Teke L’anto Bible Lo Yoho Ya Vɔ Pama
1 Lo na afɔna ɔfɛlɛmɛ wa omoto wa la Tanzanie l’osekaseka w’Ose Argentine la nyango ana kɛmɔtshi k’Ose Lettonie na? Annuaire 1997 (lɛkɛ 8, 46 la 56) kɔndɔlaka ɔnɛ vɔ akɔ asato wakahame esadi esadi lam’akaweke Bible nɛ dia vɔ wakalange sɛdingolaka dibuku Ewo mbala efula lo lomingu. Apandjudi wakakeketshama lo yɛdikɔ yakoka, dia vɔ salaka tshɛ dia mbekaka tshapita y’otondo mbala ɔtɔi. Koko, amɔtshi mɛnaka ɔnɛ ekɔ wolo. Kânga mbele dui sɔ nemanɛka tena efula l’akambo ndo l’akoka w’ombeki l’ombeki, embetsha efula wakakondja etombelo w’ɔlɔlɔ lam’akawayele alako anɛ w’eshika.
2 Oko akadilembetshiya dikatshi di’okotsha di’Olimu Aso wa Diolelo wa Lotena Eduwa 1996, sho pombaka ndakanya ambeki woho wa vɔ nɔngɔsɔlaka wekelo. Ayonga dimɛna tawalembetshiyisha ndo tawaɛnyisha oma k’etatelo woho wa salaka. Ɛnyawɔ dibuku diayɛ dia Ewo. Nyɔlɔngɔsɔlɛ wekelo wa ntondo kâmɛ. Kimanyiya ambeki dia vɔ mɛna tɔtɛkɛta t’ohomba ndo wetelo wakadimola dimbola diofundami l’ɛse ka dikatshi, ko nyu mbekɛ eshidi la bikɛ kana la markɛrɛ. Apandjudi amɔtshi wakakahɛ ambeki awɔ markɛrɛ. Keketshawɔ dia vɔ nyanga avɛsa tshɛ lam’alɔngɔsɔlawɔ. Lo salaka ngasɔ mbayowalakanyaka woho wa vɔ ndjalɔngɔsɔlaka dia mbɔtɔ lo wekelo wa dibuku la wa Tshoto y’Etangelo l’etshumanelo.—Luka 6:40.
3 Ombetsha weya hatɛkɛta efula, koko tɛkɛtshaka ombeki. Nde salaka tshɛ di’aha sambɛsambɛ l’akambo akina. Paka lo pai ko nde nembetshiya awui akina koko nde ndekaka mbika epole ɔsɛkɛ l’atshina w’akambo wa wekelo. Amɔtshi wakayangɛ ambeki awɔ ekanda wakadimola wembola awɔ. Ndo nto, anto walanga kokaka ndjolowanya ewo kawɔ lo mbɔtɔka lo nsanganya ya l’etshumanelo.
4 Ndoko ohomba mbɔsa avɛsa tshɛ woshilami. Wɛ kokaka nembetshiya atshina amɔtshi w’akambo oma lo avɛsa wofundami l’odingɔ. L’ovuswelo, tɛtɛ l’avɛsa w’ohomba wakanyɛnyi ndo keketsha ombeki dia nde mbakimɛ l’ɔtɛ.
5 Wenya Engana Wahomba Mbiviya Wekelo Na?: Aha pembola wekelo l’ɔnɛ oshidi a tango ambokoka. Amɔtshi wekɔ l’etena ndo ondo vɔ nangaka mbeka edja efula, kana mbala efula lo lomingu. Ombeki wakoka sala ngasɔ ayokondja ɛlɔlɔ oma lɔkɔ.
6 Ɛlɔ kɛnɛ, anto w’eyoyo nunu nkama wekɔ lo tombola Jehowa ndo, oko adita Isaya 60:8, vɔ ‘wekɔ lo ndjaye wayafumbɔ oko dinge, oko benga oya l’enyɔ wa tokefu tawɔ’ lo tshumanelo di’anto ande. Ɔnkɔnɛ sho tshɛ tosha lonya ndo tokambe kâmɛ la Jehowa, lam’atandakɛndjakɛndja olimu w’otshumanyelo w’anto wele oko ɛkɔkɔ.—Is. 60:22.