɔnyi efula, nde ekɔ lo nkondja etombelo w’ɛlɔlɔ nɛ dia nde ekɔ lo mbɔtɔnganyiya tolonga takɔ la wɛɔdu w’onto l’onto. La ntondo ka sho mɛna tɛdikɔ takokaso mbɔsa dia sho ndjakokɛ oma lo tolonga tɔsɔ, nyɛsɔ totasɛdingodi woho wakatondoya Satana dia nkesa Eva ndo woho wakandakite tatala la ntondo k’Ɔnaki Nzambi.

“NSAKI KA DEMBA”

7. Ngande wakakambe Satana la “nsaki ka demba” dia nkesa Eva?

⁷ Onto tshɛ nangaka monga la yoonge ya dimɛna, diakɔ dieso l’ohomba wa mbo ya ndɛ. Otungi aso akatonge nkɛtɛ dia yɔ tondjaka mbo ya ndɛ y’amɛna. Satana koka nkamba la ndjala kele laso l’oyango wa tokonya diaha sho nsala lolango laki Nzambi. Nyɛsɔ tɔsɛdingole woho wakandasale dui sɔ le Eva. (Adia Etatelu 3:1-6.) Satana akatɛ Eva ɔnɛ oyadi nde ndɛ olowa w’oma lo “utamba w’ewu k’akambu w’ololo ndu k’akambu wa kolo,” nde hatovɔ ndo ayonga oko Nzambi. (Etat. 2:9) Lo mbuta ngasɔ, Diabolo akɛnya dia Eva komonga l’ohomba wa nkitanyiya Nzambi dia nde monga la lɔsɛnɔ. Ɔsɔ mɛtɛ aki kashi ka mamba. Lam’ele kanyi shɔ yakonɛma lo yimba yaki Eva, nde akatanema la ntondo k’ɛsɔnwɛlɔ ehende, mbuta ate nde akakoke ntona kana mbetawɔ dia nsaki ka ndɛ olowa mpama l’otema ande. Kaanga mbaki etamba w’elowa ekina l’ekambɔ, Eva akake washo ande paka l’otamba wakawotɛ Satana waki l’atei w’ekambɔ ndo “ndi akakohola ulua, akali.” Satana akonɛ nsaki kande ka ndɛ olowa wakoosekɛ Otungi ande.

8. Lo nkamba la “nsaki ka demba,” ngande wakahembe Satana Yeso, ndo lande na kakinde kotondoya?

⁸ Satana akakambe la yoho yakɔ yaamɛ dia nkesa Yeso l’oswe. L’ɔkɔngɔ wa Yeso nkila mbo ya ndɛ l’edja ka tanyi 40 ndo etsho 40, Satana akɛnyi dia nde aya la ndjala ko nde akoohembe. Nde akawotɛ ate: “Naka ɔna Nzambi keyɛ, otɛ ave anɛ dia vɔ mpilɔ mbo ya ndɛ.” (Luka 4:1-3) Yeso akatanema la ntondo k’ɛsɔnwɛlɔ ehende, mbuta ate nde akakoke ntona dia nkamba la wolo ande wa nsala ahindo dia nkondja mbo ya ndɛ kana nsala dui sɔ. Yeso akeyaka dia nde kokoka nkamba la wolo ɔsɔ paka dia nkotsha eyango wa lokaki. Nde akeyaka nto dia diɔtɔnganelo diasande la Jehowa mbakaleke ohomba, koko aha nshidiya ndjala kaki la nde. Yeso akookadimola ate: “Akafundama ate: ‘Onto hayala la lɔsɛnɔ oma lo mbo ya ndɛ tsho.’”​—Luka 4:4.

“NSAKI KA WASHO”

9. Kakɔna kalembetshiya “nsaki ka washo,” ndo ngande wakakambe Satana la nsaki kɛsɔ dia nkesa Eva?

⁹ Joani akadimola “nsaki ka washo” l’ɔnɔngɔ wa tolonga takamba la Satana dia tokesa. Etelo kɛsɔ nembetshiyaka di’onto koka ntatɛ nkombola ɛngɔ kɛmɔtshi l’ɔkɔngɔ wa nde kishishima. Lo kɛnɛ kendana la Eva, Satana akakambe la nsaki kande lo mbotɛ ɔnɛ “ashu a[yɛ] wayudiho.” Etena kakaleke Eva nshishima olowa ɔsɔ mbakaleke mposa kande ka mbɔlɛ mfula l’otema ande. Nde akɛnyi di’otamba ɔsɔ waki “dimena lu ashu.”

10. Ngande wakakambe Satana la “nsaki ka washo” dia mpemba Yeso, ndo kakɔna kakasale Yeso?

¹⁰ Ko kayotota lo dikambo dia Yeso? Satana “akawɛnya waolelo tshɛ wa lo nkɛtɛ k’otondo lo tshanda mɔtshi, ndo akawotɛ ate: ‘Layokosha lowandji lɔnɛ tshɛ ndo lotombo lalɔ, nɛ dia wakambishalɔ ndo dimi lishaka onto tshɛ lalangami mbisha.’” (Luka 4:5, 6) Yeso kɔmɛna waolelo asɔ la washo ande wa mɛtɛ mɛtɛ, koko Satana akawɛnyawɔ lo ɛnɛlɔ, mbuta ate lo yoho yakakoke nkotola yambalo yande. La lotamanya tshɛ, Satana akatɛ Yeso ate: “Naka wɛ tɛmɔlami kaanga mbala ɔtɔi, kete layokoshalɔ tshɛ.” (Luka 4:7) Mbokɛmaka dia Yeso konanga monga woho w’onto wakalangaka Satana dia nde monga. Nde akookadimola aha la ntshimbatshimba ate: “Akafundama ate: ‘Jehowa Nzambi kayɛ kahombayɛ ntɛmɔla ndo paka ndamɛ oto kahombayɛ kambɛ olimu w’ekila.’”​—Luka 4:8.

“ƆSƐMƆ WA KƐNƐ KELE L’ONTO LO LƆSƐNƆ”

11. Ngande wakakesama Eva oma le Satana?

¹¹ Etena kakandashilaka Akambo wa l’andja ɔnɛ, Joani akashile ndo “ɔsɛmɔ wa kɛnɛ kele l’onto lo lɔsɛnɔ.” Etena kaki Adama nde la Eva ato la nkɛtɛ, vɔ komonga l’onto lakawakoke ‘nsɛmɛ kɛnɛ kaki la wɔ.’ Koko vɔ waki l’otako. Etena kakandahembaka Eva, Satana akawotɛ ate Nzambi ekɔ lo mbodima ɛngɔ kɛmɔtshi k’ohomba efula. Diabolo akawotɛ ate lushi layoyɔlɛ olowa “w’uma l’utamba wa ewu k’akambu w’ololo ndu k’akambu wa kolo,” wɛ ‘ayoyala oko Nzambi ndo ayeya akambo w’ɔlɔlɔ ndo akambo wa kɔlɔ.’ (Etat. 2:17; 3:5) Mbokɛmaka dia Satana akatɛka Eva dia nde akakoke ndjalɔmbɔla aha l’ekimanyielo ka Jehowa. Ondo otako waki la Eva mbakookonya dia nde kesama. Nde akale olowa wakasekɛma lo mfɔnya dia nde hatovɔ mɛtɛ. Ande woho wakandayatshundja lee!

12. Naa yoho kina yakahembe Satana Yeso, ndo ngande wakookadimola Yeso?

¹² Otshikitanyi la Eva, Yeso akatotshikɛ ɛnyɛlɔ ka diambo k’okitshakitsha. Satana akahembe Yeso lo yoho kina, koko Yeso kombetawɔ nsala kɔlɔ ndo nde kosala kaanga dui ɔtɔi diakakoke mbidja Nzambi l’ohemba. Otondosala ngasɔ, tshike dui sɔ diotonga tshondo y’otako. Yeso akookadimola mbala kakɔ ɔtɔi lo yoho yokɛma ate: “Akafundama ɔnɛ: ‘Todjake Jehowa Nzambi kayɛ l’ohemba.’”​—Adia Luka 4:9-12.

NGANDE WAKOKASO NKOKƐ DIƆTƆNGANELO DIASASO LA JEHOWA?

13, 14. Ɛnya woho wakamba Satana la tolonga tande ɛlɔ kɛnɛ.

¹³ Ɛlɔ kɛnɛ, Satana ekɔ lo nkamba la ehemba akɔ waamɛ wakakambe la nde dia mpemba Eva la Yeso. Dia memula “nsaki ka demba,” Diabolo kambaka l’andja ɔnɛ lo mfudia awui wa mindo ndo olelo la ɔnwɛlɔ wa tshambandeko. Lo tshimbo y’esato wɛnyawɔ anto etakataka, djekoleko l’Ɛtɛrnɛtɛ, nde koka munda wanɛ wawaenda esadi eto ndo memula ‘nsaki kawɔ ka washo.’ Nde kambaka nto la nsaki ka lomombo, la wolo, la lokumu ndo l’otako dia ntshutshuya anto dia vɔ ‘mfuna kɛnɛ kele la wɔ lo lɔsɛnɔ.’

¹⁴ “Akambo wa l’andja ɔnɛ” wekɔ oko ɛbɔ watokambaka l’amundji wa nse. Vɔ wekɔ amɛna efula lo washo, koko vɔ konyaka lo nyɔi. Satana kambaka l’awui wɛna anto dia wekɔ amɛna lo lɔsɛnɔ lawɔ la lushi la lushi dia mbakonya dia vɔ nsala kɛnɛ kahɔtɔnɛ l’ɛlɛmbɛ wa Nzambi. Tolonga ta mayɛlɛ tɔsɔ tekɔ l’oyango wa nomialomia nsaki yaso ndo ndanya etema aso. Tɔ tekɔ l’oyango dia sho mbetawɔ ɔnɛ nkotsha ehomba aso ndo mbetsha wahɔ aso hita lo dihole dia ntondo ndeka nsala lolango laki Nzambi. Onde tayetawɔ di’awui asɔ monga la shɛngiya le so?

15. Ngande wakokaso mbokoya Yeso lo woho wakandashike ntanga la ntondo k’ehemba waki Satana?

¹⁵ Kaanga mbakatale Eva lo djonga yaki Satana, Yeso lo wedi ande akashike ntanga. Mbala tshɛ kakoohembaka Satana, Yeso akakambaka l’Afundelo lo mbuta ɔnɛ: “Akafundama ɔnɛ.” Naka sho mbekaka Bible l’etete, kete tayonga l’akoka wa nkakatshiya avɛsa l’ɔtɛ, tayowaohɔka mbala la mbala ndo dui sɔ diayotokimanyiya dia nshika ntanga la ntondo k’ehemba. (Osam. 1:1, 2) Ndo nto, mbohɔka bɛnyɛlɔ dia l’Afundelo di’anto waki la kɔlamelo le Nzambi ayotokimanyiya dia sho mbaokoya. (Rɔmɔ 15:4) Naka sho mboka Jehowa wɔma wɔsɔhanyemi la dilɛmiɛlɔ, nanga kɛnɛ kalangande ndo mpetsha kɛnɛ kahetshande, kete dui sɔ diayotokokɛ.​—Osam. 97:10.

16, 17. Shɛngiya yakɔna yakoka monga la “akoka a[so] w’ekanelo ka yimba” lo weho w’anto weso?

¹⁶ Ɔpɔstɔlɔ Pɔɔlɔ tokeketshaka dia sho nkamba “l’akoka aso w’ekanelo ka yimba” dia sho monga anto walɔmbwama la yimba yaki Nzambi, koko aha y’andja ɔnɛ. (Rɔmɔ 12:1, 2) Dia mɛnya ohomba wa sho sɔnaka kɛnɛ kahombaso kanaka yimba lɔkɔ, ɔpɔstɔlɔ Pɔɔlɔ akate ate: “Nɛ dia tekɔ lo mbitola tokanyi ta kɔlɔ ndo oseka wekamu tshɛ walɔshana la ewo ka Nzambi, ndo tekɔ lo nɛndja tokanyi tshɛ dia tɔ nkitanyiya Kristo.” (2 Kɔr. 10:5) Lam’ele tokanyi taso tekɔ la shɛngiya ya wolo lo woho w’onto weso, sho pombaka ‘ntetemala nkana yimba’ lo akambo wakoka mandɔma.​—Flpɛ. 4:8.

¹⁷ Hatokoke pondjo monga ekila naka sho ndodiaka yimba yaso la tokanyi ndo la nsaki ya kɔlɔ. Sho pombaka nanga Jehowa la “nkum’otema ka pudipudi.” (1 Tim. 1:5) Koko otema aso wekɔ lokeso ndo lo tena dimɔtshi, sho hateye shɛngiya ya wolo yakoka monga la “diangɔ dia l’andja ɔnɛ” le so. (Jer. 17:9) Diakɔ diele, ayonga dimɛna sho ‘ndjasɛdingolaka dia mbeya kana tekɔ lo nsɛna lo yoho yɔtɔnɛ la mbetawɔ kaso ndo tekɔ lo ntetemala mɛnya weho w’anto weso’ l’ekimanyielo ka wekelo wa Bible.​—2 Kɔr. 13:5.

18, 19. Lande na kahombaso mbɔsa yɛdikɔ ya monga weho w’anto walanga Jehowa dia sho monga?

¹⁸ Dui dikina diayotokimanyiya dia sho nshika ntanga la ntondo ka “awui wa l’andja ɔnɛ,” ele namaka lo yimba ɛtɛkɛta wakafundama l’ɛlɔmbwɛlɔ ka nyuma kaki Nzambi ɛnɛ: “Andja ɔnɛ la nsaki yawɔ wekɔ lo tete, koko ɔnɛ lasala lolango la Nzambi tshikalaka pondjo.” (1 Jni. 2:17) Andja waki Satana ɔnɛ mɛnamaka oko wayotshikala pondjo ndo wekɔ dimɛna. Koko lushi lɔmɔtshi, vɔ wayolanyema. Andja waki Satana hawokoke tosha ndooko ɛngɔ kakoka ntshikala pondjo. Mbohɔka dui sɔ ayotokimanyiya diaha sho ntala lo tolonga taki Diabolo.

¹⁹ Diakɔ diatɔlɔmba ɔpɔstɔlɔ Petero dia sho monga weho w’anto wetawɔma le Nzambi ‘etena kakongaso ndo kohɔso woongelo wa lushi la Jehowa layolanyema olongo la lombe la dja ndo lele diangɔ diayɔlɛlɔ la dja ya wolo.’ (2 Pet. 3:12) Kem’edja nto, lushi lɔsɔ layanga ndja, ndo Jehowa ayanga ndanya andja waki Satana. Koko polo ndo kakiye, Satana aakatetemala nkamba la “awui wa l’andja ɔnɛ” dia tohemba oko wakandahembe Eva nde la Yeso. Hatohombe monga oko Eva ndo nyanga dia nkotsha nsaki yaso ya lokaki. Nsala ngasɔ ayɛnya diele oko Satana mbele nzambi kaso. Sho pombaka mbokoya Yeso ndo nshika ntanga la ntondo k’ehemba waki Satana, oyadi woho akɔna tshɛ wewɔ. Ɔnkɔnɛ, nyɛsɔ sho tshɛ tɔshi yɛdikɔ ya monga weho w’anto walanga Jehowa dia sho monga.