Tɔlɛkɛ Anto Dibuku Ewo Katɔla Otsha Lo Lɔsɛnɔ La Pondjo
1 Ande ɔlɔ wakatoke lam’akatombe dibuku Ewo Katɔla Otsha lo Lɔsɛnɔ la Pondjo! Dibuku sɔ diakafundama dia kimanyiya anto lo vɔ kondja ewo ka shikaa ka mɛtɛ esadi eto. Lo Mam’ɛkɔngɔ la Tange, tayolilɛkɛ anto lo mbilo kaso. Okokiso mbuta dia mbotsha atɛkɛtshi aso saki?
2 Wɛnyanyelo ɔmɔtshi ɔnɛ wokoki pɛtshahɛtsha saki k’anto wele la mbetawɔ le Nzambi yambɔ̂la:
◼ “Anto efula wakôle lo dietawɔ le Nzambi wambɛna dia mbetawɔ kawɔ kaya bu wolo oko akitɔ. Oko le yɛ, l’ɔkɔkɔ akɔna? [Tôtshike akadimole.] Mbetawɔ kaso le Nzambi keketalaka lam’akanyiyaso diangɔ di’amɛna diele l’andja. [Tâle Osambu 19:1.] Ɔnɛ lele l’ɛlɛmbɛ walɔmbɔla diangɔ dia l’olongo toshaka nto alako w’eshika. [Tâle Osambu 19:7-9.] Avɛsa asɔ mɛnyaka dia ekɔ ohomba mbeka kɛnɛ tshɛ kokokiso mbeka k’endana la Nzambi ndo la tokanyi tande. [Tokotole yambalo yande lo sango dia lo lɛkɛ 4 la 5, ko sho mbala ɛtɛkɛta adiɔ.] Naka wɛ nangaka kondja ewo kɛsɔ ka lânde, kete layɔngɛnangɛna dia kotshikɛ dibuku nɛ.”
3 Lam’akanyiyaso dikambo dimɔtshi dia kɔlɔ efula dieke ka tomba sho kokaka mbuta ɔnɛ:
◼ “Aha la tamu, wɛ akoke wata dia [ta dikambo diakɔ]. Onde wɛ amboyambolaka dia kana Nzambi ndjakiyanyaka mɛtɛ dia kɔlɔ la pâ yɛnaso la asho kana yadiɛnɛso? [Tôtshike akadimole.] Bible toshikikɛka ɔnɛ Nzambi tolangaka ndo ɔnɛ nde ayotokimanyiya lo tena dia wolo.” Tâle totenyi ta Osambu 72:12-17. Tofole dibuku lo lɛkɛ 70, ko sho mbɛ̂nya ɔnɛ dibuku nɛ, Ewo Katɔla Otsha lo Lɔsɛnɔ la pondjo, kadimolaka wombola ɔmɔtshi wayambola miliyɔ y’anto: Bonde ketawɔ Nzambi dia pâ monga? “Wɛ ayɛna dia okadimwelo washa Bible lo dimbola sɔ mbishaka ekeketshelo. Nte kotshike dibuku nɛ woho wa wɛ mbishola okadimwelo akɔ wɛmɛ.”
4 Naka tambohomana la papa kana mama, tɔtɛkɛtɛ dia nkumbo:
◼ “Ambutshi efula suyaka ɔnɛ ekɔ wolo dia monga la lɔsɛnɔ la nkumbo l’ɔngɛnɔngɛnɔ. Oko le yɛ, naa wekamu woleki weke? [Tôtshike akadimole.] Efula l’atei aso salaka la wolo tshɛ, koko sho nangaka mbeya kɛnɛ kokoki tokimanyiya dia sho kondja etombelo woleki ɛlɔlɔ nto. Bible mbishaka alako w’amɛna efula. [Tâle totenyi ta Kolosai 3:12, 18-21.] Bible ekɔ l’awui efula wa mbuta lo dikambo sɔ, oko washikikɛ tshapita 15 ya dibuku nɛ, yele l’ɔtɛ a dui w’ɔnɛ: ‘Woho Wakokayɛ Mbika Nkumbo Kalɛmiya Nzambi.’ Yɔ tshumanyaka alako wa lo Bible wɛnya woho wakoka atshukanyi shidiya nkɛlɛ l’asawɔ ndo kimanyiya anaso dia vɔ ntokomɛ ekakanu awɔ. Lambetawɔ dia wɛ ayɔngɛnangɛna diala.”
5 Naka sho nangaka tɛkɛta lo tshena pe, kete sho kokaka tatɛ sawo nganɛ:
◼ “Onde wɛ atayambolaka bonde katshundaso ndo kavɔso? Tshapita 6 ya dibuku nɛ nembetshiyaka kiɔkɔ ya nyɔi ndo woho wayokinya Nzambi. Bible totɛka ɔnɛ Nzambi akalake wanɛ wôlanga lɔsɛnɔ la pondjo. [Tâle Joani 17:3.] Naka wɛ nangaka mbeya awui efula lo dikambo sɔ, kete wɛ ayɔngɛnangɛna dibuku nɛ diele la wetshelo wa mamba.”
6 Naka sho nɔngɔsɔma dimɛna, kete tayokoka kamba la dibuku nɛ dimɛna dia ‘nembetshiya’ anyaso ‘afundelo’ lo ɔngɛnɔngɛnɔ awɔ w’efula.—Luka 24:32.