Diembwelo Diokoki Monga Tshondo Y’ɔtshɔkɔ
1 L’ɔngɛnɔngɛnɔ heyama mbakalongola Zakɛyɔ Yeso lakande. Ko tete diembwelo sɔ diaki tshondo y’ɔtshɔkɔ.—Luka 19:2-9.
2 Ɛlɔ kɛnɛ, Yeso Kristo, Owandji w’etshumanelo, nɔmbaka dikumanyi dia vɔ ‘ndeshaka ɛkɔkɔ a Nzambi.’ (1 Pet. 5:2, 3; Joa. 21:15-17) Lâdiko dia ndakanya lo nsanganya ndo mbisha ɛnyɛlɔ l’olimu w’esambishelo, dikumanyi kimanyiyaka ase etshumanelo l’onto ndo l’onto la ngandji. Diɔ diakɔ diakokayɛ nongamɛ dia vɔ wayoyashaka le yɛ lo yoho ya lânde tena la tena, lakayɛ, lo Mbalasa ka Diolelo, lam’ayotombaka la wɔ l’esambishelo ndo lo waaso akina. Onde wɛ ayokaka wɔma naka wamboya a ndjokenda? Kema. Aha naka dikumanyi wamboya a ndjokênda kete wambokɛna la dui dimɔtshi dia kɔlɔ. Ko bonde kembwana dikumanyi na?
3 Paulo akate ate nde akalangaka membola anango ‘dia tênda nganɛ wewɔ.’ (Etsha 15:36) Lam’ele dikumanyi diekɔ alami w’ɛkɔkɔ woludi la ngandji, vɔ ndjakiyanyaka efula dia mbeya nganɛ weyɛ. Vɔ nangaka kokimanyiya lo nyuma lo yoho yahombama ndo kolowanya. Jehowa, Olami a woke w’ɛkɔkɔ woludi la ngandji, nangaka di’onto tshɛ l’atei aso kokamɛ ngasɔ.—Ezek. 34:11.
4 Tetawɔ dia Dikumanyi Têmbola: Lam’akatembolaka Paulo anango, nde aki l’oyango wa ‘mbasha oshasha ɔmɔtshi wa lo nyuma dia vɔ nshikikala, ndo dia nde tokeketshana la wɔ.’ (Romo 1:11, 12) Lo nshi y’ekomelo nyɛ ya wolo, sho tshɛ tekɔ l’ohomba w’ekeketshelo ka lo nyuma ndo w’ekimanyielo dia tshikala nge lo mbetawɔ. Ɔnkɔnɛ, tetawɔ l’ɔngɛnɔngɛnɔ dia dikumanyi têmbola; tayokeketshana mɛtɛ lo diembwelo sɔ.
5 Têye dia sho kondjaka ɛlɔlɔ efula oma l’olimu wa dikumanyi. Naka dikambo kana dimbola dimɔtshi diekɔ lo totshindja yimba, tôhɔ dia dikumanyi diekɔ laawɔ dia tokimanyiya. Tatokandakandake dia mbatɛ kɛnɛ tshɛ kokoki monga la shɛngiya lo lonyuma laso. Ndo toyale la lowando le Jehowa oma lo yɛdikɔ shɔ yoludi la ngandji ndo tokanyiya l’ɔngɛnɔngɛnɔ ɛtshɔkɔ wokokiso kondja oma lo diembwelo dia dikumanyi.