Tokimanyiya akina dia vɔ nɛmiya Otungi aso
1 Onde sho mbokaka oko akôke omembi w’esambu lam’akandate ate: “[Jehowa, NW] li, . . . Eteko ka lumu keko lasuki laye.” (Usam. 36:5, 9) Woho akɔna wokokiso, ndo sho lawɔ, kimanyiya akina dia vɔ mbeya Jehowa oko Otungi aso ndo dia vɔ mbɔlɛmiya na? Lo mɛnyanya dibuku La vie: comment est-elle apparue? Évolution ou création? lo Diɛla woke. Dibuku sɔ diekɔ kawɔ efula nɛ dia diɔ mbishaka tolembetelo tɛ̂nya ɔnɛ Nzambi ekɔ ndo diɔ mɛnyaka dia ohilwelo hakoke ndjâla dikambo dia mɛtɛ. Diɔ shikikɛka nto dia Bible ekɔ Dui dia Nzambi. Mɛtɛ, sho nangaka mbewoya anto tshɛ ɔnɛ: otongelo mbalɛmiya Jehowa Nzambi, koko aha ohilwelo.
2 Hɛnyi wɛnyanyelo ɔmɔtshi wa wɔdu ndo wa hiembola.
L’ɔkɔngɔ a sho mbisha ɔtɛkɛtshi aso mɔyɔ, towɛnya esato wele lo lɛkɛ 6 ndo towombole shate:
◼ “Woho akɔna wakatatɛ lɔsɛnɔ la kɛtɛ na? Anto amɔtshi mbutaka vate lo shashimoya. Bible mbishaka Nzambi lokumu lo dikambo sɔ. Ko wɛ akanayɛ lo dikambo sɔ na? [Tshikɛ onto akɔ dihole akadimole.] Dibuku nɛ mbishaka ekadimwelo wɔtɔnganɛ la lokanyi la Bible ndo l’akambo w’akanga a diewo. Dimi nangaka wɛ ndjala la diɔ kele kɔsɛdingole tolembetelo ndo kele koyale la lokanyi layɛ wɛmɛ lo dikambo sɔ.”
3 L’ɔkɔngɔ a sho ndjalowola, sho kokaka mbuta ɔnɛ:
◼ “L’andja ɔnɛ wamboshidimikɔ nshi nyɛ l’awui efula ndo w’akanga a diewo, onde sunganaka ndjâla la mbetawɔ l’otongelo, kana wɛ ekɔ lo fɔnya ɔnɛ takatombe la shashimoya oka? [Tshikɛ onto akɔ dihole akadimole.] Lembetɛ lokanyi lele la Bible lo dikambo sɔ. [Ala Heberu 3:4.] Onde wɛ hakanyiya dia ekelo tshɛ kekɔ la ombiki atɔ oka? Naka ɔsɔku, andja akakoke monga vɔamɛmɛ oka?” Towɛnya osato wele lo lɛkɛ 114 lo dibuku Création, l’ɔkɔngɔ diko, tokotole yambalo yande lo lokanyi l’ɛnyami lo palagalafɛ 2, lɛkɛ 115. Naka ɔtɛkɛtshi aso ekɔ lo mɛnya saki kande ndo ambɔsa dibuku, towote diɔnɛ tayokalola dia ndjɔkɛtshanya lo dimbola nɛ: Woho akɔna wayônga onto ndo kɛtɛ lo nshi yayaye na?
4 Kânga, l’ɔkɔngɔ a sho mbisha ɔtɛkɛtshi aso mɔyɔ, sho kokaka mbuta ɔnɛ:
◼ “Oko le yɛ, watshɛso wakafɔnaka l’ɛngɔ kakɔna na? [Tshikɛ onto akɔ dihole akadimole.] Onde vɔ wakafɔnaka la ‘kema kele oko onto’ kɛnɛ oka? [Fola dibuku Création lo lɛkɛ 83.] Ohenda kɛnɛ kata Bible lo Etsha 17:26. [Ala.] Onde asango wa ‘kema yele oko anto’ anɛ wekɔ mɛtɛ oka?” Kotola yambalo yande l’ɛtɛkɛta wofundami la tshina dia sango diele lo lɛkɛ 89. Ewoya ɔtɛkɛtshi ayɛ dia nde ayokondja ɛngɛnɔngɛnɔ efula oma lo walelo wa dibuku diakɔ ndo nde ayeya okadimwelo wa dimbola diakɔ.
5 Yoho kina ele ya mɛnya paka lohoso la dibuku “Création” ko mbuta ɔnɛ:
◼ “Ɛlɔ, tekɔ lo tambola asukanyi aso dimbola nɛ: Onde onto akatombe oma lo ohilwelo kana oma l’otongelo? Akanyiyɛ lo dikambo sɔ na? [Tshikɛ onto akɔ dihole akadimole.] Kânga mbele anto efula wakêke mɛnaka ohilwelo oko dikambo dia mɛtɛ, ko akina nto wakêke vɔ lawɔ hawetawɔ dikambo sɔ. Lembetɛ kɛnɛ kakayokumiyaka apolo ɔmɔtshi w’edjedja la mbuta. [Ɛnyande lɛkɛ 123.] Sho pombaka sɛdingola shoamɛmɛ akambo wa mɛtɛ dia mbeya kana sho kokaka mbetawɔ ohilwelo ko kana otongelo.” Naka ɔtɛkɛtshi aso ambolongola dibuku, totondja dimbola dimɔtshi diayotoyokadimola lo diembwelo dia mbala kekina.
6 Onde sho kombolaka kimanyiya akina dia vɔ mbeya mɛtɛ y’ɛngɛnɔngɛnɔ y’oma lo Bible y’endana la Nzambi kaso ndo la sangwelo diande le ditongami diande oka? Dibuku Création diayotokimanyiya dia sala dikambo sɔ. Diɔ nɛmiyaka Otungi aso a Woke, Nkumadiɔndjɔ ndo Omboledi Jehowa, lo mandola elimu ande ndo lo mbishola sangwelo diande dia dimɛna diele dia santoya lokombo lande ndo dia tshɔkɔla anto l’ekimanyielo ka Diolelo dia Kristo.