Onde wɛ kokaka mbɔtɔ l’ɔnɔngɔ w’ambatshi mboka oka?
1 L’ɛnɔnyi etanu w’etshi ɛnɛ, nunu dia ambatshi mboka wa pondjo wakɛnyi dimɛna dia mɛmadia olimu awɔ. Onde ndo wɛ kele ɔmɔtshi a l’atei awɔ oka? Naka ɛɛ, kete aha la tamu, wɛ ekɔ l’ɔkɔkɔ ɔmɔtshi w’ɔlɔlɔ wotshikiyɛ diɛsɛ sɔ. Ondo kana dikambo dia tshukumiya diakakokomɛ, diakiyɛ kokoka mbikikɛ. Onde ɔkɔkɔ ɔsɔ wekekɔ nshi tshɛ la nɛmɔ oka? Naka wɛ akemadia olimu ayɛ l’ɔkɔkɔ w’ɛhɛnyɔhɛnyɔ wa demba, ekakatanu w’aui wa falanga, kana ɛkɛndɛ wa lo nkumbo, onde aui ayɛ asɔ wambɔ̂sɔ oka? Onde wɛ ayokoka ndjalɔngɔsɔla lo yoho kina dia ndjâla nto l’ɛngɛnɔngɛnɔ watomba oma l’olimu w’ombatshi mboka wa pondjo oka? Onde wɛ akakane lomba dia nyomɔlɔmba olimu akɔ nto oka?
2 Oko wadieyanyu, di’onto kotsha l’olimu ande w’ombatshi mboka, ekɔ ohomba dia ndjalɔngɔsɔla dimɛna ndo ndjâla l’ekongelo ka dimɛna. Lam’ele tekɔ la yema ya wenya tshitshɛ tsho ya mumuya, tena dimɔtshi dia tɔkɛnyɔ tokanga mbala mɔtshi ɔlɔlɔ efula. (Tok. 19:17; Etsha 20:35) Lam’ayotangemaka l’olimu, tayokokamɛka oma lo shɛngiya ya l’andja wɔ̂sa lɔsɛnɔ la lokaki ndo la wɔdu la nɛmɔ. Jehowa ekɔ lo ndaka ɔnɛ nde ayosha wanɛ wakalambola sɛnɔ yawɔ ndo wadja Diolelo lo dihole dia ntondo ɛtshɔkɔ wa lo nyuma. Lam’ayotokambɛka Jehowa l’otema aso tshɛ, tayokondja ɔngɛnɔngɛnɔ w’oshika ndo wangasanu.—Tok. 10:22; Kol. 3:23, 24.
3 Onde olimu wa lo tena ndo lo tena pombaka mɛnama oko diɛsɛ dimɔtshi diakondja anto yema tshitshɛ tsho oka? Kema. Lam’ele takakimɔ etondo aso le Jehowa, sho pombaka ndjambola sho tshɛ lo dikambo dia dikoka dia kamba olimu wa lo tena ndo lo tena, onyake naka tekɔ l’aui amɔtshi watoshimba.—Mako 12:30.
4 Naka mɛnamaka hwe dia demba diayɛ kana ɛkɛndɛ w’ɔtɔnganɛ l’Afundelo hawokosha diaaso dia ndjâla ombatshi mboka kakiye, eya dia Jehowa dieyaka ɔlɔlɔ ndo nde mbeyaka aui wele layɛ. Nde ayokofuta lo kɛnɛ kasalayɛ la kɔlamelo lo ndjela akoka wele layɛ. (1 Kor. 4:2; 2 Kor. 8:12) Kakianɛ, naka wɛ kokaka ndjâla ombatshi mboka nto, lande na ahayatshu dia tɛnana l’omendji-lalɔmbɔla dia wɛ ndodja dikatshi dialɔmbawɔ na?
5 Onde nkumbo kayɛ kokaka kokimanyiya oka? Ondo kana wɛ akemadia olimu w’ombatshi mboka dikambo dia shidiya ɛkɛndɛ ayɛ wa lo nkumbo. Onde ase nkumbo kayɛ akina hawokoke kokimanyiya kakianɛ kele okondja diaaso dia wɛ ndjâla ombatshi mboka nto oka? Amɔtshi wayonga paka l’ohomba wa mbatshindjiya yema tshitshɛ dia mbakimanyiya dia vɔ kotsha ɛkɛndɛ awɔ wa laande dia vɔ ndjoyâla ambatshi mboka nto.
6 Diokanelo di’ɔlɔlɔ la wolo wayoleka mbidja ase nkumbo akina kokaka mbisha diaaso dia dikambo dia ngasɔ salema. Ase nkumbo akɔ kokaka kokimanyiyaka la yema ya dikuta kana koshaka lonya lo tohombahomba tɔmɔtshi kana ndjalɔngɔsɔlaka nshi tshɛ dia kotshindɛka otsha la tosambisha. Weoho ekina wekɔ nto wa mbisha lonya. Naka aui wele layɛ hawokosha diaaso dia nyomokondja diɛsɛ dia kamba olimu ɔsɔ nto, ondo wɛ kokaka kimanyiya ose nkumbo kayɛ ɔmɔtshi lele la diaaso dia kamba olimu ɔsɔ lo yoho shɔ.
7 Lande na ahanyatɛkɛta dikambo diakɔ kâmɛ lo nkumbo na? Lokanyi la ngasɔ kokaka kotshama naka nyu tshɛ nyekɔ l’oweso ɔsɔ. Naka opandjudi ɔmɔtshi wa lâdiko ambɔtɔ l’ɛnɔngɔ w’ambatshi mboka, kete nkumbo k’otondo kokaka ngɛnangɛna nɛ dia wakasha lonya. Lomba la lokaho la ngasɔ hosha lonya paka l’esambishelo kayosalema lo mbilo lo dikambo dia Diolelo keto, koko ayokimanyiya ndo nkumbo dia tɔ nyomoleka ndjâla kâmɛ lo nyuma.—Luka 6:38; Fil. 2:2-4.