Ehamelo Ayɛ Wɛname!
1 Ohôhɔ mbala ka ntondo kakayoke losango la Diolelo. Mɛtɛ yaha l’okakatanu yakalomialomia mposa kayɛ ka mbeya ndo ka shihodia. Lam’akayɛnyi ɔnɛ mboka ya Jehowa mangana etale la mboka yayɛ, wɛ akeye esadi eto ɔnɛ wɛ la dia ndowanya lɔkɛwɔ lakɛ. (Is. 55:8, 9) Wɛ akahame, akakimɔ lɔsɛnɔ layɛ le Nzambi ndo akabatizama.
2 Kânga l’ɔkɔngɔ a wɛ pama l’akambo amɔtshi wa lo nyuma, wɛɔdu ɛmɔtshi wa nɛmbia wakikɔ tsho. (Romo 12:2) Ondo wɛ akatshɔka la tosambisha l’etema ehende, nɛ dia wɛ akokaka anto wɔma. Kana wɛ kokokaka mɛnya elowa wa nyuma ka Nzambi. Koko wɛ kompekɔ, nɛ dia wɛ akânɛ dia paka pama lam’akayadjɛ eyango wa Teokrasi.
3 Tamba lam’akayakimɔ le Nzambi, ondo ɛnɔnyi efula wambeta. Naka wɛ kalola yema l’ɔkɔngɔ, ehamelo akɔna wokokiyɛ shila? Onde wɛ akakotsha eyango ayɛ ɛmɔtshi? Onde wɛ eke l’ohetoheto ‘waki la yɛ oma l’etatelo?’ (Heb. 3:14) Lam’akawotɛ Paulo ate: “Utetemali lu akambu aso; uyakimo l’utema aye tshe loko, ne dia uhamelu aye wenami le antu tshe,” lâsɔ ko Timɔtɛ ambotongaka Okristo wambotshunda oma l’ɛnɔnyi wa diewo waki la nde.—1 Tim. 4:15.
4 Toyasɛdingole. Naka sho menda nganɛ waki lɔsɛnɔ laso edja ndo kakianɛ, ɛnaso? Onde teke la wɛɔdu ɛmɔtshi waki la so oma l’etatelo? Onde hatokotshisha eyango wakatayadjɛ? Naka eelo, lande na? Ondo taki la tokanyi t’ɛlɔlɔ, koko takasɛkɔlaka tsho. Onyake kana ekiyanu wa lo lɔsɛnɔ akatotutsha.—Luka 17:28-30.
5 Mɛtɛ, hawoholaka akambo wambetaka, koko nshi yayaye yekɔ yakiso. Toyasɛdingole dimɛna shâmɛ, têye wɛɔdu aso, ko sho shinganya wolo aso dia ndjalowanya. Ondo sho pombaka nyomoleka mɛnya elowa wa nyuma ka Nzambi oko ɛnyɛlɔ: ndjakimɛ, lotutsha, kana memakana. (Ngal. 5:22, 23) Naka sho mbokaka wolo mbokana l’akina kana kamba kâmɛ la dikumanyi, kete sho pombaka monga la yimba ya ndjakitshakitsha.—Fil. 2:2, 3.
6 Ehamelo aso wayoleka mɛnama naka tayolanga monga la waɛsɛ w’olimu ondo? Aha la tamu, anangɛso kokaka monga ekambi w’olimu kana dikumanyi, naka vɔ mbidja yema ya weolo wa lâdiko. Ondo amɔtshi l’atei aso wekɔ la diaaso dia koma ambatshi mboka wa pondjo. Le akina, olimu w’ombatshi mboka wa tshanda ekɔ oyango wakoka la wɔ. Akina nto kokaka ndjasha lo nɔngɔsɔla toho tawɔ ta wekelo, lo mbishaka kɔmatɛrɛ efula lo nsanganya ya l’etshumanelo, kana lo monga apandjudi watondja elowa efula.
7 Mɛtɛ, onto l’onto mbahomba mbuta lo akambo akɔna wahombande pama. Toyale l’eshikikelo ɔnɛ tayoleka monga l’ɔngɛnɔngɛnɔ ndo tayotondja elowa efula l’etshumanelo naka sho mbidja weolo l’otema ɔtɔi dia ‘tetemala otsha lo lotshundju.’—Heb. 6:1.