Onde kokaka tshikitanya asawo mbala la mbala oka?

Asawo a weho la weho w’oma lo Bible ndo wakokaso kamba awɔ olimu lam’asambishaso mɛnyamaka lo numɛlɔ la numɛlɔ ka Olimu aso wa Diolelo. Apandjudi efula w’esalosalo mbidjaka lomba lo tokanyi t’eyoyo woho wa tshikitanyaka mbɔtwɛlɔ yawɔ. Olimu aso wa Diolelo nɔngɔsɔlaka mbɔtwɛlɔ yakɔ lo ndjiɛnya oseka ngɔndɔ tshɛ l’ekimanyielo k’asawo efula.

Ondo sho kokaka mɛna mbala mɔtshi ɔnɛ: kema ohomba tshikitanya asawo akɔ. Esangɔ ɛmɔtshi ondo tayoyasha l’olimu wa sambisha lo luudu la luudu paka wenya ɛmɔtshi eto lo ngɔndɔ. L’edjedja ka wonya, takakondja mbɔtwɛlɔ mɔtshi y’ɔtɔnɛ ndo yatondja etombelo w’ɔlɔlɔ. Yɔ kokaka tɛkɛta dikambo dia tɔvɛsa efula takambema olimu mbala la mbala oko Osambu 37:9-11, 2 Petero 3:13, Enyelo 21:4, ndo tokina. Naka ɔsɔku mbediɔ, kete ndoko ohomba wa paka tshikitanyaka asawo mbala efula. Oyango aso w’ohomba efula ele dia mbewoya dikambo dia dikongelo dia Diolelo ndo dia kimanyia anyaso dia vɔ mbeka kɛnɛ kahombawɔ ntsha dia vɔ ndjashikikɛ ekondjelo k’ɛtshɔkɔ w’oma le Jehowa. Naka tambɛna mbɔtwɛlɔ mɔtshi kana asawo wakotola tambalo t’anto ndo wakokaso kamba lawɔ olimu esadi esadi, yatondja etombelo w’amena ndo yangɛnangɛnaso lo dibuku Comment raisonner, kete tatokandakandake dia kamba olimu l’asawo akɔ.