Lokumu l’Ɔlɔlɔ le Akanga wa Ndjakitshakitsha
1 Tekɔ lo sɛna l’etena kayosala Jehowa dombwelo diande. (Ezek. 9:5, 6) Ekɔ ohomba efula ɛlɔ kɛnɛ dia akanga wa ndjakitshakitsha mbewolama l’ahole tshɛ dia kɛnɛ kayanga ndja, woho wa vɔ ndjalɔngɔsɔla dia dikambo diakɔ. Jehowa akasha anto tshɛ lotumu la “mbewoya akanga a ndjakitshakitsha lokumu l’ɔlɔlɔ,” ɔsɔ ekɔ djembetelo y’ɔlɔlɔ ande w’otema. (Is. 61:1, 2, NW) Periodikɛ tokimanyiyaka dia sho pandjola lokumu l’ɔlɔlɔ lɔsɔ l’ahole efula.
2 Tshoto y’Etangelo la Réveillez-vous! toshaka mma dia lo nyuma dia wotsho diatokeketsha ndo dia totshutshuya dia sho sala dikambo dimɔtshi. Tshoto y’Etangelo sambaka akanga wa ndjakitshakitsha lo mbaewoya lokumu l’ɔlɔlɔ l’ɔnɛ kem’edja Diolelo diaki Nzambi diayokonya nkɛtɛ Paradiso. Réveillez-vous! toshaka ɛkɔkɔ w’ɔlɔlɔ wa ndjâla la mbetawɔ lo daka diaki Otungi dia shikikɛ andja w’oyoyo wa wɔladi ndo waha la wâle. Okahanyelo wa periodikɛ shɔ l’ahole efula ekɔ yoho mɔtshi yoleki esadi ya mɛmbɛ akanga wa ndjakitshakitsha lokumu l’ɔlɔlɔ. Naa tokanyi tashama paka lo dikambo dia kɛtshanya tatanaso lo numɛlɔ ya ndjihelo na?
3 Sho kokaka mɛnyanya “Tshoto y’Etangelo” ya Ngɔndɔ ka Tanu 1 lo kotola yambalo lo sawo diele l’ɔtɛ a dui w’ɔnɛ: “Ɛlɔlɔ w’oma lo walelo wa Bible wa lushi la lushi” ko wɛ mumbola dimbola nɛ:
◼ “Oko le yɛ, naa ɛlɔlɔ wakokaso kondja oma lo walelo wa Bible na? [Totshike onto akɔ etena akadimole.] Lo Romo 15:4, Bible tɔamɛ tokimanyiyaka dia sho kana yimba lo dimbola sɔ. [Tâle Romo 15:4.] Anto efula wele lo tshenyi yaso ya ngelo wekɔ la Bible, koko amɔtshi ato mbatana etena ka kiala mbala la mbala. Sho mbetawɔka ɔnɛ tshɔi yakɔ y’elongamelo ka lo nshi yayaye tanemaka lo Bible ndo ɔnɛ lo kialaka sho tayɔtshɔkɔma.” Tosale kɔmatɛrɛ nkina yasungana ko sho mbɔlɛkɛ (proposer) periodikɛ.
4 “Tshoto y’Etangelo” ya Ngɔndɔ ka Tanu 15 (lo Falase) yekɔ la sawo dimɔtshi diele l’ɔtɛ a dui wakotola yambalo ɔnɛ: “Watshɛso wayonga la lɔsɛnɔ nto.” Ondo tayokoka kotola yambalo y’ɛtɛkɛtshi aso lam’ayotokamba la mbɔtwɛlɔ ka lo sawo kɛnɛ:
◼ “Anto efula ndjambolaka woho akɔna waki watshɛwɔ. Nɛ dia vɔ wambovɔka, efula mbutaka ɔnɛ hawokokaki mbeya woho wakiwɔ pondjo. Onde wɛ kanaka dia tayokoka mbeya watshɛso lushi lɔmɔtshi?” Toshike onto akɔ etena akadimole. Tâle Joani 5:28, 29, ko sho mbutɛ ɔtɛkɛtshi aso ɔnɛ Nzambi akalake dia nyomosha watshɛso lɔsɛnɔ nto lanɛ la nkɛtɛ kambokadimɔ paradiso.
5 Sho kokaka ndɛkɛ anto numɛlɔ ka “Réveillez-vous!” wa Ngɔndɔ ka Tanu 8 lo mumbola dimbola dimɔtshi ɔnɛ:
◼ “Oko le yɛ, kakɔna kahomba salema dia lɔsɛnɔ ndjâla mɛtɛ l’ɔkɔkɔ w’onto mbolisɛna?” Totshike onto akɔ etena akadimole. Towɛnya sawo diele l’ɔtɛ a dui w’ɔnɛ: “Naa kitshimudi ya lɔsɛnɔ na? lo lɛkɛ 26, ko sho mbala kɛnɛ kakate Salɔmɔna lo Undaki 2:11. L’ɔkɔngɔ diko, toke epole ɔsɛkɛ lo dako diakandasha lo tshapita 12, divɛsa 13. Totshutshuya ɔtɛkɛtshi aso dia nde nongola periodikɛ.
6 Naka wɛ ambosha anto periodikɛ, tohɛke tshikɛ wanɛ tshɛ wele watalongola kɔpi kɛmɔtshi ka Nkumu ya Diolelo No. 34 (naka yekekɔ lo lɔkɔtɔ). Sho pombaka mangemɛka wonya tshɛ dia mbishaka anto ekanda, lam’eyaso ɔnɛ ondo anto akina w’ase nkumbo kana angɛnyi wayoya dia ndjowaenda wayoyiala. (1 Tim. 6:18) Lokumu l’ɔlɔlɔ lɛmbɛso akanga wa ndjakitshakitsha kokaka mbashimbela.—1 Tim. 4:16.