“Wɛ kokaka monga ombatshi mboka w’oshika”
1. Ngande wakayaoke kadiyɛso kɛmɔtshi lo kɛnɛ kendana l’olimu w’ombatshi mboka?
1 Kadiyɛsɔ kɛmɔtshi kelewɔ Kathe B. Palm akate ate: “Halɛnyi ndoko olimu wakoka mbelami ɔngɛnɔngɛnɔ w’efula kana ɛtshɔkɔ w’efula wa lo nyuma.” Nde akakambe olimu w’ombatshi mboka l’edja k’ɛnɔnyi akumi oma la koma mɔtshi ya wodja wa Chili wele l’Amɛrikɛ wa lo sidɛ polo lo koma kina. Lo nkanyiya dikambo di’ɛtshɔkɔ wakondja anto wakamba olimu wa lo tena tshɛ, ondo onto ɔmɔtshi ambokotɛka ate: “Wɛ kokaka monga ombatshi mboka w’oshika.”
2. Lembetshiya lande na kele elimu wa lo nyuma toshaka ɔngɛnɔngɛnɔ w’efula.
2 Yoho ya lɔsɛnɔ yasha ɔngɛnɔngɛnɔ: Yeso lele Ɛnyɛlɔ kaso akakondja ɔngɛnɔngɛnɔ w’oshika lo nsala lolango laki She. (Joa. 4:34) Ɔnkɔnɛ, ekɔ mɛtɛ dia Yeso aketsha ambeki ande dia ɔngɛnɔngɛnɔ wa mɛtɛ ndjaka lo ndjasha l’elimu wendana l’ɔtɛmwɛlɔ waki Jehowa. Sho mongaka l’ɔngɛnɔngɛnɔ etena kakambaso elimu wetawɔma le Jehowa lo nsɛnɔ yaso. Lâdiko dia lâsɔ, etena kakimɔso wenya, wolo ndo ekundji aso dia nkimanyiya anto akina, sho fudiaka ɔngɛnɔngɛnɔ aso.—Etsha 20:31, 35.
3. Ɔngɛnɔngɛnɔ akɔna wakokaso monga la wɔ lo nsambisha efula?
3 Woho wayotoleka mbetsha wenya efula l’esambishelo mbayotoleka monga la waaso wa monga l’ɔngɛnɔngɛnɔ waya lo ntatɛ ndo nɔmbɔla wekelo wa Bible. Oyadi lɛnɛ ele ampokami efula la wendjudi, sho kokaka mɛna dia anto wa l’ɛtshi kaso ka nkɛtɛ wambotshikitana l’ɔkɔngɔ wa sho monga ambatshi mboka lam’ele tayonga la diewo ndo l’akoka wa nsambisha. Ambatshi mboka kokaka nkamba la diewo diakawakondja lo Kalasa k’ambatshi mboka kakawɔtɔ l’ɔkɔngɔ wa vɔ nkamba olimu w’ombatshi mboka suke l’ɔnɔnyi ɔtɔi. (2 Tim. 2:15) Naka tayotetemala, kete sho mbeyaka monɛ ntɔngɔ y’akambo wa mɛtɛ yayoyɔtɔ elowa l’edjedja ka wonya.—Und. 11:6.
4. Kakɔna kahomba nsɛdingola ɛlɔngɔlɔngɔ l’esekaseka waya suke la nshidiya kalasa?
4 Ɛlɔngɔlɔngɔ l’esekaseka: Lam’ele nyaya suke la nshidiya kalasa yanyu ya sekɔndɛrɛ, onde nyu kanyiyaka dikambo dia nshi yanyu yayaye? Polo ndo kakianɛ, wenya efula wa l’ekongelo kanyu nyetɛka la kalasa. Ngande wayonyokamba la wɔ l’ɔkɔngɔ wa nyu nshidiya kalasa? Lo dihole dia nyu nkamba elimu wa l’emunyi, shi nyu kokaka ndjasɛdingola lo dɔmbɛlɔ dia menda kana nyu kokaka nkamba olimu w’ombatshi mboka wa pondjo? Diewo diayonyokondja, mbuta ate lo nsambisha anto w’oma lo waoho wotshikitanyi, lo ntondoya ekakatanu wahomana la nyu, lo monga la ndjaekiya ndo lo ndowanya diewo dianyu dia mbetsha, ayonga la wahɔ lo lɔsɛnɔ lanyu l’otondo.
5. Ngande wakoka ambutshi ndo ase etshumanelo nkimanyiya dia yimba y’ombatshi mboka monga?
5 Ambutshi le, onde nyu kimanyiyaka ananyu dia vɔ ndjokamba olimu wa lo tena tshɛ? Ɛtɛkɛta ndo ɛnyɛlɔ kanyu k’ɔlɔlɔ kokaka mbakimanyiya efula dia vɔ mbetsha wahɔ wa Diolelo lo dihole dia ntondo. (Mat. 6:33) Ɔnangɛso ɔmɔtshi lelɛwɔ Ray, lakatatɛ nkamba olimu w’ombatshi mboka etena kakandashidiya kalasa ka sekɔndɛrɛ mbohɔka ate: “Tena tshɛ, Mama akɔsaka olimu w’ombatshi mboka oko yoho ya lɔsɛnɔ yoleki mbisha ɔngɛnɔngɛnɔ.” Anto tshɛ wa l’etshumanelo kokaka nkimanyiya dia yimba y’ombatshi mboka monga oma l’ɛtɛkɛta ndo l’osukɔ awɔ. Ɔnangɛso ɔmɔtshi lelɛwɔ Jose l’ose Espagne mbutaka ate: “Ase etshumanelo kami wakɔsaka dia olimu w’ombatshi mboka mbele olimu woleki tshɛ dimɛna le ɛlɔngɔlɔngɔ l’esekaseka. Ɛtɛkɛta awɔ ndo woho wakawangɛnangɛnaka olimu w’ombatshi mboka, mbidja ndo ekimanyielo kawɔ ka shikaa, akakimanyiya dia dimi ntatɛ nkamba olimu w’ombatshi mboka.”
6. Kakɔna kakokaso nsala naka sho bu la nsaki ka nkamba olimu w’ombatshi mboka?
6 Woho wa ntondoya wekamu: Ko kayotota naka wɛ ambota ɔnɛ: ‘Dimi bu la nsaki ka nkamba olimu w’ombatshi mboka?’ Naka ngasɔ mbakanyiyayɛ, kete lɔmba Jehowa dia woho wayaokayɛ ndo tɛnde ɔnɛ: ‘Haleye kana ndo dimi mbakoka nkamba olimu w’ombatshi mboka, koko dimi nangaka nsala kɛnɛ kakɔngɛnyangɛnya.’ (Osam. 62:8; Tuk. 23:26) Oma lâsɔ, yanga ɛlɔmbwɛlɔ kande lo tshimbo y’Ɔtɛkɛta ndo y’okongamelo ande. Ambatshi mboka wa pondjo efula ‘wakalɛtɛ’ olimu w’ombatshi mboka ntondo lo nkamba oko ambatshi mboka wa tshanda ndo ɔngɛnɔngɛnɔ wakawakondja wakayatshutshuyaka dia vɔ nkamba olimu wa lo tena tshɛ.—Osam. 34:8.
7. Ngande wakokaso ntondoya wekamu w’ɔnɛ hatotokotsha wenya 70 walɔmbama lo ngɔndɔ?
7 Ko kayotota naka wɛ bu l’eshikikelo k’ɔnɛ wɛ ayokotshaka lofulo la wenya 70 lalɔmbama lo ngɔndɔ? Shi wɛ kokaka nsawola l’ambatshi mboka wele l’akambo oko wayɛ? (Tuk. 15:22) Oma lâsɔ, funda dikongelo diotshikitanyi. Wɛ mbeyaka ndjɛna dia bu wolo ndjatshungwɛ etena ka sambishaka oma l’akambo wele bu ohomba oko akayafɔnyaka ntondo.—Ef. 5:15, 16.
8. Lande na kahombaso sɛdingolaka akambo wele la so mbala la mbala?
8 Nyomɔsɛdingola akambo wele la yɛ: Mbala efula akambo wele l’onto tshikitanaka. Ɔnkɔnɛ, ekɔ ohomba dia sho sɛdingolaka akambo wele la so mbala la mbala. Ɛnyɛlɔ, onde wɛ ekɔ suke la nongola pasiɔ? Ɔnangɛso ɔmɔtshi lelɛwɔ Randy, lakalɔmbɛ dia vɔ mbosha pasiɔ la ntondo ka nde nkotsha ɛnɔnyi walɔmbama akate ate: “Yɛdikɔ shɔ yakakimanyiya dia dimi la wadɛmi ntatɛ nkamba olimu w’ombatshi mboka wa pondjo ndo yɔ yakatosha diaaso dia sho monɔ dia tokamba lɛnɛ ele ohomba efula. Lakakondja ɛtshɔkɔ waheyama mbala lo yɛdikɔ yakamɔshi, koko ɔtshɔkɔ woleki woke ele wa monga la nkum’otema k’ɔlɔlɔ.”
9. Kakɔna kahomba atshukanyi nsɛdingola?
9 Atshukanyi amɔtshi wakɛnyi l’ɔkɔngɔ wa vɔ ndjasɛdingola dia vɔ tshɛ hawokoke nkamba olimu wa lo tena tshɛ. Ekɔ mɛtɛ dia dui sɔ nɔmbaka di’ase nkumbo mbetɛ lɔsɛnɔ lawɔ ɔsɛlɛngɛ, koko ɔsɔ bu welo wa wodjadja. Ɔnangɛso John lele wadɛnde eke katshika olimu wa l’emunyi wawɔsɛ wenya efula dia mfudia olimu ande w’esambishelo mbutaka ate: “Ndoko dui dioleki dimɛna oko mbeya ɔnɛ wadɛmi ekɔ lo ndjasha l’akambo wa lo nyuma lushi l’otondo.”
10. Kakɔna katshutshuya Akristo dia vɔ menda dia kana vɔ kokaka nkamba olimu w’ombatshi mboka?
10 Djembetelo ya ngandji ndo ya mbetawɔ: Jehowa aketɛ esambishelo olimu woleki ohomba wakoka onto tshɛ la l’atei aso nkamba. Dikongɛ nɛ di’omusu diayanga ndanyema. Ɔnkɔnɛ, paka wanɛ watɛndɛ lokombo la Jehowa mbayoshimbamɛ. (Romo 10:13) Naka sho monga la ngandji k’oma k’ɛse otema ndo la lowando lo kɛnɛ tshɛ kakandatosalɛ, kete tayotshutshuyama dia sho nkitanyiya ɔkɛndɛ wakatosha Ɔnande wa nsambisha l’ohetoheto. (Mat. 28:19, 20; 1 Joa. 5:3) Lâdiko dia lâsɔ, naka sho monga la mbetawɔ dia tekɔ lo nsɛna mɛtɛ lo nshi y’ekomelo, kete dui sɔ diayototshutshuya dia sho nsala kɛnɛ tshɛ kakokaso nsala l’olimu w’esambishelo kam’eke etena lo dihole dia sho ndjasha tshɛ lo tshɛ l’andja ɔnɛ.—1 Kor. 7:29-31.
11. Ngande wahombayɛ mbɔsa onto lakotɛ ɔnɛ wɛ kokaka monga ombatshi mboka w’oshika?
11 Olimu w’ombatshi mboka wa pondjo hawendana tsho la lofulo la wenya lahombaso sambishaka, koko vɔ wekɔ djembetelo yɛnya woho wamamemaso Nzambi. Ɔnkɔnɛ, naka onto ɔmɔtshi ambokotɛ ate: Wɛ kokaka monga ombatshi mboka w’oshika, kete ɔsa dia djɔki mbakoshande. Yasɛdingola lo dɔmbɛlɔ dia kana wɛ kokaka mbɔtɔ l’ɔnɔngɔ wa wanɛ wakamba yoho y’olimu yasha ɔngɛnɔngɛnɔ shɔ.
[Efundelo wa l’etei w’odingɔ wa lo lɛkɛ 4]
Ambutshi le, onde nyu kimanyiyaka ananyu dia vɔ ndjokamba olimu wa lo tena tshɛ?
[Efundelo wa l’etei w’odingɔ wa lo lɛkɛ 5]
Jehowa aketɛ esambishelo olimu woleki ohomba wakoka onto tshɛ la l’atei aso nkamba.