Todje Lokolo Lo Kalasa K’olimu Wa Teokrasi
1 Kalasa k’Olimu wa Teokrasi kambolowanya miliyɔ y’Ɛmɛnyi wa Jehowa dia vɔ monga ekambi wa lokumu l’ɔlɔlɔ. Efula ka l’atei aso mbohɔka wɔma wakatokaka ndo ohokosanu waki laso mbala ka ntondo kakatasale sawo dimɔtshi lo kalasa kɛsɔ; ndo ɛlɔ kɛnɛ, sho mandolaka woho wambotokimanyiya kalasa kɛsɔ dia sho pama lo nyuma: lo nsanyɛ anto Dui dia Nzambi ndo mbalakanyadiɔ. (Enda l’Etsha 4:13.) Onde wɛ ambofundjaka lokombo lo kalasa kɛsɔ ka dimɛna efula?
2 Akɔna akoka fundja lokombo lande lɔkɔ? Dibuku dielɛwɔ Organisés pour bien remplir notre ministère mbutaka ɔnkɔnɛ lo lɛkɛ 73: “Anto tshɛ wasala olimu l’atei w’etshumanelo kokaka fundja nkombo yawɔ lɔkɔ, ndo wanɛ wambomɛ mbɔtɔ lo nsanganya, naka vɔ wekɔ la lɔsɛnɔ lɔtɔnɛ l’awui wa Bible.” Tambokeketsha wanɛ tshɛ wele la waonga walɔmbama—apami, amato ndo ana—dia vɔ mɛnana l’omendji wa kalasa dia fundja nkombo lo kalasa kɛsɔ.
3 Ekongelo ka Kalasa ka 1997: Lo Ekongelo ka Kalasa k’Olimu wa Teokrasi ka 1997, tayɔsɛdingola wetshelo efula wa lo Bible, anto watɛkɛtama lɔkɔ ndo ɔkɔndɔ w’ɔlɔngɔswamelo aso. Lâdiko dia pamia akoka aso w’atɛkɛtshi (kana ambahemi a loseke) ndo w’embetsha, tayeka ndo akambo efula oma l’awui w’ohomba efula wa lo nyuma wakalɔngɔswama l’ekongelo ka lomingu la lomingu. (Tuk. 9:9) Naka sho ndjâlɔngɔsɔlaka otsha lo kalasa kɛsɔ, ɛnyɛlɔ oko mbadiaka etenyi ka Bible kakalɔngɔswama lomingu la lomingu, ndo mbɔtɔka lo kalasa kɛsɔ mbala la mbala, kete tayokondja ɛlɔlɔ efula lo nyuma.
4 Lo 1997, efula ka tenyi dia wadielo wa Bible dia lo Sawo No. 2 diayoyala tomondo efula ndeka ndo tenyi dia l’ɛnɔnyi wetshi. Lam’ayondɔlɔngɔsɔlaka sawo diande, ombeki pombaka mbɔsa tango ko mbɛdikaka wadielo ande dia, lo taahe totanu takawawosha, nde mbeya taahe tongana tahomba mbɔtwɛlɔ la ndjihelo mbɔsa. Dui sɔ diayowokimanyiya dia nde mbeya kambaka la wenya ande ndo monga l’akoka wa mbadiaka dimɛna la tɛkɛtaka lo ndjela paka ekongelo k’atshina w’akambo ato Please, see sg in extemporaneous talk.—1 Tim. 4:13.
5 Esambishelo ka tshakitudi (témoignage informel) kakakotshama lo lokongɛ la lo Sawo No. 3, sawo diotumbi oma lo dibuku Ewo. Lo yoho shɔ, kadiyɛso kokaka sɔna lokongɛ lande oko diendelo di’oyoyo, wekelo wa Bible kana esambishelo ka tshakitudi. Lo mɛtɛ, pombaka mbika epole ɔsɛkɛ lo wetshelo koko aha lo lokongɛ.
6 Oyadi wɛ ekɔ la diɛsɛ dia mbisha dako dia wetshelo, atshina w’akambo wa lo Bible kana sala sawo di’ombeki, wɛ kokaka mɛnya nɛmɔ diashayɛ Kalasa k’Olimu wa Teokrasi lo nɔngɔsɔlaka sawo diakɔ, lo divusolaka dimɛna, lo disalaka l’eshikikelo tshɛ ndo la wangasanu, aha ndɛ wenya, lo mpokamɛka ndo ndjelaka alako w’oma le omendji wa kalasa ndo ndjâtshutshuyaka nshi tshɛ dia kotsha ɔkɛndɛ ayɛ la kɔlamelo. Ɔsɔku mbayoyala wɔtwɛlɔ ayɛ lo kalasa kɛsɔ tshondo y’ɔtshɔkɔ le yɛ ndo le wanɛ tshɛ wayonga lâwɔ.