KANYI YA BIBLE
Andjelo
Esato wa andjelo tanemaka lo abuku, asango ndo lo waa filmɛ. Ko andjelo waa na wewɔ? ndo ɔkɛndɛ akɔna wele lawɔ?
Andjelo waa na wewɔ?
KƐNƐ KATA BIBLE
Nzambi akatonge ditongami diele la tomba diokongɛmi dimɛna la ntondo ka nde ndjotonga anto ndo andja wɛnama. Diɔ ndeka anto wolo efula ndo diɔ tanemaka lo dihole diakɔ diaamɛ diatanema Nzambi, mbuta ate lo dihole diahakoke anto nkoma ndo mɛna. (Jɔbɔ 38:4, 7) Bible mbelɛka ditongami dioleki anto sɔ ɔnɛ “nyuma” ndo “andjelo.”—Osambo 104:4.a
Andjelo wekɔ angana? Efula ka mamba. Lofulo la andjelo wodingi kiti ka lowandji kaki Nzambi lekɔ “nunu akumi mbala nunu akumi,” kana “nunu dia nunu” (Ɛnyɛlɔ 5:11) Naka ɛtɛkɛta ɛsɔ pombaka mbɔsama lo yoho ya mɛtɛ mɛtɛ, kete lofulo la andjelo lekɔ miliyɔ nkama!
“Dimi lakɛnyi . . . andjelo efula wakadinge kiti ka lowandji . . . , ndo lofulo lawɔ laki nunu akumi mbala nunu akumi ndo nunu dia nunu.”—Ɛnyɛlɔ 5:11.
Kakɔna kakasalaka andjelo lo nshi y’edjedja?
KƐNƐ KATA BIBLE
Andjelo wakakambɛka Nzambi oko tɛmba awui kana akɛndji.b Vɔ tɛkɛtamaka nto lo Bible oko wanɛ wasala elimu wa diambo wa Nzambi. Nzambi akatome ondjelo ɔmɔtshi dia ndjɔtshɔkɔla Abrahama ndo dia ndjoshimba diaha nde nambola ɔnande Isaka. (Etatelo 22:11-18) Ondjelo ɔmɔtshi akɛnama le Mɔsɛ l’atei wa dikombokombo dia lombalomba l’oyango wa ndjowosha losango lashimbɛ nsɛnɔ. (Etombelo 3:1, 2) Etena kakakashema omvutshi Danyɛlɛ lo difuku dia ntambwɛ, ‘Nzambi akatome ondjelo ande ndo akadihe enyɔ wa ntambwɛ.’—Danyɛlɛ 6:22.
“Ko ondjelo waki Jehowa akɛnama le [Mɔsɛ] lo loombe la dja l’atei wa dikombokombo di’atɛndɛ.”—Etombelo 3:2.
Kakɔna kasala andjelo nshi nyɛ?
KƐNƐ KATA BIBLE
Hatokoke mbeya kɛnɛ tshɛ kasala andjelo ɛlɔ kɛnɛ. Koko, Bible mɛnyaka dia vɔ kimanyiyaka anto w’etema ɛlɔlɔ dia mbeya akambo efula wendana la Nzambi.—Etsha 8:26-35; 10:1-22; Ɛnyɛlɔ 14:6, 7.
Jehowa akɛnya Jakɔbɔ laki owandji wa nkumbo dɔ diakandɛnyi andjelo wadɛ ndo waholɔ lo “kibandola” kaki lam’asa olongo la nkɛtɛ. (Etatelo 28:10-12) Ondo Jakɔbɔ akate kɛnɛ kakandɛnyi lo dɔ sɔ kakokaso mbuta ndo sho lawɔ, mbuta ate Jehowa Nzambi tomaka andjelo ande la nkɛtɛ dia ndjosala elimu, dia ndjokimanyiya anto wele la kɔlamelo wele l’ohomba wa ekimanyielo kande.—Etatelo 24:40; Etombelo 14:19; Osambo 34:7.
“Kibandola k’otale [kakakitshama] la nkɛtɛ ndo shɔdi yatɔ yakakomaka polo l’olongo. Andjelo wa Nzambi wakaholɔka ndo wakadɛka lɔkɔ.”—Etatelo 28:12.
a Bible mɛnyaka dia nyuma mɔtshi yakatɔmbɔkwɛ lowandji la Nzambi ndo tɔ mbelɛka andjelo wa kɔlɔ asɔ ɔnɛ “ɛdiɛngɛ.”—Luka 10:17-20.
b Lo mɛtɛ, tshɛkɛta ya lo Hɛbɛru ndo ya lo Grɛkɛ yokambi lawɔ lo Bible lo dikambo dia “ondjelo” nembetshiyaka tshɛ ɔnɛ “ɔkɛndji.”