Ekadimwelo Lo Wembola Anyu
◼ Naka tshumanelo efula diekɔ lo mengɔnya Mbalasa ka Diolelo ɔtɔi, lo yɛdikɔ yakɔna yakokawɔ tshikitola nshi ya nsanganya lam’aya omendji w’otshimbedi dia ndjembola kɛmɔtshi ka l’atei ayɔ?
L’Olimu Aso wa Diolelo wa Ngɔndɔ k’Esambele 1995, wakate lo sawo dia “Tɔlɛmiake Anto Akina,” vate: “Mbala la mbala, ekɔ ohomba dia etshumanelo tshɛ tshikitanya nshi yawɔ ya nsanganya, djekoleko lo nshi ya diendelo di’omendji w’otshimbedi.” Tena tshɛ, diembwelo di’omendji w’otshimbedi totatɛka Lushi la Hende ndo komɛka Lushi la Lomingu. Lushi la Hende la dikɔlɔ, etshumanelo k’otondo sanganaka lo Kalasa k’Olimu wa Teokrasi la lo losanganya l’olimu, l’edja ka taahe akumi asato asato aha mbidja dɔmbɛlo l’esambu. Omendji w’otshimbedi ndjodihiyaka la dako di’olimu l’edja ka taahe 30. Pombaka mbɔtɔka nsanganya shɔ tena tshɛ Lushi la Hende la diembwelo di’omendji w’otshimbedi.
L’asa Lushi la Sato la la Samalo, nyayokoka nɔngɔsɔla wekelo wa dibuku la dako di’olimu di’omendji w’otshimbedi. Aha tshima Lushi la Nɛi ko mbɔtɔ nsanganya shɔ. Lushi la Lomingu mbele mɛtɛ lushi latoshaka omendji w’otshimbedi dako dia lo sɛkɛ ko l’ɔkɔngɔ wekelo wa Tshoto y’Etangelo lo hiembola la dako dia ndjihelo di’omendji w’otshimbedi. Koko, aha paka l’eshidi 8 mbahomba nsanganya shɔ ntshama. Kokaka ndjiɔtɔ wonya tshɛ la ntondo ka midi kana l’ɔkɔngɔ a midi Lushi lakɔ la Lomingu, kânga la dikɔlɔ.—Enda lo Etsha 20:7.
Omalɔkɔ, naka omendji w’otshimbedi amboya dia ndjembola etshumanelo kɛmɔtshi, tshumanelo dikina diengɔnya la tɔ Mbalasa ka Diolelo kâmɛ wayɛnya dilɛmiɛlɔ diawɔ lo tshikitanya nshi yawɔ ya nsanganya, naka pombamaka, woho wa mbisha etshumanelo kakɔ diaaso dia tɔ sangana Lushi la Hende la dikɔlɔ. (1 Kor. 10:24) Sawo diakɔ diakatatshi diakakotsha ɔnɛ: “Dikumanyi [dia l’etshumanelo kembolawɔ] pombaka tewoyisha wanɛ wa l’etshumanelo kana tshumanelo dikina woho wa vɔ mbewoya apandjudi k’ɔlɔmɔ.” Koko, lo kɛnɛ kendana la nshi kina ya lo lomingu, kema ohomba wa paka yɔ tshikitanya nshi yawɔ ya nsanganya lo dikambo di’etshumanelo koye omendji w’otshimbedi a ndjembola.—1 Kor. 14:40; Fil. 4:5.
[Caption on page 7]
Ekadimwelo Lo Wembola Anyu
◼ Bonde kahombaso mbidjaka yimba efula l’ɔlɔtɔ aso la divo diaso etena katshɔso dia tenda Bɛtɛlɛ yaki la Société la Brooklyn, la Patterson, la Wallkill (New York) ndo lo filialɛ nkina ya l’andja w’otondo?
Sho nongamɛka dia Akristo ndɔtaka nshi tshɛ lo yoho yasungana. Ɔlɔtɔ aso la divo diaso pombaka mɛnyaka wonya tshɛ yongamu ndo nɛmɔ diasungana l’ekambi wa Jehowa Nzambi. Ngasɔ mbediɔ djekoleko etena katshɔso dia tenda Bɛtɛlɛ la mvudu nkina yaki la Société la New York la lo filialɛ ya l’andja w’otondo.
Lo 1998, nsanganya ya distrikɛ la ya wedja efula yayosalema. Nunu di’anangɛso w’oma lo wedja efula wayotshɔ dia tenda mbalasa ka woke ka la Société la New York kâmɛ ndo filialɛ ya lo wedja ekina. Etena katatende mvudu shɔ, aha paka l’etena kɛsɔ keto koko ndo lo tena dikina tshɛ diayotolanga, sho nangaka ‘ndjaɛnya oko ekambi wa Nzambi lo akambo tshɛ,’ mbidja ndo shunganyi l’ɔlɔtɔ aso la lo divo diaso.—2 Kor. 6:3, 4.
Lam’atɛkɛtadiɔ di’ohomba wa ndɔta ndo nɔngɔsɔla divo woho wasungana, dibuku Organisés pour bien remplir notre ministère mɛnyaka ohomba wa monga pudipudi lo demba ndo ndɔta la nɔngɔsɔla divo woho wakoka lam’atshɔso a tosambisha ndo lo nsanganya y’Akristo. Diɔ mbutaka lo lɛkɛ 131, odingɔ 1 ɔnɛ: “Woho akɔ wamɛ mbahombaso monga etena katshɔso dia tenda Bɛtɛlɛ ka la Brooklyn kana lo wodja okina tshɛ wele filialɛ ka la Société lɛkɔ. Tohɛke ɔnɛ Bɛtɛlɛ ekɔ ‘luudu la Nzambi,’ ɔnkɔnɛ ɔlɔtɔ aso, divo ndo dionga diaso pombaka monga oko woho watotongaka lo nsanganya dia tɛmɔla lo Mbalasa ka Diolelo.” Ndo apandjudi wa Diolelo tshɛ pombaka ndjela dui sɔ, oyadi wanɛ wele lo ngelo kakɔ kana wanɛ w’oma l’etale waya dia ndjenda ase nkumbo ka Bɛtɛlɛ ndo mvudu ya filialɛ.
Ɔlɔtɔ aso pombaka mbisha anto akina kanyi y’ɔlɔlɔ lo woho wɔsawɔ ɔtɛmwɛlɔ wa mɛtɛ waki Jehowa. Koko, takɛnyi dia anangɛso l’akadiyɛso amɔtshi wekɔ la mbekelo ka ndɔtaka ɔlɔtalɔta lam’atshɔwɔ a tenda mvudu ya la Société. Ɔlɔtɔ wa ngasɔ hasungana lam’atshɔso a tenda Bɛtɛlɛ. Lo dikambo sɔ, ndo lo akambo akina wa lo lɔsɛnɔ laso l’Akristo, sho nangaka ndjelaka ɛlɛmbɛ akɔ wamɛ watshikitanya ekambi wa Nzambi l’ase andja ɔnɛ lo tshaka akambo tshɛ dia lotombo la Nzambi. (Romo 12:2; 1 Kor. 10:31) Ekɔ nto dimɛna sawola l’ambeki aso wa Bible ndo anto akina wayoyenda Bɛtɛlɛ mbala ka ntondo ndo mbaohola ohomba wa vɔ mbidja yimba dia ndɔta ndo nɔngɔsɔla divo lo yoho yasungana.
Omalɔkɔ, lam’atshɔyɛ a tenda mvudu ya la Société, yambola wate: ‘Onde ahɔndɔ ami ndo divo diami sunganaka?’ (Enda Mika 6:8.) ‘Onde vɔ mbishaka ɛnamelo ka dimɛna ka Nzambi katɛmɔlami? Ɛnamelo kami koka kotola yambalo y’anto kana mbâlɔya la sɔnyi? Onde lekɔ lo mbisha anto akina ɛnyɛlɔ k’ɔlɔlɔ, wanɛ wele ondo mbala kawɔ ka ntondo ka mɛna Bɛtɛlɛ?’ Nyɛsɔ tɛnyake nshi tshɛ oma l’ɔlɔtɔ aso la divo diaso ‘ɔnɛ sho mbetshamaka oma le Nzambi, Oshimbedi aso l’akambo tshɛ!’—Tito 2:10.