Nyɔi keema ekomelo a shimu

Bɛtaniya aki ngelo ka tshitshɛ kakangana la Jɛrusalɛma kilɔmɛtrɛ oko shato. (Joani 11:18) Dikambo dimɔtshi dia woke diakasalema lɛkɔ mingu ngana la ntondo ka Yeso mvɔ. La shashimoya Lazaro laki ɔngɛnyi ɔmɔtshi waki Yeso wa ma ma akatate hemɔ ka wolo ndo akavu.

Etena kakoke Yeso lokumu lɔsɔ, nde akatɛ ambeki ande dia Lazaro ekɔ lo djɔ ndo nde ambotshɔ dia towemula. (Joani 11:11) Koko ambeki waki Yeso koshihodia kɛnɛ kakandawatɛ, diakɔ diakawatɛ Yeso hwe ate: “Lazaro ambovɔ.”—Joani 11:14.

Nshi nyɛi l’ɔkɔngɔ wa vɔ mbokundɛ, Yeso akakome la Bɛtaniya dia tosamba Maata lakavusha ɔnango. Maata akawotɛ ate: “Otondonga wɛ aki lanɛ, tshike ɔnalengo havwe.” (Joani 11:17, 21) Yeso akokadimola ate: “Dimi lekɔ eolwelo la lɔsɛnɔ. Onto tshɛ longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto.”—Joani 11:25.

Dia mɛnya mɛtɛ k’ɛtɛkɛta ɛsɔ, Yeso akasukana la diombo ndo akate la dui dia wolo ate: “Lazaro, tomba!” (Joani 11:43) Ndo anto tshɛ waki laawɔ wakambe dia mɛna ɔnɛ lakavu ambotomba.

Yeso akolola anto ahende la ntondo ka nde ndjosala dui sɔ. Lo diaaso dimɔtshi nde akolola ɔnaki Jayiro la womoto. La ntondo ka nde mbolola ɔna ɔsɔ, Yeso akate dia nde ekɔ lo djɔ.—Luka 8:52.

Tolembete dia lo kɛnɛ kendana la nyɔi ka Lazaro ndo ka ɔnaki Jayiro la womoto, Yeso akɛdika nyɔi la djɔ. Wɛdikelo ɔsɔ wekɔ dimɛna. Lande na? Nɛ dia onto loladi heye ndooko dui ndo dui sɔ mbelaka kanyi ya momuya oma lo paa ndo asui. (Undaki 9:5; enda kiombo yele l’ɔtɛ a dui ɔnɛ: “Nyɔi ekɔ oko djɔ ya baku.”) Ambeki wa Yeso wa ntondo wakashihodiaka eongelo ka mɛtɛ k’anto wavɔ. Dibuku Encyclopédie de la religion et de l’éthique (lo Angɛlɛ) mbutaka ɔnɛ: “Ambeki wa Yeso wakɔsaka nyɔi oko djɔ ndo diombo oko dihole dia momuya . . . le wanɛ wakavu lo mbetawɔ.”a

Sho sambemaka lo mbeya ɔnɛ wanɛ wavɔ wekɔ lo djɔ lo waombo ndo vɔ hawosowe. Lam’ele tambeya kɛnɛ keta etena kavɔso, hatoyokoka mboka wɔma nto.

‘ONDE NAKA ONTO AMBOVƆ, NDE KOKA NDJƆSƐNA NTO?’

Kaanga mbele sho ngɛnangɛnaka ndala dimɛna l’otsho ko memɔ, akɔna akombola ndala lo pondjo? Shi tekɔ l’elongamelo k’ɔnɛ wanɛ wavɔ woladi djɔ lo waombo wayolɔ, l’ɛnyɛlɔ ka Lazaro ndo ɔna womoto laki Jayiro?

Owandji wa nkumbo Jɔbɔ akoke dimbola di’ohomba sɔ etena kakandoke dia nde aya suke la mvɔ. Nde akambola ate: ‘Onde naka onto ambovɔ, nde ayɔsɛna nto?’—Jobo 14:14.

Jɔbɔ akakadimola lo dimbola diande hita lo mbutɛ Nzambi Kanga-Wolo-Tshɛ ate: “We ayumbeta, ku dimi layuketawo; we ayukaka ulimu w’anya aye ketshi.” (Jobo 14:15) Jɔbɔ aki l’eshikikelo dia Jehowa ekɔ lo nomɔlomɔ lo kɛnɛ kendana la lushi layondolola okambi ande wa kɔlamelo. Onde Jɔbɔ akalongamɛka dui dimɔtshi diahakoke salema? Keema.

Woho wakolola Yeso anto akɛnya dia Nzambi akawosha wolo wa mbolola anto wakavu. Diakɔ diata Bible ɔnɛ Yeso ekɔ la “nsapi ya nyɔi.” (Ɛnyɛlɔ 1:18) Oko wakinde la wolo wa mbolola Lazaro, Yeso ekɔ la wolo wa mbolola anto lo nshi yayaye.

Bible tɛkɛtaka dikambo dia daka dia eolwelo mbala ko mbala. Ɛnyɛlɔ, ondjelo ɔmɔtshi akashikikɛ omvutshi Danyɛlɛ ate: “We ayumuya ndu ayemala lu dihuli diaye lu ekumelu ka nshi.” (Danyele 12:13) Yeso akatɛ Asadukɛ ndo ewandji w’ɛtɛmwɛlɔ w’ase Juda waki komonga la mbetawɔ lo daka dia eolwelo ɔnɛ: “Nyu nyekɔ lo dindja, nɛ dia hanyeye oyadi Afundelo kana wolo wa Nzambi.” (Mateo 22:23, 29) Ɔpɔstɔlɔ Pɔɔlɔ akate ate: “Dimi lekɔ l’elongamelo le Nzambi . . . dia eolwelo k’anto w’ɛlɔlɔ ndo k’anto wa kɔlɔ kayoyala.”—Etsha 24:15.

ETENA KAKƆNA KAYOLWAMA WANƐ WAKAVU?

Etena kakɔna kayosalema eolwelo k’anto w’ɛlɔlɔ ndo k’anto wa kɔlɔ? Ondjelo akatɛ Danyɛlɛ laki onto ɔlɔlɔ dia nde ayolwama “lu ekumelu ka nshi.” Maata nde lawɔ aki la mbetawɔ k’ɔnɛ Lazaro l’ɔnango “ayolɔ lo eolwelo ka lushi l’ekomelo.”—Joani 11:24.

Bible mɛnyaka diɔtɔnganelo diele lam’asa “lushi l’ekomelo” la ɛlɔmbwɛlɔ ka Diolelo diaki Kristo. Pɔɔlɔ akafunde ate: “Nɛ dia nde [Kristo] pombaka monga Nkumekanga polo lam’ayokitsha Nzambi atunyi ande tshɛ l’ɛse k’ekolo ande. [Ndo] otunyi w’ekomelo wayolanyema ele nyɔi.” (1 Kɔrɛtɔ 15:25, 26) Ɔsɔ ekɔ ɔkɔkɔ ɔmɔtshi w’ohomba watotshutshuya dia nɔmba dia Diolelo diaki Nzambi ndja ndo dia lolango lande salema la nkɛtɛ.b

Oko wakadieyaka Jɔbɔ, Nzambi ekɔ lo nomɔlɔmɔ dia mbolola anto wakavu. Etena kayokoka lushi lɔsɔ, nyɔi hatonga nto. Ndo ndooko lushi layoyambola anto nto ɔnɛ: ‘Onde nyɔi mbele ekomelo a shimu?’