Tokoya Nzambi k’akambo wa mɛtɛ

“Nyukuya [Nzambi] uku an’andi wa ngandji.”​—EFESO 5:1.

1. Anto amɔtshi akanyiyawɔ lo kɛnɛ kendana l’akambo wa mɛtɛ ndo lande na kele kanyi yawɔ kɔlɔ?

‘AKAMBO wa mɛtɛ kɛdikɛdi na?’ (Joani 18:38) Wombola ɔsɔ mbakoke Pɔnsɔ Pilato la lɔsɔkɔ tshɛ ambeta ɛnɔnyi suke la 2 000, mɛnyaka di’akambo wa mɛtɛ wekɔ wolo manema fundo. Ondo anto efula ɛlɔ kɛnɛ mbetawɔka dikambo sɔ. Tshondo ya kanyi y’akambo wa mɛtɛ yekɔ lo ndɔshama. Ondo wɛ akoke wata ɔnɛ onto tshɛ ekɔ l’akambo wɔsande ate wekɔ mɛtɛ kana ɔnɛ akambo wa mɛtɛ bu tshɛ mɛtɛ kana ɔnɛ akambo wekɔ lo tatshikitana efula. Weho wa tokanyi ta ngasɔ tekɔ kɔlɔ. Oyango wa shikaa wasala anto eyangelo ndo wekelo ele wa mbeya awui kana akambo wa mɛtɛ wendana l’andja wasɛnaso ɔnɛ. Akambo wa mɛtɛ hendana la kanyi yele l’onto. Ɛnyɛlɔ, onde onto ekɔ l’anima wahavu kana bu? Onde Satana ekɔ kana bu? Onde lɔsɛnɔ lekɔ l’oyango kana bu? Lo wembola ɛsɔ tshɛ, okadimwelo ɔtɔi oto mbakoka monga mɛtɛ. Naka amonga ekadimwelo ehende lo wombola ɔtɔi, kete ɔmɔtshi wekɔ mɛtɛ ko okina kashi, ekadimwelo ehende hawokoke monga tshɛ mɛtɛ.

2. Lo weho akɔna wele Jehowa Nzambi k’akambo wa mɛtɛ ndo wembola akɔna wayangaso sɛdingola kakianɛ?

² Lo sawo dia ntondo, takɛnyi dia Jehowa ekɔ Nzambi k’akambo wa mɛtɛ. Nde mbeyaka kɛnɛ kele mɛtɛ l’akambo tshɛ. Otshikitanyi efula l’otunyi ande Satana Diabolo lele kanga kashi, Jehowa mbutaka nshi tshɛ mɛtɛ. Ndo nto, Jehowa mbisholɛka anto akina akambo wa mɛtɛ l’ɔlɔlɔ tshɛ. Ɔpɔstɔlɔ Paulo akalake asekande Akristo ate: “Nyukuya [Nzambi] uku an’andi wa ngandji.” (Efeso 5:1) Oko weso Ɛmɛnyi wa Jehowa, ngande wahombaso mbôkoya lo mbutaka mɛtɛ ndo lo sɛnaka lo yoho yɔtɔnɛ l’akambo wa mɛtɛ na? Lande na kele ekɔ ohomba sala ngasɔ na? Ndo eshikikelo kakɔna kele laso k’ɔnɛ Jehowa mbetawɔka wanɛ wakɛndakɛnda lo mɛtɛ na? Tɔsɛdingole akambo asɔ.

3, 4. Ngande wakɛnya ɔpɔstɔlɔ Paulo nde la Petero kɛnɛ kayosalema lo “nshi y’ekumelu”?

³ Tekɔ lo sɛna l’etena kambololanɛ awui wa kashi wendana l’ɔtɛmwɛlɔ. Oko wakataditshi ɔpɔstɔlɔ Paulo l’ekimanyielo ka nyuma k’ekila, anto efula wa lo ‘nshi nyɛ y’ekomelo’ mɛnamaka oko wekɔ lo tɛmɔla Nzambi koko tonaka wolo ande. Amɔtshi tonaka akambo wa mɛtɛ ndo ‘yimba yawɔ yambolana tshɛ.’ Lâdiko wa lâsɔ, “antu wa kolo la akanga a lukesu [wambohama] lu akambu awo wa kolo; vo [wekɔ lo kesana ndo wekɔ lo kesama.]” Kânga mbele anto asɔ wekɔ lo mbeka nshi tshɛ, vɔ hawokome pondjo lo monga la ‘ewo k’oshika k’akambo wa mɛtɛ.’​—2 Timote 3:1, 5, 7, 8, 13.

⁴ Nyuma k’ekila akakimanyiya ɔpɔstɔlɔ Petero nde lawɔ dia funda akambo wendana la nshi y’ekomelo. Oko wakandadite, anto hawotone tsho akambo wa mɛtɛ koko wekɔ lo mɔnyɔla ndo Ɔtɛkɛta wa Nzambi ndo wanɛ wewoya akambo wa mɛtɛ wofundami lɔkɔ. ‘Lo ndjela kɛnɛ kakombolawɔ,’ amɔnyɔdi asɔ mbohɛka dia andja wa lo nshi ya Nɔa wakalanyema l’elola k’ashi, wekɔ ɛnyɛlɔ kendana la lushi l’elombwelo layaye. Kɛnɛ kafɔnyawɔ ɔnɛ kekɔ mɛtɛ kɛsɔ ayowakonya l’elanyelo lam’ayokoka etena ka Nzambi ndanya anto wa kɔlɔ.​—2 Petero 3:3-7.

Ekambi waki Jehowa mbeyaka akambo wa mɛtɛ

5. Lo ndjela omvutshi Danyɛlɛ, kakɔna kakahombe mbeta l’“etena k’ekumelu,” ndo ngande wakotshama prɔfɛsiya kɛsɔ?

⁵ Lam’akandatɛkɛta di’“etena k’ekumelu,” omvutshi Danyɛlɛ akate akambo wele bu l’ɛtɛmwɛlɔ ekina wahomba monga l’atei w’ekambi waki Nzambi, mbut’ate ovuswelo w’akambo wa mɛtɛ wa l’ɔtɛmwɛlɔ. Nde akafunde ate: “Efula [wayoyanga] lene la lene, ewu kayuyala efula.” (Danyele 12:4) Ekambi waki Jehowa hawofukutanyema kana konyama totshungu oma le Okesanyi wa woke. Oko wayangawɔ lo ndjɛkɛ ya lo Bible, vɔ kondjaka ewo ka mɛtɛ. Lo ntambe ka ntondo, Yeso akahɛtshɛ ambeki ande osase. Nde “akadihola etema awo dia vo mana afundelu fundu.” (Luka 24:45) Lo nshi yaso nyɛ, Jehowa ekɔ lo sala woho akɔ wamɛ. Oma lo tshimbo y’Ɔtɛkɛta ande, ya nyuma kande ndo y’ɔlɔngɔswamelo ande, Jehowa ambosha miliyɔ y’anto wa lo nkɛtɛ k’otondo akoka wa shihodia kɛnɛ kamondoshilaka la mbeya, mbut’ate akambo wa mɛtɛ.

6. Akambo akɔna wa mɛtɛ w’oma lo Bible wamboshihodia ekambi waki Nzambi ɛlɔ kɛnɛ?

⁶ Oko w’eso ekambi waki Nzambi, sho shihodiaka akambo efula wele tototowaeya otondonga hatokambɛ Nzambi. Sho mbeyaka ekadimwelo lo wembola wele akanga a lomba wa l’andja ɔnɛ wambohekɔ kunga dia mbeya ekadimwelo awɔ l’edja ka nunu di’ɛnɔnyi. Ɛnyɛlɔ, sho mbeyaka lande na katanema asui, lande na kavɔ anto, ndo lande na kahakoke anto mbidja ki ndo kâmɛ l’andja w’otondo. Ndo tambokondja diɛsɛ dia monga la kanyi ya kɛnɛ katokongɛ lo nshi yayaye, mbut’ate Diolelo diaki Nzambi, paradiso ka lanɛ la nkɛtɛ, ndo lɔsɛnɔ la kokele laha l’ekomelo. Tambeya Jehowa ɔnɛ Laheme Lâdiko dia Tshɛ. Tambeka akambo wendana la lonto lande latɔngɛnyangɛnya ndo kɛnɛ kahombaso sala dia kondja ɛtshɔkɔ ande. Woho wamboteya akambo wa mɛtɛ ambotokimanyiya dia mbeya kɛnɛ kele bu mɛtɛ. Woho wakambaso l’akambo wa mɛtɛ tokokɛka oma l’awui w’anyanya, tokimanyiyaka dia sɛna lɔsɛnɔ loleki dimɛna ndo toshaka elongamelo ka dimɛna efula kendana la nshi yayaye.

7. Anto wa woho akɔna washihodia akambo wa mɛtɛ wa lo Bible ndo waa na wahashihodia akambo akɔ?

⁷ Onde wɛ shihodiaka akambo wa mɛtɛ wa lo Bible? Naka eelo, kete wɛ ambɔtshɔkɔma efula. Etena kafunda ofundji ɔmɔtshi dibuku, mbala efula nde difundaka woho wa ngɛnyangɛnya djui mɔtshi y’anto ya lânde. Abuku amɔtshi fundamaka dikambo di’anto wakeke mukanda efula, akina dikambo di’ana, ndo akina nto dikambo di’anto wele la diewo di’akambo amɔtshi wa lânde. Kânga mbakoka anto tshɛ tana Bible esadi eto, paka djui mɔtshi ya lânde y’anto tsho mbakishihodia ndo mbakingɛnangɛna. Jehowa akakifunde dikambo di’akanga w’okitshakitsha, mbut’ate akanga a memakana wa lanɛ la nkɛtɛ. Anto asɔ koka shihodia Bible oyadi woho wa kalasa wakawɔtɔ, mbekelo yawɔ, dihole diele lawɔ lo tshunda di’anto kana dioho diawɔ. (1 Timote 2:3, 4) Lo wedi okina, eokelo k’akambo wa mɛtɛ wa lo Bible kema le anto wele bu l’etema w’ɛlɔlɔ wa mpokamɛ, oyadi wekɔ anto wa yimba ndo wakeke mukanda efula. Kanga lotamanya ndo didiya hakoke shihodia akambo wa mɛtɛ w’amɛna wele l’Ɔtɛkɛta waki Nzambi. (Mateu 13:11-15; Luka 10:21; Etsha 13:48) Paka Nzambi ndamɛ oto mbakoka funda woho wa dibuku dia ngasɔ.

Ekambi waki Jehowa mbutaka mɛtɛ

8. Lande na kaki Yeso ndamɛ tshondo y’akambo wa mɛtɛ?

⁸ L’ɛnyɛlɔ kaki Jehowa, Ɛmɛnyi ande wa kɔlamelo mbutaka mɛtɛ. Yeso Kristo lele Ɔmɛnyi wa Jehowa woleki woke akewoya akambo wa mɛtɛ oma l’awui wakandetsha ndo oma lo woho wakandasɛnɛ ndo wakandavu. Nde akasukɛ akambo wa mɛtɛ wa l’ɔtɛkɛta waki Jehowa ndo alaka ande. Diakɔ diele, Yeso ekɔ ndamɛ tshondo y’akambo wa mɛtɛ oko wakandate ndamɛ.​—Joani 14:6; Enyelo 3:14; 19:10.

9. Kakɔna kata Afundelo lo kɛnɛ kendana la mbuta mɛtɛ?

⁹ Yeso akalole tɔ “la ngandji ka mamba la mete” ndo nde kondjala “la aui wa lukesu l’unyo andi.” (Joani 1:14; Isaya 53:9) Akristo wa mɛtɛ ndjelaka ɛnyɛlɔ kakatatshiki Yeso lo mbutɛka anto akina mɛtɛ. Paulo akalake asekande ambetawudi ate: “Nyutaneli akambu wa mete, untu la unyandi, ne dia beke dia dimba otoi mbesu, shu tshe untu l’untu.” (Efeso 4:25) Omvutshi Zekaria akafunde ntondo ate: “Kanyutanelaki akambu wa mete untu l’untu la unyandi.” (Zekaria 8:16) Akristo mbutaka mɛtɛ nɛ dia vɔ nangaka ngɛnyangɛnya Nzambi. Jehowa mbutaka mɛtɛ ndo nde mbeyaka kɔlɔ kaya oma l’akambo wa kashi. Diakɔ diele, nde nongamɛka mɛtɛ di’ekambi ande vɔ lawɔ mbutaka mɛtɛ.

10. Lande na kata anto kashi ndo etombelo akɔna wa kɔlɔ watomba?

¹⁰ Le anto efula, mbuta kashi koka mɛnama oko yoho ya kondja wahɔ ɛmɔtshi. Anto mbutaka kashi dia mbewɔ dilanya, dia kondja wahɔ lo yoho mɔtshi kana di’anto akina mbatombola. Koko, wotelo wa kashi ekɔ mbekelo ka kɔlɔ efula. Ndo kɛnɛ koleki ele kanga kashi hakoke mbetawɔma le Nzambi. (Enyelo 21:8, 27; 22:15) Etena keya anto akina ɔnɛ sho mbutaka mɛtɛ, vɔ koka mbetawɔ kɛnɛ kataso ndo vɔ mbɛkɛka etema awɔ le so. Koko, naka vɔ toka tata kânga yema ya kashi tshitshɛ, kete anto akina koka monga la tâmu l’akambo akina tshɛ wa mɛtɛ wakokaso mbuta otsha la ntondo. Yokedi mɔtshi y’ase Afrikɛ mbutaka ɔnɛ: “Dikambo ɔtɔi dia kashi nanyaka miliyɔ y’akambo wa mɛtɛ.” Ndo yokedi kina mbutaka ɔnɛ: “Awui waki kanga kashi hawetawɔma kânga akambo wa mɛtɛ mbatande.”

11. Lo woho akɔna wele akambo wa mɛtɛ hawendana tsho la mbuta mɛtɛ?

¹¹ Akambo wa mɛtɛ halembetshiya tsho mbuta mɛtɛ. Vɔ wekɔ yoho ya lɔsɛnɔ. Vɔ mɛnyaka lonto laso. Sho mbewoyaka anto akina akambo wa mɛtɛ aha tsho oma l’ɛtɛkɛta aso koko ndo oma lo kɛnɛ kasalaso. Ɔpɔstɔlɔ Paulo akambola ate: “We latetshaka akina, okoko wa na wahayayaetsha weme? We latetshaka untu wati: Tuvaki, ku weme mvuaka? We latutelaka akina wati: tanyunanaki, ku weme munanaka?” (Romo 2:21, 22) Naka sho nangaka mbewoya anto akina akambo wa mɛtɛ, kete sho pombaka ndjelaka kɛnɛ kele mɛtɛ l’akambo tshɛ wasalaso. Naka sho mbeyamaka oko anto wata mɛtɛ ndo wele la losembwe, kete dikambo sɔ diayokoka monga la shɛngiya ya wolo efula lo woho wɔsa anto kɛnɛ ketshaso.

12, 13. Kakɔna kakafunde dikɛnda dimɔtshi lo kɛnɛ kendana l’akambo wa mɛtɛ, ndo kakɔna kakôtshutshuya dia monga la lɔkɛwɔ la dimɛna efula?

¹² Ɛlɔngɔlɔngɔ l’esekaseka wele l’atei w’ekambi waki Jehowa vɔ lawɔ shihodiaka ohomba wa mbutaka mɛtɛ. Lo dɛvɔarɛ dimɔtshi diakandasale la kalasa, Jenny laki l’etena kɛsɔ l’ɛnɔnyi 13 akafunde ate: “Losembwe ekɔ dikambo dimɔtshi diɔsami mɛtɛ la nɛmɔ efula. Lonyangu ko aha anto efula mbele la losembwe tshɛ lo tshɛ ɛlɔ kɛnɛ. Lambɔsa yɛdikɔ dimɛ dia layongaka nshi tshɛ la losembwe lo lɔsɛnɔ lami. Layongaka la losembwe oyadi mbuta mɛtɛ hatombela dimi la angɛnyi ami wahɔ mbala kakɔ ɔtɔi. Dimi shikikɛka di’angɛnyi ami wekɔ anto wata mɛtɛ ndo wele la losembwe.”

¹³ Lam’akandatɛkɛtaka dikambo dia dɛvɔarɛ sɔ, ombetsha waki Jenny akate ate: “Dikambo di’ɔlɛmbɛ ɔmɔtshi w’oshika wendana la lɔkɛwɔ ndo la dionga di’anto diɔtɛkɛtshiyɛ nɛ hɛdimi l’ɛnɔnyi ayɛ nɛ dia wɛ eke dikɛnda efula. Dimi mbeyaka dia wɛ ayotetemala la ndjela ɔlɛmbɛ ayɛ ɔsɔ nɛ dia wɛ ekɔ la lɔkɛwɔ la dimɛna efula.” Kakɔna kakatshutshuya dikɛnda dia womoto diaki akɔtɔ kasala sɔ dia monga la lɔkɛwɔ la dimɛna na? Lo mbɔtwɛlɔ ka dɛvɔarɛ diande, Jenny akate dia ɔtɛmwɛlɔ ande “mbodjɛka ɛlɛmbɛ lo lɔsɛnɔ [lande].” Dɛvɔarɛ diakasale Jenny sɔ diambeta ɛnɔnyi esambele. Oko wakadite ombetsha ande, Jenny ekɔ lo tetemala la monga la lɔkɛwɔ la dimɛna efula lo lɔsɛnɔ lande oko Ɔmɛnyi wa Jehowa.

Ekambi waki Jehowa mbisholaka akambo wa mɛtɛ

14. Lande na kele ekambi waki Nzambi wekɔ l’ɔkɛndɛ wa lânde wa sukɛ kɛnɛ kele mɛtɛ na?

¹⁴ Mɛtɛ anto akina wele bu Ɛmɛnyi wa Jehowa koka mbuta mɛtɛ ndo nyanga dia monga la losembwe. Koko, oko weso ekambi waki Nzambi sho mbele l’ɔkɛndɛ wa lânde wa sukɛ kɛnɛ kele mɛtɛ. Takalongola ɔkɛndɛ w’akambo wa mɛtɛ wele lo Bible wakoka konya onto lo lɔsɛnɔ la pondjo. Diakɔ diele, tekɔ l’ɔkɛndɛ wa kahana l’anto akina ewo kɛsɔ. Yeso akate ate: “Untu tshe lambuwusha diango kambi, wayôlomba efula.” (Luka 12:48) Lo mɛtɛ, vɔ ‘nɔmbaka akambo efula’ le wanɛ wakakondja ɔtshɔkɔ wa nongola ewo k’oshinga wolo kaki Nzambi.

15. Ɔngɛnɔngɛnɔ akɔna wonga layɛ etena kewoyayɛ akambo wa mɛtɛ wa lo Bible?

¹⁵ Mbewoya anto akina akambo wa mɛtɛ mbishaka ɔngɛnɔngɛnɔ. L’ɛnyɛlɔ k’ambeki waki Yeso wa lo ntambe ka ntondo, sho mbewoyaka lokumu l’ɔlɔlɔ, mbut’ate losango l’elongamelo lananda otema, le wanɛ ‘wahɛnyahɛnyama ndo wambohandjɔ oko ɛkɔkɔ waha l’olami’ ndo le wanɛ wambetɛma totshungu ndo wambɔtɔ l’ofukutanu oma lo “wetshelu w’edienge.” (Mateu 9:36; 1 Timote 4:1) Ɔpɔstɔlɔ Joani akafunde ate: “Dimi kema la ongenongeno ukina wuleki one, dia mbuka nti: An’ami watokendakendaka lu mete.” (3 Joani 4) Kɔlamelo yaki ‘ana’ wa Joani, ondo ya wanɛ wakandetsha akambo wa mɛtɛ, yakawoshaka ɔngɛnɔngɛnɔ efula. Sho mongaka l’ɔngɛnɔngɛnɔ etena kɛnaso anto wetawɔ Ɔtɛkɛta wa Nzambi la lowando tshɛ.

16, 17. (a) Lande na kahetawɔ anto tshɛ akambo wa mɛtɛ? (b) Ɔngɛnɔngɛnɔ akɔna wakokayɛ kondja etena kasambishayɛ akambo wa mɛtɛ wa lo Bible?

¹⁶ Lonyangu ko, aha anto tshɛ mbetawɔ akambo wa mɛtɛ. Yeso akewoya akambo wa mɛtɛ wendana la Nzambi, kânga etena kakatonaka anto efula dikambo sɔ. Nde akatɛ atunyi w’ase Juda ate: “Ukundi ahanyambetawo? Untu a [“Nzambi atohokamɛka,” NW] akambu a [Nzambi]. Nyu hanyuwauki, ne dia nyu kema wa [Nzambi].”​—Joani 8:46, 47.

¹⁷ L’ɛnyɛlɔ kaki Yeso, sho hatotshike dia mbewoya akambo wa mɛtɛ w’oshinga wolo wendana la Jehowa. Sho hatolongamɛ di’anto tshɛ mbetawɔ kɛnɛ kawatɛso nɛ di’aha anto tshɛ mbaketawɔ kɛnɛ kakate Yeso. Koko, tekɔ l’ɔngɛnɔngɛnɔ wa mbeya dia tekɔ lo sala kɛnɛ kele ɔlɔlɔ. Oma lo ngandji kande k’otamanya, Jehowa nangaka mbisholɛ anto akambo wa mɛtɛ. Oko wewɔ l’akambo wa mɛtɛ, Akristo wekɔ amɛmbi w’osase l’andja ɔnɛ wa wodjima. Lo mpɛtsha osase w’akambo wa mɛtɛ oma l’ɛtɛkɛta ndo l’etsha aso, sho koka kimanyiya anto akina lo vɔ tombola Shɛso lele l’olongo. (Mateu 5:14, 16) Sho mbewoyaka lo sɛkɛ dia hatetawɔ woho watshikitanya Satana akambo wa mɛtɛ ndo sho sukɛka Ɔtɛkɛta wa Nzambi wa pudipudi ndo waha la vadi. Akambo wa mɛtɛ weyaso ndo wasambishaso koka mbisha anto wetawɔ akambo akɔ lotshungɔ la mɛtɛ.​—Joani 8:32.

Totetemale mbuta akambo wa mɛtɛ

18. Lande na ndo ngande wakangɛnangɛna Yeso Natanyɛlɛ?

¹⁸ Yeso akalangaka ndo akatɛkɛtaka akambo wa mɛtɛ. Lo nshi yakandakambaka olimu ande lanɛ la nkɛtɛ, nde akangɛnangɛna anto wakataka mɛtɛ. Lo kɛnɛ kendana la Natanyɛlɛ, Yeso akate ate: “Enda, usi Isariyele mete, laha la lukesu!” (Joani 1:47) Oma lâsɔ, Natanyɛlɛ, lele ondo aketamaka nto Baratolomayo, akasɔnama dia monga ɔmɔtshi la l’atei w’apɔstɔlɔ dikumi l’ahende. (Mateu 10:2-4) Nde mɛtɛ akakondja nɛmɔ efula!

19-21. Ngande wakatshɔkɔma pami kaki ntondo tshungu lo woho wakandate mɛtɛ la dihonga tshɛ?

¹⁹ Tshapita y’otondo ya dibuku dia lo Bible dia Joani kɔndɔlaka dikambo dia pami kekina ka losembwe kakatshɔkɔma oma le Yeso. Sho hateye lokombo lande. Kɛnɛ keyaso ele pami kɛsɔ akotɔ tshungu ndo akalɔmbaka anto diangɔ. Anto wakambe efula etena kakasɛnya Yeso pami kɛsɔ. Losango la dihindo sɔ lakakome l’atui waki Afarisɛ amɔtshi. Lam’ele vɔ wakahetshaka akambo wa mɛtɛ, vɔ tshɛ wakate lam’asawɔ dia onto tshɛ longa la mbetawɔ le Yeso pombaka mbitshanyema oma lo shinangɔnga. Oko wakaweye sheke yawɔ shɔ, ambutshi waki pami kaki tshungu kɛsɔ wakandama la wɔma ko wakatɔlɛ pami kakɔ la ntondo k’Afarisɛ wata dia vɔ haweye woho wokoka ɔnawɔ mɛna kakianɛ ndo haweye onto lakasadi dikambo diakɔ.​—Joani 9:1-23.

²⁰ Pami kakakɔnɔ kɛsɔ aketama nto la ntondo k’Afarisɛ. Lo minya yimba oma l’etombelo tshɛ wakakoke tomba, pami kɛsɔ akate mɛtɛ la dihonga tshɛ. Nde akalembetshiya woho wakandakɔnɔ ndo akɛnya dia Yeso mbakɔkɔnɔla. Oko wakandambe efula lo mɛna di’apami wa lokumu ndo weya mukanda efula asɔ hawetawɔ dia Yeso akaye oma le Nzambi, pami kakakɔnɔ kɛsɔ akawatɛ aha la mboka wɔma dia vɔ mbetawɔ mɛtɛ ka dikambo sɔ lo mbuta ɔnɛ: “Utunduyala untu one kema uma le [Nzambi], tshiki ndi heyi ntsha nduku dikambu.” Oko wakawakome ewo, Afarisɛ wakate dia pami kakakɔnɔ kɛsɔ kema la loshilambo ndo wakawotshanya.​—Joani 9:24-34.

²¹ Lam’akoke Yeso dikambo sɔ, la ngandji tshɛ nde akatshungola etena ka tɛnana la pami kɛsɔ. L’ɔkɔngɔ wa nde sala ngasɔ, nde akakeketsha mbetawɔ kakɛnya pami kaki ntondo tshungu kɛsɔ. Yeso akayɛnya ndamɛ hwe dia nde kele Mɛsiya. Pami kɛsɔ mɛtɛ akatshɔkɔma l’ɔtɛ wakandate mɛtɛ! Lo mɛtɛ, Nzambi ngɛnangɛnaka anto wata mɛtɛ.​—Joani 9:35-37.

22. Lande na kahombaso tetemala la mbuta mɛtɛ?

²² Wotelo wa mɛtɛ ekɔ dikambo diahombaso tetemala mbɔsa la nɛmɔ efula. Ekɔ ohomba efula dia monga ndo tetemala monga la diɔtɔnganelo dia dimɛna l’anto ndo la Nzambi. Mbuta mɛtɛ kɛdikɛdi monga onto lata akambo woho wewɔ, onto lele bu okadi, onto lakokawɔ mbɔtɔ lo demba, onto lakokawɔ mbɛkɛ otema ndo onto letawɔma le Jehowa. (Osambu 15:1, 2) Onto lahate mɛtɛ ekɔ kanga lokeso, akadikadi, kanga kashi ndo lahetawɔma le Jehowa. (Tukedi 6:16-19) Diakɔ diele, ɔsa yɛdikɔ ya tetemala la mbutaka mɛtɛ. Lo mɛtɛ, dia mbokoya Nzambi k’akambo wa mɛtɛ, sho pombaka mbeya akambo wa mɛtɛ, mbutaka mɛtɛ ndo sɛnaka lo yoho yɔtɔnɛ l’akambo wa mɛtɛ.

Ngande wayoyokadimola?

• Lande na kakokaso monga la lowando lo woho wamboteya akambo wa mɛtɛ?

• Ngande wakokaso mbokoya Jehowa lo mbutaka mɛtɛ?

• Ɛlɔlɔ akɔna waya oma lo mbewoya anto akina akambo wa mɛtɛ?

• Lande na kele ekɔ ohomba tetemala la mbuta akambo wa mɛtɛ?

[Esato wa lo lɛkɛ 29]

Oko wakawalongola akambo wa mɛtɛ, Akristo mbewoyaka anto akina akambo, akɔ l’ohetoheto tshɛ

[Esato wa lo lɛkɛ 31]

Pami ka tshungu kakakɔnɔ oma le Yeso akatshɔkɔma efula l’ɔtɛ wakandate mɛtɛ