Onde wɛ mbetawɔka dia Okengi a Woke kokenga?

1, 2. Lande na kakɔsɛ Nzambi Danyɛlɛ oko ‘onto la nɛmɔ efula’ ndo ngande wakokaso monga l’okitanyiya l’ɛnyɛlɔ ka Danyɛlɛ?

ETENA kakatɔlama ase Juda otsha la Babilɔna, vɔ wakɔtɔ l’osomba ɔmɔtshi wakalole tɔɔ la dikishi ndo l’anto wakatɛmɔlaka ɛdiɛngɛ. Koko, ase Juda waki la kɔlamelo, ɛnyɛlɔ Danyɛlɛ nde l’angɛnyi ande asato wakatone kengama oma le ase Babilɔna. (Danyele 1:6, 8, 12; 3:16-18) Danyɛlɛ ndo angɛnyi ande waketawɔ dia Jehowa monga Okengi awɔ ndo wakatetemala mbɔtɛmɔla paka ndamɛ oto. Kaanga mbaketsha Danyɛlɛ etenyi koleki woke ka lɔsɛnɔ lande lo dihole dia kɔlɔ, ondjelo wa Nzambi akate dia nde aki ‘onto la nɛmɔ efula.’—Danyele 10:11, 19.

² Lo nshi yakafundamaka Bible, okengi akakokaka nkitsha diwomba lo ɛngɔ kɛmɔtshi dia ditondja ɛngɔ kɛmɔtshi ka nɛmɔ. Ɛlɔ kɛnɛ, atɛmɔdi wa mɛtɛ mbeyaka dia Jehowa ekɔ Omboledi wa l’andja w’otondo ndo nde ekɔ la lowandji la nkenga wedja. (Adia Jeremiya 18:6.) Nzambi ekɔ nto la lowandji la nkenga onto tshɛ la l’atei aso. Koko, Jehowa hatshutshuya kaanga onto ɔtɔi dia nsala etshikitanu. Nde nangaka dia sho mbetawɔ dia nde tokenga. Lo sawo nɛ tayeka woho wakokaso monga oko diwomba dia wɔdu l’anya wa Nzambi. Tayɔkɛtshanya ambola asato wayela anɛ: 1) Ngande wakokaso mbewɔ ditshelo diakoka tokonya dia ntona dako dia Nzambi ndo monga oko diwomba dia wolo? 2) Ngande wakokaso ndowanya waonga aso dia tokimanyiya dia monga l’okitanyiya ndo monga oko diwomba dia wɔdu? 3) Ngande wakoka ambutshi w’Akristo nkamba kaamɛ la Nzambi etena kakengawɔ anawɔ?

TEWƆ AWUI WAKOKA MBETƐ OTEMA ASO LONYU

3. Awui akɔna wakoka mbetɛ otema aso lonyu? Sha ɛnyɛlɔ.

³ Tukedi 4:23 mbutaka ɔnɛ: ‘Laadiko dia diangɔ tshɛ dialamayɛ, olamake otema ayɛ, nɛ dia oma lɔkɔ mbele tɔkɔkɔ ta lɔsɛnɔ.’ Dia nama etema aso diaha vɔ monga wolo, sho pombaka mbewɔ awui wa kɔlɔ ɛnyɛlɔ oko otako, nsala pɛkato ndo nshisha mbetawɔ. Naka hatongi la shɛnɔdi, kete akambo anɛ koka tokonya diaha monga l’okitanyiya ndo atɔmbɔki. (Danyele 5:1, 20; Hɛbɛru 3:13, 18, 19) Kɛsɔ mbakakomɛ Uziya nkumekanga ka la Juda. (Adia 2 Ekondo 26:3-5, 16-21.) Ntondo, Uziya aki l’okitanyiya ndo nde aki la diɔtɔnganelo dia dimɛna la Nzambi ndo Nzambi akawosha wolo. Koko ‘kam’akandonge la wolo, otema ande wakayala la lotamanya.’ Nde akonge la otako w’efula ndo akatshumbe tshɔ lo tɛmpɛlɔ kaanga mbaki paka ɛlɔmbɛdi eto mbaki la lotshungɔ la nsala dui sɔ. Etena kakawotɛ ɛlɔmbɛdi dia nde ambosala kɔlɔ, Uziya akomala efula. Koko Jehowa akakitshakitsha nkumekanga k’otako kɛsɔ ndo nde akayala kanga sudi polo ndo lushi lande la nyɔi.—Tukedi 16:18.

4, 5. Kakɔna kakoka tokomɛ naka tambohekɔ ndɔshana l’otako? Sha ɛnyɛlɔ kɛmɔtshi.

⁴ Naka hatewe otako, kete sho koka ndjotatɛ nkanyiya ɔnɛ sho ndeka anto akina ndo sho koka ndjotona alako watoshawɔ oma lo Bible. (Tukedi 29:1; Rɔmɔ 12:3) Dui sɔ mbakakomɛ ekumanyi kɛmɔtshi kakawelɛka Jim. Nde akawane la dikumanyi dikina dia l’etshumanelo l’ɔtɛ wa dikambo dimɔtshi. Jim mbutaka ate: “Dimi lakatɛ anangɛso dia vɔ komonga la ngandji ndo lakatombe oma lo losanganya.” Ngɔndɔ oko shamalo l’ɔkɔngɔ, nde akatshikitanya etshumanelo koko nde kotonga ekumanyi lɛkɔ. Jim aki la lonyangu l’efula. Nde aki l’eshikikelo ɔnɛ nde aki la shadiya, nde akatshike kambɛ Jehowa ndo nde akayɔlaka lo nyuma l’edja k’ɛnɔnyi dikumi. Nde mbutaka dia nde aki l’otako ndo nde akatatɛ mama Jehowa onongo wa kɛnɛ kakete. L’edja k’ɛnɔnyi ɛsɔ, anangɛso wakawembolaka ndo wakokimanyiyaka koko Jim akatonaka ekimanyielo kawɔ.

⁵ Jim mbutaka ate: “Dimi kotshika mbika washo lo woho wakamɛnaka di’anto akina mbaki kɔlɔ.” Ɛnyɛlɔ kande tɛnyaka dia otako koka tokonya dia sho mamɛ dionga diaso dia kɔlɔ. Etena katomba dui dia ngasɔ, kete taya bu oko diwomba dia wɔdu. (Jeremiya 17:9) Onde ɔnangɛso kana kadiyɛso kɛmɔtshi ambokosalɛka kɔlɔ? Onde wɛ atongaka la lɔkɔnyɔ l’ɔtɛ wamboyoshisha diɛsɛ diayɛ dimɔtshi? Ngande wakayasale? Onde wɛ aki l’otako, kana wɛ akashihodia ɔnɛ mbidja wɔladi lam’asayɛ la ɔnanyɔ ndo ntetemala monga la kɔlamelo otsha le Jehowa mbele dui dioleki ohomba?—Adia Osambu 119:165; Kɔlɔsayi 3:13.

6. Kakɔna kakoka ntomba naka sho salaka pɛkato?

⁶ Etena katetemala onto ɔmɔtshi nsala pɛkato ndo kashɛnde kɛnɛ kasalande, dui sɔ koka monga wolo le nde dia nde mbetawɔ dako dia Nzambi. Oma laasɔ, koka monga dui dia wɔdu dia nsala pɛkato. Ɔnangɛso ɔmɔtshi akate dia etena kakinde la dionga dia kɔlɔ, dui sɔ komongaka l’etombelo w’amɛna. (Undaki 8:11) Ɔnangɛso okina lakayashaka lo menda esato wɛnyawɔ anto etakataka lo etena kɛmɔtshi, akayotaka l’ɔkɔngɔ ate: “Lakayɛnaka dia lambotatɛ mɔnyɔla dikumanyi.” Dionga diande diakalanya diɔtɔnganelo diasande la Jehowa. Etena kakashola anto akina kɛnɛ kakandasalaka, nde akakondja ekimanyielo oma le dikumanyi. Mbokɛmaka hwe dia sho tshɛ keema anto wa kokele. Ko naka sho mɔnyɔlaka wanɛ watolaka kana naka sho mbishaka tɛkɛ nɛndɛ etena kasalaso dui dimɔtshi dia kɔlɔ lo dihole dia nɔmba Nzambi dia nde todimanyiya kana dia nde tokimanyiya, kete etema aso wayotshuna.

7, 8. a) Ngande wakatshininadja ase Isariyɛlɛ w’edjedja etema ndo wakawashisha mbetawɔ? b) Wetshelo akɔna wakondjaso?

⁷ Etena kakatshungola Jehowa ase Isariyɛlɛ oma l’Edjibito, vɔ wakɛnyi nde asala ahindo wa diambo efula. Kaanga mbakiwɔ suke la mbɔtɔ lo Nkɛtɛ ya Daka, etema awɔ wakayotshuna. Lande na? Vɔ kondjonga la mbetawɔ le Nzambi. Lo dihole dia vɔ ndjaɛkɛ le Jehowa, vɔ wakayonga la wɔma ndo wakangunɛngunɛ Mɔsɛ. Vɔ wakakombola kaanga nkalola otsha l’Edjibito, lɛnɛ akiwɔ ɛhɔmbɔ. Jehowa akanyange efula ndo akate ate: ‘Edja ndo etena kakɔna kayotona anto anɛ dia nɛmiyami?’ (Walelu 14:1-4, 11; Osambu 78:40, 41) Ase Isariyɛlɛ asɔ wakavu l’oswe wa shɛnga l’ɔtɛ wakawatshininadia etema awɔ ndo wakawashisha mbetawɔ kawɔ.

⁸ Ɛlɔ kɛnɛ, taya suke l’andja w’oyoyo ndo mbetawɔ kaso kekɔ lo pembama. Diakɔ diele, ekɔ ohomba sho sɛdingolaka woho wele mbetawɔ kaso. Ngande wakokaso ndjashikikɛ dia tɔ kekɔ wolo? Sho kokaka nsɛdingola ɛtɛkɛta wa Yeso watanema lo Mateo 6:33. Yambola wate: ‘Onde eyango ndo tɛdikɔ tami mɛnyaka dia dimi mɛtɛ mbetawɔka ɛtɛkɛta wa Yeso? Onde layetsha nsanganya kana olimu w’esambishelo l’oyango wa nyomokondja falanga? Kakɔna kayomosala naka olimu ami wɔlɔmba dia dimi mbetsha wenya ndo wolo efula? Onde dimi layotshika andja ɔnɛ kengami ndo kaanga shimbami dia ntshika kambɛ Jehowa?’

9. Lande na kahombaso ‘ntetemala nsɛdingola’ dia kana tekɔ lo mbetawɔ, ndo ngande wakokaso nsala dikambo sɔ?

⁹ Naka hatoyele kɛnɛ kata Bible lo kɛnɛ kendana la lɔngɛnyi la kɔlɔ, wotshanyelo w’onto oma l’etshumanelo kana tɔkɛnyɔ, kete etema aso wayotshuna. Kakɔna kakokayɛ nsala naka wɛ aya la dionga dia ngasɔ? Aha la ntshimbatshimba wɛ pombaka nsɛdingola mbetawɔ kayɛ. Bible mbutaka ɔnɛ: “Nyotetemale ndjasɛdingola dia mbeya kana nyekɔ lo nsɛna lo yoho yɔtɔnɛ la mbetawɔ ndo nyotetemale mɛnya woho w’anto wenyu.” (2 Kɔrɛtɔ 13:5) Onga la losembwe ndo kambaka mbala la mbala la Ɔtɛkɛta wa Nzambi dia nɔngɔsɔla tokanyi tayɛ.

TONGE OKO DIWOMBA DIA WƆDU

10. Kakɔna kayotokimanyiya dia sho monga oko diwomba dia wɔdu l’anya waki Jehowa?

¹⁰ Dia tokimanyiya dia sho monga oko diwomba dia wɔdu, Nzambi akatosha Ɔtɛkɛta ande, etshumanelo k’Akristo ndo olimu w’esambishelo. Etena kadiaso Bible ndo kakanaso yimba la kɛnɛ kadiaso lushi la lushi, tɔ tokimanyiyaka dia sho monga oko diwomba lo anya wa Jehowa ndo mbetawɔ dia nde tokenga. Jehowa akadjangɛ nkumi ya dikanga ya l’Isariyɛlɛ dia ndjasangolɛ kɔpi kɛmɔtshi k’Ɛlɛmbɛ wa Nzambi ndo kiadiaka lushi la lushi. (Euhwelu k’Elembe 17:18, 19) Apɔstɔlɔ wakeyaka dia mbadiaka Afundelo ndo kanaka la wɔ yimba aki ohomba efula l’esambishelo kawɔ. Vɔ wakakambaka la tenyi di’oma lo Afundelo wa lo Hɛbɛru mbala nkama lo efundelo awɔ ndo etena kakawasambishaka anto, vɔ wakaakeketshaka dia kambaka l’Afundelo dimɛna. (Etsha 17:11) Woho akɔ waamɛ mbele, sho la wɔ mbeyaka di’ekɔ ohomba efula mbadiaka Ɔtɛkɛta wa Nzambi lushi la lushi ndo kanaka la wɔ yimba. (1 Timɔte 4:15) Dui sɔ tokimanyiyaka dia sho monga l’okitshakitsha ndo Jehowa ayonga l’akoka wa tokenga.

11, 12. Ngande wakoka Jehowa nkamba l’etshumanelo k’Akristo dia nde tokenga lo ndjela ehomba wele l’onto l’onto? Sha ɛnyɛlɔ.

¹¹ Jehowa mbeyaka ehomba wele l’onto tshɛ la l’atei aso, ndo nde kambaka l’etshumanelo k’Akristo dia tokenga. Jim, lakatatɛkɛtshi dikambo dia nde la diko, akayotatɛ ntshikitanya ekanelo kande etena kakayoyashaka ekumanyi kɛmɔtshi ka l’etshumanelo le nde. Jim mbutaka ate: “Ndooko lushi lakandapangwɛ lo dikambo diakamasale kana mɔnyɔlami. Koko nde akɛnyaka yimba y’ɔlɔlɔ ndo nsaki ka mɛtɛ ka nkimanyiya.” L’ɔkɔngɔ wa ngɔndɔ shato, ekumanyi kakɔ akelɛ Jim dia nde ndja lo losanganya lɔmɔtshi. Jim mbutaka ate ase etshumanelo kakɔ wakolongola l’osalosalo tshɛ ndo ngandji kawɔ kɛsɔ mbakookimanyiya dia ntshikitanya ekanelo kande. Nde akatatɛ mɛna dia tokanyi tande komonga dui diakaleke ohomba. Dikumanyi dia l’etshumanelo ka Jim ndo wadɛnde wakookeketsha, ndo yema yema nde akayokambɛ Jehowa nto. Jim akakondja wahɔ nto lo mbadia asawo amɔtshi oma lo Tshoto y’Etangelo ya Ngɔndɔ ka dikumi l’ɔtɔi 15, 1992 waki l’ɔtɛ adui ɔnɛ: “Jéhovah n’est pas à blâmer,” ndo “Servons Jéhovah fidèlement.”

¹² L’edjedja ka wonya, Jim akayonga ekumanyi. Oma laasɔ, nde akakimanyiya anangɛso waki l’ekakatanu akɔ waamɛ dia vɔ nkeketsha mbetawɔ kawɔ. Nde akafɔnyaka dia nde aki la lɔngɛnyi la ma ma la Jehowa koko tetele aha ngasɔ mbakidiɔ. Nde ekɔ lo nyanga l’ɔtɛ wakandetawɔ dia otako mbokonya dia mbika washo lo munga y’anto akina lo dihole dia mbika washo lo awui woleki ohomba.—1 Kɔrɛtɔ 10:12.

13. Olimu w’esambishelo koka tokimanyiya dia nkɛnɛmɔla waonga akɔna, ndo wahɔ akɔna wele la dui sɔ?

¹³ Olimu w’esambishelo koka nto tokenga ndo tokimanyia dia sho monga anto w’ɛlɔlɔ. Lo woho akɔna? Etena kasambishaso lokumu l’ɔlɔlɔ, sho pombaka mɛnya waonga wele oko okitshakitsha ndo waonga wotshikitanyi w’olowa wa nyuma ka Nzambi. (Ngalatiya 5:22, 23) Kanyiya waonga amɔtshi w’ɛlɔlɔ wambokokimanyiya olimu w’esambishelo dia wɛ mbakɛnɛmɔla. Etena kokoyaso Kristo, anto kotwamaka lo losango laso ndo vɔ mbeyaka ntshikitanya kanyi yawɔ lo dikambo diaso. Ɛnyɛlɔ, Ɛmɛnyi wa Jehowa ehende wa l’Australie wakalange nsambisha womoto ɔmɔtshi laki lakande, koko nde akomala efula ndo aki ɔsɛndji otsha le wɔ. Koko, Ɛmɛnyi ɛsɔ wakohokamɛka la dilɛmiɛlɔ tshɛ. L’ɔkɔngɔ diko, womoto ɔsɔ akayonyangaka l’ɔtɛ wa lɔkɛwɔ lande ndo akayofundɛ Bɛtɛlɛ mukanda. Nde akayɔlɔmbaka edimanyielo l’ɔtɛ wa dionga diande. Nde mbutaka ate: “Lekɔ enginya dia memala la ntondo k’anto ahende wadianganya Ɔtɛkɛta wa Nzambi ndo monga suke dia mbatondja.” Lo ndjela ɔkɔndɔ ɔsɔ, sho koka mɛna nɛmɔ diele la monga la memakana etena kasambishaso. Lo mɛtɛ, olimu aso w’esambishelo kimanyiyaka anto akina, koko vɔ tokimanyiyaka sho lawɔ dia ndowanya lonto laso.

NYOKAMBE KAAMƐ LA NZAMBI ETENA KAKENGANYU ANANYU

14. Kakɔna kahomba ambutshi nsala naka vɔ nangaka nkondja etombelo w’ɛlɔlɔ etena kakengawɔ anawɔ?

¹⁴ Ana w’akɛnda efula wekɔ l’okitshakitsha ndo vɔ nomɔlomɔka dia mbeka. (Mateo 18:1-4) Diakɔ diele, ekɔ dui dia lomba le ambutshi dia vɔ nkimanyiya anawɔ dia mbeka akambo wa mɛtɛ ndo mbalanga etena kekewɔ akɛnda. (2 Timɔte 3:14, 15) Dia ntondoya dikambo sɔ, ambutshi vɔamɛ pombaka nanga akambo wa mɛtɛ ndo nkamba la kɛnɛ kata Bible lo nsɛnɔ yawɔ. Etena kasala ambutshi dui sɔ, ayonga dui dia wɔdu le anawɔ dia nanga akambo wa mɛtɛ. Ndo nto, ana wayoshihodia dia ohokwelo w’oma le ambutshi awɔ mɛnyaka ɔnɛ vɔ mbaokaka ngandji ndo vɔ mbokamaka ngandji oma le Jehowa.

15, 16. Ngande wakoka ambutshi mɛnya wɛkamu awɔ le Nzambi naka ɔnawɔ ambotshanyema?

¹⁵ Kaanga etena ketsha ambutshi anawɔ akambo wa mɛtɛ, ana amɔtshi ndjotshikaka Jehowa kana ndjotshanyemaka. Naka dui sɔ diambosalema, nkumbo sowaka efula. Kadiyɛso kɛmɔtshi ka l’Afrique du Sud akate ate: “Etena kakatshanyema koshɛmi ka pami, aki oko nde ambovɔ. Dui sɔ diakatɔkɔmɔla etema.” Ko kakɔna kakandasale nde l’ambutshi ande? Vɔ wakayele alako w’oma lo Bible. (Adia 1 Kɔrɛtɔ 5:11, 13.) Ambutshi mbeyaka dia nkitanyiya alako wa Nzambi mongaka la wahɔ le onto tshɛ. Ndo vɔ shihodiaka dia wotshanyelo ekɔ ohokwelo wa la ngandji w’oma le Jehowa. Ɔnkɔnɛ, vɔ sawolaka l’ɔnawɔ paka etena kele dui dimɔtshi di’ohomba diendana la nkumbo kawɔ.

¹⁶ Ngande wakayaoke ɔnɔsɔ? L’ɔkɔngɔ diko nde akayotaka ate: “Lakeyaka dia ase nkumbo kami kopetshakami, koko vɔ wakakitanyiyaka Jehowa ndo okongamelo ande.” Nde akayotaka nto ate: “Etena katshutshuyamayɛ dia nsɛngasɛnga Jehowa dia nde kokimanyiya ndo kodimanyiya, wɛ ayoshihodia polo lo yɛdikɔ yakɔna yeyɛ l’ohomba wa Jehowa.” Ohokanyiya ɔngɛnɔngɛnɔ waki la nkumbo kɛsɔ etena kakakalolɛ ɔlɔngɔlɔngɔ ɔsɔ Jehowa! Lo mɛtɛ, tayonga l’ɔngɛnɔngɛnɔ ndo tayotondoyaka etena tshɛ kayotokitanyiyaka Nzambi.—Tukedi 3:5, 6; 28:26.

17. Lande na kahombaso ndjelaka ɛlɔmbwɛlɔ ka Jehowa ndo ngande wele ndjelaka alako asɔ ekɔ la wahɔ le so?

¹⁷ Omvutshi Isaya akate dia ase Juda waki la Babilɔna wakahombe ndjatshumoya lo mbuta ɔnɛ: ‘Jehowa le, wɛ kele Shɛso. Sho tekɔ diwomba ndo wɛ kele Okengi aso.’ Vɔ wakahombe nto nsɛngasɛnga Jehowa ɔnɛ: ‘Tohɔke munga kaso lo pondjo. Lam’alangayɛ, otende, nɛ dia sho tshɛ tekɔ anto ayɛ.’ (Isaya 64:8, 9) Etena keso l’okitshakitsha ndo kakitanyiyaso Jehowa mbala tshɛ, sho mongaka la nɛmɔ efula le nde oko waki Danyɛlɛ. Jehowa ayotetemala tokenga lo nkamba l’Ɔtɛkɛta ande, la nyuma kande ndo l’okongamelo ande ndo lo nshi yayaye tayoyala “ana wa Nzambi” wa kokele.—Rɔmɔ 8:21.