Lande na Funda Nkombo ya Wanɛ Wele bu Lawɔ?
1 Ɛmɛnyi ɛmɔtshi wadi l’omi wakasambisha lushi lɔmɔtshi ko pindju. L’ɔkɔngɔ diko, lâsɔ ko wonya ambokadimɔ, vɔ akɔ ahende wakakalola laka anto waki kondjala lawɔ lam’akawete ntondo. Pami kɛmɔtshi akawaɔtshiya ndo akâlonge la yambalo tshɛ. Nde akɔshi dibuku Loseno la Pondjo ndo akawambola dia kana vɔ wayoya nto. Nde atasawolaka l’Ɛmɛnyi wa Jehowa ndoko lushi ndo nde aki la wembola efula wa mbambola; wakatatɛ mbeka la nde Bible. Atshukanyi waki l’ɔngɛnɔngɛnɔ efula dia tana onto lele oko ɔkɔkɔ. Onde wɛ kombolaka dia dikambo dia ngasɔ kokomɛ? Dikambo sɔ kokaka salema naka sho fundaka nkombo ya wanɛ wele bu lawɔ dimɛna ndo kalolaka esadi.
2 Tambokeketshamaka mbala la mbala dia fundaka awui w’eshika ndo dia kalolaka aha la tshimbatshimba. Oko adiɛnya dikambo di’omiso la mbuta sɔ, sho kokaka ndjâla l’etombelo w’ɛlɔlɔ efula lo kalolaka laka anto akɔ yema l’ɔkɔngɔ diko ko lushi lakɔ. Lam’eso l’eshikikelo k’ɔnɛ tayokindjakindja mbilo kakawatosha, ondo hatofunde nkombo ya wanɛ wele bu lawɔ la yambalo tshɛ. Anto amɔtshi mbutaka ɔnɛ: ‘sho kindolaka lo mbilo kaso oseka mingu hiende kana shato tshɛ; kema ohomba wa funda nɛ dia, lo weho akɔ tshɛ tayokalola.’ Koko tekɔ l’ɔkɔkɔ okina nto wa mbɔsa nɔtɛ. Mɛtɛ, lo mbilo yakindjakindjama tena efula, ekɔ paka lo ndjatshutshuyaka dia pomana la wanɛ waki kondjala lawɔ lam’akatete mbala ka ntondo mbayangaso, l’ɔlɔlɔ tshɛ; wanɛ wasungana la losango. Woho akɔna?
3 Lo bɛtshi dia nkɛtɛ efula, % 50 kana ndekana y’anto hawoyala lawɔ la yanyi. Ɔnkɔnɛ lo ndjashaka efula le wanɛ wele bu lawɔ, sho nanulaka mbilo kaso. Kânga lo mbilo yahaleke kindjakindjama, sho kokaka kondja etombelo w’ɛlɔlɔ lo ndjatshutshuyaka dia pomana l’onto tshɛ la ntondo ka kaloya mbilo.
4 Sho kokaka ndjalɔngɔsɔla dia kalola lushi lokina, ndeka dimɛna l’atei a lomingu, le wanɛ waki kondjala lawɔ. Anto efula ndeka mɛna dimɛna dia kalola lushi lɔmɔtshi lotshikitanyi la lɔnɛ lakawete mbala ka ntondo ndo lo wonya okina. Ondo wɛ ayɔsɔna dia ndjaombɛ etena lushi la Samalo la la Lomingu dia kalola le anto waki kondjala lawakawɔ l’atei a lomingu. Lo wedi okina, tshumanelo efula diamboyeya ɔnɛ esambishelo ka la dikɔlɔ tondjaka etombelo w’ɛlɔlɔ. Lo etena kɛsɔ k’ɔlɔlɔ, apandjudi pomanaka l’anto ndekana etenyi ɔtɔi ka l’ahende ka wanɛ wadjasɛ lo mbilo.
5 Wɛ pombaka funda waendelo lânde. Naka wɛ hatokoka kalola le anto waki kondjala lawɔ, kosha ɔnɔmbɔdi w’olui akɔ nɔtɛ yayɛ ya lo luudu la luudu, kele anangɛso l’akadiyɛso wayoyosambisha mbala kekina lo mbilo kawokambe la yɔ.
6 Lo mbidja yimba dimɛna lo yoho shɔ y’olimu aso, sho tayokondja anto efula ndo tayonga l’ɔngɛnɔngɛnɔ efula. Tayɔngɛnangɛna, teya ɔnɛ sho nyangaka anto wele oko ɛkɔkɔ l’ɔlɔlɔ tshɛ ndo tayowakokɛ.—Ezek. 34:11-14.
[Caption on page 7]
Jehowa Ekɔ Otungi Aso
1 Miliyɔ y’anto mbetawɔka ɔnɛ Nzambi mbakatonge lɔsɛnɔ. Akina efula mbetawɔka ohilwelo. Ko akina wekɔ lo kanyiya tsho. Dibuku La vie : comment est-elle apparue ? Evolution ou création? diakafundama lo dikambo di’anto tshɛ. Okanda ɔsɔ mbishaka olembetshiyelo w’oshika w’ɔtɔngwɛlɔ wa lɔsɛnɔ ndo kitshimudi ya dikambo sɔ lo nshi yaso yayaye. Tayosha anto dibuku dia dimɛna efula sɔ lo Ngɔndɔ ka Dikumi l’Ahende.
2 Kânga anto wa weke l’akambo wa diewo dia l’andja ɔnɛ mandolaka yimba yele l’okanda ɔsɔ. Pami kɛmɔtshi kakamba lɛnɛ asalawɔ oyangelo l’akambo wa diewo lo Pays-Bas akafunde ate: “Mɛtɛ dibuku nɛ ndeka dikongelo tshɛ. Woho watayelana totshapita l’ɔlɔndji ndo asango wekɔ mɛtɛ ka koma y’akambo a diewo, paka kana wekɔ tshungu ko wɛ mbânya wanyanya.” Avɔka ɔmɔtshi akate ate: “Lambodiala mbala nyɛi, ko lekɔ lo mamba tsho dia woho w’oyangelo wakasalema wa ka tshina ndo olimu w’omewo wakahombama dia dilɔngɔsɔla.” Lâsɔ, sho kokaka ndjâshikikɛ ɔnɛ anto akina wayɔngɛnangɛna dibuku sɔ.
3 Ondo tayɔsɔna wɛnyanyelo ɔmɔtshi wa lo tshena pe oko wɔnɛ:
◼ “Tofole dibuku lo lɛkɛ 6 ko sho mbuta ɔnɛ: “Anto efula kanaka ɔnɛ nkɛtɛ yaso ya dimɛna nyɛ ndo lɔsɛnɔ lele lɔkɔ akatombe otombatomba. Onde wɛ mɛnaka di’oko olembetshiyelo ɔsɔ mbɔtɔnɛka la lomba? [Tôtshike etena akadimole.] Akambo efula wa mɛtɛ shikikɛka kɛnɛ kata Bible lo dikambo di’Otungi wele la wolo efula, koko woludi la ngandji. Nde ekɔ Nzambi ka mɛtɛ ndo lokombo lande Jehowa.” Tale Osambu 83:18, ko sho nembetshiya lo tshena pe ɔnɛ sangwelo dia Nzambi ele dia kadimola nkɛtɛ k’otondo paradiso.
4 Naka sho nangaka ntshɔ mbala kakɔ ɔtɔi lo tshondo ya dikambo, kete sho mbeyaka mbuta ɔnɛ:
◼ “Onde wɛ atayambolaka dimbola nɛ.” Towɛnya ɔtɛ a dui wa dibuku, totshu lo lɛkɛ 7, tale wembola wombwami lo odingɔ 2 ko sho mbuta ɔnɛ okanda ɔnɛ mbishaka ekadimwelo w’amɛna efula w’oma lo Bible.
5 Sho kokaka mbuta kânga ɔnɛ:
◼ “Onde wɛ atayambolaka woho wakatɔngɔ nkɛtɛ? Anto efula mbutaka paka ɔnɛ ekɔ etombelo w’otondwelo wa diangɔ diele lo lowa. Akanayɛ lo dikambo sɔ? [Tôtshike etena akadimole.] Bible mbutaka ɔnɛ Nzambi akatonge nkɛtɛ dia tɔ ndjâla edjaselo kaso ka pondjo. Tɔ tshikitana la ekama ekina tshɛ wele l’olongo wakɔmama yanyi. Lo woho weyaso, tɔ keto mbele okama wa lo lowa wele l’oseka ɛngɔ tshɛ kele ohomba lo lɔsɛnɔ.” Tofole dibuku diakɔ lo lɛkɛ 130, tende lo odingɔ 5 ko sho nembetshiya lande na kahomba nkɛtɛ ndjâla olimu w’Otungi a woke.
6 Yoho kina ele wɛ mbuta ɔnɛ:
◼ “Anto amɔtshi kanaka ɔnɛ takahilɔ oma lo nkema yele oko anto. Vɔ mbutaka ɔnɛ watshɛso wakafɔnaka la nkema nyɛ. [Towɛnya osato wele lo lɛkɛ 89]. Ko wɛ akanayɛ lo dikambo sɔ?” Tôtshike etena akadimole. Toke epole ɔsɛkɛ lo kɛnɛ kotami lo odingɔ 20, ko sho mbala Etsha 4:24, divɛsa diɛnya Jehowa oko Otungi la Ombishi wa lɔsɛnɔ. “Dibuku nɛ sɛdingolaka wetshelo w’ohilwelo lo ndjela kɛnɛ kata Bible.” Totshu l’ɛtɛ w’awui wofundami lo lɛkɛ 5, ko sho sɔtɔla ɛtɛ w’awui ɛmɔtshi, oko wɛnɛ wele lo tshapita 1, 7, 15, la 19.
7 Anto wele l’etema w’ɔlɔlɔ wakakesama oma le wanɛ wele kema la mbetawɔ le Jehowa kânga lo Dui diande wayokondja ɛlɔlɔ oma lo dibuku Création. Elembetshiyelo woshikikɛmi l’akambo wa mɛtɛ wele lɔkɔ kokaka kimanyiya anto dia vɔ ndjala la lowando le Otungi, ɔnɛ latokokɛ la ngandji tshɛ.