Ekadimwelo Lo Wembola Anyu
◼ Ahombaso sala naka ditto dimɔtshi diambotomba diahomuya anangɛso mpokoso na?
Naka Ditto Dimɔtshi Diambotomba l’Etenyi Kanyu ka Nkɛtɛ: Todidimake la wɔma. Onga l’otema wolo ndo yasha tshɛ lo kɛnɛ kele ohomba mɛtɛ: lɔsɛnɔ, aha diangɔ dia l’emunyi. Kimanyiya nkumbo kayɛ lo demba esadi oko ahombama. L’ɔkɔngɔ diko, ewoya dikumanyi nganɛ wenyu ndo lɛnɛ enyu.
Dikumanyi l’akambi w’olimu mbele anto wa ntondo wele l’ɔkɛndɛ wa kimanyiya anto l’atei w’ɔlɔngɔswamelo. Naka wambota dia ditto dimɔtshi, oko mpɛpɛ ya wolo, anangɛso asɔ wayoyanga dia mbeya kana anto tshɛ wekɔ lo dihole dia dimɛna, ndo naka etena kekɔ, vɔ wayoyanga mbo ya ndɛ ko ndjikahanya.
L’ɔkɔngɔ diko, ɔnɔmbɔdi wa wekelo wa dibuku ayohomba mbeya lɛnɛ ele nkumbo la nkumbo ndo mbeya kana wekɔ ki. Wayohomba mbewoya omendji-walɔmbɔla kana ekumanyi kekina nganɛ wele nkumbo la nkumbo, oyadi kânga wekɔ ki. Naka onto ɔmɔtshi ambohomɔ mpota, dikumanyi diayɔsa tɛdikɔ dia nde sakemɛ. Vɔ wayokimɔ ndo diangɔ tshɛ dia l’emunyi diahombama oko: mbo ya ndɛ, ahɔndɔ, luudu kana diangɔ dia lo luudu. (Joa. 13:35; Ngal. 6:10) Naka pombaka vɔ monɔ oma lo etenyi kakɔ ka ngelo, oko eke kasalema lo lɛkɛ l’Ehotwelo ka Onya la Zaïre, kete ayoleka dimɛna anangɛso monga dihole ɔtɔi, l’ɛlɔmbwɛlɔ ndo l’ekokelo k’ekumanyi kɛmɔtshi. Kema ɔlɔlɔ dia nkumbo kakitɔna kana pandjɔnɛ. Dikumanyi dia l’etenyi kakɔ ka ngelo diayosukɛ etshumanelo lo nyuma la lo yimba ndo wayoyatshutshuya dia sala ekongelo ka nsanganya nto kam’ayowokondja diaaso. L’ɔkɔngɔ wa sɛdingola dikambo diakɔ dimɛna, ekumanyi kɛmɔtshi ayohomba, lo lokombo l’olui, mɛnana l’omendji w’otshimbedi dia mbêwoya kana anto wakahomɔ wa mpota, kana efukutanu wakayala lo Mbalasa ka Diolelo kana lo mvudu y’anangɛso, kâmɛ ndo ehomba wa lânde. Omendji w’otshimbedi ayotomɛ filialɛ telefɔnɛ dia sala alapɔlɔ wa dikambo diakɔ. Naka pombaka mbɔsa tɛdikɔ ta weke, kete filialɛ ayɔlɔngɔsɔla diangɔ dia mbâkimanyiya.
Naka Ditto Diambosalema lo Lɛkɛ Lokina la Nkɛtɛ: Tohɔ anangɛso l’akadiyɛso l’alɔmbɛlɔ aso. (2 Kor. 1:8-11) Naka sho nangaka mbâkimanyiya la falanga, kete sho kokaka toma eshasha aso le la Société mbele l’okundji w’ekimanyielo wakalɔngɔsɔma lo dikambo sɔ. Adrɛsɛ v’ɔnɛ: Association “Les Témoins de Jéhovah”, B.P. 634, Limete, Kinshasa. (Etsha 2:44, 45; 1 Kor. 16:1-3; 2 Kor. 9:5-7; enda lo Tshoto y’Etangelo ya Diɛla Woke 1, 1985 (lo Falase), lɛkɛ 20-2.) Totomake ndoko ɛngɔ lo lɛkɛ la nkɛtɛ lotumbi mpokoso, onyake kana anangɛso walɔngɔsɔla diangɔ dia kimanyiya anto mbokɔlɔmbi l’ɔkɔkɔ ɔmɔtshi w’oshika. Ngasɔ mbahatonga ofukutanu lo mbâkimanyiya, ndo diangɔ diayokahanyema dimɛna. (1 Kor. 14:40) Totomɛke la Société telefɔnɛ otomɛtomɛ, nɛ dia dikambo sɔ kokaka mbusanya eshinga wa telefɔnɛ wele ohomba dia nongola awui oma lo dihole diosalemi mpokoso.
L’ɔkɔngɔ wa mbɛdikola dikambo diakɔ dimɛna, la Société ayoshikikɛ kana pombaka sala kɔmite ka ekimanyielo. Wayewoya anangɛso wele l’ɔkɛndɛ akɔ. Onto l’onto ayohomba kamba kâmɛ la dikumanyi dialɔmbɔla awui akɔ woho wa ehomba w’anangɛso tshɛ kotshama lo yoho yahombama.—Enda lo dibuku Les Témoins de Jéhovah: Prédicateurs du Royaume de Dieu, lɛkɛ 310-15.