Toyaombe etena dia sambisha l’ekimanyielo ka periodikɛ
1 Jehowa kombolaka dia wanɛ wayela mboka yande ndjâla la ‘wɔladi, dikongelo ndo elongamelo ka nshi yayaye.’ (Jer. 29:11) Periodikɛ La Tour de Garde la Réveillez-vous! mbishaka elembetshiyelo lo dikongelo sɔ l’etena k’ohomba. Yɔ kokaka ndjâla ohomba le anto wa weoho tshɛ watanema la ntondo k’akambo efula wotshikitanyi. (1 Tim. 2:4) Onde sho ndjaombɛka etena nshi tshɛ dia sambisha sho la nkumbo kaso l’ekimanyielo ka periodikɛ oka?
2 Naka sho kema la mbekelo ka tshika periodikɛ efula, ahombaso sala dia tshikitanya eongelo kɛsɔ na? Nshi tshɛ, sho pombaka mbeya dia yɔ yekɔ la nɛmɔ efula. Onto ɔmɔtshi akafunde ate: “Ekɔ dimɛna efula mbala periodikɛ yanyu. Nyɔ kema ‘asambi’ wa kɔlɔ. Alako wakimanyiya dia mbisha kitshimudi lo lɔsɛnɔ tanemaka lɔkɔ.” La Tour de Garde la Réveillez-vous! yekɔ etombelo w’eyangelo w’eshika w’oma le “ɔhɔmbɔ wa kɔlamelo ndo wa kɛsɔ.” (Mat. 24:45) Yɔ yekɔ dihomɔ di’eshika dia kɛtsha etema w’anto.
3 Têye artikɛlɛ w’ɛnyanyaso ɔlɔlɔ. Toyange tokanyi tasungana l’ekakatanu watanema tena la tena le anto wa lo mbilo. Ekɔ dimɛna ndjalɔngɔsɔla dia tɛkɛta la pami, la omoto kana l’ɔlɔngɔlɔngɔ wayohomana laso lo soko dimɔtshi kana lo shinga. Tɛ̂nya aha la tshimbatshimba ɔnɛ periodikɛ tɛkɛtɛka onto tshɛ ndo nkumbo tshɛ.
4 Tônge la “periodikɛ yakashimoya”: Sho pombaka momba etenyi k’ɔlɔlɔ ka pɔlɔngalamɛ kaso k’esambishelo lo dikambo dia esambishelo ka l’ekimanyielo ka periodikɛ. Naa etena kaleka sungana dia ndjiɛnyanya na? Onde takahembe sambisha lo luudu la luudu oshidi ɔtɔi a tango la dikɔlɔ, la ntondo ka wekelo wa dibuku oka? Lo ngelo mɔtshi, esambishelo ka la dikɔlɔ tondjaka etombelo w’ɛlɔlɔ efula. Eelo, lushi la samalo sungaka mɛtɛ dia kamba olimu l’ekimanyielo ka periodikɛ, koko ndo nshi kina ya lo lomingu mbeyaka ndjâla ɔlɔlɔ. Esambishelo pombaka salema nshi tshɛ lo luudu la luudu ndo lo makashinyi la makashinyi lo lushi la periodikɛ.
5 Onto l’onto ekɔ l’ɔkɛndɛ wa kɔmandɛ lofulo lɔmɔtshi la shikaa la periodikɛ. Naka têkekɔ la numɛlɔ y’edjedja, sho kokaka kamba la yɔ olimu lo mɛnya anto akambo wotshikitanyi wakatɛkɛtama lo periodikɛ yaso. Naka tekɔ la dikimɔ, sho kokaka nto tshika numɛlɔ mɔtshi y’edjedja lo mvudu y’esombe w’anto la lo wa pitadi. Ɔnkɔnɛ, sho kokaka mbadia ekanda wodianganyemi lo alapɔlɔ aso w’olimu.
6 Naka sho kamba olimu la yema y’alako shɔ, kete lo weoho tshɛ, tayokoka nyomoleka tshika periodikɛ efula. Anto w’etema ɛlɔlɔ wasowa dikambo dia dikongɛ dia kɔlɔ nɛ mandolaka tokanyi tasha ekeketshelo tatanema lo La Tour de Garde la Réveillez-vous! Periodikɛ shɔ mbishaka mɛtɛ mma dia lo nyuma di’ohomba le wanɛ wayanga dia mbetawɔma oma le Jehowa. Omalɔkɔ, toyale la “periodikɛ yakashimoya” ndo todje wolo dia nyomoleka ndjikahanya lo mbilo kaso.