“Ekomelo”​—Alembetshiyatɔ?

Kakɔna kakoyɛ lo yimba etena kokayɛ etelo k’ɔnɛ: “Ekomelo kayasuke”? Onde wɛ kanyiyaka di’osambisha ɔmɔtshi wa lokumu wahangɔhangɔ lo lɔyɛnga, asala tɔjɛstɛ ta laande, ele la Bible l’anya? Kana onde wɛ kanyiyaka dikambo dia osombe wa pami emadi l’asanga wa mboka ndɛdu kaanda, ndɔta okutu w’otale, ndjakeleka ɔkɔdi lo lokende ndo okime djembetelo yele la losango la lushi l’ekomelo? Nkanyiya awui wa ngasɔ konyaka anto amɔtshi dia ndjakiyanya, mbidja taamu ndo mbɔsa oko awui wa shɛkɛsɛkɛ.

Bible mbutaka ɔnɛ: “Ekomelo kayoya.” (Mateo 24:14) Ekomelo mbelamɛka nto ɔnɛ “lushi la woke la Nzambi” ndo “Aramangɛdɔna.” (Ɛnyɛlɔ 16:14, 16) Lo mɛtɛ, ɛtɛmwɛlɔ efula wekɔ la eokelo ka kɔlɔ ka dui sɔ, hawodimane mfundo, ndo wetshelo efula wa kashi wendana la dui sɔ wambofulanɛ. Koko, Bible tɛkɛtaka lo yoho yokɛma hwe lo dikambo dia ekomelo, tɔ nembetshiyaka woho wele ekomelo ndo woho wetɔ bu. Ɔtɛkɛta wa Nzambi tokimanyiyaka dia mbeya kana ekomelo kaya suke. Kɛnɛ koleki dimɛna ele, tɔ tɛnyaka kɛnɛ kahombaso nsala dia ndjoshimbamɛ. Ntondo, taanga mɛna tokanyi tɔmɔtshi ta kɔlɔ tele l’anto ndo kɛnɛ ketsha Bible. Lo ndjela Bible, “ekomelo” mɛtɛ alembetshiyatɔ?

KƐNƐ KAHALEMBETSHIYA EKOMELO

1. EKOMELO BU DUI DIMƆTSHI DIAYOLANYA NKƐTƐ LA DJA.

   Bible mbutaka ɔnɛ: “[Nzambi] akashikike kete lu dikitshelu diayo, diako mbahayasukasukaki pundju.” (Osambu 104:5) Divɛsa sɔ ndo akina toshikikɛka dia Nzambi holanya nkɛtɛ kana mbetawɔ dia tɔ nanyema lo pondjo!—Undaki 1:4; Isaya 45:18.

2. EKOMELO BU DUI DIAYOYA OYAYA DIAKI KOKONGƐMA.

   Bible mɛnyaka dia ekomelo kakakongɛma, Nzambi amboshikikɛka etena shikaa ka mbela ekomelo. Tɔ mbutaka ɔnɛ: “Lo kɛnɛ kendana la lushi kana wonya akɔ, ndooko onto leya, kaanga andjelo wa l’olongo, kaanga Ɔna, paka Papa. Nyendake, nyɔsɛnake, nɛ dia nyu hanyeye etena kakashikikɛma.” (Makɔ 13:32, 33) Mbokɛmaka hwe dia, Nzambi (“Papa”) mbeyaka ‘etena shikaa’ kayondela ekomelo.

3. EKOMELO BU ELANYELO KAYOYA OMA LE ANTO KANA OMA LO OSAKANELO WA DIANGƆ DIA L’OLONGO.

   Kakɔna kayosalema lushi l’ekomelo? Ɛnyɛlɔ 19:11 mbutaka ɔnɛ: “Ko dimi lakɛnyi olongo wambodihɔ ndo mfalasa ka wɛma. Ɔnɛ lakakiahema lokombo lande Kanga kɔlamelo ndo mɛtɛ.” Divɛsa dia 19 kotshaka ɔnɛ: “Ko dimi lakɛnyi nyama ka ngala la nkumi ya dikanga ya la nkɛtɛ ndo alembe awɔ wosanganyi dia ndɔsha ɔnɛ lahemi laadiko dia mfalasa ndo alembe ande.” (Ɛnyɛlɔ 19:11-21) Lam’ele tɔtɛkɛta efula ta lo divɛsa nɛ tekɔ ta didjidji, sho koka mbuta lo tshena pe ɔnɛ: Nzambi ayotoma alembe ande w’andjelo dia ndjoshila atunyi ande oshiki.

KƐNƐ KALEMBETSHIYA EKOMELO

1. EKOMELO KA MANDJI Y’ANA W’ANTO YAMBOKITA TATALA.

   Bible mbutaka ɔnɛ: “Lu nshi ya khumi ya dikanga yako, Nzambi leli l’ulungu ayutundja diulelu [lowandji] diahalanaki pundju. Dio hadiuyala l’okongo a wudja ukina. Dio diayulanya waulelu ako tshe, diayâshila ushiki, ku dio diame diayushikikala pundju.” (Danyele 2:44) Oko wakataditshi lo dikambo dia 3, “nkumi ya dikanga ya la nkɛtɛ ndo alembe awɔ” wayosangana “dia ndɔsha ɔnɛ lahemi laadiko dia mfalasa ndo alembe ande.”—Ɛnyɛlɔ 19:19.

2. EKOMELO K’ATA, AWUI WA NGALA NDO WA WƐNGIYA.

   Bible mbutaka ɔnɛ: “[Nzambi] atukumiyaka ata pulu ndu lu kuma ya kete.” (Osambu 46:9) “Antu w’uluwanyi wayukita kete, antu w’usimbwi wayutshikala loko. Keli antu wa kolo wayunyema uma la kete, akanga w’ukadi wayukhundwama uma loko.” (Tukedi 2:21, 22) “Enda! Dimi leetɛ diangɔ tshɛ eyoyo.”—Ɛnyɛlɔ 21:4, 5.

3. EKOMELO KA ƐTƐMWƐLƆ WAHAKOTSHA ƆKƐNDƐ AWƆ LE NZAMBI NDO LE ANTO.

   Bible mbutaka ɔnɛ: “Amvutshi watutaka kashi lu akambu wahatayi. Elombedi watulelaka antu uku alangawo. . . . L’ekumelu k’akambu ako, kayunyutsha na?” (Jeremiya 5:31) “Lushi lɔsɔ, anto efula wayombutɛ vate: ‘Nkumadiɔndjɔ, Nkumadiɔndjɔ, sho kombutaka akambo wahataye lo lokombo layɛ? Sho kotondjaka ɛdiɛngɛ lo lokombo layɛ? Sho kosalaka ahindo efula lo lokombo layɛ?’ Ko dimi layowatɛ nte: Nyomangane, dimi haanyeye ndooko yema, nyu atshi w’akambo wa kɔlɔ.”—Mateo 7:21-23.

4. EKOMELO K’ANTO WASUKƐ AWUI WASALEMA L’ANDJA ƆNƐ.

   Yeso Kristo akate ate: “Kilombo kayosalema lo ndjela dikambo nɛ: Osase wakaye l’andja, koko anto wakalange wodjima lo dihole di’osase dikambo etsha awɔ waki kɔlɔ.” (Joani 3:19) Bible tɛkɛtaka dikambo dia andja wakalanyema lo nshi ya Nɔa laki pami ka kɔlamelo. Tɔ mbutaka ɔnɛ: “Andja wa lo nshi shɔ [wakalanyema] lam’akalɔ Mvula k’elola la nkɛtɛ. Koko, la ɔtɛkɛta akɔ waamɛ mbambolamema olongo ndo nkɛtɛ yele kakianɛ dia tshumbama la dja lushi la kilombo ndo l’elanyelo k’anto wa kɔlɔ.”—2 Petero 3:5-7.

Tolembete dia “lushi la kilombo ndo l’elanyelo” laya ka ndja, mbɛdikamaka la elanyelo ka “andja” wa lo nshi ya Nɔa. Andja akɔna wakalanyema? Nkɛtɛ kaso kɛnɛ kondanyema, koko “anto wa kɔlɔ,” mbuta ate atunyi waki Nzambi “mbakalanyema.” Lo “lushi la kilombo” laki Nzambi layaye, anto tshɛ wayaetɛ atunyi wa Nzambi wayolanyema. Koko, angɛnyi waki Nzambi wayoshimbamɛ oko wakashimbamɛ Nɔa l’ase nkumbo kande.—Mateo 24:37-42.

Ande woho wayonga nkɛtɛ kɛnɛ dimɛna l’ɔkɔngɔ wa Nzambi minya tɔsɛngiya tshɛ ta kɔlɔ lee! Mbokɛmaka hwe dia losango la lo Bible lendana l’ekomelo lekɔ lokumu l’ɔlɔlɔ, koko aha la kɔlɔ. Koko dimbola diambwama ele: ‘Onde Bible totɛka etena kayoya ekomelo? Onde tɔ kaya suke? Ngande wakokami ndjoshimbamɛ?’