ASAWO WƆTƆNƐ L’ƆTƐ A DUI WA LO LOHOSO | ANDJELO—ONDE VƆ WEKƆ MƐTƐ? OHOMBA WA DIMBOLA SƆ
Mɛtɛ lo dikambo di’andjelo
Onde wɛ nangaka mbeya mɛtɛ lo dikambo di’andjelo, mbuta ate waa na wewɔ, ngande wakawatongama ndo kɛnɛ kasalawɔ? Ndooko dihole dioleki dimɛna diakokaso nkondja ekadimwelo oleki l’Ɔtɛkɛta wa Nzambi wakasambiyama, mbuta ate Bible. (2 Timɔte 3:16) Kakɔna katotɛ Bible?
Oko wele Nzambi ekɔ Nyuma, andjelo vɔ lawɔ wekɔ nyuma yahɛnama yele “bu l’emunyi la weka.” Andjelo wa kɔlamelo mbidjasɛka l’olongo ndo vɔ wekɔ la lotshungɔ la nkoma lo dihole diodjashi Nzambi l’olongo.—Luka 24:39; Mateo 18:10; Joani 4:24.
Lo tena dimɔtshi andjelo wakɛnama oko anto dia nkotsha ɛkɛndɛ wakawasha Nzambi la nkɛtɛ ndo l’ɔkɔngɔ wa vɔ nshidiya ɛkɛndɛ awɔ, vɔ wakakolola alemba w’anto.—Embadi 6:11-23; 13:15-20.
Kaanga mbele andjelo tɛkɛtamaka lo Bible oko apami ndo mbala efula vɔ ndɔtaka alemba w’apami, ndooko otshikitanu wele lam’asa pami kana womoto l’atei awɔ. Vɔ hawotshuke ndo hawote anawɔ hita. Koko, andjelo kotongama ntondo oko anto la nkɛtɛ, mbuta ate ana w’ashashi, akɛnda kana epalanga. Andjelo wakatongama oma le Nzambi, diakɔ diawaelɛ Bible ɔnɛ “ana wa Nzambi ka mɛtɛ.”—Jɔbɔ 1:6; Osambo 148:2, 5.
Bible tɛkɛtaka dia “ɛtɛkɛta w’anto ndo w’andjelo,” kɛsɔ mɛnyaka dia anto wa lo nyuma asɔ wekɔ la dikoka dia ntɛkɛta. Kaanga mbakakambe Nzambi la andjelo dia ntɛkɛta la anto, nde hetawɔ dia sho ntɛmɔla andjelo kana nsala alɔmbɛlɔ otsha le wɔ.—1 Kɔrɛtɔ 13:1; Ɛnyɛlɔ 22:8, 9.
Andjelo wekɔ nunu akumi laadiko dia nunu akumi, ondo lofulo lawɔ lekɔ otsha lo miliyara.a—Danyɛlɛ 7:10; Ɛnyɛlɔ 5:11.
Andjelo wekɔ la “nkudu ka wolo” oleki wolo w’anto etale ndo vɔ wekɔ la yimba yoleki y’anto. Mɛnamaka dia vɔ koka minda nkɛndɔ la vitɛsɛ y’efula lo ahole wa tale efula ndekana kɛnɛ kakoka anto nkanyiya.—Osambo 103:20; Danyɛlɛ 9:20-23.
Kaanga mbewɔ la yimba y’efula ndo la wolo wa lo nyuma, andjelo wekɔ la elelo, ndo ekɔ awui amɔtshi wewɔ haweye.—Mateo 24:36; 1 Petero 1:12.
Andjelo wakatongama la lonto, waonga wa Nzambi ndo lotshungɔ la nsɔna. Ndo l’ɛnyɛlɔ k’anto, vɔ koka nsɔna dia nsala ɔlɔlɔ kana kɔlɔ. Lonyangu ko, andjelo amɔtshi wakasɔnɛ dia tɔmbɔkwɛ Nzambi.—Judɛ 6.
a Nunu dikumi fundamaka nganɛ lo toshifidi, 10 000. Nunu dikumi ndodia lo nunu dikumi mbishaka miliyɔ 100. Koko, Ɛnyɛlɔ tɛkɛtaka dia “nunu akumi mbala nunu akumi” di’andjelo. Ɔsɔ ekɔ miliyɔ nkama, ondo miliyara ya ditongami dia lo nyuma.