Omba
Mbɔtwɛlɔ ya kamba layɔ l’olimu w’esambishelo
Kamba la alako wayela anɛ dia nɔngɔsɔla mbɔtwɛlɔ yɛnya ekanda wayotoshaka anto lo ngɔndɔ.
Approchez-vous de Jéhovah
“Anto efula wele la mbetawɔ le Nzambi kombolaka ndjaoka dia wekɔ suke la nde. Onde wɛ mbeyaka dia Nzambi tɔlɔmbaka dia sho ndjasukanya la nde? [Adia Jakoba 4:8.] Okanda ɔnɛ wakafundama dia kimanyiya anto woho wa vɔ kamba la Bible yawɔ dia ndjasukanya la Nzambi.” Adia odingɔ 1 lo lɛkɛ 16.
“Awui wa wɛngiya wambofulanɛ efula nshi nyɛ. Ekɔ oko wɔkɔndwamidiɔ lanɛ. [Adia Undaki 8:9b.] Anto efula wekɔ lo ndjambola dia kana Nzambi ndjakiyanyaka dikambo sɔ. [Adia ɛnɔngɔ ehende wa ntondo wa l’odingɔ 4 lo lɛkɛ 119.] Tshapita nyɛ nembetshiyaka bonde kambotshika Nzambi awui wa wɛngiya lo tshanda mɔtshi.”
Y a-t-il un Créateur qui se soucie de vous ?
“Lende okokiso tana alako woleki amɛna wendana la woho wakokaso kandola ekakatanu woleki wolo wahomana laso? [Tshikande akadimole. Oma lâsɔ ko wɛ mbadia Mateu 7:28, 29.] Divɛsa nɛ mɛnyaka woho wakangɛngɛna anto dako diaki Yeso dia lo Dikona. Enda kɛnɛ kakate anto akina. [Sha kɔmatɛrɛ lo lɛkɛ 152.] Tshapita nyɛ tɛkɛtaka dikambo dia lɔsɛnɔ ndo dia wetshelo waki Yeso.”
“Onde wɛ atayambolaka ɔnɛ: ‘Naka Nzambi ekɔ, onde nde ayonya pâ ndo wɛngiya l’andja?’ [Tshikande akadimole. Oma lâsɔ ko wɛ mbadia Enyelo 21:3, 4.] Dibuku nɛ nembetshiyaka kɛnɛ kayosala Nzambi dia minya asui ndo kiɔkɔ yawɔ.” Ɛnya onto tshapita 10.
Nyotetemale sungukala!
“Anto efula wekɔ lo ndjakiyanya dikambo di’ekakatanu wa weke ndo di’awui wa kɔlɔ wambokokanɛ ɛlɔ kɛnɛ. [Shila dui dimɔtshi dieyama l’ɛtshi kanyu ka nkɛtɛ.] Onde wɛ mbeyaka dia akambo anɛ wekɔ l’atei w’akambo wakenga djembetelo yɛnya dia kema edja akambo wa la nkɛtɛ nyɛ wayanga monga l’anya wa lowandji laki Nzambi? [Tshikande akadimole. Oma lâsɔ, ko wɛ mbadia divɛsa diɔtɔnganɛ la ɛnyɛlɔ koshayɛ oko Mateu 24:3, 7, 8; Luka 21:7, 10, 11; kana 2 Timote 3:1-5.] Biukubuku nyɛ mɛnyaka lande na kamondoleka monga ohomba mambalɛka kakianɛ lo kitshimudi ya akambo anɛ.”
“Anto efula ɛlɔ kɛnɛ wambɔkɔmɔ otema l’ɔtɛ w’akambo wa kɔlɔ wasalema kana l’ɔtɛ wa mpokoso mɔtshi yakakomɛ. Amɔtshi ndjambolaka lande na kahekɛ Nzambi lonya dia shimba awui wa ngasɔ. Bible toshikikɛka dia kema edja Nzambi ayonyɛ anto asui. [Adia Enyelo 14:6, 7.] Enda kɛnɛ kayolembetshiya elombwelo kaki Nzambi le anto. [Adia 2 Petero 3:10, 13.] Biukubuku nyɛ mbewoyaka awui akina wa lâdiko wendana la dikambo di’ohomba sɔ.”
Ewo katɔla otsha lo lɔsɛnɔ la pondjo
“Naka wambokɔlɔmba dia wɛ mbidjasɛ lo dihole dia dimɛna dia nganɛ, onde wɛ ayetawɔ leeta lɔsɔ? [Ɛnyande osato wa lo lɛkɛ 4-5, ndo tshikande akadimole.] Enda kɛnɛ kata Ɔtɛkɛta wa Nzambi kayotokimanyiya dia sho monga la yoho ya lɔsɛnɔ la nganɛ pondjo pondjo. [Adia Joani 17:3.] Dibuku nɛ diayokokimanyiya dia wɛ kondja ewo katɔla otsha lo lɔsɛnɔ la pondjo.” Lɔngɔsɔla dia nyu kɛtshanya edingɔ etanu wa ntondo wa tshapita 1 lo wendelo wayaye.
Fola lo osato wele lo lɛkɛ 188-189, ndo lo kamba la ɛtɛkɛta wele lo osato akɔ mbola ompokami wate: “Onde wɛ nongamɛka nsɛna lo Paradiso, etena kayolola ewo kaki Nzambi la nkɛtɛ? [Tshikande akadimole. Oma lâsɔ, adia Isaya 11:9.] Dibuku nɛ diayokokimanyiya dia wɛ mbeka kɛnɛ kata Bible lo dikambo diendana la Paradiso ndo woho wakokaso monga lɔkɔ.” Lɔngɔsɔla dia nyu kɛtshanya odingɔ 11-16 wa tshapita 1 lo wendelo wayaye.
Etshama oma le Ombetsha a woke
“Onde wɛ fɔnyaka dia andja ɔnɛ wayonga dihole dia dimɛna efula naka anto ndjela awui wotami lânɛ? [Adia Mateu 7:12a. Oma lâsɔ, tshikande akadimole.] Dibuku nɛ diekɔ la wetshelo efula w’oma le ombetsha woleki woke lo tena tshɛ.” Ka epole ɔsɛkɛ l’esato ndo lo ɛtɛkɛta walembetshiya esato wele lo tshapita 17.
“Ambutshi efula ɛlɔ kɛnɛ wekɔ lo sala la wolo dia mbetsha anawɔ atɔndɔ w’eshika wendana la lɔkɛwɔ l’ɔlɔlɔ. Onde wɛ fɔnyaka dia dui sɔ diekɔ ohomba? [Tshikande akadimole. Oma lâsɔ adia Tukedi 22:6.] Teye di’ambutshi keketshamaka dia ndakanya anawɔ oma ko tɔkɛndakɛnda tawɔ. Dibuku nɛ diakatondjama dia mbâkimanyiya dia vɔ sala dui sɔ.” Ka epole ɔsɛkɛ l’esato ndo lo ɛtɛkɛta walembetshiya esato wele lo tshapita 15 kana 18.
“Tena efula ambutshi mambaka lam’okawɔ wembola wawaoka anawɔ. Wembola ɛmɔtshi l’atei awɔ koka monga wolo kadimola, shi ngasɔ mbediɔ? [Tshikande akadimole. Oma lâsɔ adia Efeso 6:4.] Dibuku nɛ koka kimanyiya ambutshi dia vɔ kadimola lo wembola waki anawɔ ɛlɔ kɛnɛ.” Ka epole ɔsɛkɛ lo esato ɛmɔtshi ndo l’ɛtɛkɛta walembetshiya esato wele lo tshapita 11 ndo 12 kana 34 polo 36.
La vie : comment est-elle apparue ? Évolution ou création ?
“Sho tshɛ ndjakiyanyaka dikambo dia diakatanelo ndo akambo wa ngala lo ɛtshi kaso ka nkɛtɛ. Onde wɛ fɔnyaka dia onto ɔmɔtshi kokaka mɛtɛ kandola okakatanu ɔsɔ? [Tshikande akadimole.] Nzambi kokaka kandola dui sɔ.” Tofole lo lɛkɛ 196; ko sho mbadia ndo mbisha kɔmatɛrɛ ka Tukedi 2:21, 22 lo odingɔ 19. Ɛnyande ɔtɛ a dui wa tshapita 16 ko wɛ mbosha dibuku.
Fola lo lɛkɛ 6, ndo ta wate: “Anto efula fɔnyaka dia nkɛtɛ kaso k’olangala kɛnɛ ndo lɔsɛnɔ lele lɔkɔ lakaye oyaya. Onde wɛ fɔnyaka dia olembetshiyelo ɔsɔ wekɔ mɛtɛ? [Tshikande akadimole.] Akambo efula shikikɛka kɛnɛ kata Bible dikambo dia Otungi aso wele la wolo efula ndo watoka ngandji k’efula. Nde ekɔ Nzambi ka mɛtɛ, ndo lokombo lande Jehowa.” Adia Osambu 83:18, ndo lembetshiya lo tshena pe dia sangwelo diande ele dia kadimola nkɛtɛ k’otondo paradiso.
L’humanité à la recherche de Dieu
“Nshi nyɛ ɛtɛmwɛlɔ wekɔ efula hakoke: onde wɛ amboyambolaka woho wokokiyɛ mbeya wakɔna wangɛnyangɛnya Nzambi?” L’ɔkɔngɔ wa okadimwelo ande, fola lo lɛkɛ 377. Ta dikambo diele lo numɛlɔ 7, ko wɛ mombola kana ndo nde lawɔ fɔnyaka ɔnɛ ɔtɛmwɛlɔ wa mɛtɛ pombaka mbokanya anto wele la weho tshɛ wa nkoho y’alemba. Ɔsa divɛsa dimɔtshi dioshawɔ lawɔ ndo, naka wonya wekekɔ, sha kɔmatɛrɛ lo dikambo dikina dioshidiwɔ l’ɔnɔngɔ akɔ. Naka onto ambɛnya mɛtɛ nsaki ko wɛ mbosha dibuku diakɔ. Etena kalangayɛ kakitɔna la nde, wɛ mbeyaka mumbola ɔnɛ: “Naa shɛngiya yahomba monga l’ɔtɛmwɛlɔ wa mɛtɛ lo lɔkɛwɔ l’anto wa lɔkɔ na?” Okana la nde lushi la ndjokadimola wombola ɔsɔ.
Naka onto ekɔ lo ndjata dia nde ekɔ ose ɔtɛmwɛlɔ ɔmɔtshi wa woke, wɛ mbeyaka mbuta wate: “Ekɔ dikambo dia dimɛna efula dia sawola la anto wa lo ɛtɛmwɛlɔ wotshikitanyi. Anto wamboyanga Nzambi lo toho efula. [Naka kokaka, adia Etsha 17:26, 27.] Mbala efula, anto ndjelaka ɔtɛmwɛlɔ waki ambutshi awɔ. [Adia odingɔ 12 lo lɛkɛ 8.] Mbeka akambo efula wendana la ɛtɛmwɛlɔ ekina kimanyiyaka ndo mbishaka wetshelo. Dibuku nɛ nembetshiyaka etatelo, ditshelo ndo wetshelo wa ɛtɛmwɛlɔ wa weke wa l’andja.” Sha ɛnyɛlɔ kɛmɔtshi ka kɛnɛ kata dibuku lo kɛnɛ kendana la ɔtɛmwɛlɔ waki onto lasawola layɛ, oko watanemadiɔ lo ndjɛkɛ yayela nyɛ: ɔtɛmwɛlɔ wa waa Sikh (100-101); wa waa Hindu (116-117); w’ase Buda (141); w’ase Tao (164-166); w’aseka Confucius (177); w’ase Shinto (190-195); w’ase Juda (220-221); ndo wa waa Mizilima (289).
La Révélation : le grand dénouement est proche !
“Mɛtɛ wɛ akoki wata dia [ta lokumu lɔmɔtshi l’oyoyo]. Lam’ashisha anto nsɛnɔ l’odiakanelo, efula ndjambolaka nganɛ wokokiwɔ tokeketsha nkumbo yovushisha. Akanayɛ na?” Tshikande akadimole. Oma lâsɔ, ko wɛ mbifola lo lɛkɛ 299 dia mbɛnya osato wa woho wayôlɔ anto. Tetemala la mbuta ɔnɛ: “Efula mambaka lam’okawɔ ɔnɛ anto w’ɔlɔlɔ la wa kɔlɔ wayôlɔ lo Paradiso ka la nkɛtɛ. [Adia Etsha 24:15, divɛsa dia l’odingɔ 9 lo lɛkɛ 297, ko wɛ mbisha olembetshiyelo wele l’odingɔ 10.] Dibuku nɛ mɛnyaka awui akina efula w’ohomba wendana la sangwelo dia Nzambi lo dikambo dia nshi yayaye.”
La Bible : Parole de Dieu ou des hommes ?
“Tekɔ lo sɛna lo nshi yele onto tshɛ ekɔ lo ndɔshana la ekakatanu wa wolo. Anto efula nyangaka ɛlɔmbwɛlɔ le andaki wa weho la weho. Amɔtshi nyangaka ekimanyielo le asaki w’awolo. Lende afɔnyayɛ akokaso tana alako w’amɛna wakoka tokimanyiya mɛtɛ? [Tshikande akadimole.] Bible mbutaka dikambo dimɔtshi di’ohomba efula diahombaso sho tshɛ shihodia. [Adia 2 Timote 3:16. L’ɔkɔngɔ diko fola lo lɛkɛ 187, ndo adia odingɔ 9.] Dibuku nɛ ayokokimanyiya dia wɛ mbeya dia mbala tshɛ wetshelo wa lo Bible mongaka la etombelo w’amɛna efula.”
Onto loleki woke lo tena tshɛ
“Lo nshi ya Nɔɛlɛ nyɛ, anto efula kanyiyaka dikambo diaki Yeso. Lo menda akambo tshɛ wa kɔlɔ watomba l’ahole suke la tshɛ l’andja ɔnɛ, ondo anto amɔtshi mbeyaka ndjambola dia kana Yeso ndjakiyanyaka mɛtɛ lo dikambo diaso. Ko wɛ akanayɛ lo dikambo sɔ na?” Tshikande akadimole. Fola dibuku lo tshapita 24 ndo nyɔkɛtshanya lo tshena pe lande na kakaye Yeso lanɛ la nkɛtɛ. Oma lâsɔ, ala Joani 15:13 dia mbika epole ɔsɛkɛ lo ngandji ka l’otema ɔtɔi koka Yeso anto akina.
“Etena katɛkɛta onto ɔmɔtshi dikambo dia Yeso Kristo, anto efula mbɔ̂saka oko ɔna ashashi, kana onto lakawakawa laya suke la mvɔ. Kanyi yele lawɔ lo dikambo dia Yeso pembetɛka lo eotwelo kande la lo nyɔi kande. Mbala efula, vɔ mɔnyɔlaka akambo wa diambo wakandate ndo wakandasale lo nshi ya lɔsɛnɔ lande. Kɛnɛ kakandasale mendanaka l’anto tshɛ wasɛna la nkɛtɛ. Diɔ diakɔ diele ekɔ ohomba sho mbeka awui efula wendana la akambo wa diambo wakandasale lo wahɔ aso.” Adia Joani 17:3. Nyotshu lo lɛkɛ la ntondo la mbɔtwɛlɔ ka dibuku ko wɛ mbadia odingɔ wa nɛi.
Kakɔna katɔlɔmba Nzambi?
“Onde wɛ fɔnyaka dia Nzambi akalange ɔnɛ tɛnake pâ l’ekakatanu oko wɛnɛ wele laso nshi nyɛ? [Tshikande akadimole. Oma lâsɔ, adia Mateu 6:10.] Onde wɛ ambokanyiyaka dia mbeya ele mɛtɛ Diolelo diaki Nzambi?” Tofole lo wekelo 6 ko sho mbadia wembola wele l’etatelo ka wekelo. Tatɛ ɔkɛtshanyelo lo wekelo ɔmɔtshi kana lɔngɔsɔla dia ndjosala dikambo sɔ lo wendelo wa mbala kayaye.
“Kânga mbambohama tshunda di’anto dia nshi nyɛ lo akambo efula, hemɔ ndo nyɔi ekɔ lo tetemala mbisha pâ efula ndo lonyangu. Onde wɛ mbeyaka kɛnɛ kayosala Yeso, dikambo dia hemɔ, dia lotshundu l’osombe ndo dia nyɔi?” Tshikande akadimole. Naka onto ngɛnangɛnaka mbeya okadimwelo, kete fola lo wekelo 5 ndo adia wembola wa lo odingɔ 5-6. Nyɔkɛtshanya edingɔ, kana lɔngɔsɔla dia sala ngasɔ lo wendelo wa mbala kayaye.
Tɛmɔla Nzambi ɔtɔi ka mɛtɛ
“Lende afɔnyayɛ akokaso nyanga ekimanyielo dia ndɔshana la ekakatanu wa lo lɔsɛnɔ? [Tshikande akadimole. Oma lâsɔ, adia Romo 15:4.] Eya dia Afundelo wakasambiyama toshaka wetshelo, esambelo ndo elongamelo kakoka tokeketsha dia sho mbikikɛ ekakatanu. Dibuku nɛ toshaka alako w’amɛna wa woho wakokaso kondja wahɔ oma lo wadielo wa Bible.” Ka epole ɔsɛkɛ l’awui anɛi wɔtɛkɛtami lo lɛkɛ 30.
“Tatɛ lo nshi yaki Yeso lanɛ la nkɛtɛ, anto efula wakalɔmbaka dia Diolelo diaki Nzambi ndja. Onde wɛ atayambolaka kɛnɛ kalembetshiya oyelo wa Diolelo sɔ le anto? [Tshikande akadimole. Oma lâsɔ, adia Danyele 2:44.] Dibuku nɛ nembetshiyaka ele Diolelo diaki Nzambi, kɛnɛ kayodiosala ndo woho wakokaso kondja wahɔ oma lo ɛlɔmbwɛlɔ kadiɔ ka losembwe.” Tɛkɛta dia esato wele lo lɛkɛ 92-93.