Ewo K’oma Le Nzambi Kadimulaka Lo Wembola Efula

¹ La ntondo ka sho ndjokondja ewo k’oshika k’akambo wa mɛtɛ, ondo takayambolaka wembola efula lo dikambo dia lɔsɛnɔ aha la mbeya kɛnɛ ka kadimula. Ande ɔlɔ waya laso kakianɛ dia kondja ekadimwelo oma lo Bible lee! Ɛlɔ kɛnɛ, taya l’akoka wa kimanyiya anto akina dia vɔ kondja ekadimwelo akɔ wamɛ. (Enda lo 2 Timote 2:⁠2.) Sho kokaka kahana la wɔ ewo ka Nzambi katɔla otsha lo lɔsɛnɔ la pondjo. (Joa. 17:⁠3) Ko ngande wokokiso kimanyiya onto dia nde mɛna ɔnɛ ewo kakɔ kekɔ ohomba mɛtɛ na? Tokanyiya ekadimwelo wakatakondja l’ekimanyielo k’akambo wa mɛtɛ. Naka sho monga la kanyi shɔ l’ɔtɛ, kete hatotoka wolo dia mbisha anto dibuku Ewo Katɔla Otsha lo Lɔsɛnɔ la Pondjo. Alako wotoshawɔ lanɛ l’ɛse wayokoka tokimanyiya dia sho ndjalɔngɔsɔla di’esambishelo lo Mam’ɛkɔngɔ la Tange.

² Lam’ele anto efula ndjambolaka bonde kele pâ efula nganɛ l’andja, ondo shambu yayela nyɛ kokaka kotola yambalo y’anto:

◼ “Etena kasalema ditto dimɔtshi kana katɛkɔya akambo wa kɔlɔ ndo wa ngala, anto ndjambolaka tena efula bonde kasalema akambo wa ngasɔ. Ngande ayoyokadimula na?” Hokamɛ okadimwelo ande dimɛna, ko wɛ ndjofola dibuku Ewo lo tshapita 8 ko wɛ mbɛ̂nya kɛnɛ katawɔ l’odingɔ 2. Lembetshiyande ɔnɛ dibuku nɛ mɛnyaka kɛnɛ kata Bible lo dikambo di’akambo wa kɔlɔ wasalema, ko wɛ kotsha wate: “Naka mɛtɛ wɛ ayodiala, kete dimi kotshikɛdiɔ.” Naka nde ambolongola dibuku diakɔ, ko wɛ mbotɛ oshinga adiɔ.

³ Lam’ayokalola dia tenda onto lakayatshikɛ dibuku “Ewo,” wɛ kokaka tota ɔnɛ:

◼ “Layɔngɛnangɛna dia mbeya nganɛ wamboyota lo dikambo di’ɔkɔkɔ akɔna wambɔtɛkɔya pâ ɔnkɔnɛ l’andja ɔnɛ. Onde wɛ mbetawɔka okadimwelo washa Bible wɛnyami lo dibuku nɛ?” Tshikande akadimule. Adia odingɔ 17 lo lɛkɛ 77 la dibuku Ewo ndo sɛngɔlande dia nde mbadia Romo 9:14 lo Bible kande hita. Ko wɛ ndjokotsha wate: “Lokumu l’ɔlɔlɔ latawɔ lanɛ ele ɔnɛ Jehowa hatɛnya pâ la fɔnu wɛnyɛnya. Nde akalake dia tosha lɔsɛnɔ la pondjo lo wɔladi ndo l’ɔngɛnɔngɛnɔ. Tshapita ya ntondo ya dibuku nɛ yekɔ l’ɔtɛ a dui w’ɔnɛ: ‘Wɛ Kokaka Monga la Nshi Yayaye y’Ɔngɛnɔngɛnɔ!’ Te kolembetshiya woho wokoki dikambo sɔ salema le yɛ ndo le wanɛ wokayɛ ngandji.” Fola lo tshapita 1, ndo ɛnyande woho wekaso l’anto. Eka la nde edingɔ efula wa tshapita yakɔ lo ndjela etena kele la nde.

⁴ Ondo wɛ mbeyaka sɔna mbɔtwɛlɔ kele lo lɛkɛ 4 la biukubuku “Woho wa Tatɛ” l’ɔtɛ a dui w’ɔnɛ “Lotshundu/Nyɔi”:

◼ “Onde wɛ atayambolaka bonde katshundaso ndo kavɔso? [Tshikande atɛkɛtɛ.] Afundelo kadimulaka wembola tshɛ wokokiso ndjambola lo dikambo sɔ. [Adia Undaki 9:​5, 10.] Afundelo mɛnyaka nto ɔnɛ wanɛ wele la mbetawɔ wekɔ l’elongamelo k’oshika. [Tshɔka l’odingɔ 13 wa lo lɛkɛ 84 la dibuku Ewo; adia ndo lembetshiya ɛtɛkɛta wa Yeso wele lo Joani 11:25.] Tshapita nyɛ y’otondo yakafundama paka dia kadimula dimbola nɛ: ‘Ngande Wele Wakiso wa Ngandji Wakavu?’ Dimi kokaka kotshikɛ dibuku nɛ naka wɛ nangaka ndjiala.” Tɛnde dia nde kimɔ yema ya woshasha yalɔmbama.

⁵ Lam’asalayɛ diendelo di’oyoyo, wɛ kokaka mbohola sawo ko ndjota ɔnɛ:

◼ “Lushi longo, takatɛkɛta dia kɛnɛ kasalema lam’avɔ onto. Anto efula mbetawɔka ɔnɛ lɔsɛnɔ lɔmɔtshi lekɔ l’ɔkɔngɔ a nyɔi, oyadi l’olongo kana l’infɛrnɔ. Ko onde wɛ ambokanyiyaka dia kana anto wambovɔ wayɔsɛna nto paka lanɛ la nkɛtɛ? [Tshikande akadimule.] Lo ndjela kɛnɛ kata Bible, anto wayolɔ oma lo nyɔi wayonga l’atei w’akanga a memakana wayokita nkɛtɛ. [Adia Osambu 37:​11, 29, ko wɛ ndjosha kɔmatɛrɛ l’odingɔ 20 lo lɛkɛ 88 la dibuku Ewo.] Elongamelo kɛsɔ kambokitshakitshaka asolo w’anto efula wakokaka nyɔi wɔma. Dibuku nɛ diayokokimanyiya dia wɛ shihodia dikambo diakɔ ɔlɔlɔ. Kɛ̂nya woho wokokidiɔ kokimanyiya?”

⁶ Naka wɛ nangaka sala sawo diaha l’okakatanu, kete wɛ kokaka pemba nɛ:

◼ “Lekɔ lo nanga kɛnya sango dimɔtshi lo dibuku nɛ, Ewo Katɔla Otsha lo Lɔsɛnɔ la Pondjo. Shi ekɔ osato wa dimɛna efula?” Fola dibuku dia onto akɔ mɛna kɛnɛ kele lo lɛkɛ 4 la 5. Tshikande akadimule, ko wɛ ndjadia awui wele lo kiombo lo lɛkɛ 5. Dihiya wate: “Dimi kokaka kotshikɛ dibuku nɛ dia wɛ diala wɛmɛmɛ.” Tɛnde dia nde kimɔ yema ya woshasha yalɔmbama. Naka nde ambɛnya saki, ko wɛ mombola etena kakɔna kokokiyɛ ndja dia ndjowenda nto.

⁷ Tekɔ l’ewo k’oma le Nzambi kakadimula lokema la wembola wendana la lɔsɛnɔ laso. Yâlɔngɔsɔla dimɛna dimɛna ko Jehowa ayɔtshɔkɔla weolo wayoyodja dia mbewoya anto wayanga akambo wa mɛtɛ losango lɔsɔ lasha lɔsɛnɔ.