Tɔlɛkɛke Anto Periodikɛ Ɛsangɔ Tshɛ
1 Tekɔ l’ɛkɔkɔ w’ɔlɔlɔ wa mbɔsa Tshoto y’Etangelo la Réveillez-vous! la nɛmɔ. Naa tojurnalɛ tokina takotola tambalo t’anto l’andja w’otondo oko tɔnɛ na? Ngɔndɔ kɛnɛ, tayotilɛkɛ anto lo yoho ya lânde; awui watawɔ lo numɛlɔ ka Kɔlɛkɔlɛ wekɔ lo kotola tambalo t’anto efula. Nshi tshɛ, sho kahanyaka etenyi ka woke ka periodikɛ yaso l’olimu wa luudu la luudu, koko toyalɔngɔsɔlɛ dia ndjilɛkɛ anto ndo lo diaaso dikina tshɛ diasunguna.
2 L’ekimanyielo ka “Tshoto y’Etangelo” ya Kɔlɛkɔlɛ 1, tokotole yambalo y’anto lo sawo diele l’ɔtɛ a dui w’ɔnɛ: “Etena Kakɔna Kayonga Andja Waha l’Ata?,” tata shate:
◼ “Anto efula ndjambolaka bonde kele, kânga mbadja anto weolo, mɛnamaka dia ekɔ wolo minya ata l’andja. Akanayɛ dia ɛtɛkɛta wotami lo lɛkɛ 5 la Tshoto y’Etangelo ya Kɔlɛkɔlɛ 1? [Tale etelo ka ntondo ka l’odingɔ wa ntondo la ka l’odingɔ wa hende l’ɔtɛ a dui woyedi w’ɔnɛ: “Ɛtɛmwɛlɔ Wekɔ Wekamu wa Woke,” ko sho kongɛ okadimwelo ɔmɔtshi.] Eelo mɛtɛ, dikambo sɔ hɛnya ɔnɛ ata wayongaka pondjo pondjo. Ohenda daka nɛ diaki Nzambi diele lo Isaya 9:6, 7.” Tale divɛsa diakɔ lo Bible kaso kana woho wofundamidiɔ lo Tshoto y’Etangelo. Tote lo tshena pe ɔnɛ Tshoto y’Etangelo mbewoyaka ɔnɛ Diolelo diaki Jehowa mbele tshɔi yakɔ y’elongamelo kayodja wɔladi l’andja, ko sho keketsha onto akɔ dia nde mbala sawo diakɔ.
3 Dia mɛnya Onto “Réveillez-vous!” wa Kɔlɛkɔlɛ 22, sho mbeyaka mbuta shate:
◼ “Akanayɛ lo dimbola nɛ diele lo lɛkɛ la ntondo la periodikɛ kɛnɛ: ‘lande na kele lɔsɛnɔ tshenyi nganɛ?’ [Tokonge okadimwelo.] Okanda ɔnɛ nembetshiyaka kɛnɛ kata wa nomb’ewo l’anto akina lo dikambo dia lotshundu, ko l’ɔkɔngɔ ndjoyasha lo kɛnɛ kakalake Otungi, lɔsɛnɔ la pondjo. Nte kotshike periodikɛ kɛnɛ, naka wɛ nangaka kiala.”
4 Naka tambohomana l’anto walanga sawola dikambo dia ɛtɛmwɛlɔ, lande na kahatatɛtɛ lo sawo dimɔtshi diele lo “Tshoto y’Etangelo” ya Tshaka Fudu 1? Ondo nde ayɛna losango lɔmɔtshi?
◼ “Lekɔ lo nanga mbeya kanyi yayɛ lo dimbola nɛ: Onde onto kokaka mboka Nzambi ngandji ko mbôka ndo wɔma etena kakɔ kâmɛ?” Tokonge okadimwelo, ko l’ɔkɔngɔ sho ndjadia awui wofundami lo sango di’ɔtɛ a dui wa sawo di’ɔnɛ: “Lande na Kahombaso Mboka Nzambi ka Mɛtɛ Wɔma Etena Kɛnɛ?” (Und. 12:13) Tokambe l’ɛnyɛlɔ kɛmɔtshi oma lo nɛ diele lo lɛkɛ 202 la dibuku Comment raisonner, ko sho mbɔlɛkɛ periodikɛ naka tekɔ lo mɛna yema ya saki.
5 Lo luudu la luudu, tatolekanake makashinyi wa totshitshɛ la wa butikɛ. Wanɛ wasambisha tena la tena lo wa makashinyi mbutaka ɔnɛ olimu ɔsɔ mbishaka ɔngɛnɔngɛnɔ ndo tondjaka elowa. Tohembe wɛnyanyelo ɔmɔtshi wa wɔɔdu oko wɔnɛ etena kalɛkɛso onto “Réveillez-vous!” wa Kɔlɛkɔlɛ 8:
◼ “Sho mbeyaka shate anto wele oko wɛ, wanda okanda, nangaka mbeya kɛnɛ kaleka kiyanya anto wâdingi. Oma lɔkɔ lamboyashikikɛ dia asawo anɛ wayokɔngɛnyangɛnya.” Ko l’ɔkɔngɔ sho ndjosha kɔmatɛrɛ lo tshena pe lo kanyi mɔtshi yele l’okanda wa “Nkumbo Yele l’ombutshi ɔtɔi: ngande wayowokoka Tondoya?”
6 Naka onto lohomanyi laso ekɔ mɛtɛ l’olimu, kete sho kokaka mbɛ̂nya wa periodikɛ ko mbotɛ ɔnɛ:
◼ “Lekɔ lo ndjakandjakandja nɛ dia wɛ halongamɛki di’onto ndjokênda ɛlɔ, oma lɔkɔ layɔtɛkɛta lo tshena pe. Nte kosha diaaso dia wɛ mbala dikambo dimɔtshi di’ohomba.” Tote sawo dimɔtshi diakasɔnama, ko sho mbɔlɛkɛ wa periodikɛ.
7 Tofunde nɔtɛ ya lo luudu la luudu l’ɔnɔngɔ ndo tokalole dia tênda onto tshɛ lakalongola okanda ɔmɔtshi. Naka tamboshola dia nde ekɔ la saki k’oma ka tshina di’otema lo diendelo di’oyoyo, kete towɛnya abɔnɛma lo periodikɛ kɛmɔtshi kana lo yakɔ hiende. Tongake suke ndo ekalanganu lo ndɛkɛ anto periodikɛ l’esangɔ tshɛ wasungana.