Tofudia Saki Kakɛnya Anto Oma Lo Nkumu Ya Diolelo
1 Ambeta mingu mɔtshi yeso l’ɔngɛnɔngɛnɔ ndo la diɛsɛ dia dianganya Nkumu ya Diolelo No. 35, yele l’ɔtɛ a dui ɔnɛ: “Onde Anto Tshɛ Wokokana Ngandji Lushi Lɔmɔtshi?” L’ahole tshɛ, apandjudi wekɔ lo sala la wolo dia tshikɛ anto efula ‘wasungana’ kiatshi shɔ. (Mat. 10:11) Odianganyelo ɔsɔ pombaka shila mɛtɛ Lushi la Lomingu, Ngɔndɔ ka Dikumi l’Ahende 14, koko naka mbilo yekekɔ ya kindola, kete dikumanyi mbeyaka tɔlɔmba dia sho tetemala l’odianganyelo wa Nkumu ya Diolelo No. 35 edja ndo nyɛ yele lo lɔkɔtɔ l’etshumanelo kaso yamboshila.
2 Numɛlɔ kɛnɛ ka Nkumu ya Diolelo memulaka saki k’anto efula. Vɔ mɛnaka ɔnɛ anto efula wa nshi nyɛ waya bu la ngandji k’onto l’ɔnango, diakɔ diayambolawɔ kakɔna kayonga lo nshi yayaye. (2 Tim. 3:3) Sho nangaka fudia saki kɛsɔ kakɛnya anto.
3 Odianganyelo wa Nkumu ya Diolelo Tɔka Elowa Awɔ: L’odianganyelo wakasalema lo 1995, omoto ɔmɔtshi lakalongola kiatshi mɔtshi ya Nkumu ya Diolelo akaye lo losanganya lo Mbalasa ka Diolelo dia ndjeya awui efula lo kɛnɛ kendana l’akambo wetawɔ Ɛmɛnyi wa Jehowa. Nde aketawɔ esadi eto dia mbeka Bible ndo oma lâsɔ nde aketshaka lo losanganya paka lo pai. Edja la ntondo, nde akadimula lokombo lande oma l’abuku wafundawɔ nkombo y’ambetawudi l’Ɔtɛmwɛlɔ ande.
4 Ɛlɔ kɛnɛ, nkama y’anto wa lo mbilo kaso wamboshila la mbadia losango lofundami lo Nkumu ya Diolelo No. 35. Ko akawasale l’ɔkɔngɔ wa vɔ mbadia na? Oyadi kânga asolo awɔ akakɛtɛ oma lo kɛnɛ kakawadia, efula hawotosala ndoko dikambo onyake paka kana Ɔmɛnyi wa Jehowa ɔmɔtshi kotshwe nto dia towaenda. Onde tasangoyakɔ dia kalola towaenda nto? Kandji kosokoyami la ngandji kokaso anyaso anto pombaka tosokoya dia sho sala dui sɔ. Wanɛ tshɛ wakɛnya saki lo Nkumu ya Diolelo pombaka mendama nto.
5 Ayotota Lam’ayokalola Osangɔ Okina Na? Sho mbeyaka mbisha yema ya kɔmatɛrɛ lo awui watshama nshi nyɛ watawɔ lo Nkumu ya Diolelo ko sho ndjowombola dimbola dimɔtshi diayowosokoya lo nde kanyiya. Tôhokame la yambalo tshɛ dia sho mboka dimɛna kɛnɛ kele lo yimba yande. L’ɔkɔngɔ ko sho ndjokotola yambalo yande lo dikambo dimɔ diasungana diele lo biukubuku Katɔlɔmba, dikambo diatawɔ lo Nkumu ya Diolelo. Naka nde ambɛnya saki ko sho pemba tatɛ mbeka la nde Bible mbala kakɔ ɔtɔi.
6 Toho tɔmɔtshi tɔnɛ ta tatɛ sawola mbala ka hende la wanɛ wakɛnya saki lo “Nkumu ya Diolelo” No. 35:
◼ “Ondo wɛ mbohɔka kiatshi yofundami losango lɔmɔtshi yakamakotshikɛ atete ndoko edja. Lɔkɔ wekɔ lo mbuta dikambo dimɔtshi dia wolo efula diele lo kiɔkɔ y’okakitɔnelo w’anto: ngandji ka onyaso onto aya bu.” Toshile ndo diɛnyɛlɔ diɔkɔndwami lo lɛkɛ 2 la Nkumu ya Diolelo l’ɛse k’ɔtɛ a dui w’ɔnɛ “Ngandji ka Onyaso Onto Kekɔ lo Tɔ̂lɛ.” Ko sho ndjowombola ɔnɛ: “Onde wɛ fɔnyaka dia Nzambi akalange dia anto sɛna woho ɔnɛ?” Totshike akadimole. Tofole biukubuku Katɔlɔmba lo wekelo 5 ko sho pemba tatɛ mbeka la nde Bible.
◼ “Lam’akatɛnana mbala ka ntondo, lakakotshikɛ kiatshi yaki la dimbola di’ɔnɛ: ‘Onde Anto Tshɛ Wokokana Ngandji Lushi Lɔmɔtshi?’ Onde wɛ fɔnyaka dia dui sɔ koka salema l’andja w’otondo?” Totshike akadimole. Tofole biukubuku Katɔlɔmba lo wekelo 6 ko sho mbadia odingɔ 6. L’ɔkɔngɔ ko sho ndjadia daka diakasha Nzambi lo Mika 4:3, 4. Naka onto lasawola la so ambɛnya saki kande hwe, towosha biukubuku ndo tɔ̂sɛngɔlɛ dia mbeka la nde.
◼ “Mbala ka komelo kakatɛnana, lakakotshikɛ kiatshi mɔtshi yele l’ɔtɛ a dui ɔnɛ: ‘Onde Anto Tshɛ Wokokana Ngandji Lushi Lɔmɔtshi?’ Lɔkɔ vɔ sɛngɔlaka anto wekelo wa Bible la ngelo ofele. Lamboya a ndjokenda nto dia kɛnya ehomɔ kɔmbɔla Bible kakamba la so. [Towɛnya dibuku Ewo.] Dibuku nɛ nembetshiyaka hwe etena kakɔna kakokaso nongamɛ mɛna anto wokana ngandji l’asawɔ, ndo diɔ kadimolaka lo wembola efula wele ondo wɛ ndjambolaka: Bonde katshundaso esombe ndo kavɔso? Bonde katshika Nzambi asui? Ngande wele wakiso wa ngandji wakavu?” Ko sho ndjowombola ɔnɛ: “Kɛ̂nya woho wasalema wekelo akɔ wa Bible?” Naka nde ambotona, towombole kana nde ndeka nanga mbadia dibuku diakɔ ndamɛmɛ. Naka ngasɔ mbalangande, totshike dimɔtshi ko sho mbotɛ oshinga adiɔ. Tosale ekongelo dia ndjowenda nto.
7 Lam’ayoshila mbilo k’otondo tshɛ kindjakindjama la Nkumu ya Diolelo No. 35, sho mbeyaka mbisha anto dibuku Ewo edja ndo l’ekomelo ka ngɔndɔ. Lo lɛkɛ la komelo l’Olimu Aso wa Diolelo wa Ngɔndɔ ka Samalo 1996; wa Ngɔndɔ k’Esambele ndo ka Dikumi l’Ahende 1996; la wa Ngɔndɔ k’Esambele 1997, sho koka tana tokanyi efula tayotokimanyiya dia mbisha anto dibuku diakɔ.
8 Odianganyelo wa Nkumu ya Diolelo ekɔ diaaso diambokondja onto tshɛ l’atei aso dia sho nyomoleka ndjasha l’olimu w’esambishelo. L’ekimanyielo ka Jehowa, sho koka nongamɛ ɔnɛ odianganyelo ɔnɛ ayonga l’etombelo w’ɔlɔlɔ: vɔ wayokimanyiya anto dia vɔ mbeya ɔnɛ sangwelo dia Nzambi ele di’anto mbokana ngandji l’asawɔ. Jehowa atetemale tshɔkɔla weolo tshɛ wadjaso dia fudia saki kakɛnya anto lo Nkumu ya Diolelo!