EKADIMWELO LO AMBOLA W’OMA LO BIBLE
Onde sho koka mbeya mɛtɛ lo kɛnɛ kendana la Nzambi?
lande na kele nzambi nangaka dia sho mbeya akambo wa mɛtɛ? adia Joani 17:3
Nzambi akatɛkɛta l’anto. Nde akakambe la nyuma kande kana wolo ande wakamba olimu dia mbidja tokanyi tande lo timba t’afundji wa Bible. (2 Petero 1:20, 21) Sho koka mbeya mɛtɛ lo kɛnɛ kendana la Nzambi oma lo wadielo wa Bible.—Adia Joani 17:17; 2 Timɔte 3:16.
Lo Bible, Nzambi tosholɛka awui efula wendana la nde. Nde tɛnyaka lande na kakandatonge anto la lɔsɛnɔ, kɛnɛ kayondosalɛ anto ndo woho walangande sho nsɛna. (Etsha 17:24-27) Jehowa Nzambi nangaka dia sho mbeya mɛtɛ lo kɛnɛ kendana la nde.—Adia 1 Timɔte 2:3, 4.
Lande na kele Nzambi nongolaka anangi w’akambo wa mɛtɛ?
Jehowa ekɔ Nzambi k’akambo wa mɛtɛ, nde akatome Ɔnande Yeso dia ndjetsha anto akambo wa mɛtɛ. Diakɔ diele anangi w’akambo wa mɛtɛ kotwamaka le Yeso. (Joani 18:37) Nzambi nangaka anto wa ngasɔ oko atɛmɔdi ande.—Adia Joani 4:23, 24.
Satana Diabolo amboshimba anto efula diaha vɔ mbeya Nzambi lo mbaetsha akambo wele bu mɛtɛ lo dikambo dia Nzambi. (2 Kɔrɛtɔ 4:3, 4) Anto wahalange kɛnɛ kele ɔlɔlɔ kotɔmaka lo wetshelo wa kashi wa ngasɔ. (Rɔmɔ 1:25) Koko miliyɔ y’anto w’etema ɛlɔlɔ tanaka mɛtɛ lo kɛnɛ kendana la Nzambi lo mbeka Bible.—Adia Etsha 17:11.