Bɛtɛlɛ Ekɔ l’Ohomba w’Anto Wayakimɔ la Lolango
1 Osambu 110:3 ɔnɛ anto wa Nzambi wayotshikitana l’anto akina lo nshi nyɛ y’ekomelo oma lo yimba yawɔ ya ndjakimɔ la lolango. Lo nkɛtɛ k’otondo, ekambi wa Nzambi wekɔ lo ndjasha tshɛ dia lokumu l’ɔlɔlɔ la Diolelo sambishama. L’atei awɔ tanemaka ndo ase nkumbo ka Bɛtɛlɛ. Sho nangaka kewoya awui amɔtshi wa lâdiko dia wɛ ndeka mbeya ɔnɛ yoho shɔ y’olimu yekɔ tshondo ya diɛsɛ dia lânde dia wɛ mbeya ehomba wele la la Société.
2 Elimu wa Weoho la Weoho: Vɔ mbishaka ase nkumbo ka Bɛtɛlɛ elimu wa weoho la weoho. La Brooklyn, ndo lo filialɛ yaki la Société, anangɛso kambaka olimu dia tondja kana dia toma wa Bible, ekanda; periodikɛ; tobukubuku la tokatshikatshi. Amɔtshi nɔngɔsɔlaka diangɔ di’olimu la mvudu. Pombaka lotumu efula dia kokɛ nkumbo (lo katɛ diangɔ dia ndɛ, lo sola ahɔndɔ, ndo l’akambo akina). Lâdiko dia lâsɔ, anangɛso l’akadiyɛso wakamba olimu wa nɔngɔsɔla luudu mbidjaka pudipudi ka mamba ndo kambaka elimu efula w’ohomba.
3 Akoka la Waonga Walɔmbama: Ɛlɔ kɛnɛ, wekɔ l’ohomba w’ɛlɔngɔlɔngɔ w’enyemba wele l’alemba a wolo, nɛ dia lotumu la lo Bɛtɛlɛ nɔmbaka di’onto monga la wolo ndo la lokalo la lo demba. Naka ɔlɔngɔlɔngɔ ɔmɔtshi nangaka ndodja dɛmandɛ dia mbɔtɔ lo Bɛtɛlɛ, nde pombaka ndjâla onto lambolongola batismu ambolekana yɛdikɔ y’ɔnɔnyi w’otondo. Nde pombaka monga nge lo nyuma, ndo l’akoka wa kamba olimu efula, djekoleko wa l’anya. Lo nshi yaso nyɛ, l’andja ɔnɛ anto efula kanyiyaka ɔnɛ pombaka tshika elimu wa ngasɔ. Diɔ diakɔ diahomba onto tshɛ lalanga kamba lo Bɛtɛlɛ ndɔta lonto l’oyoyo dia nde kamba lotumu l’ɔlɔlɔ l’anya ande. (Enda lo Efeso 4:28.) Nde hahombe monga la yimba yoshikikadi paka l’ɛngɛnɔngɛnɔ, l’ɛlɛmwɛlɔ, la lo tɔkɛnyɔ, ndo nde pombaka tatshiki waonga w’ɔna dikɛnda.—Enda lo 1 Koreto 13:11.
4 Onde wɛ ekɔ l’ɛnɔnyi l’asa 19 la 35? Onde wɛ ekɔ la demba dia wolo ndo kema la hemɔ ya lo tokanyi? Onde wɛ mbalaka, fundaka ndo tɛkɛtaka Falase dimɛna? Onde wɛ ekɔ nge lo nyuma? Naka wamboketa oya lo Bɛtɛlɛ, onde wɛ ayoyotshikala la kɔlamelo lɛkɔ l’edja kolekanyi ɔnɔnyi ɔtɔi, ndo ayetawɔ lotumu tshɛ layowokosha? Naka wɛ kokaka kadimola ɔnɛ eelo lo wembola ɛsɔ tshɛ, kete ekɔ ɔlɔlɔ dia wɛ kanyiya ɔnɛ kamba lo Bɛtɛlɛ ekɔ tshondo ya diɛsɛ dia lânde.
5 Ɛlɔlɔ Waya oma l’Olimu wa lo Bɛtɛlɛ: Tshoto y’Etangelo ya Mam’ɛkɔngɔ la Tange 15, 1994 (lo Falase), yakɛnya ɔnɛ: “Ose Bɛtɛlɛ ekɔ la diɛsɛ dia kambɛ Jehowa l’atei w’anango nshi tshɛ! (Osam. 26:12) Ande waaso w’ɛlɔlɔ efula wa nde pamia lotshundju lande la lo nyuma lee!” Eelo, ɔsɔ ekɔ ɔlɔlɔ wa lânde wakondja onto lam’akambande lo Bɛtɛlɛ. Ase Bɛtɛlɛ mɛnanaka ndo mbekesanɛka l’anangɛso wambotshikala la kɔlamelo l’edja k’ɛnɔnyi efula. Lo tena la tena, ɔmɔtshi a l’atei w’Olui Walɔmbɔla ndjaka dia ndjowaenda. Oyadi lotumu tshɛ lakoshawɔ, mɛtɛ ekɔ ɔlɔlɔ kamba kâmɛ l’anto wa ngasɔ.
6 Ekongelo ka Wenya w’Ose Bɛtɛlɛ: Ose Bɛtɛlɛ ndjashaka wonya tshɛ l’elimu wendana la Diolelo. Oma ko Lushi l’Ɔtɔi polo ndo Lushi la Samalo, l’eshidi 6 la taahe 45, nde ntshɔka lo luudu l’olelo dia tɔ̂tɔ lo culte matinal. Anto amɔtshi wa lo Bɛtɛlɛ mbishaka kɔmatɛrɛ lo kɛnɛ kendana la divɛsa dia lushi lakɔ. L’ɔkɔngɔ diko, ɔnangɛso ɔmɔtsi lele manamana salaka sawo dimɔtshi dia tshena pe, oma lo sawo sɔ ko dɔmbɛlɔ. Ɔsɔku mbakeketshama nkumbo kɛsɔ lo nyuma la ntondo ka tatɛ kamba elimu wa lo lushi. L’ɔkɔngɔ wa vɔ ndɛ yangɔ ya pindju, onto l’onto ndjalaka la saki ka sala olimu wakawawosha, tatɛ oma lo Lushi l’Ɔtɔi polo lo Lushi la Tanu, oma l’eshidi 7 la taahe 45 polo l’eshidi 5 wa dikɔlɔ kokele, vɔ mumuyaka l’edja k’oshidi a tango ɔtɔi l’ɔkɔngɔ wa ndɛ diangɔ dia la midi, ndo Lushi la Samalo vɔ kambaka oma l’eshidi 7 la taahe 45 polo l’eshidi 12 kokele. Ose Bɛtɛlɛ mbɔsaka wenya ande w’akɔlɔ, nshi yande ya samalo l’ɔkɔngɔ a midi la ya lobingu dia ntshɔ otsha lo nsanganya, tomba l’olimu w’esambishelo, mbeka, ndo sala ɛkɛndɛ ande wa weho la weoho. Nde kokaka ntshɔ otsha lo bibliɔtɛkɛ wa lo Bɛtɛlɛ dia nde têka ndo nɔngɔsɔla nsanganya yande. Koko mɛtɛ, nde mbɔsaka tena dimɔtshi dia mumuya ndo dia ndjalɛmɔla. (Mako 6:31, 34) Bɛtɛlɛ mbishaka onto diaaso dia nde mbetsha etenyi koleki woke ka wenya ande l’olimu w’ekila.
7 Elimu wa l’Etshumanelo: Lo Zaïre, ase Bɛtɛlɛ kahanyema lo tshumanelo 29 dia l’osomba wa Kinshasa. Vɔ mbeyaka ɔnɛ vɔ pombaka monga l’ohetoheto dia ndjâla la lonyuma la dimɛna. Diɔ diakɔ diɔtɔwɔ lo nsanganya ya tshumanelo diawɔ ndo diatombawɔ l’olimu w’esambishelo kâmɛ l’anangɛwɔ l’akadiyɛwɔ. Lâdiko dia lâsɔ, ase nkumbo ka Bɛtɛlɛ mbɔtɔka lo wekelo awɔ wa Tshoto y’Etangelo Lushi l’Ɔtɔi la dikɔlɔ. Ekongelo wa wenya wa lo Bɛtɛlɛ shikikala paka l’akambo wa lo nyuma. Dikambo sɔ mbishaka lɔsɛnɔ l’ɔngɛnɔngɛnɔ l’olimu wa Jehowa.—1 Kor. 15:58.
8 Woho Wakokayɛ Ndjalɔngɔsɔla dia Kamba lo Bɛtɛlɛ: Naka wɛ nangaka kamba olimu dimɛna lo Bɛtɛlɛ, kete keketsha lonyuma layɛ ndo onga la diokanelo di’oshika wɛ la Jehowa, Dia sɔnɔla anto w’eyoyo wahomba ndja oya lo Bɛtɛlɛ, vɔ ndekaka mbɔsa ambatshi mboka. Koko, olimu ɔsɔ hawokitshami paka dikambo di’ambatshi mboka ato. Wanɛ tshɛ wele la waonga walɔmbama kokaka nɔmba dia vɔ mbɔtɔ lo Bɛtɛlɛ. Ndo nto, oyadi onto ekɔ l’akoka wa lânde kana kema, nde pombaka mbokana l’anto akina dia kamba kâmɛ la yimba y’olui. Shɛmanedi la yimba ya ndjaongɛ hahombe ndjâla, koko pombaka kamba kâmɛ, monga la ngandji ndo la saki ka ndjakitshakitsha la tshina di’ɛlɔmbwɛlɔ ka Teokrasi.—Enda lo Efeso 4:16.
9 Ɔsɔku mbakoka ɛlɔngɔlɔngɔ kamba olimu ndo monga l’akoka wakatatɛkɛtshi ango l’atei w’anto waki Jehowa. Lâsɔ, naka wambowaeta dia ndjokamba lo Bɛtɛlɛ, vɔ wayokoka ndjolongola olowanyelo okina dia vɔ kondja ɛkɛndɛ ekina efula. Tekɔ lo keketsha ambutshi w’Akristo la dikumanyi dia vɔ mbutɛka ɛlɔngɔlɔngɔ dikambo dia Bɛtɛlɛ mbala efula. Ambutshi amɔtshi ndjaka l’anawɔ mbala la mbala dia ndjenda Bɛtɛlɛ, dikambo sɔ mbakimanyiyaka dia vɔ mbeya kɛnɛ kasalema lɛkɔ ndo mbatshutshuyaka dia vɔ ndodja dɛmandɛ dia mbɔtɔ lo Bɛtɛlɛ lam’ashidiyawɔ kalasa.
10 Anangɛso l’akadiyɛso wanɛ wele l’ewo l’akambo w’atɔtɔ (électronique) kana l’akambo wa wa ɔrdinatɛrɛ kokaka ndja oya lo Bɛtɛlɛ. La Société ekɔ la wa mashinyi wa fɔtɔkɔpi, mashinyi wa funda ndo wa ɔrdinatɛrɛ efula. Tekɔ nto l’ohomba wa wanɛ weya elimu wa mbidja ɛlɔnda w’ashi (plombiers), w’anto weya akambo wendana la frigo, wanɛ weya akambo w’atala ndo elimu ekina. Lo elimu efula, mbidja ndo elimu w’okadimwelo, anangɛso wele l’ewo k’ɔlɔlɔ k’Angɛlɛ, djekoleko wanɛ wambomanyamanya Falase, Kiluba, Kirundi, Lingala, Monokutuba, Ɔtɛtɛla, Sango, Swahili, Tshiluba, l’ɛtɛkɛta ekina, kokaka monga ohomba efula. Omalɔkɔ, wekɔ l’ohomba wa toshufɛlɛ la wa mekanisiɛ lo Bɛtɛlɛ.
11 Tekɔ l’ohomba djekoleko w’anangɛso weke enyemba, koko anangɛso wele l’akoka wa lânde kokaka mbelamɛ oya lo Bɛtɛlɛ oyadi kânga wambotshukanaka. Wɛ kokaka kondja dɛmandɛ dia mbɔtɔ lo Bɛtɛlɛ le omendji w’otshimbedi kana lo losanganya la distrikɛ, kânga lam’ayoyofundɛ bilɔ ka filialɛ. Naka wɛ ambotshuka wadi, oho dia ndo wadiɛyɛ pombaka monga la waonga wa lo nyuma w’ɛlɔlɔ ndo monga la demba dia wolo, aha la hemɔ ya lo tokanyi. Naka nyambolongolaka wetshelo kana nyekɔ l’ewo l’olimu ɔmɔtshi womiso la tɛkɛta, kete funda awui wa lo ɔm’ɔmɔ wendana l’olimu akɔ weyayɛ ko wɛ mamasanya la dɛmandɛ diayɛ.
12 Onde Wɛ Kokaka Mbetawɔ Leeta Lɔsɔ? Bɛtɛlɛ ekɔ nshi tshɛ l’ohomba w’anto wayakimɔ la lolango. Naka wɛ ekɔ la waonga walɔmbama dia kamba lo Bɛtɛlɛ, kete tambokokeketsha efula dia wɛ ndodja dɛmandɛ. Tɔkɔmɔke naka hawokele esadi eto. Wɛ kokaka ndodjaka dɛmandɛ dikina ɔnɔnyi l’ɔnɔnyi, dikambo sɔ diayokokimanyiya dia wɛ shikikɛ diaaso diele layɛ.
13 Lam’akate Jehowa ate: “Ayumutuma na?” Isaya akakadimola aha la kandakanda ate: “Dim’one, untumi.” Ɛlɔlɔ efula wekɔ lo kokongɛ naka wɛ ambelamɛ dia ndjokamba lo Bɛtɛlɛ, “luudu la Nzambi.”—Is. 6:8.