Ngande Wasalaso La Ntondo Ka Wendjodi?
1 Wendjodi kɛdikɛdi dionga di’onto lahoke saki, laha la shase, hadje yimba ndo hayakiyanya kânga yema. Ɔsɔ ekɔ dionga dimɔtshi diatongaka l’anto efula wahomana la so ndo dioleki wolo tondoya l’esambishelo. Ngande wasalaso la ntondo ka wendjodi na? Onde sho totutshaka olimu aso l’ɔtɛ wa wendjodi? Ngande wakokaso nɛmbia wendjodi wonga l’anto dia sho mbaewoya losango la Diolelo na?
2 Ntondotondo, toteyi bonde kendjola anto wa lo mbilo kaso. Onde nɛ dia ewandji wa pɔlitikɛ la w’ɛtɛmwɛlɔ wambowasha sɔnyi? Onde vɔ mɛnaka ɔnɛ ndoko woho wokokiwɔ shidiya ekakatanu awɔ? Onde vɔ mbidjaka tamu lo dikambo di’alaka w’ɛngɔ kɛmɔtshi ka dimɛna efula? Onde vɔ hawolangaka ndjasha l’akambo wa lo nyuma paka kana vɔ mɛna ɛlɔlɔ w’awui akɔ ko wonya akɔ kana la asho awɔ?
3 Tɛnya Ɛlɔlɔ wa Monga l’Elongamelo ka Diolelo: Ndoko okakatanu wahatokandola Diolelo. Ɔnkɔnɛ, etena tshɛ keso la diaaso, sho la dia mbuta alaka wa Diolelo l’ekimanyielo k’awui w’ohomba efula wele lo Bible, oyadi kânga diaaso kana etena kakɔ hasungana dia mɛnya divɛsa lo Bible. (Heb. 4:12) Ko lâsɔ, ngande wokokiso sawola l’onto polo lɛsɔ na?
4 Anto pombaka shihodia bonde kayaso ndjowaenda. Vɔ pombaka mbeya ɔnɛ naka sho ndjaka dia ndjowaenda ele nɛ dia sho nangaka onyaso ndo ndjashaka le asukanyi aso. Sho kokaka mbaoka dimbola dimɔtshi di’oshika oko ɔnɛ: “Afɔnyayɛ ayoshidiya [ta dikambo dimɔtshi diambotomba l’etenyi kanyu ka ngelo]?” Naka mbɔtwɛlɔ kosadiyɛ hakotudi yambalo yande ko wɛ pemba kekina.
5 Lo mbilo kɛmɔtshi kakadjasɛka anto w’ɛngɔnyi wa mamba wendjola losango la Diolelo, apandjudi wakasale tshɛ dia kondja mbɔtwɛlɔ kɛmɔtshi ka sawo kayemula saki kawɔ. Ɔnangɛso ɔmɔtshi la wadiɛnde wakahembe mbɔtwɛlɔ kɛnɛ dia mbisha onto dibuku Ewo: “Onde wɛ fɔnyaka ɔnɛ di’onto monga la lɔsɛnɔ l’ɔlɔlɔ l’andja ɔnɛ nshi nyɛ, nde pombaka nshidimikɔ? Onde wɛ mbetawɔka dia wetshelo wa kokele pombaka monga ndo l’ewo ka Bible?” L’ɔkɔngɔ a midi, vɔ wakasha anto abuku asato, dimɔtshi wakasha omoto lakayotaka l’ɔkɔngɔ ɔnɛ nde ambomana mbadia dibuku Ewo ndo aketawɔ dia mbeka Bible.
6 Lam’ahomanaso la wendjodi, tohembe weho wotshikitanyi wa mbɔtwɛlɔ y’asawo, tombole wembola watshutshuya onto lo nde kanyiya ndo toyaɛkɛ lo wolo wele la Dui dia Nzambi. Ondo ngasɔ mbayotokoka kimanyiya anto akina dia vɔ mbeya elongamelo kaso ka diambo efula ka Diolelo.