Ekadimwelo Lo Wembola Anyu

◼ Kakɔna kahombaso ntsha dia ndeka ndowanya nsanganya yaso?

Anto amɔtshi mbeyaka fɔnya ɔnɛ paka dikumanyi l’ekambi w’olimu mbele l’ɔkɛndɛ wa ndowanya nsanganya nɛ dia vɔ mbayilɔmbɔla ndo mbaleka mbisha alako lɔkɔ. Lo mɛtɛ, sho tshɛ kokaka mbisha lonya dia nsanganya mbeta dimɛna ndo kondja wahɔ oma lɔkɔ. Sho kokaka ndeka ndowanya nsanganya yaso lo ndjela akambo dikumi anɛ:

Ndjâlɔngɔsɔlaka la Ntondo: Naka sho ndjâlɔngɔsɔla dimɛna, kete nsanganya yayokotola yambalo yaso. Naka sho tshɛ ntsha ngasɔ, kete nsanganya yayɔmɔta dimɛna ndo yayotokeketsha efula. Aha Mbetshaka Nsanganya: Wonya waya anto efula lo nsanganya, onto tshɛ lakaye keketshamaka, ndo tayɛna ɔnɛ ekɔ ohomba mbɔtɔka nsanganya mɛtɛ. Komaka la Wonya: Naka tayokoma ndo mbidjasɛ la ntondo ka losanganya tatɛ, kete tayemba kâmɛ osambu w’etatelo ndo pokamɛ dɔmbɛlɔ dia mbɔtwɛlɔ, ngasɔ mbayotokondja wahɔ oma lo losanganya laso. Lâdiko dia Falase, tekɔ lo nongola yema yema dibuku di’esambu l’ɛtɛkɛta wa lo mbilo kaso, wony’ɔsɔ taya ladiɔ lo Lingala la lo Swahili. Tenyi diadiɔ dimɔtshi diekɔ lo Kiluba, Kirundi la l’Ɔtɛtɛla. Tekɔ lo nongamɛ dikondja l’ɛtɛkɛta ekina. Kam’ayonyokondja dibuku sɔ kana tenyi diadiɔ l’ɔtɛkɛta watɛkɛtama l’etshumanelo kanyu, ayonga dimɛna etshumanelo k’otondo membaka l’ɔtɛkɛta akɔ lo dihole dia wanɛ wemba l’ɔtɛkɛta ɔmɔtshi ko akina l’ɔtɛkɛta okina. (Romo 15:6; 1 Kor. 14:​23, 33) Mɛmba Oseka Okanda Tshɛ Wele Ohomba: Lo mɛmba Bible kaso ndo ekanda wayowokamba lawɔ lo losanganya, sho kokaka ndjela dimɛna kɛnɛ kayɔtɛkɛtama. Mbewɔ Tɔkɛnyɔ: Tayoyela losanganya dimɛna naka sho mbidjasɛ la ntondo. Naka tayongunangunaka ndo tayetetaka wonya tshɛ lo Mbalasa, kete sho kokaka pandja akambo efula ndo fukutanya anto akina. Mbishaka Kɔmatɛrɛ. Lo yɛdikɔ yemɛ anto anya ndo yashawɔ kɔmatɛrɛ, mbaleka keketshama anangɛso efula lo menda nganɛ wɛnyawɔ mbetawɔ yawɔ lo sɛkɛ. Mbishaka Kɔmatɛrɛ ya Tomondo. Dikambo sɔ mbishaka anto akina diaaso dia vɔ tɛkɛta. Sho pombaka tɔlɔnganya kɔmatɛrɛ kaso l’awui wekama. Kotsha Ɛkɛndɛ. Naka tayonga la sawo lo Kalasa k’Olimu wa Teokrasi kana lo Losanganya l’Olimu, kete todilɔngɔsɔlɛ dimɛna, todivusole ndo todisha lo dihole dia dihandja. Andola Wanɛ Waki l’Asawo. Tɛ anto akina ɔnɛ lakangɛnyingɛnyi weolo wakanyadjisha. Dikambo sɔ mbakeketshaka ndo mbatshutshuyaka dia vɔ ndeka ndjalɔngɔsɔla mbala kaye. Nyokeketshanyi. Lâdiko wa ɔngɛnɔngɛnɔ ndo wahɔ wakondjaso lo nsanganya, ekɔ nto dimɛna mbishana mɔyɔ w’ɔngɛnɔngɛnɔ ndo sawolaka asawo wakeketshana la ntondo ndo l’ɔkɔngɔ wa nsanganya.